Ani Onyiɛɔ Gbɛtsɔɔmɔi Asɛɛ?
TSƐ ni yɔɔ suɔmɔ lɛ tsɔɔ ebii anii bɔni afee ni amɛye omanye yɛ shihilɛ mli koni kɛ amɛdara ni amɛtsɔmɔ onukpai hu lɛ, ni amɛna miishɛɛ. Ni gbekɛbii ni sumɔɔ amɛfɔlɔi ni amɛbuɔ amɛ hu lɛ kpɛlɛɔ gbɛtsɔɔmɔi nɛɛ anɔ ejaakɛ amɛle akɛ amɛ diɛŋtsɛ amɛhilɛ hewɔ akɛhaa. Nakai nɔŋŋ hu, wɔŋwɛi Tsɛ ni yɔɔ suɔmɔ lɛ, Yehowa, kɛ gbɛtsɔɔmɔ ni haa etsuji yeɔ omanye ni amɛnaa miishɛɛ yɛ amɛshihilɛ mli lɛ haa amɛ. No hewɔ lɛ, ehe miihia ni wɔnyiɛ gbɛtsɔɔmɔ ni Nyɔŋmɔ kɛhaa wɔ kɛtsɔɔ e-Wiemɔ ni ji Biblia lɛ kɛ eshikpɔŋ nɔ gbɛjianɔtoo lɛ nɔ lɛ sɛɛ.
Yɛ Weku lɛ Mli
Hei sɔrɔtoi babaoo yɛ ni akɛ gbɛtsɔɔmɔi haa wɔ yɛ he. Ekome ji yɛ weku kɔkrɔɔ lɛ mli. Nyɔŋmɔ ji gbalashihilɛ kɛ weku lɛ shishitolɔ. Biblia lɛ kɛɔ akɛ Nyɔŋmɔ kpee klɛŋklɛŋ hefatalɔi lɛ yɛ gbalashihilɛ mli ni ekɛɛ amɛ ni amɛfɔ bii. (1 Mose 1:27, 28; 2:22-24) Bɔlɔ lɛ eto gbɛtsɔɔmɔi ahe gbɛjianɔ eha weku lɛ mlibii sɔrɔtoi lɛ fɛɛ yɛ nɔ ni amɛgbɛnaa nii ji lɛ ahe. Akɛ nɔkwɛmɔ nɔ lɛ, wu kɛ tsɛ lɛ ji shia lɛ fɛɛ yitso, ni tsɔɔ akɛ lɛ ji mɔ ni gbɛnaa nii ka enɔ akɛ ekɛ gbɛtsɔɔmɔ aha, ni eha amɛ niyenii, hehaa nɔ, wɔɔhe, hebuu, kɛ tsɔsemɔ hu. Lɛ nɔŋŋ hu ebaakpɛ eyiŋ yɛ weku lɛ mli saji ni he hiaa lɛ ahe. Akɛ wu lɛ, esa akɛ esusu eŋa lɛ he ni ekɛ woo aha lɛ akɛ bɔɔ nɔ ni he waaa tuutu ko. (Efesobii 5:22, 23; 1 Timoteo 5:8; 1 Petro 3:7) Esa akɛ ŋa lɛ aba ehe shi aha ewu lɛ, ni ejie bulɛ ni mli kwɔ kpo eha lɛ, ni efee eyelikɛbualɔ kɛ ehefatalɔ. Ni Ŋmalɛi lɛ tsɔɔ faŋŋ akɛ esa akɛ gbekɛbii lɛ afee toiboo amɛha amɛfɔlɔi.—1 Mose 2:18; Efesobii 6:1-3; 1 Petro 3:1, 2.
Mɛni ji nɔ ni baaba kɛji aku hiɛ ashwie nɛkɛ gbɛtsɔɔmɔi nɛɛ anɔ? Kɛ ebalɛ akɛ wumɛi susuuu amɛŋamɛi ahe lɛ, ekɛ gbeekpamɔ ni baaa kɛ naataomɔi baa, ni ŋamɛi lɛ tsɔɔ bulɛ bibioo ko pɛ ni amɛyɔɔ kɛha wu lɛ yitsoyeli lɛ. Yɛ anɔkwale mli lɛ, nibii nɛɛ eha wekui babaoo po amli egbala kwraa. Gbekɛbii hu atoigbele kɛ atuatsemɔ lɛ kɛ awerɛho babaoo ebaha fɔlɔi babaoo. Yɛ bei babaoo mli lɛ, fɔlɔi lɛ ji mɛi ni sa shwamɔ yɛ tsɔsemɔ kpakpa ni amɛkɛhaaa amɛbii lɛ, shi moŋ amɛwoɔ amɛmlila lɛ hewɔ.—Efesobii 6:4.
Eyɛ mli akɛ mɛi ni tsuɔ adesai ashihilɛi ahe nii, jwɛŋmɔ he nilelɔi, kɛ mɛi krokomɛi kɛ ŋaawoi sɔrɔtoi babaoo eha yɛ bɔ ni aaafee ana weku naagbai anaa lɛ he moŋ, shi ŋaawoo ko bɛ ni yeɔ omanye fe gbɛtsɔɔmɔi ni weku lɛ Bɔlɔ lɛ kɛha yɛ Biblia lɛ mli lɛ. Enɛɛmɛi asɛɛnyiɛmɔ kɛ miishɛɛ kɛ tsui ni nyɔɔ mɔ mli hu baa.—Lala 19:7-9.
Yɛ Asafo lɛ Mli
Esa akɛ wɔnyiɛ gbɛtsɔɔmɔi ni Kristofoi asafo lɛ Yitso, Yesu Kristo kɛhaa kɛtsɔ “tsulɔ anɔkwafo kɛ nilelɔ,” ni ji gbɛ ni ahala kɛha Nyɔŋmɔ gbɛjianɔtoo ni yɔɔ shikpɔŋ nɔ yɛ biɛ lɛ nɔ lɛ sɛɛ. (Mateo 24:45-47; Efesobii 5:23) Kɛji toiŋjɔlɛ kɛ ekomefeemɔ baahi asafo lɛ mli lɛ, belɛ ehe miihia ni emlibii lɛ fɛɛ kɛ gbɛtsɔɔmɔ ni akɛhaa lɛ atsu nii yɛ gbeekpamɔ mli. Akɛ nɔkwɛmɔ nɔ lɛ, ehe miihia ni mɛi ni nyiɛɔ hiɛ yɛ nitsɔɔmɔ mli yɛ asafo lɛ mli ni amɛyeɔ amɛbuaa mɛi krokomɛi hu lɛ kɛ amɛhe akpɛtɛ gbɛtsɔɔmɔi ni amɛnine shɛɔ nɔ kɛjɛɔ Yehowa gbɛjianɔtoo lɛ dɛŋ lɛ he gbagbalii. Enɛ baaye ebua koni eha amɛnitsumɔ lɛ amɔ shi jogbaŋŋ. Ekolɛ gbɛtsɔɔmɔi lɛ kɔɔ bɔ ni aaafee ni ana shiɛmɔ nitsumɔ lɛ mli gbɛfaŋnɔ, aloo bɔ ni aaafee atsu naagbai ahe nii yɛ asafo lɛ mli, bɔ ni aaafee ni akɛ ŋaawoo kɛ ekaawoo aha, bɔ ni aaafee ashɛje mɛi ni piŋɔ lɛ amii, kɛ nibii krokomɛi ahe. Akɛ gbɛtsɔɔmɔi hu haa bɔni afee ni anyɛ ato kpeei ni kɛ nitsɔɔmɔ kɛ gbɛtsɔɔmɔ haa hu ahe gbɛjianɔ kɛha mɛi fɛɛ ni kɛ amɛhe bɔɔ Kristofoi asafo lɛ he lɛ.—Bɔfoi lɛ Asaji 20:20; Romabii 12:6-8; Galatabii 6:1; 1 Tesalonikabii 3:1-3.
Esa akɛ asafo lɛ mli onukpai lɛ, aloo nɔkwɛlɔi lɛ titri afee nɔkwɛmɔ kpakpa yɛ enɛ gbɛfaŋ. Nɔyeli Kuu lɛ kɛ gbɛtsɔɔmɔi haa, ni esa akɛ onukpai lɛ anyiɛ sɛɛ jogbaŋŋ yɛ anɔkwayeli hu mli. Esa akɛ amɛkɛ gbɛtsɔɔmɔi nɛɛ ato shihilɛ ni yɔɔ he ni amɛyɔɔ lɛ ahe ni amɛkɛtsu nii. Esa akɛ wɔha ahi wɔjwɛŋmɔ mli akɛ mɔ ni kudɔɔ Kristofoi asafo lɛ ji Yesu Kristo. Eyooɔ asafoi ni yɔɔ jeŋ fɛɛ lɛ ahiamɔ nii fɛɛ jogbaŋŋ kɛmɔɔ shi, ni ekɛ hewalɛwoo kɛ yelikɛbuamɔ ni he hiaa lɛ haa. No hewɔ lɛ, esaaa ni onukpai lɛ shashaoɔ shi akɛ amɛkɛ gbɛtsɔɔmɔi ni amɛnine shɛɔ nɔ kɛjɛɔ Nyɔŋmɔ teokrase gbɛjianɔtoo lɛ ŋɔɔ lɛ aaatsu nii. Enɛ baafee nɔkwɛmɔ nɔ kpakpa kɛha mɛi fɛɛ yɛ asafoi lɛ fɛɛ amli ni ebaaye ebua amɛ ni ekomefeemɔ ahi amɛ diɛŋtsɛ kɛ amɛnyɛmimɛi Kristofoi ni yɔɔ shikpɔŋ lɛ nɔ fɛɛ lɛ hu ateŋ.—Bɔfoi lɛ Asaji 15:1-31; Hebribii 13:7; Kpojiemɔ 5:6.
Miishɛɛ ni Jɛɔ Mli Baa
Kɛ tsumalɔ ko miima tsu agbo lɛ, enyiɛɔ tsumaa he gbɛjianɔtoo ni tsu he ŋaalɔ lɛ etsɔɔ yɛ tsu lɛ he woji anɔ lɛ sɛɛ pɛpɛɛpɛ bɔni afee ni tsu ni emaa lɛ sɛɛ atsɛ. Nakai nɔŋŋ hu, yɛ yiwalɛ gbii ni tsɔ Nu Afua lɛ hiɛ lɛ amli lɛ, afa Noa akɛ ekpɛ adeka. Atsɔɔ lɛ bɔ ni ekpɛ lɛ eha, kɛ gbɔmɛi pɔtɛɛ kɛ kooloi hu ni esa akɛ ekɛwo mli kɛha yibaamɔ kɛtsɔ Nu Afua ni baa lɛ mli. Te Noa tsu he nii eha tɛŋŋ? Biblia lɛ kɛɔ akɛ: “Ni Noa fee nakai; bɔ ni Nyɔŋmɔ fa lɛ lɛ, nakai pɛpɛɛpɛ efee.” Noa kɛ mɛi ni fata ehe yɛ adeka lɛ mli lɛ pɛ na yibaamɔ yɛ Nu Afua lɛ mli. (1 Mose 6:5, 13-22; 7:23) Ŋmɛnɛ, bei ni wɔyɔɔ mli lɛ tamɔ Noa gbii lɛ nɔŋŋ, ni yɛ yiŋtoo nɛɛ nɔŋŋ hewɔ lɛ Nyɔŋmɔ baakpata gbɔmɛi fɔji fɛɛ ahiɛ. Biblia lɛ kɛɔ wɔ gbɛ ni esa akɛ wɔkɔ kɛji wɔmiitao wɔfata mɛi ni abaahere amɛyiwala lɛ ahe.—Mateo 24:37-39; 2 Petro 3:5-7, 11.
No hewɔ lɛ, nyɛhaa wɔkɛ hiɛsɔɔ akpɛlɛa gbɛtsɔɔmɔi ni Yehowa kɛhaa kɛtsɔɔ e-Wiemɔ ni aŋma lɛ kɛ eshikpɔŋ nɔ gbɛjianɔtoo lɛ nɔ lɛ nɔ ni wɔkɛtsua nii hu. Kɛ wɔfee nakai lɛ eeeha wɔye omanye ni wɔɔna miishɛɛ ni eeehere wɔyiwala hu.