Yehowa Odasefoi ni Yɔɔ Jeŋ Fɛɛ—Sweden
SWEDEN kã Scandinavia ŋshɔnine lɛ bokagbɛ ni ehusui tekeɔ Arctic Circle lɛ. Ale maŋ nɛɛ yɛ jeŋ fɛɛ yɛ ekooi ni yɔɔ be fɛɛ be lɛ ni kwɛ̃ɔ babaoo ni ebɔle maŋ lɛ he lɛ, kɛ kpaakpoi, kɛ gɔji lɛ hewɔ, ni Sweden ji Europa maji ni mɛi faaa tsɔ yɛ mli ni amɛgbɛ amɛshwa hu lɛ ateŋ ekome. Ni kɛlɛ, Yehowa Odasefoi eye omanye yɛ mɛi ni sumɔɔ anɔkwale lɛ yɛ jɛmɛ lɛ ataomɔ mli jeeŋmɔ kɛjɛ 1800 afii lɛ amli. Susumɔ nyɛsɛɛ nɔkwɛmɔ nɔ nɛɛ he.
Yoo ko kɛ Odasefoi lɛ kase Biblia lɛ, shi ewu sumɔɔɔ nakai. Ekɛɛ eŋa lɛ akɛ ekpa nikasemɔ lɛ, ni yoo lɛ fee nakai. Nuu nɛɛ tsuɔ nii yɛ dãa feemɔ nibii atoohe. Gbi ko lɛ, tsɔne kudɔlɔ ko kɛ enabi ni eye afii nyɔŋma ba nitoo he lɛ. Gbekɛ nuu lɛ nii kɛɛ nuu lɛ akɛ ekwɛ enabi lɛ nɔ beni etoɔ nibii ewoɔ etsɔne lɛ mli lɛ. Kɛha sanegbaa kɛkɛ lɛ, nuu lɛ bi gbekɛ nuu lɛ sane yɛ nibii ni enine shɛ nɔ kɛha efɔmɔgbi-yeli nyɛsɛɛ nɛɛ lɛ he. Nuu lɛ naa kpɛ ehe beni gbekɛ nuu lɛ ha lɛ hetoo akɛ, lɛ kɛ eweku lɛ yeee fɔmɔgbii akɛni amɛji Yehowa Odasefoi lɛ hewɔ. Gbekɛ nuu lɛ kɛɛ lɛ hu akɛ enine shɛɔ nikeenii anɔ yɛ afi lɛ mli bei krokomɛi amli, ni nɔ ko nɔ ko eŋmɛɛɛ lɛ, ejaakɛ eyɛ weku ni yɔɔ miishɛɛ kɛ suɔmɔ. Ni ekɛfata he akɛ, nikeenii ko bɛ ni jara wa nakai.
Gbekɛ nuu lɛ kɛ enii kuɔ amɛsɛɛ shii abɔ. Be fɛɛ be lɛ, nuu lɛ biɔ gbekɛ nuu lɛ saji babaoo, ni bɔ ni gbekɛ nuu lɛ kɛ anɔkwayeli haa hetoo tɛ̃ɛ ni eshashaooo shi kwraa lɛ sa nuu lɛ hiɛ diɛŋtsɛ. Ni bɔ ni gbekɛ nuu lɛ hiɛ sɔɔ nibii ni sɛɛnamɔ diɛŋtsɛ yɔɔ he lɛ hu na nuu lɛ nɔ hewalɛ. Gbɛkɛ ko, beni nuu lɛ ekwɛ tɛlivishin nɔ nibii ni tsɔɔ awerɛho shihilɛi ni je lɛ yɔɔ mli lɛ egbe naa lɛ, eyoo akɛ esa akɛ ekɛ hiɛdɔɔ apɛi mumɔŋ nibii amli babaoo. Etswa Odasefonyo ni kɛ eŋa lɛ kase nii lɛ tɛlifon ni ekɛɛ lɛ akɛ eku esɛɛ eba. Etsɛɛɛ ni nuu lɛ kɛ Odasefonyo ko je Biblia lɛ kasemɔ shishi, ni etee ehiɛ oyayaayai. Abaptisi lɛ yɛ April 10, 1994. Abaptisi eŋa lɛ hu bianɛ.
Shweremɔ Biɔ Tsumaa
Sweden hu ebafee shia kɛha abobalɔi babaoo ni jɛ maji krokomɛi anɔ, ni Sweden Odasefoi lɛ eye omanye babaoo yɛ shiɛmɔ ni amɛshiɛɔ amɛhaa amɛ lɛ mli. Bɔ ni shiɛmɔ nitsumɔ lɛ eye omanye eha sɔŋŋ hewɔ lɛ, ebi ni ana Maŋtsɛyeli Asai heei koni ana he ko aha emlilɛɛmɔ ni yaa nɔ lɛ. Atsɔ gbɛ ni akɛmaa tsui oyayaayai lɛ nɔ amamɔ Maŋtsɛyeli Asai 37 kɛjɛ 1986 kɛbashi 1993, ni alɛɛ asai 8 mli ni asaa mli. Aku sɛɛ amamɔ Maŋtsɛyeli Asai krokomɛi kpawo yɛ 1994 pɛ mli, ni asaa etɛ.
Amrɔ nɛɛ, asafoi 65 yɛ ni miimɛ yelikɛbuamɔ koni amɛma Maŋtsɛyeli Asa hee loo ni amɛlɛɛ mli loo amɛsaa nɔ ni amɛyɔɔ bianɛ lɛ. Hetuu-kɛhalɔi aaafee 2,500 yeɔ buaa yɛ tsumaa nitsumɔi ni tamɔ nɛkɛ mli, ni asafoi lɛ ahiɛ sɔɔ yelikɛbuamɔ ni amɛjɛɔ suɔmɔ mli amɛkɛhaa nɛɛ waa.
Afɔɔ Sweden kooyigbɛ, ni yaa shɔŋŋ kɛtekeɔ Arctic Circle lɛ tsɛmɔ yɛ bei komɛi amli akɛ nyɔɔŋteŋ hulu shikpɔŋ. Enɛ jɛ hulu lɛ ni enyɔɔɔ shi kwraa yɛ hulutsoo be mli yɛ jɛmɛ lɛ hewɔ. Shi, anɔkwale la lɛ miiya nɔ eekpɛ kaŋkaŋ yɛ Sweden fɛɛ. Yehowa jɔɔmɔ hewɔ lɛ, nakai mumɔŋ la lɛ kpɛmɔ baŋ shi kɔkɔɔkɔ, shi moŋ ebaaya nɔ ekpɛ kaŋkaŋ be fɛɛ be.
[Akrabatsa ni yɔɔ baafa 8]
MAŊ LƐ HE SANE
1994 Sɔɔmɔ Afi
YIFALƐ NI FE FƐƐ NI YAA SHIƐMƆ: 24,246
EMLIJAA: Odasefonyo 1 kɛha 362
MƐI NI BA KAIMƆ LƐ: 40,372
GBƐGBALƆI AMLIJAA: 2,509
BIBLIA KASEMƆI AMLIJAA: 11,306
MƐI NI ABAPTISI: 850
ASAFOI SƆRƆTOI AYIBƆ: 358
NITSUMƆ HE NINE: ARBOGA
[Mfoniri ni yɔɔ baafa 9]
Nitsumɔ he nine lɛ kɛ Betel Shia lɛ yɛ Arboga
[Mfoniri ni yɔɔ baafa 9]
Klɛŋklɛŋ Odasefoi ni yɔɔ Hjo lɛ kɛ bɔs bibioo nɛɛ tsu nii yɛ shikpɔŋkuku ni shɛɔ kilomitai 5,000 koji-ejwɛ mli