Nɔ Hewɔ Ni Réunion Yɔɔ Maŋtsɛyeli Asai Babaoo Lɛ

AAFEE shitooi 400 kɛmiiya Madagaska bokagbɛ ji he ni ŋshɔkpɔ bibioo ni ji Réunion faa kpo trukaa yɛ, yɛ Indian Ocean ni da lɛ mli. Eyɛ mli kɛ ekɛlɛ ji aaafee shitooi 40 ni elɛɛmɔ hu ji shitooi 30 pɛ moŋ, shi ale ŋshɔkpɔ nɛɛ yɛ lasu gɔji sɔrɔtoi ni fɛɔ la yɛ be kɛ bei amli lɛ hewɔ. Egɔŋ ni kwɔ fe fɛɛ ni shɛɔ ninetalɔi 10,069 lɛ hu ji lasu gɔŋ Piton des Neiges (Snoo Gɔji) ni efɛɛɛ la dɔŋŋ lɛ. Nɔ ni yɔɔ ŋshɔkpɔ lɛ wuoyi-bokagbɛ ji lasu gɔŋ kroko ni ekwɔlɛ feɔ ninetalɔi 8,612 ni fɛɔ la be fɛɛ be ni atsɛɔ lɛ Piton de la Fournaise (Flɔnɔɔ Gɔŋ) lɛ. Kɛ efɛ la yɛ gbɛkɛ mli lɛ, eyɛ fɛo naakpa! Gbɛjegbɛi lɔgɔɔ shi kɛyaa ŋwɛi kɛkpelekeɔ shi yɛ gɔji lɛ ahe, ni ehaa akɛ naakpɛɛ naa nɔ ni atsɛɔ lɛ Réunion fɛo nibii ni yɔɔ gbeyei lɛ.

Mɛni Hewɔ Maŋtsɛyeli Asai Babaoo Nɛkɛ?

Shi Réunion hefɛo diɛŋtsɛ lɛ damɔ gbɛ ni ŋshɔkpɔ lɛ nɔ bii pii hereɔ “maŋtsɛyeli lɛ he sanekpakpa” ni Yehowa Odasefoi jajeɔ lɛ nɔ lɛ nɔ. (Mateo 24:14) Amɛshiɛmɔ nitsumɔ lɛ je shishi yɛ 1960, beni be fɛɛ sɔɔlɔi enyɔ jɛ France ba jɛmɛ lɛ. Amrɔ nɛɛ, afii 30 sɛɛ lɛ, Odasefoi 1,665 bɛ deka kwraa kɛ Maŋtsɛyeli lɛ he sane lɛ gbɛɛ-kɛ-shwamɔ yɛ shikpɔŋ lɛ nɔ bii 582,000​—ni kɛ aja mli lɛ eji Odasefonyo 1 kɛha gbɔmɛi 350 ni yɔɔ ŋshɔkpɔ lɛ nɔ lɛ ateŋ.

Shweremɔ ni tamɔ nɛkɛ ebi ni ana kpeehei ni sa koni Odasefoi lɛ anyɛ atsu amɛjamɔ kɛ mumɔŋ tsɔsemɔ lɛ he nii yɛ jɛmɛ. (Hebribii 10:​24, 25) Amrɔ nɛɛ, Réunion asafoi 19 lɛ amli 13 emamɔ amɛ diɛŋtsɛ amɛ Maŋtsɛyeli Asai momo. Yɛ ahum ni naa wa ni tswaa yɛ nɛkɛ he nɛɛ hewɔ lɛ, esa akɛ nɛkɛ tsui ni amamɔɔ nɛɛ afee nɔ ni wa ni heɔ bei pii​—kɛ shika babaoo hu​—dani akɛma agbe naa. No hewɔ lɛ te fee tɛŋŋ ni anyɛ amamɔ nɛkɛ Asai nɛɛ, akɛni Odasefoi ni yɔɔ ŋshɔkpɔ nɛɛ nɔ lɛ ateŋ mɛi pii ji mɛi ni bɛ nɔ ko tsɔ ni amɛyɔɔ wekui ni dara ni amɛkwɛɔ amɛ lɛ? Yɛ Biblia lɛ wiemɔi amli lɛ, hetoo lɛ ji, ‘Yehowa nine efoko kuku.’​—Yesaia 59:⁠1.

Gbɛtsii Nii Ni Aye Nɔ Kunim

Akɛ nɔkwɛmɔ nɔ lɛ, susumɔ bɔ ni Yehowa tsirɛ gbɔmɛi lɛ atsuii koni amɛye amɛbua Maŋtsɛyeli Asa ni yɔɔ maŋ bibioo ni ji Saint-Louis ni yɔɔ Réunion wuoyi-anaigbɛ lɛ maa lɛ he okwɛ. Beni akpɛlɛ tsu maa lɛ he woji lɛ anɔ klɛŋklɛŋ lɛ, Odasefonyo obalanyo ko kɛɛ etsɔɔlɔ ni tsɔɔ amɛ tsumaa lɛ akɛ abaama Maŋtsɛyeli Asa ko ni mɛi ni baama lɛ baajɛ amɛsuɔmɔ mli amɛfee nakai. Jeee akɛ tsɔɔlɔ lɛ kpɛlɛ nɔ akɛ lɛ diɛŋtsɛ lɛ ekɛ ebe baaha kɛkɛ, shi moŋ ekɛ kuu ni etsɔɔ amɛ nii lɛ fɛɛ ba he ni amaa tsu lɛ yɛ lɛ koni amɛbaye amɛbua ni amɛtsa tsu lɛ shishitooi lɛ. Yɛ sɛɛ mli lɛ, ekɛ dadei ni he baahia kɛha shishitooi lɛ ke nyɛmimɛi lɛ.

Beni gbɔmɛi fe oha ni amɛjɛ amɛsuɔmɔ mli ba yɛ hejɔɔmɔ gbi ko nɔ koni amɛkɛ kɔnkrit abato tsu lɛ shishi yɛ shikpɔŋ ni edalɛ shɛɔ ninetalɔi 2,000 koji-ejwɛ lɛ, amɛnaa kpɛ amɛhe akɛ amɛaana akɛ maŋ lɛ efo nu loo paip ni baa jɛmɛ lɛ mli. Te amɛaafee tɛŋŋ ni amɛfee kɔnkrit ni nu bɛ mli hũ? Nitsulɔi lɛ ateŋ mɔ kome ni le onukpa ni kwɛɔ lagbee nitsumɔ he lɛ nɔ lɛ kpɛ eyiŋ akɛ ebaatsɔɔ naagba lɛ mli etsɔɔ nɛkɛ nuu ni mli hi nɛɛ. Yɛ sɛɛ mli be fioo ko lɛ, lagbee tsɔne ba he ni atoɔ tsu lɛ shishi yɛ lɛ. Nu ni fa yɛ tsɔne lɛ mli kɛha nitsumɔ lɛ, ni lagbee nitsumɔ he lɛ ŋmɛ gbɛ koni tsɔne lɛ ahi jɛmɛ gbi muu lɛ fɛɛ! Anuɔ shishi akɛ enɛ ha mɛi ni jɛ amɛsuɔmɔ mli amɛba jɛmɛ kɛha nitsumɔ lɛ kɛ amɛtsuii fɛɛ wo nitsumɔ lɛ mli.

Yehowa yelikɛbuamɔ jeɔ kpo faŋŋ yɛ gbɛi krokomɛi ni aye gbɛtsii nii anɔ kunim yɛ mli lɛ hu mli. Akɛ nɔkwɛmɔ nɔ lɛ, beni tsu lɛ maa eshɛ he ko lɛ, no mli lɛ afee nsɛndo lɛ klalo ni esa akɛ akɛ kanei krɛdɛɛi 22 lɛ he nibii lɛ ni atsɔ hiɛ ashɛ aaafee nyɔji kpaanyɔ lɛ ahɔlɔ mli. Shi nitsumɔ he lɛ ha nyɛmimɛi lɛ le akɛ amɛkpa nɔ ni amɛtaoɔ krɛdɛɛ lɛ feemɔ jeeŋmɔ. Mɛni abaanyɛ afee? Ani esa akɛ atsake bɔ ni ato tsu lɛ kɛ nsɛndo lɛ he gbɛjianɔ aha lɛ fɛɛ? Dabi, ejaakɛ yɛ be ni sa pɛpɛɛpɛ mli lɛ, nyɛmimɛi lɛ nu maŋ lɛ mli tsumalɔ ko ni yɔɔ kanei ni tamɔ nakai nɔŋŋ pɛpɛɛpɛ ni kulɛ ekɛbaama tsu ko ni enaaa ema lɛ he.

Amɛbi nuu lɛ akɛ, “Enyiɛ oyɔɔ?”

Eha hetoo akɛ, “Aaafee 25.”

Amrɔ nɔŋŋ pɛ kɛkɛ ni ahe kanei lɛ akɛhɔlɔ he ni esa akɛ akɛhɔlɔ lɛ.

Beni nitsumɔ lɛ yaa nɔ lɛ, mɔ ko ni kpaako ekɛ Yehowa Odasefoi eje Biblia lɛ kasemɔ shishi lɛ hiɛ sɔ tsu fɛfɛo lɛ waa.

Ebi amɛ akɛ, “Nyɛkɛɛa mi, ani nɔ kroko yɛ ni he hiaa nyɛ?”

Nyɛminuu ko ha hetoo akɛ, “Hɛɛ, tsɔne ni awieɔ awoɔ mli ni haa wiemɔ gbɛɛɔ he miihia.”

Kɛkɛ ni mɔ hee ni ena wiemɔ lɛ he miishɛɛ nɛɛ jie eshika wolo ni eŋma shika bɔ ni fa ni baaha anyɛ ahe tsɔne ni awieɔ awoɔ mli lɛ fɛɛ. Nɛkɛ oniatsumɔi nɛɛ kɛ shika ni akɛfa amɛ kɛjɛ Buu Mɔɔ Asafo lɛ yitso ni yɔɔ U.S. Amerika lɛ ye bua ni asafo lɛ gbe nɛkɛ Maŋtsɛyeli Asa fɛfɛo nɛɛ maa lɛ naa.

Bɔni afee ni akɛgbe enɛɛmɛi fɛɛ na lɛ, Saint-Louis Asafo lɛ na miishɛɛ akɛ Nyɛminuu Carey W. Barber, ni ji Yehowa Odasefoi a-Nɔyeli Kuu lɛ mlinyo lɛ aaaba ni ebajɔɔ Maŋtsɛyeli Asa nɛɛ nɔ eha yɛ December 1988. No mli lɛ ato akɛ Nyɛminuu Barber baajɛ Asafo lɛ yitso ni yɔɔ Brooklyn, New York lɛ aba ni ebajɔɔ nitsumɔ he nine tsu hee ni yɔɔ ŋshɔkpɔ ni bɛŋkɛ jɛmɛ ni ji Mauritius lɛ nɔ eha. Beni nyɛmimɛi ni yɔɔ Saint-Louis lɛ nu enɛ lɛ, amɛbua shika ni fa ni sa naa yɛ otsii etɛ pɛ mli koni akɛwo kɔɔyɔɔŋ lɛlɛ ni kɛ lɛ kɛ Mauritius Nitsumɔ he Nine Ajinafoi lɛ ateŋ mɔ kome baafa gbɛ kɛjɛ Mauritius kɛba Réunion lɛ nyɔmɔ. Yɛ bɔ ni amɛshwere kɛjɛ nakai be lɛ mli kɛbaa nɛɛ lɛ hewɔ lɛ, ebabi ni aja St.-Louis asafo lɛ mli enyɔ. Agbɛnɛ asafoi enyɔ yaa Maŋtsɛyeli Asa hee lɛ mli.

Yehowa nɔ Ji Yijiemɔ Lɛ

Ni asafoi krokomɛi ni yɔɔ Réunion lɛ hu? Yɛ bɔ ni mɛi ehere Maŋtsɛyeli shiɛmɔ nitsumɔ lɛ nɔ jogbaŋŋ amɛha hewɔ lɛ, mɛi ni baa kpeei yɛ Maŋtsɛyeli Asai anɔ lɛ eku ebɔ he kɛjɛ nɔ ni kulɛ yɛ oha fɛɛ mli lɛ 50 bafataa he lɛ kɛyashɛ oha fɛɛ mli ni oha kroko bafataa Yehowa Odasefoi ni yɔɔ ŋshɔkpɔ lɛ nɔ lɛ ahe. No hewɔ lɛ akɛ Maŋtsɛyeli Asai babaoo he miihia yɛ Réunion lɛ ka shi faŋŋ. Yɛ anɔkwale mli lɛ, amamɔ etɛ momo kɛjɛ be mli ni ama nɔ ni yɔɔ Saint-Louis lɛ, ni enɛ eha nɔ ni amamɔ lɛ fɛɛ feɔ 13 kɛha asafoi 19 ni yɔɔ ŋshɔkpɔ lɛ nɔ lɛ.

Enɛ he yijiemɔ lɛ fɛɛ yaa Yehowa ŋɔɔ, mɔ ni tsɔ hiɛ egba akɛ: “Mɔ bibioo ko aaatsɔ mɛi akpe, ni mɔ fioo hu aaatsɔ maŋ ni wa; kɛ shɛ ebe lɛ, mi Yehowa, maha afee oya!” (Yesaia 60:22) Taakɛ eji yɛ shikpɔŋ lɛ nɔ hei krokomɛi lɛ, nɛkɛ gbalɛ nɛɛ eba mli anɔkwale yɛ ŋshɔkpɔ fɛfɛo nɛɛ nɔ.