Nyɔŋmɔ “Maŋ ni Wa” ni Efee Ekome Iɛ Baakpele Shikpɔŋ Iɛ Nɔ
“Mɔ bibioo ko aaatsɔ mɛi akpe, ni mɔ fioo hu aaatsɔ maŋ ni wa: Kɛ shɛ ebe lɛ, mi, Yehowa, maha afee oya.”—YESAIA 60:22.
1, 2. (a) Mɛni eba jeŋ ekomefeemɔ kɛ gbɛjianɔtoo nɔ? (b) Mɛni baa Yehowa tsuji anɔ yɛ je ni eba shi nɛɛ mli?
1 GBƆMƐI ni le nibii ni yaa nɔ lɛ kpɛlɛɔ nɔ akɛ nɛkɛ je nɛɛ miitsɔ he ni mligbalamɔ kɛ basabasafeemɔ faa yɛ, yɛ be fɛɛ mli. New York Times adafitswaa wolo lɛ jaje akɛ: “Maŋkwramɔŋ basabasafeemɔ miigbɛ kɛmiishwa jeŋ muu fɛɛ fe tsutsu. . . . Basabasafeemɔ babaoo ni yaa nɔ bianɛ lɛ haaa anyɛ abu fɛɛ he akɔntaa.” Ekɛɛ akɛ: “Anɔkwasane lɛ ji akɛ, mɔ ko mɔ ko bɛ ni kudɔɔ je lɛ dɔŋŋ, ni amɛtamɔɔɔ mɛi ni yeɔ mla ko nɔ dɔŋŋ.” Shi, nɔ ni fiteɔ nɛɛ ji nɔ ni Nyɔŋmɔ Wiemɔ lɛ gba fɔ shi kɛha wɔgbi nɛɛ.—2 Timoteo 3:1-5; Mateo 24:3-13.
2 Kɛha Yehowa tsuji ni amɛfee ekome lɛ, nɛkɛ basabasafeemɔ ni yaa nɔ egbɛɔ eshwaa nɛɛ ji okadi diɛŋtsɛ ni tsɔɔ akɛ nibii agbɛjianɔtoo momo ko miibɛŋkɛ enaagbee, yɛ be mli ni nibii agbɛjianɔtoo hee ko hu miipue. (Luka 21:28) Shi kɛlɛ, Yehowa miitsuu ewebii ahe ni eenyiɛ amɛhiɛ kɛmiiya Gbɛjianɔtoo Hee ko mli, yɛ je ni kaseɔ enyɔŋmɔ, Satan Abonsam, ni aba lɛ shi lɛ sui babaoo nɛɛ mli. Ebuaa amɛnaa kɛyaa jamɔ krɔŋŋ, ni awo nɔ grɔŋŋ fe jamɔi fɛɛ, tamɔ akɛma gɔŋ ko nɔ lɛ he. Mɛi ni tsɔɔ amɛhe kɛyaa anɔkwa Nyɔŋmɔ lɛ jamɔ ni efee ekome lɛ he lɛ kɛɔ mɛi krokomɛi akɛ: “Nyɛbaa ni wɔyakwɔa Yehowa gɔŋ lɛ, kɛya Yakob Nyɔŋmɔ lɛ we lɛ, koni etsɔɔ wɔ egbɛ̀i lɛ, ni wɔnyiɛ etempɔŋi Iɛ anɔ.” (Yesaia 2:2, 3) Mɛi ni akɛ amɛ eba nɛkɛ jamɔ mli ekomefeemɔ nɛɛ he lɛ kɛ oyaiyeli miikpa ‘ŋwɛi hee kɛ shikpɔŋ hee ni jalɛ hiɔ mli lɛ gbɛ.’—2 Petro 3:13.
“Gwantɛŋi” Lɛ Ni Agbalaa Amɛmli Kɛjɛɔ “Abotiai” Lɛ Ahe
3, 4. (a) Mɛni nibii baa kɛjɛ 1914 kɛbaa nɛɛ? (b) Mɛɛ gbɛ nɔ atsɔɔ agbalaa gbɔmɛi amli ahaa yiwalaheremɔ yɛ?
3 Taakɛ Biblia gbalɛ ni kɔɔ Nyɔŋmɔ be-buu he lɛ tsɔɔ lɛ, ato “ŋwɛi hee” (Nyɔŋmɔ ŋwɛi Maŋtsɛyeli ni yɔɔ Kristo nɔyeli shishi) lɛ ama shi yɛ 1914 afi ni hiɛdɔɔ yɔɔ mli lɛ mli. Kɛjɛ nakai be lɛ sɛɛ kɛbaa nɛɛ, ágbe “ŋwɛi hee” lɛ mli hefatalɔi nɔyelɔi 144,000 lɛ ahalamɔ naa. (Kpojiemɔ 14:1-4) Agbɛnɛ Yehowa miitsɛ gbɔmɛi ni amɛbafee nakai Maŋtsɛyeli lɛ shishibii yɛ shikpɔŋ nɔ. ‘Amɛbaaba kɛjɛ amanehulu kpeteŋkpele lɛ mli’ akɛ mɛi ni amɛje mli shweshweeshwe koni amɛbaje gbɛjianɔtoo hee lɛ tswaa shishi yɛ Maŋtsɛyeli lɛ gbɛtsɔɔmɔ shishi.—Kpojiemɔ 7:9, 14; Mateo 24:21.
4 Yesu gba nɛkɛ naabuamɔ nɛɛ efɔ shi yɛ nɛkɛ wiemɔi nɛɛ amli: “Shi beni gbɔmɔbi [Kristo] lɛ aaaba yɛ enunyam lɛ mli [yɛ ŋwɛi Maŋtsɛyeli hewalɛ mli], ni bɔfoi krɔŋkrɔŋi lɛ fɛɛ aaafata ehe lɛ, no mli lɛ eeeta enunyam sɛi lɛ nɔ; ni aaabua jeŋmaji lɛ fɛɛ naa yɛ ehiɛ, ni eeegbala amɛmli taakɛ bɔ ni tookwɛlɔ gbalaa gwantɛŋi kɛ abotiai amli lɛ. Ni eeeŋɔ gwantɛŋi lɛ edamɔ eninejurɔ nɔ, shi abotiai lɛ, eeeŋɔ amɛ edamɔ ebɛku nɔ.” Mɛni baajɛ mli aba? Yesu kɛɛ: “Kɛkɛ lɛ maŋtsɛ lɛ aaakɛɛ mɛi ni yɔɔ eninejurɔ nɔ [gbɔmɛi ni tamɔ gwantɛŋi] lɛ, akɛ: Nyɛbaa, nyɛ mɛi ni mitsɛ ejɔɔnyɛ, nyɛbaŋɔa maŋtsɛyeli lɛ ni asaa atonyɛ kɛjɛ jeŋ shishijee lɛ! . . . Kɛkɛ lɛ eeekɛɛ mɛi ni yɔɔ ebɛku nɔ [gbɔmɛi ni tamɔ abotiai] lɛ akɛ: Nyɛjea minɔ, nyɛ mɛi ni alomɔnyɛ, nyɛyaa naanɔ la [naanɔ hiɛkpatamɔ] lɛ ni asaa ato abonsam kɛ ebɔfoi lɛ amli! . . . Ni mɛnɛɛmɛi lɛ, amɛaatee naanɔ hejaramɔ mli; shi jalɔi lɛ aaatee naanɔ wala mli.”—Mateo 25:31-46.
5. Yehowa mɔbɔnalɛ lɛ jeɔ kpo bianɛ yɛ mɛɛ gbɛ nɔ?
5 Shi kɛlɛ, Yehowa ji Nyɔŋmɔ ni naa mɔbɔ ni yɔɔ suɔmɔ. “Etsui shi etoɔ ehaa wɔ, ejaakɛ esumɔɔɔ akɛ mɛi komɛi alaaje, shi moŋ akɛ mɛi fɛɛ atsake amɛtsui.” (2 Petro 3:9) No hewɔ lɛ, dani Nyɔŋmɔ kɛ je ni mli egbala ni kɛ ehe wuɔ ta nɛɛ aaaba enaagbee lɛ, eji esuɔmɔnaa nii akɛ etsuji ajaje naanɔ wala yɛ jalɛ Gbɛjianɔtoo Hee lɛ mli lɛ he hiɛnɔkamɔ lɛ amɛtsɔɔ. No hewɔ lɛ e-Bi lɛ jaje akɛ: “Ni aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba.”—Mateo 24:14.
6. Namɛi Yehowa kɛtsuɔ nii yɛ Maŋtsɛyeli-shiɛmɔ nitsumɔ lɛ mli?
6 Namɛi baashiɛ Maŋtsɛyeli lɛ he sane nɛɛ dani naagbee lɛ aba lɛ? Eka shi faŋŋ akɛ, Yehowa kɛ mɛi ni sumɔɔɔ akɛ amɛaasɔmɔ lɛ lɛ tsuŋ nii. Mɛi ni ekɛ amɛ tsuɔ nii yɛ Maŋtsɛyeli-shiɛmɔ nitsumɔ lɛ mli Iɛ ji mɛi ni jɛɔ amɛsuɔmɔ mli amɛbaa amɛhe shi amɛhaa lɛ. Gbalɛ nɛɛ eba mli yɛ mumɔŋ Israel shwɛɛnii lɛ anɔ akɛ: “Maŋɔ amɛ mato he kome tamɔ tooi ni yɔɔ tsu mli.” (Mika 2:12) “Tooi krokomɛi” lɛ kɛ amɛ naa ekomefeemɔ nɛɛ mli gbɛfaŋnɔ agbɛnɛ. (Yohane 10:16) Mɛnɛɛmɛi fɛɛ ji majimaji-ateŋ Yehowa odasefoi ni amɛfee ekome lɛ. Mɛi ni fata he ji onukpai kɛ gbekɛbii, hii kɛ yei, ejaakɛ lala ni jɛ mumɔ mli lɛ kɛɛ akɛ: “Nyɛjiea Yehowa yi . . . obalahii kɛ obalayei hu, onukpai kɛ gbekɛbii bluublu: Ha amɛjie Yehowa gbɛi lɛ yi.” “Yei ni ‘shiɛɔ sanekpakpa lɛ fa babaoo.”—Lala 148:1, 12, 13; 68:12.
Aashiɛ Yɛ Ekomefeemɔ Mli
7. (a) Mɛɛ ekomefeemɔ Yehowa Odasefoi yɔɔ? (b) Te wɔɔfee tɛŋŋ wɔna nɔmimaa akɛ abaabaa ekomefeemɔ nɛɛ yi?
7 Yehowa, Yesu Kristo kɛ ŋwɛi bɔfoi krɔŋkrɔŋi lɛ kwɛɔ koni Maŋtsɛyeli shiɛlɔi agbɛjianɔtoo ni yɔɔ shikpɔŋ nɔ lɛ ajaje Nyɔŋmɔ sane lɛ yɛ ekomefeemɔ mli. (Mateo 28:19, 20; Yohane 14:26; Kpojiemɔ 14:6, 7) No hewɔ lɛ, Yehowa Odasefoi feɔ nɔ ni Nyɔŋmɔ Wiemɔ ni jɛ mumɔŋ lɛ kɛɔ. ‘Amɛfee ekome yɛ jwɛŋmɔŋ kɛ yiŋtoo mli.’ Amɛkɛ ‘naabu kome woɔ wɔ-Nuŋtsɔ Yesu Kristo Nyɔŋmɔ kɛ Tsɛ lɛ’ hiɛ nyam.—1 Korintobii 1:10; Romabii 15:6.
8. Mɛni he hiaa titri ni no aha ekomefeemɔ yɛ jamɔ mli ashwere?
8 Bɔni afee ni amɛfee ekome yɛ jwɛŋmɔ, yiŋtoo kɛ shiɛmɔ mli lɛ, Yehowa Odasefoi kaseɔ Nyɔŋmɔ Wiemɔ ni ji anɔkwale lɛ daa. Amɛfeɔ enɛ yɛ teemɔŋ, yɛ daa afi kpeei ashishi kɛ agbɛnɛ shii enumɔ yɛ asafoŋ kpeei ashishi daa otsi. Nɛkɛ gbɛ nɔ amɛtsɔɔ amɛnaa mumɔŋ niyenii ni feɔ amɛ ekome kɛjɛɔ Yehowa okpɔlɔ nɔ. (Mateo 24:45-47; Hebribii 10:24, 25) Ayɔseɔ nɛkɛ Biblia mli tsɔsemɔ nɛɛ akɛ eji oti ni feɔ amɛ ekome yɛ jamɔ mli lɛ. Taakɛ Katolek niŋmalɔ William Whalen kɛɛ yɛ wolo tɛtrɛɛ U.S. Catholic lɛ mli lɛ: “[Yehowa Odasefoi] a-Maŋtsɛyeli Asa fɛɛ Asa kɛ tsɔsemɔ babaoo haa onukpai yɛ nyɔŋ kome mli fe bɔ ni Katolek asafoi babaoo feɔ yɛ afi muu fɛɛ mli.” Hɛɛ, Biblia mli tsɔsemɔ ji oti ni haa anaa “jwɛŋmɔ kome,” “yiŋtoo kome,” “naabu kome.”
9. Te wɔɔfee tɛŋŋ wɔyoo mɛi ni Yehowa kɛ amɛ tsuɔ nii ni amɛshiɛ Maŋtsɛyeli lɛ he sane lɛ?
9 Kɛji akɛ oyiŋ feɔ bo kɔshikɔshi yɛ mɛi ni Yehowa kɛtsuɔ nii koni amɛshiɛ “emaŋtsɛyeli lɛ he sanekpakpa” lɛ he lɛ, bi bo diɛŋtsɛ ohe akɛ: Kɛ aŋkroaŋkroi komɛi tee mɛi komɛi ashia koni amɛyawie Yehowa kɛ e-Maŋtsɛyeli lɛ he sane amɛtsɔɔ mɛi lɛ, namɛi yaa shiai nɛɛ amli lɛ? Ale jogbaŋŋ akɛ amɛji Yehowa Odasefoi. Shii enyiɛ gbɔmɛi ni jɛ jamɔi krokomɛi amli lɛ baa oŋɔɔ koni amɛkɛ bo abawie Yehowa kɛ e-Maŋtsɛyeli lɛ he? Shii enyiɛ po nɛkɛ gbɔmɛi nɛɛ wieɔ enɛɛmɛi ahe yɛ he ko? Mɛi ni yɔɔ je lɛŋ jamɔi sɔrɔtoi ni mli egbala lɛ amli lɛ efee dioo yɛ Yehowa kɛ e-Maŋtsɛyeli lɛ he. Amɛteŋ mɛi fioo ko pɛ le mɔ ni Yehowa ji kɛ nɔ ni e-Maŋtsɛyeli lɛ baafee aha shikpɔŋ lɛ. Shi kɛlɛ, Yehowa kɛ e-Maŋtsɛyeli lɛ ji saji ni hosoɔ je lɛ, ejaakɛ, taakɛ Daniel 2:44 gba fɔ shi lɛ, etsɛŋ ni Yehowa Maŋtsɛyeli lɛ ‘baajwara ni ekpata nɔyelii krokomɛi lɛ fɛɛ ahiɛ ni ekome too pɛ baaye nɔ kɛya naanɔ.’
Shweremɔ Ni Etee Nɔ Oyayaayai Kɛjɛ Shishijee Bibii Amli
10. Te Yehowa Odasefoi ayifalɛ yɔɔ tɛŋŋ dani 1914 shɛ, shi te esa akɛ wɔbu nɔ ni anyɛ atsu yɛ nakai be lɛ mli lɛ tɛŋŋ?
10 Ŋmɛnɛŋmɛnɛ gbii nɛɛ amli Maŋtsɛyeli shiɛmɔ lɛ je shishi yɛ gbɛ bibioo nɔ. Kɛjɛ afi 1870 afii lɛ amli kɛbashi afi 1914 ni nibii babaoo kɔɔ he lɛ mli lɛ, no mli lɛ Maŋtsɛyeli shiɛlɔi lɛ ayi faaa. Shi nakai anɔkwafoi lɛ to nitsumɔ shishi amɛha nɔ ni baaba lɛ. Yɛ be mli ni aje shishi bibioo lɛ, ekaiɔ wɔ ŋmalɛ ni kɛɔ akɛ akagbe “nibii bibii agbi lɛ he guɔ” lɛ. (Zakaria 4:10) Kɛha Yehowa tsuji lɛ, eji “nibii bibii agbi” dani 1914 ba, shi etsɛŋ ni babaoo baaba.
11, 12. (a) Mɛɛ odaseyeli yɔɔ ni tsɔɔ akɛ mumɔ krɔŋkrɔŋ lɛ miitsu nii yɛ 1914 sɛɛ? (b) Mɛni awie ni kɔɔ Maŋtsɛyeli nitsumɔ lɛ he yɛ nɔ ni fe afii 30 nɛ, ni mɛni wɔbaanyɛ wɔkɛɛ yɛ he bianɛ?
11 Beni Jeŋ Ta I je shishi yɛ 1914 pɛ kɛkɛ ni nibii agbɛjianɔtoo momo lɛ bote ‘enaagbee gbii’ lɛ amli. (2 Timoteo 3:1) Maŋtsɛyeli nɔyeli hu je shishi yɛ 1914. (Kpojiemɔ 12:10-12) Kɛkɛ ni akɛ hewalɛ wo Kristo dɛŋ koni eje shishi egbala “gwantɛŋi” lɛ kɛjɛ “abotiai” lɛ ateŋ. No hewɔ lɛ Nyɔŋmɔ mumɔ krɔŋkrɔŋ lɛ je shishi yɛ etsuji anɔkwafoi lɛ anɔ. (Okɛto Bɔfoi lɛ Asaji 2:16-21 he.) Maŋtsɛyeli shiɛlɔi lɛ ayifalɛ tee hiɛ kɛjɛ 4,000 yɛ afi 1918 mli kɛtee nɔ ni fe 260,000 yɛ 1948 mli, ni ji akɛ, yɛ afii 30 mli. Nakai be lɛ mli C. S. Braden, Nyɔŋmɔjamɔ yinɔsane he nilelɔ lɛ ŋma akɛ: “Yehowa Odasefoi kɛ amɛ odaseyeli lɛ eha shikpɔŋ muu lɛ fɛɛ nɔ diɛŋtsɛ. . . . Abaanyɛ akɛɛ yɛ anɔkwale mli akɛ, Nyɔmɔjamɔ kuu ko bɛ je lɛ mli ni amɛjie ekãa kɛ hekamɔ babaoo koni amɛkɛgbɛ Maŋtsɛyeli lɛ he sanekpakpa lɛ amɛtsɔɔ je lɛ fe Yehowa Odasefoi”
12 Shi, nɔ ni fe afii 30 ni eho nɛ! Ŋmɛnɛ, Maŋtsɛyeli shiɛlɔi ayibɔ ni fe 1948 nɔ̃ lɛ nɔ toi nyɔŋma yɔɔ je lɛŋ fɛɛ! Akɛni, taakɛ Braden wie lɛ, Yehowa Odasefoi kɛ Maŋtsɛyeli shiɛmɔ lɛ “eha shikpɔŋ muu Iɛ fɛɛ nɔ” diɛŋtsɛ hewɔ lɛ, mɛni abaanyɛ awie yɛ Maŋtsɛyeli nitsumɔ lɛ dalɛ he bianɛ? Ni wɔbaanyɛ wɔkɛɛ enɛ kɛ hekɛnɔfɔɔ: Babaoo diɛŋtsɛ baaba yɛ wɔsɛɛ be ni ka wɔhiɛ nɔŋŋ lɛ mli!
13. Mɛni nibii ni yaa nɔ yɛ je lɛŋ fɛɛ tsɔɔ akɛ Yesaia 60:22 mlibaa miiya nɔ?
13 Amaniɛbɔɔi ni baa kɛjɛɔ shikpɔji fe 200 nɔ lɛ tsɔɔ Maŋtsɛyeli shiɛlɔi lɛ ayifalɛ ni yaa hiɛ yɛ be fɛɛ mli. Bɔni afee ni ekɛ enɛ akpa gbee lɛ, amamɔ Buu Mɔɔ Asafo lɛ tsũi heei aloo aalɛɛ amɛsɔɔmɔ nitsumɔ he gbɛjianɔtooi lɛ amli. Amɛna tsɔnei heei, kɛ gbɛ̀i heei ni atsɔɔ nɔ akalaa woji oyayaayai, kɔmpiuta tsɔnei ni akɛtsuɔ nii yɛ gbɛ ni da nɔ, kɛ nitsulɔi ni jɛɔ amɛsuɔmɔ mli amɛtsuɔ nii yɛ Betel wekui ni miishwere yɛ je lɛŋ fɛɛ lɛ amli. Nɛkɛ nitsumɔ mli lɛɛmɔ aloo emli gbelemɔ ni yaa nɔ oyayaayai lɛ kɛɔ wɔ akɛ wɔmiina shiwoo ni shɛjeɔ wɔ mii ni áwie he jeeŋmɔ ni kɔɔ Nyɔŋmɔ tsulɔ anɔkwafo ni toɔ etsui shi lɛ he lɛ mlibaa: “Mɔ bibioo ko aaatsɔ mɛi akpe, ni mɔ fioo hu aaatsɔ maŋ ni wa: Kɛ eshɛ ebe lɛ, mi, Yehowa, maha afee oya!” (Yesaia 60:22) Ŋwanejee ko bɛ anɔkwale ni eji akɛ aawula Yehowa Odasefoi yɛ mumɔŋ, ni aasaa amɛ hu yɛ gbɛjianɔtoo naa koni amɛye Yehowa kɛ e-Maŋtsɛyeli lɛ he odase kpeteŋkpele ni fe fɛɛ yɛ je lɛ yinɔsane mli lɛ he!
14. Mɛni hewɔ wɔbaanyɛ wɔkɛɛ akɛ Yehowa tsuji nyiɛ gbɛ kɛmiiya ni amɛyafee “maŋ ni wa”?
14 Ŋmɛnɛ, Kristofoi ni ji sanekpakpa lɛ he sɔɔlɔi fe akpekpei enyɔ kɛ fã yɔɔ je lɛŋ. Anaa amɛ yɛ asafoi fe 46,000 amli yɛ je lɛŋ he fɛɛ he. Beni Yehowa Odasefoi bua amɛhe naa yɛ March 29, 1983 koni amɛkai Kristo gbele lɛ, aŋkroaŋkroi 6,767,707 kpe kutuu, ni amɛkɛtsɔɔ miishɛɛ ni amɛyɔɔ yɛ Nyɔŋmɔ Maŋtsɛyeli lɛ he. Nakai yibɔ lɛ miihe afe gbɔmɛi ni yɔɔ je lɛŋ maji komekomei lɛ amli lɛ amlijaa etɛ mli enyɔ mli gbɔmɛi! Eji anɔkwale akɛ Yehowa tsuji ni amɛfee ekome lɛ nyiɛ gbɛ kɛmiiya ni amɛyafee “maŋ ni wa,” eyɛ mli akɛ kɛ akɛ amɛ to jeŋ gbɔmɛi fɛɛ ayifalɛ aaafee akpekpei toi akpekpei ejwɛ lɛ he lɛ, amɛyi faaa kwraa.—Mateo 7:13, 14.
15. Mɛni eba yɛ afii fioo ni eho nɛɛ amli ni kɔɔ gbɔmɛi ni tamɔ gwantɛŋi lɛ anaabuamɔ he?
15 Gbɔmɛi ni tamɔ gwantɛŋi lɛ anaabuamɔ lɛ miiya nɔ kɛ foi amrɔ nɛɛ. Gbɔmɛi ni hiɛ tsuijurɔ lɛ miiho yuu kɛmiiba Yehowa gbɛjianɔtoo lɛ mli kɛha jamɔ. Yɛ enɛ feemɔ mli lɛ belɛ amɛmiiba gbalɛ ko ni yɔɔ miishɛɛ ni Nyɔŋmɔ ewo shi yɛ he yɛ Hagai 2:7 lɛ miiba mli, he ni Yehowa kɛɔ yɛ akɛ: “Ni mahoso jeŋmaji fɛɛ kwa, ni jeŋmaji lɛ fɛɛ anii ni jara wa lɛ aaaba, ni mikɛ anunyam sɔŋŋ aaawo shia nɛɛ obɔ, Yehowa Zebaot kɛɛ.” Nɛkɛ aŋkroaŋkroi ni jara wa ni baa amɛhe shi nɛɛ kɛɔ Yehowa tsuji lɛ akɛ: “Wɔkɛnyɛ aaatee; ejaakɛ wɔnu akɛ Nyɔŋmɔ kɛnyɛ yɛ.”—Zakaria 8:23.
16, 17. Mɛɛ gbɛ nɔ Yehowa baatsɔ ni ekɛ ewebii atsu nii dani ekɛ nibii agbɛjianɔtoo ni leee Nyɔŋmɔ nɛɛ aba enaagbee?
16 Yehowa gbɛjianɔtoo ni anaa ni mli lɛɛɔ lɛ miibɛŋkɛ be ni ekɛbaatsu nii yɛ gbɛ kroko ni da waa nɔ: koni ejaje enaagbee kojomɔ sane lɛ eshi gbɛjianɔtoo nɛɛ. Enɛ baatamɔ be ni Israelbii lɛ ni ebɔle Yeriko he shikome daa gbi, gbii ekpaa lɛ, afa amɛ akɛ: “Ni gbi ni ji gbi kpawo lɛ, nyɛbɔlea maŋ lɛ shii kpawo, ni osɔfoi lɛ akpa tɛtrɛmantrɛi lɛ. Ni aaaba mli akɛ, kɛ . . . nyɛnu tɛtrɛmantrɛ lɛ gbɛɛmɔ lɛ, maŋ muu lɛ fɛɛ abɔ oshe wulu, ni maŋ lɛ gbogbo lɛ aaagbee shi shwɛtɛɛ” lɛ. No hewɔ lɛ, nitsumɔ lɛ tee nɔ kɛ oyaiyeli shii toi kpawo yɛ naagbee gbi lɛ nɔ! Kɛkɛ ni akpa tɛtrɛmantrɛi lɛ, ni gbɔmɛi lɛ bɔ oshe kpeteŋkpele ni “gbogboi lɛ gbee shi shwɛtɛɛ.”—Yoshua 6:2-5, 20.
17 Ŋmɛnɛ, akɛ anɔkwale nu ni mli “jɔ” lɛ miiya gbɔmɛi lɛ aŋɔɔ koni akɛwo amɛ hewalɛ ni amɛtsɔ amɛhe kɛba Yehowa ŋɔɔ. Shi etsɛŋ ni gbi lɛ baaba ni shɛɛ sane lɛ baatsɔ nɔ ni “wa.” Ebaatswa Satan gbɛjianɔtoo lɛ fɛɛ naagbee ni baa lɛ he adafi. Anɔkwale nui ni mli jɔ, ni waaa lɛ baafi ni ebaawa keketee tamɔ anɔkwale nyɔŋmɔŋtɛi. Bɔ ni nɛkɛ naagbee kojomɔ saji nɛɛ mli baawa aha lɛ baaha akɛto “nyɔŋmɔŋtɛi babaoo ni amɛtsiimɔ tamɔ talenta” he, ni ji akɛ, nɔ ni dara naakpaa. No hewɔ ni Kpojiemɔ 16:21 kɛɔ akɛ: “Nyɔŋmɔŋtɛi lɛ ahaomɔ lɛ . . . da tsɔ.”
“Maŋ Ni Wa” Epele Shikpɔŋ Lɛ Nɔ
18. (a) Te Nyɔŋmɔ Maŋtsɛyeli lɛ ji nɔ ni yɔɔ diɛŋtsɛ ha tɛŋŋ? (b) Mɛni Daniel 2:35 tsɔɔ akɛ yɛ naagbee lɛ Maŋtsɛyeli lɛ baafee?
18 Nyɔŋmɔ Maŋtsɛyeli lɛ ni Yehowa Odasefoi baa amɛhe shi amɛhaa no klɛŋklɛŋ lɛ ji nɔyeli diɛŋtsɛ. Eyɛ Kristo kɛ ehefatalɔi 144,000 lɛ akɛ ŋwɛi nɔyelɔi hefatalɔi. Eyɛ mlai diɛŋtsɛ kɛ “maŋnɔyeli gbɛjianɔtoo”—Nyɔŋmɔ Wiemɔ lɛ. Nɛkɛ nɔyeli diɛŋtsɛ nɛɛ hu yɛ eshishibii diɛŋtsɛ ni feɔ maŋ ko ni miishwere, akpekpei abɔ ni amɛfee ekome. Ni Biblia lɛ egba efɔ shi akɛ yɛ be mli ni nɛkɛ Mesia Maŋtsɛyeli nɛɛ ejwara je lɛŋ nɔyelii fɛɛ kɛjɛ shihilɛ mli lɛ, ‘ebaakpele shikpɔŋ lɛ fɛɛ nɔ.’ (Daniel 2:35) Mɛɛ gbɛ nɔ enɛ aaatsɔ aba yɛ?
19, 20. Te Yehowa tsuji aaafee tɛŋŋ ni amɛbatsɔ “maŋ ni wa” diɛŋtsɛ yɛ nakai shishinumɔ lɛ naa?
19 Mɛi ni jeɔ Harmagedon mli lɛ baaje shishi atswa Paradeiso ni Yesu wie he yɛ Luka 23:43 lɛ amɛma shi. (Kpojiemɔ 16:14, 16) Kɛkɛ lɛ, yɛ be ni sa mli lɛ, “gbohiiashitee baaba, ni jalɔi kɛ mɛi ni ejaaa fɛɛ baate shi.” (Bɔfoi lɛ Asaji 24:15) Yɛ Kristo Afii Akpe Nɔyeli yɛ Maŋtsɛyeli hewalɛ mli lɛ shishi lɛ, akɛ hegbɛ baaha amɛteŋ mɔ fɛɛ mɔ ni amɛdamɔ Maŋtsɛyeli nɔyeli lɛ masɛi. Abaajie mɛi ni sumɔɔɔ jalɛ nɔyeli lɛ kɛya kɛtsɔ amɛhiɛkpatamɔ nɔ. (Kpojiemɔ 20:6, 11-15) No hewɔ lɛ, yɛ afii akpe lɛ naagbee lɛ, mɔ fɛɛ mɔ ni hiɔ wala mli yɛ shikpɔŋ lɛ nɔ lɛ baafee Yehowa jálɔ ni etu ehe eha lɛ! Kɛkɛ lɛ abaanyɛ akɛɛ akɛ Yesaia 11:9 eba mli kwraa akɛ: “Shikpɔŋ lɛ nɔ aaayi obɔ kɛ Yehowa he nilee, tamɔ bɔ ni nu ha ŋshɔ shishi lɛ.”
20 Mɛɛ anunyam be enɛ aaaji nɛkɛ! Mɔ fɛɛ mɔ ni okɛ lɛ aaakpe lɛ baafee Yehowa jálɔ ni hiɛ “jwɛŋmɔ kome,” “yiŋtoo kome, “naabu kome.” Jálɔi ni amɛfee ekome nɛɛ ateŋ akpekpei toi akpekpei abɔ ni áwo amɛnɔ kɛyashɛ adesa emuuyeli mli lɛ baayi Paradeiso shikpɔŋ lɛ nɔ obɔ. Amɛbaafee “maŋ ni wa” lɛlɛŋ, maŋ ni wa fe fɛɛ ni shikpɔŋ lɛ ena. Dabi, adesa weku lɛ ni efee ekome lɛ jeee lamɔ ko kɛkɛ. Aatsu he nii bianɛ! Ani oji amɛteŋ mɔ ko?a
[Shishigbɛ niŋmai]
a Ajie kɛjɛ March 15, 1984 Blɔfo Buu-Mɔɔ lɛ mli.
Sanebimɔi Kɛha Emlitii
□ Yɛ be mli ni basabasafeemɔ yaa nɔ babaoo yɛ je lɛ mli lɛ, mɛni baa Yehowa webii ateŋ?
□ Mɛɛ mligbalamɔ nitsumɔ kpeteŋkpele ko yaa nɔ bianɛ?
□ Mɛni hewɔ wɔbaanyɛ wɔna hekɛnɔfɔɔ akɛ abaabaa ekomefeemɔ ni ka Yehowa tsuji ateŋ lɛ yi lɛ?
□ Mɛɛ gbɛ nɔ Yehowa gbɛjianɔtoo ni anaa lɛ yaa nɔ edaa efeɔ “maŋ ni wa,” ni mɛni baajɛ enɛ mli aba?
[Mfoniri ni yɔɔ baafa 15]
Taakɛ tookwɛlɔ gbalaa gwantɛŋi kɛjɛɔ abotiai ateŋ lɛ, nakai Yesu Kristo ni yɔɔ Maŋtsɛyeli hewalɛ mli lɛ gbalaa gbɔmɛi ateŋ ŋmɛnɛ
[Mfonirii ni yɔɔ baafa 17]
Aamamɔ aloo aalɛɛ Betel shiai kɛ nitsumɔhei ni tamɔ enɛɛmɛi amli kɛha Maŋtsɛyeli-shiɛmɔ nitsumɔ lolo
Ebina, Japan
Abidjan, Ivory Coast
Ingleburn, N.S.W. Australia
Enebakk, Norway
Ajalvir (Madrid) , Spain