Anɔkwale Jamɔ Naa Samfele Lɛ
GBƆMƐI BABAOO kɛɔ akɛ amɛfata Kristofoi ajamɔ lɛ he yɛ afii ohai 20 nɛɛ mli fe be fɛɛ. Ni kɛlɛ, nɛkɛ afii oha nɛɛ ji nɔ ni haomɔ eba mli fe fɛɛ yɛ adesa yinɔsane mli. Mɛni hewɔ sane nɛɛ kɛ ehe kpaaa gbee lɛ?
Nɔ kome ji akɛ, mɛi pii kɛ hiɛdɔɔ tsuuu amɛjamɔ he nii. Kɛha amɛ lɛ, Kristojamɔ ji nɔ ko kɛkɛ ni yɔɔ, ejeee hewalɛ ko ni yeɔ amɛshihilɛ nɔ. Agbɛnɛ, mɛi ni kɛ hiɛdɔɔ tsuɔ amɛjamɔ he nii lɛ hu kpɛlɛɔ hemɔkɛyeli kɛ tsɔɔmɔi sɔrɔtoi babaoo ni kɛ amɛhe kpaaa gbee, kɛ ekrokomɛi ni hiɛ jeŋba he mlai sɔrɔtoi lɛ anɔ. Ni maŋ, wiemɔ kɛ shika helɛtemɔ mli sɔrɔtofeemɔ egbala amɛmli. Kɛfata he lɛ, amɛyeɔ amɛhe nɔ, amɛwaa amɛhe yi, amɛwuɔ ta amɛshiɔ amɛhe ni amɛgbeɔ amɛhe po. No hewɔ lɛ, “Kristofoi” amaji ji mɛi ni wu tai wuji enyɔ ni fe fɛɛ yɛ yinɔsane mli lɛ.
Mɛɛ sanenaamuu obaana kɛjɛ enɛ mli? Ákɛ, amɛ Kristojamɔ lɛ jeee anɔkwale jamɔ lɛ aloo sɔrɔtofeemɔ agbo ko yɛ kɛɛmɔ ni amɛkɛɔ akɛ amɛji Kristofoi Iɛ kɛ Kristofoi diɛŋtsɛ ni amɛaaji lɛ mli. Taakɛ Yesu Kristo, Kristojamɔ shishijelɔ lɛ tsɔɔ lɛ, sanenaamuu ni ji enyɔ lɛ ji anɔkwale. Be ko lɛ, ewie mɛi komɛi ni tsɛɔ lɛ “Nuŋtsɔ Nuŋtsɔ” lɛ ahe. Yɛ gbɛ kroko nɔ lɛ, amɛkɛɔ akɛ amɛji Kristofoi, amɛkpɛlɛɔ Yesu nɔ akɛ amɛ Nuŋtsɔ. Ni abaana amɛ akɛ mɛi ni bɛ deka kwraa yɛ nitsumɔi komɛi ni tamɔ nɔ ni he hiaa ni amɛmiitsu yɛ egbɛi amli lɛ mli. Shi Yesu baakɛɛ amɛ akɛ: “Mileee nyɛ kwraa, nyɛjea minɔ nyɛyaa, nyɛ mɛi ni nyɛtsuɔ nibii ni ejaaa gbɛ!”—Mateo 7:22, 23.
Eka shi faŋŋ akɛ wɔteŋ mɔ ko sumɔɔɔ ni ehiɔ nakai shihilɛ lɛ mli! Te wɔɔfee tɛŋŋ wɔtsɔɔ kɛji akɛ wɔjeee Kristofoi diɛŋtsɛ aloo jeee nakai wɔji? Ani anɔkwale jamɔ naa samfele ko yɛ?
Samfele Lɛ
Hɛɛ, eko yɛ. Shi Kristojamɔ kɔɔ nibii pii ahe. Akɛ nɔkwɛmɔ nɔ lɛ, esa akɛ Kristofonyo diɛŋtsɛ lɛ ana Nyɔŋmɔ mli hemɔkɛyeli ni wa, ejaakɛ “kɛ hemɔkɛyeli bɛ lɛ, enyɛŋ Nyɔŋmɔ hiɛ asa.” (Hebribii 11:6) Esɛi akɛ mɔ lɛ kɛ ehe awo nitsumɔi kpakpai amli hu. Kaselɔ Yakobo bɔ kɔkɔ akɛ “hemɔkɛyeli ni nitsumɔi bɛ he lɛ ji hemɔkɛyeli gbonyo.” (Yakobo 2:26) Agbɛnɛ, bɔfo Paulo maa bɔ ni ehe hiaa akɛ aaayimɔ “obɔbɔ kɛ esuɔmɔnaa nii alee yɛ mumɔŋ nilee kɛ shishinumɔ fɛɛ mli” lɛ nɔ mi. (Kolosebii 1:9) Shi nibii nɛɛ eko kwraa kɛ Kristojamɔ he samfele lɛ haaa.
Anɔkwa sane lɛ ji akɛ, wɔbaanyɛ wɔna Biblia mli nilee ni hi kɛ hemɔkɛyeli ni mli wa ni wɔkɛ wɔhe awo nitsumɔi kpakpai amli, ni kɛlɛ wɔbaanyɛ wɔfee mɛi ni kɛɔ akɛ amɛji Kristofoi kɛkɛ. Mɛni hewɔ enyɛɔ ebaa lɛ nakai? Bɔfo Paulo jaje akɛ: “Kɛji mikɛ gbɔmɛi kɛ Ŋwɛibɔfoi alilɛi wieɔ, shi mibɛ suɔmɔ lɛ, kulɛ mitsɔ ayawa ni jijeɔ loo ŋmɛlɛ ni gbɛɔ. Ní kɛji miyɛ gbalɛ, ni minaa teemɔŋ nii fɛɛ naa, ni mile nii fɛɛ, ni kɛji miyɛ hemɔkɛyeli fɛɛ hu, bɔ ni manyɛ gɔji matsirɛ, shi mibɛ suɔmɔ lɛ, jikulɛ mijeee nɔ ko. Ni kɛji miŋɔ minii fɛɛ mikuma mɛi, ni kɛji miŋɔ migbɔmɔtso miha ni asha mi, shi mibɛ suɔmɔ lɛ, jikulɛ minaaa sɛɛ ko.”—1 Korintobii 13:1-3.
Hɛɛ, samfele ni haa ayɔseɔ anɔkwale jamɔ ji bɔ ni ehe hiaa akɛ wɔɔyoo akɛ edamɔ suɔmɔ nɔ. Wɔhemɔkɛyeli, nitsumɔi kpakpai, kɛ anɔkwale nilee he miihia, anyɛŋ ajie enɛɛmɛi kɛjɛ mli. Shi kɛji akɛ wɔkɛtsuuu nii yɛ suɔmɔ mli lɛ, yɛ wɔgbɛfaŋ lɛ, sɛɛnamɔ ko kwraa bɛ he. Mɛni hewɔ eyɔɔ nakai lɛ? Mɛni haa su ni ji suɔmɔ lɛ feɔ nɔ titri ni he hiaa fe fɛɛ Iɛ?