‘Harmagedon Yinɔ’

New York Daily News adafitswaa wolo lɛ bɔ amaniɛ akɛ, “Beni eshwɛ gbii enumɔ dani awuyelɔi komɛi kɛ okpɛlɛmii aaagbe Amerika asraafoi babaoo yɛ Beirut lɛ, abɔ amaniɛ akɛ Maŋnukpa Reagan kai Biblia mli gbalɛ ko ni ekɛɛ akɛ eesusu kɛji akɛ je lɛ kɛ ‘Harmagedon’ miikpe lɛ he.” Bɔ ni amaniɛbɔɔ lɛ tsɔɔ lɛ, Reagan kɛɛ yɛ sane ko ni ekɛ Thomas Dine, onukpa ni kwɛɔ Amerika kɛ Israel maŋ saji ajinafoi asaji anɔ lɛ gba yɛ telefon nɔ lɛ mli akɛ: “Ani ole nɔ ko, migbalaa mijwɛŋmɔ kɛyaa nyɛ blema gbalɔi ni yɔɔ Kpaŋmɔ Momo lɛ mli lɛ kɛ okadii ni tsɔɔ akɛ Harmagedon miiba lɛ anɔ, ni minaa ni miisusu miyiŋ akɛ​—ani wɔji yinɔ ni baana enɛ lɛ lo?” Ekɛfata he akɛ: “Mileee kɛji akɛ okadi nakai gbalɛi lɛ ekomɛi nyɛsɛɛ nɛɛ, shi esa akɛ ohe mi oye akɛ amɛtsɔɔ shihilɛi kɛ bei ni wɔtsɔɔ mli bianɛ lɛ shishi.”

Eji nɔ ni sa kadimɔ akɛ je lɛŋ hiɛnyiɛlɔi lɛ naa okadii ŋmɛnɛ ni tsɔɔ akɛ jaramɔ bei miiba. Shi ani amɛle akɛ okadii ni baa mli bianɛ lɛ tsɔɔ nibii agbɛjianɔtoo nɛɛ “naagbee gbii” lɛ? (2 Timoteo 3:​1-5; Mateo 24:​3-14) Eka shi faŋŋ akɛ amɛleee he nɔ ko, ejaakɛ amɛsumɔɔɔ ni amɛjɛɔ amɛsuɔmɔ mli amɛŋmɛɛɔ amɛ nɔyelii lɛ ahe amɛhaa Nyɔŋmɔ Maŋtsɛyeli ni áto ama shi ni etsɛŋ ebaaye adesa nɔyelii fɛɛ najiaŋ lɛ.​—Daniel 2:⁠44.