La Ni Akɛbaa Hei Ni Yɔɔ Shɔŋŋ Yɛ Bolivia

NƆ Nl ka Bolivia gɔji kakadaji lɛ kooyi kɛ bokagbɛ ji shikpɔŋ ni ka shi tɛtrɛɛ ni nugbɔnɛmɔ kɛ hulutsoo fa yɛ nɔ ni baaŋmɔŋ eyi nɔ obɔ. Faai ni yɔɔ gbeyei ni bɔleɔ shi kɛtsɔɔ kooi amli kɛ ŋa kplanaa nɔ ejara shikpɔŋ lɛ mli. Te Maŋtsɛyeli lɛ he sanekpakpa lɛ shiɛmɔ yɛ nɛkɛ hei ni yɔɔ shɔŋŋ nɛɛ yɔɔ tɛŋŋ?

Susumɔ ohe akɛ oyɛ lɛlɛ agbo ko ni akpɛ tso ko mli akɛfee ni tsɔne ko ni kpɛtɛ sɛɛ tsiɔ lɛ kɛtsɔɔ faa mli lɛ mli. Enɛ ji be-fɛɛ sɔɔlɔi ekpaa ko ni jɛ Trinidad, maŋtiase ko ni yɔɔ El Beni fa ni yɔɔ Bolivia lɛ aniiashikpamɔ. Amɛto gbɛfaa nɛɛ he gbɛjianɔ koni amɛnyɛ amɛye odase yɛ akrowai ni yɔɔ faai atoi ni “maŋtsɛyeli lɛ he sanekpakpa lɛ” shɛko jɛmɛ kwraa lɛ amli. (Mateo 24:14) Yɛ be mli ni amɛtsɔ faa ni hiɛ lɛɛ ni tswaa afui lɛ mli kɛshɛ shɔŋŋ lɛ, amɛlɛlɛ lɛ yi faa lɛ fa ni efee bibioo ni kɛ mɔ yaa Mamoré Faa lɛ mli lɛ nɔ.

Kuu nɛɛ ateŋ mɔ kome gba akɛ: “Wɔshɛ Mamoré lɛ mli wɔta po ni wɔbayoo akɛ faa bibioo lɛ naagbee gbɛ egbi. Beni wɔyimɔ shi kɛjɛ lɛlɛ lɛ mli pɛ kɛkɛ ni wɔna ni wɔmiishiu yɛ ŋmɔtɔ ni ebashɛ wɔshuɔji ahe lɛ mli! Miŋa laaje etokotai yɛ mli beni ebɔɔ mɔdɛŋ ni eje mli lɛ. Shi yɛ gbɔmɛi ni hoɔ yɛ he ni wɔbaje nɛɛ ayelikɛbuamɔ naa lɛ wɔnyɛ wɔgbala lɛlɛ ni tsii lɛ kɛjɛ ŋmɔtɔ lɛ mli kɛtee shikpɔŋ gbiŋ nɔ. Yɛ be mli ni wɔgbo deŋme ŋmlɛtswaai enyɔ sɔŋŋ sɛɛ lɛ, wɔshɛ Mamoré faa lɛ he.

“Kɛkɛ ni wɔtsɔ faa ni etoi biɛ kɛ biɛ kwɔlɔ ni tsei wuji eyi nɔ obɔ lɛ mli yɔɔ. Beni amɛnu lɛlɛ lɛ sɛɛ tsɔne lɛ he lɛ, halai wuji jɛ tsei ni amɛbumɔ nɔ yɛ faa lɛ mli lɛ nɔ amɛbote nu lɛ mli, ni faa mli looi komɛi ni tamɔ tsafɔrɔbii huruɔ kɛjɛɔ nu lɛ mli kɛboteɔ mli ekoŋŋ. Nɔ ni tsɔɔ wɔ he ni esa akɛ wɔwa yɛ klɛŋklɛŋ ji la ni atsɛ yɛ faa lɛ toi koni akɛshwie filikilɔi lɛ mli lasu ni jeɔ lɛ. Beni wɔyawa ni wɔfi wɔ lɛlɛ lɛ yɛ tsei aniji komɛi ateŋ lɛ, wɔkɛ gbɔmɛi ni sumɔɔ mɔ sane nɛɛ gba Maŋtsɛyeli ni baa lɛ mli jɔɔmɔi ahe sane. Amɛhiɛ sɔ ni amɛkɛ aduawai kɛ wuɔwɔji babaoo ke wɔ.

“Beni gbi lɛ hoɔ lɛ, wɔwa yɛ hei krokomɛi hu koni wɔtɛo anɔkwale dumɔwui lɛ babaoo. Beni wɔshɛɔ San Antonia lɛ duŋ ewo kwraa. Kosɛɛbii nɛɛ eyawɔ. Shi beni wiemɔ gbɛ shwa akɛ abaajie sini lɛ, kɛkɛ ni abɔi kanei asũu. Amɛto okpɔŋɔ kɛ shwiili he gbɛjianɔ koni akɛloo wɔnibii lɛ kɛba maŋ lɛ mli. Mɛi bale Yehowa Odasefoi kɛtsɔ sini lɛ kɛ mɔ kɛ mɔ teŋ sanegbaa nɔ.

“Enɔ jetsɛremɔ lɛ wɔyasara hei krokomɛi. Wɔna yei ni miifɔ amɛnibii ahe yɛ faa lɛ toi, kɛ abifabii po ni aaju amɛhe yɛ hala ŋoŋoi wuji amli. Amɛnuko wɔ Biblia mli shɛɛ sane lɛ da. Wɔshɛ he ko ni looi bibii tumɔ kɛjɛ nu lɛ mli yɛ lɛlɛ lɛ masɛi, ni pii bagbee lɛlɛ lɛ mli. No hewɔ lɛ yɛ be mli ni wɔjie sini lɛ wɔgbe naa lɛ, wɔshĩ loo wɔkpe dani wɔyawɔ. Beni gbɛfaa lɛ baa naagbee lɛ, wɔkɛ woji babaoo eha yɛ nɛkɛ hei ni yɔɔ shɔŋŋ nɛɛ, ni wɔtsuii nyɔ wɔmli akɛ wɔye wɔbua mɛi koni amɛnu sanekpakpa lɛ he klɛŋklɛŋ kwraa.”​—Okɛto Romabii 15:​20, 21 he.

Ŋwɛibɔfoi Agbɛtsɔɔmɔ He Odaseyeli

Feemɔ ohe mfoniri akɛ naa bo ni ooya ni oyatao gbɔmɔ kome yɛ maŋ ni emli gbɔmɛi ayifalɛ ji 12,000, ni enɛ ji klɛŋklɛŋ be mli ni oyaa jɛmɛ. Oleee yoo nɛɛ he nɔ ko nɔ ko kwraa, ja egbɛi pɛ. Enɛ ji naagba ko ni baka be-fɛɛ sɔɔlɔi enyɔ ko ni ba Guayaramerin ni amɛhiɛ ka nɔ akɛ amɛbaana mɔ ko ni etsɔ hiɛ ekase Biblia lɛ pɛŋ ni etee kpeei hu yɛ maŋ ko mli shi eshi kɛba maŋ nɛɛ mli lɛ nɔ. Beni amɛto amɛshihilɛ mli gbɛjianɔ amɛgbe naa lɛ, gbɛgbalɔi enyɔ ni ji wu kɛ ŋa nɛɛ kpɛ amɛyiŋ akɛ amɛbaashera shi kɛya maŋ lɛ jarayeli he, he ni gbɔmɛi pii buaa amɛhe naa amɛyeɔ nii yɛ okpɔlɔ he loo amɛgbaa sane kɛkɛ lɛ. Amrɔ nɔŋŋ pɛ kɛkɛ ni nuu ko bɛŋkɛ wu kɛ ŋa nɛɛ ni sanegbaa je shishi. Amɛbi lɛ kɛji akɛ ele yoo ni amɛtaoɔ lɛ lɛ. Eha hetoo akɛ: “Dabi, shi mishaayoo ji Yehowa Odasefoi lɛ ateŋ mɔ kome.” Shi akɛni amɛle akɛ Odasefoi bɛ maŋ lɛ mli hewɔ lɛ, amɛsusu akɛ eyiŋ efutu lɛ loo ehiɛ ekpa ehe nɔ.

Shi enɔ jetseremɔ lɛ, ayasara yoo onukpa, ni eka saa mli akɛni enane eku hewɔ lɛ. Yoo nɛɛ kɛɛ: “Yehowa Odasefoi lɛ ateŋ mɔ kome ji mi, shi abaptisiko mi.” Beni amɛbi lɛ mɔ ni tsɔɔ lɛ anɔkwale lɛ, kɛkɛ ni ekɛ enine tsɔɔ enabi yoo mfoniri ni kpɛtɛ gbogbo he lɛ ni ekɛɛ: “Mɔ nɛɛ tsɔɔ mi.” Amɛnyɛɛɛ amɛhe nɔ ni amɛhiŋmɛi naa lɛ amɛye! Obalayoo ni amɛtaoɔ lɛ lɛ nɛ! Kɛkɛ ni amɛbi lɛ akɛ: “Mɛni hewɔ oshaanuu lɛ kɛɛ eleee lɛ lɛ?” Yoo nɛɛ ha hetoo akɛ: “Oh, ebote gbalashihilɛ mli bianɛ, ni egbalashihilɛ mli gbɛi lɛ pɛ ele. Enabi lɛ bɛ maŋ lɛ mli yɛ nakai be lɛ mli, shi amɛtsɔ woloŋmaa nɔ amɛkɛ lɛ fee Biblia mli nikasemɔ. Mɛni jɛ mli ba? Obalayoo nɛɛ kɛ enaa lɛ fɛɛ tee amɛhiɛ yɛ nilee mli kɛyashɛ be mli ni abaptisi amɛ. Amɛshia lɛ bafee Maŋtsɛyeli Asa kɛha asafo ni daa lɛ, ni akɛ be-fɛɛ sɔɔlɔ lɛ, obalayoo nɛɛ etsɔɔ mɛi pii agbɛ kɛba Yehowa gbɛjianɔtoo lɛ mli.

Shiɛmɔ yɛ Nugbɔnɛmɔ kɛ Hulutsoo Shikpɔŋ lɛ Teŋ Diɛŋtsɛ

Yɛ no sɛɛ lɛ, susumɔ ni okɔɔyɔŋ lɛlɛ lɛ miiya ayama shi yɛ ŋa kplanaa ko nɔ yɛ San Joaquin, yɛ Bolivia nugbɔnɛmɔ kɛ hulutsoo shikpɔŋ lɛ teŋ diɛŋtsɛ lɛ he. Onaaa miishɛɛ tsɔ yɛ be mli ni osusuɔ akɛ afii enyɔ ni tsɔ hiɛ lɛ mli ni naakpɛɛ tsɛŋemɔhela ko gbe maŋ nɛɛ mlibii ayifalɛ mlijaa enumɔ mli ekome lɛ he lɛ.

Wu kɛ ŋa gbɛgbalɔi ni kɛ kɔɔyɔŋ lɛlɛ baa kɛjɛɔ Trinidad lɛ le bɔ ni gbɔmɛi lɛ agbɔfeemɔ su yɔɔ ha lɛ. Wu lɛ gba akɛ: “Biblia mli sanegbaa ni wɔkɛ mɔ ko na yɛ kɔɔyɔŋ lɛlɛ lɛ mli lɛ ha afɔ wɔ nine akɛ wɔbahi mɔ ko shia yaka ni wɔwooo nyɔmɔ ko yɛ he. Mɛi ni fee wɔ gbɔ lɛ po tse nyɔmɔ ni wɔbaabɔ yɛ niyenii ni amɛhaa wɔ lɛ he lɛ nɔ, ni enɛ ha wɔnyɛ wɔtuu wɔbe fɛɛ wɔha shiɛmɔ nitsumɔ lɛ. Beni wɔshɛ jɛmɛ lɛ etsɛɛɛ kwraa ni akɛɛ wɔ akɛ wɔkɛ wɔhe ayatsɔɔ yɛ asraafoi ashihilɛ he lɛ. Beni maŋ onukpa lɛ nu akɛ wɔjeee maŋ-hiɛ-atuatselɔi shi wɔji Yehowa Odasefoi lɛ, ejie miishɛɛ ni ekaaa kpo ni ehe Biblia, kɛ Biblia kasemɔ he wolo ni eshɛ Watchtower kɛ Awake! woji tɛtrɛbii lɛ eko. Yɛ no sɛɛ lɛ, etamɔ nɔ ni mɔ fɛɛ mɔ ni yɔɔ maŋ lɛ mli lɛ bo Biblia mli shiwoo ni kɔɔ gbɔmɔtsoŋ hewalɛnamɔ ni yeɔ emuu yɛ wɔsɛɛ be mli lɛ he lɛ toi.”​—Kpojiemɔ 21:⁠4.

Be-fɛɛ sɔɔlɔi ejwɛ miisumɔ ni amɛshi San Joaquin kɛya San Ramon, shi gbɛfaa tsɔne ni yɔɔ pɛ ji shwiili ni tsina gbalaa. Amɛkɛ woji adekai fee sɛii. Etsɛɛɛ ni enɛɛmɛi boda yɛ bɔ ni tso shwiili kɛ ekoklolontoi ni akɛ tsei efee lɛ shimɔɔ shi waa ha lɛ hewɔ. Wuɔi ni akɛ amɛ faa gbɛ lɛ po hiɛ bɔi amɛ dimɔ yɛ bɔ ni shwiili lɛ fɔ̃ɔ amɛ lɛ hewɔ.

Yɛ be mli ni amɛkɛ ŋmɛlɛtswai nyɔŋma etsomlo kɛtsɔ kooi lɛ ashishi lɛ, amɛyashɛ he ni nanegbɛ po bɛ ni kadiɔ gbɛ lɛ, ni duŋ hu miiwo. Shwiili kudɔlɔ lɛ ha kuu lɛ tsui fa beni etswa adafi akɛ, “Misusuɔ akɛ wɔlaaje!” lɛ. Beni amɛje shishi amɛmiisusu akɛ, ‘Te wɔɔfee tɛŋŋ wɔhi koo ni mli eyi obɔ kɛ onufui kɛ kooloi awuyelɔi mli lɛ?’ pɛ kɛkɛ ni shwiili kudɔlɔ lɛ kɛfata he akɛ, “Shi nyɛkahaoa. Kooloi lɛ efa gbɛ nɛɛ da.” Ni nakai eji. Ŋmɛlɛtswaa kome sɛɛ pɛ kɛkɛ ni amɛfa kpo kɛjɛ koo lɛ mli ni amɛshɛ San Ramon!

Amɛkɛ gbii pii tswa Paradeiso ni baa lɛ he adafi amɛtsɔɔ mɛi ni nuko da lɛ yɛ biɛ hu. Odasefoi bɛ biɛ; ni kɛlɛ nɔ ko tee nɔ ni ha enɛ tsake.

Katolek maŋsɛɛ sanekpakpa shiɛlɔ ko nyiɛ Odasefoi lɛ asɛɛ yɛ be mli ni amɛyaa shia kɛ shia lɛ. Shi amɛyanina lɛ trukaa yɛ shia ni nyiɛ sɛɛ ni amɛyaa mli lɛ mli. Akɛni enaanyobɔɔ su lɛ ha amɛnaa kpɛ amɛhe hewɔ lɛ, amɛshi Anɔkwale ni kɛ mɔ yaa Naanɔ Wala Mli wolo lɛ amɛha lɛ. Eyɛ mli akɛ lɛ diɛŋtsɛ lɛ ebɛ he miishɛɛ tuutu ko moŋ, shi ekɛ wolo lɛ ha ewuyoo, ni yoo nɛɛ kane wolo muu lɛ fɛɛ, ekase nii kɛtsa nɔ, ni yɛ sɛɛ mli lɛ ebatsɔ Odasefonyo ni abaptisi lɛ.

Sane ni Mli Wa yɛ Nugbɔnɛmɔ kɛ Hulutsoo Shikpɔŋ nɔ Faai Ahiɛ

Agbɛnɛ feemɔ ohe mfoniri akɛ ookudɔ faa hiɛ lɛlɛ ko ni akɛ tsɔne ewo mli kɛmiitsɔ faa ni miiho waa mli. Faai ashishi tɛsaai ni eteetee, faa toi ŋmɔtɔ kɛ tsokui, kɛ nui ni tsɔmɔɔ ni pueɔ trukaa ji osharai ni yɔɔ mli lɛ ateŋ fioo ko. Faa mli looi ni yeɔ looŋmɔŋ, jiji ni shiɔ mɔ, kɛ tantrai ni tsɛ̃ɔ mɔ fa yɛ nɛkɛ nui nɛɛ amli. Enɛɛmɛi ji saji ni mli wawai ni nyɛmimɛi ni yɔɔ Riberalta ni nitsumɔ ka amɛnɔ akɛ amɛye mɛi ni hiɔ faai atoi lɛ odase lɛ kɛkpeɔ.

Bɔni afee ni amɛnyɛ amɛshɛ hei ni yɔɔ banee lɛ, amɛkpɛ lɛlɛ ko ni amɛwo lɛ gbɛi Luz de los Rios (Faai lɛ La). Ato yiŋ akɛ abaaka lɛlɛ lɛ akwɛ yɛ be mli ni kpokpaa wulu kɛ kpokpaa nɔkwɛlɔi basara amɛ lɛ. Nɔ fɛɛ nɔ tee nɔ jogbaŋŋ kɛyashi be mli ni nɔ ni akɛha yiteŋ lɛ yatsɛ tso nine ko ni tsotsoro shi mli. Nu ni hoɔ waa lɛ fɔ lɛlɛ lɛ etswa tso ko ni egbee shi. Tso nine ko ni enaabu sosooso gbu lɛlɛ lɛ koŋ nɔ tamɔ akɛ klante gbuɔ nɔ ko mli​—shwɛ sharao kulɛ esɛŋ kpokpaa wulu nɔkwɛlɔ lɛ ŋa lɛ! Kɛkɛ ni nu bɔi mli baa, ni lɛlɛ lɛ butu ni efɔ emlibii lɛ fɛɛ ewo nui ni tsɔmɔɔ lɛ mli. Kpokpaa wulu nɔkwɛlɔ lɛ kɛ eŋa lɛ nyɛɛɛ asere! Mɛi ni baanyɛ lɛ ye bua ni amɛba shikpɔŋ shweshweeshwe. Shi lɛlɛ lɛ shiu kwraa. Gbii komɛi asɛɛ lɛ, ayana yɛ faa lɛ jɔɔ mli gbɛ aaafee shitooi etɛ kɛjɛ he ni eshiu yɛ lɛ. Amɛ nibii fɛɛ, ni adekai 20 ni woji yɔɔ mli obɔbɔ fata he lɛ fɛɛ laaje.

Bolivia ŋshɔ hiɛ asraafoi lɛ ye bua ni agbala lɛlɛ lɛ kɛjɛ faa lɛ mli, ni yɛ be mli ni akɛ otsii pii esaa lɛ, asaa he ekoŋŋ koni akɛ lɛlɛ lɛ agbe eklɛŋklɛŋ gbɛfaa lɛ naa. Gbɛfaa ni mli wa lɛ je shishi kɛ kɔɔyɔŋ tsakemɔ ko ni ehiii kɛ tsɔne ni ka mli lɛ he naagba.

Nyɛmimɛi lɛ kɛ Sanekpakpa shiɛlɔi akuu ko kpe yɛ he ni amɛyawa yɛ klɛŋklɛŋ kwraa lɛ, ni amɛye amɛhe fɛo akɛ: “Nyɛ lɛlɛ bibioo lɛ ehiii kɛhaaa faa nɛɛ!” Tsɔne ni haa sarawa hewalɛ ni amɛkɛbaajie sini lɛ nyɛɛɛ atsu nii. Beni amɛku amɛsɛɛ kɛtee lɛlɛ lɛ mli yɛ faa lɛ hiɛ lɛ, Odasefoi lɛ na le akɛ lɛji krokomɛi ebatsɔ jɛmɛ kɛho ni hiɛ tsɔnei ni awieɔ awoɔ mli ni gbɛɛɔ ni miibɔ gbɔmɛi lɛ kɔkɔ yɛ “apasa gbalɔi” lɛ ni baa lɛ ahe. Eka shi faŋŋ akɛ Sanekpakpa shiɛlɔi lɛ fee nakai. Ni kɛlɛ, enɛ moŋ tee gbɔmɛi lɛ ahenumɔ shi akɛ amɛaale bɔ ni sane lɛ ji ha.

Eyɛ mli akɛ saramɔ nɛɛ kɛ apasa gbalɔi lɛ amale adafitswaa lɛ ba naagbee moŋ, shi nyɛmimɛi lɛ nu he akɛ amɛnaaa miishɛɛ, ejaakɛ gbɛfaa ni heɔ gbii 21 ni amɛkɛaashɛ Fortaleza ka amɛhiɛ.

Beni amɛyaa lɛ, amɛshiɛ amɛha akutso ko ni yɔɔ he ko shɔŋŋ lɛ maŋtsɛ; ebo toi jogbaŋŋ. Biblia mli wiemɔ ni gbɛgbalɔi lɛ ateŋ mɔ kome ha ni kɔɔ anɔkwa hiɛnɔkamɔ kɛha gbohii lɛ ahe lɛ shɛje kuu ko ni yeɔ awerɛho yɛ he ko ni ahu jɛmɛ lɛ amii. Nuu onukpa ko ni etsɛŋ eyɛ futaa tsɔɔ etsuiŋ hiɛsɔɔ, ni ebi bɔ ni eeefee ni eshɛ wɔ woji tɛtrɛbii lɛ eko kɛha afii nyɔŋma! Asafo lɛ sini lɛ he ba sɛɛnamɔ kɛha gbɔmɛi 120 yɛ Fortaleza.

Kwɛ bɔ ni gbɛgbalɔi nɛɛ amii shɛ amɛhe ha akɛ amɛkɛ anɔkwale lɛ la lɛ etee hei ni yɔɔ shɔŋŋ! Eka shi faŋŋ akɛ gbɛ ni yɔɔ shweshweeshwe kɛ gbɛ ni aaaha mɔ kɛ ewala atsu nii ni etsui anyɔ emli yɛ he bɛ fe ni aaasɔmɔ wala Bɔlɔ lɛ diɛŋtsɛ, ni ji Yehowa Nyɔŋmɔ.​—Lala 63:​4, 5.

[Shikpɔŋ he mfoniri/Mfonirii ni yɔɔ baafa 26]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

BOLIVIA

Guayaramerín

Riberalta

Fortaleza

San Joaquín

San Ramón

Trinidad

San Antonio