Sanebimɔi Ni Jɛ Nikanelɔi Adɛŋ

Mɛɛ sɔ̃ ka Kristofoi anɔ akɛ amɛha adebɔɔ mli nibii ni ebɔle wɔ​—shikpɔŋ, ŋshɔ, kɛ kɔɔyɔɔ mli muji ni awoɔ lɛ nɔ agbɔ?

Ákɛ Yehowa Odasefoi lɛ, wɔsusuɔ adebɔɔ mli nibii ahe naagbai pii ni saa wɔshia ni ji shikpɔŋ nɛɛ he lɛ he waa diɛŋtsɛ. Wɔkpɛlɛɔ nɔ fe bɔ ni mɛi babaoo feɔ akɛ abɔ shikpɔŋ nɛɛ ni enɔ atse, koni efee adesai aweku ni eye emuu lɛ ashia nihaa amɛnaa hewalɛ. (1 Mose 1:​31; 2:​15-17; Yesaia 45:18) Wɔyɛ Nyɔŋmɔ shiwoo wiemɔ nɛɛ hu akɛ “abaafite mɛi ni fiteɔ shikpɔŋ lɛ.” (Kpojiemɔ 11:18) No hewɔ lɛ eja gbɛ akɛ aaaŋmɛ pɛpɛɛpɛ, ni abɔ mɔdɛŋ bɔ ni sa akɛ ahaŋ wɔ shikpɔŋ nɛɛ fitemɔ ni adesai haa eyaa nɔ lɛ aya hiɛ bɔ ni esaaa. Shi, kadimɔ wiemɔ, “bɔ ni sa” lɛ. Eja yɛ Ŋmalɛ naa hu akɛ wɔɔkwɛ wɔhe nɔ jogbaŋŋ yɛ gbɛ ni wɔɔŋmɛ ni adebɔɔ nibii ahe saji kɛ nifeemɔi abatsɔ nii ni haoɔ wɔ fe fɛɛ yɛ wɔshihilɛ mli lɛ hu he.

Nibii ni efite jɛɔ adesai adaa gbi shihilɛ po mli baa. Akɛ nɔkwɛmɔ nɔ lɛ, nibii ni akɛfeɔ niyenii lɛ adumɔ, amɛhe nitsumɔ, kɛ eyeli haa nibii ni efite jɛɔ mli baa, eyɛ mli akɛ emli babaoo lɛ, sũ mli muawai nyɛɔ amɛtsakeɔ lɛ. (Lala 1:4; Luka 3:17) Eka shi faŋŋ akɛ loo ni Yesu ni atee lɛ shi lɛ sha ekɛfee niyenii eha ekaselɔi lɛ wo lasu, ni eha lamulu, kɛ jwɛi ni ji loo wui hu ba. (Yohane 21:9-13) Shi afee shikpɔŋ nɔ nibii ni wala yɔɔ amɛmli kɛ nɔ ni wala bɛ amɛmli lɛ fɛɛ bɔ ni enɛɛmɛi gbaŋ amɛshihilɛ naa.

Esaaa akɛ Nyɔŋmɔ webii jieɔ amɛjwɛŋmɔ kɛjɛɔ adebɔɔ nibii ahe saji anɔ. Yehowa fa ewebii ni hi shi blema lɛ ni amɛto nibii ni efite lɛ ajiemɔ, ni ji nifeemɔ ni he hiaa yɛ adebɔɔ nibii kɛ hetsemɔ gbɛfaŋ fɛɛ lɛ ahe gbɛjianɔ. (5 Mose 23:​9-14) Ni akɛni wɔle eyiŋtoo yɛ mɛi ni fiteɔ shikpɔŋ lɛ ahe hewɔ lɛ, eka shi faŋŋ akɛ esaaa akɛ wɔkuɔ wɔhiɛ wɔshwieɔ nɔ ni wɔbaanyɛ wɔfee ni wɔkɛha nibii ni ebɔle wɔ lɛ mli atse lɛ anɔ. Wɔbaanyɛ wɔjie enɛ kpo yɛ bɔ ni wɔtaoɔ jwɛi loo nibii ni efite lɛ atoohe’ kpakpa, titri lɛ nibii ni ebɔɔ yɔɔ mli lɛ mli. Wɔjɛɔ henilee mli wɔfiɔ mɔdɛŋ ni abɔɔ koni akɛtsake nɛkɛ nibii nɛɛ ekoŋŋ lɛ sɛɛ, ni wɔyɛ yiŋtoo babaoo ni wɔkɛaafee nakai kɛji Kaisare ewo mla yɛ he. (Romabii 13:​1, 5) Ni aŋkroaŋkroi komɛi sumɔɔ akɛ amɛaafee babaoo amɛfata enɛ he, tamɔ halamɔ ni amɛhalaa akɛ amɛkɛ nibii ni sũ mli muawai bibii baanyɛ atsake lɛ lɛ atsu nii, moŋ fe nibii krokomɛi ni baaha jwɛi babaoo ni etĩa yɛ shikpɔŋ nɔ kɛ ŋshɔ shishi lɛ aya nɔ afa babaoo.

Shi, he ni Kristofonyo baanyɛ afee enii kɛyashɛ yɛ enɛ gbɛfaŋ lɛ ji lɛ diɛŋtsɛ esane, ja mla biɔ ni efee nakai. Wɔnaa faŋŋ kɛjɛɔ adafitswaa saji amli akɛ ewaaa kwraa akɛ adesai ni yeee emuu lɛ aaagbee kaa ni ji nii ni afeɔ kɛtekeɔ nɔ lɛ mli. Eka shi faŋ akɛ Yesu ŋaawoo nɛɛ kɔɔ sane nɛɛ he, akɛ: “Nyɛkakojoa, koni akakojo nyɛ. . . Shi mɛɛba onaa kuli ni yɔɔ onyɛmi hiŋmɛi mli lɛ shi bo diɛŋtsɛ ohiŋmɛi mli mplaŋ lɛ, oyooo lɛ?” (Mateo 7:​1, 3) Enɛ ni wɔɔha ahi wɔjwɛŋmɔ mli lɛ baanyɛ aye abua wɔ ni wɔhiɛ akaje otii krokomɛi ni he hiaa lɛ anɔ.

Gbalɔ Yeremia ŋma akɛ: “Yehowa, mile akɛ gbɔmɔ gbɛ bɛ lɛ diɛŋtsɛ edɛŋ, ni adesa ni nyiɛ nɛɛ, bɔ ni eeetsɔ ejaje enajifaamɔi eha lɛ, ebɛ edɛŋ.” (Yeremia 10:23) Nɛkɛ shishitoo mla nɛɛ ni aku hiɛ afɔ nɔ lɛ eha adesai kɛ “jaramɔ bei,” taakɛ awie he yɛ 2 Timoteo 3:​1-5 lɛ miikpe hiɛ kɛ hiɛ. Ni nɔ ni Nyɔŋmɔ eha aŋma yɛ Kpojiemɔ 11:18 lɛ maa nɔ mi akɛ mɔdɛŋ ni adesai bɔɔ akɛ amɛaajie adebɔɔ nibii ahe naagbai titrii, ni mujiwoo fata he lɛ kɛjɛ shikpɔŋ lɛ nɔ kwraa lɛ yeŋ omanye kɛmɔŋ shi. Hiɛyaa ko kɛ̃ baaba yɛ hei komɛi moŋ shi enaa tsabaa ni baahi shi kɛya naanɔ lɛ biɔ ni Nyɔŋmɔ kɛ ehe awo mli.

Enɛ hewɔ lɛ wɔkɛ wɔ mɔdɛŋbɔɔ kɛ wɔnibii fɛɛ tsuɔ tsabaa ni baajɛ ŋwɛi lɛ he nii, moŋ fe ni wɔɔbɔ mɔdɛŋ ni wɔjie hiɛaŋhiɛaŋ okadii lɛ kɛkɛ. Wɔnyiɛɔ Yesu, mɔ ni kɛ esɔɔmɔ nitsumɔ lɛ mli be babaoo ‘ye anɔkwale lɛ he odase’ lɛ nɔkwɛmɔnɔ lɛ sɛɛ yɛ enɛ mli. (Yohane 18:37) Ní eeeha je lɛ niyenii ni amɛye, loo eeejie shihilɛ mli naagbai ni egbɛ eshwa he fɛɛ he​—ni mujiwoo fata he​—lɛ moŋ lɛ, Yesu gbala jwɛŋmɔ kɛtee naagbai ni haoɔ adesai nɛɛ anaa tsabaa ni yeɔ emuu lɛ nɔ.​—Yohane 6:10-15; 18:⁠36.

Yɛ be mli ni suɔmɔ ni wɔyɔɔ wɔhaa wɔnaanyo gbɔmɔ lɛ tsirɛɔ wɔ koni wɔkawo shikpɔŋ, kɔɔyɔɔŋ, kɛ nu mli muji bɔ ni esaaa lɛ, wɔyaa nɔ wɔyeɔ anɔkwale lɛ he odase hu. Enɛ biɔ gbɔmɛi lɛ anitsɔɔmɔ koni amɛkɛ Biblia mli anɔkwalei atsu nii, ni amɛtsi amɛhe kɛjɛ lasu, daanumɔ shɛii, loo tsofai fɔji kɛ nitsumɔ ni amɛkɛaawo amɛgbɔmɔtsei ahe muji lɛ he. Be mli ni mɛi heei akpekpei abɔ batsɔmɔɔ kaselɔi lɛ, amɛkaseɔ hetsemɔ sui kɛ mɛi krokomɛi ahesusumɔ hu. No hewɔ lɛ shiɛmɔ nitsumɔ lɛ eye ebua yɛ gbɛ pɔtɛɛ diɛŋtsɛ nɔ yɛ naagba, ni ji mujiwoo ni yɔɔ he fɛɛ he nɛɛ nɔ gbɔmɔ mli. Shi akɛ nɔ ni he hiaa fe fɛɛ lɛ, Kristofoi kaselɔi bɔɔ mɔdɛŋ akɛ amɛaatsake amɛ diɛŋtsɛ amɛsui kɛ amɛjeŋbai amrɔ nɛɛ bɔni afee ni amɛfee mɛi ni sa kɛha Paradeiso shikpɔŋ ni nɔ tse, ni etsɛŋ ni Nyɔŋmɔ kɛbaaha enɔkwa jalɔi lɛ mli shihilɛ.