Gbɛ Ni Lɛɛ​—Nɛɛgbɛ Eyaa?

● Beni Roma Katolik Nyɔŋmɔ he nikaselɔ ko ni atsɛɔlɛ Andrew M. Greeley wieɔ “hemɔkɛyeli ni ayɔɔ akɛ Katoliknyofeemɔ ji jamɔ ko ni damɔ mlai anɔ ni esani oye mlai lɛ fɛɛ nɔ dani atsɛ bo Katoliknyo lɛ he lɛ, eha hetoo akɛ: “Ebɛ mli nakai, ni afeko nakai hu dã. Ekɛɛ akɛ: “Obaanyɛ oku mlai sɔrɔtoi fɛɛ mli ni nakai be mli nɔŋŋ lɛ atsɛ bo Katoliknyo.”

Akɛ nɔkwɛmɔnɔ lɛ, ekɛɛ akɛ: “Mɔ ko baanyɛ akɛɛ akɛ bɔlɛ ni akɛ mɛi sɔrɔtoi aaana lɛ ehiii taakɛ bɔni mikɛɔ lɛ. Mɔ ko baanyɛ esusu akɛ eji esha, ni ebaanyɛ efee anɔkwale hu. Shi no etsɔɔɔ akɛ mɛi ni kpɛlɛɔ nakai nifeemɔ lɛ nɔ lɛ nyɛɛɛ afee sɔlemɔ lɛ mlibii dɔŋŋ aloo ashwie mɛi ni kɛ amɛhe woɔ nakai bɔlɛnamɔ lɛ mli lɛ kɛjɛ asafo lɛ mli. Greeley tee nɔ ejaje akɛ: “Kɛjɛ jeeŋmɔ lɛ, atsi Katoliknyofeemɔ naa husu Iɛ kɛtee shɔŋŋ bɔni afee ni anyɛ aŋɔ mɛi babaoo ni abaanyɛ lɛ kɛba toikuu lɛ mli.”

Shi ani nɛkɛ nitsɔɔmɔ nɛɛ ii Katolik ‘su kpakpa,’ aloo kwashiasane yɛ Ŋmalɛ naa? Yesu ha hetoo akɛ: “Nyɛbotea agbo fintɔɔ lɛ mli. Ejaakɛ agbo ni lɛɛ kɛ gbɛ tɛtrɛɛ lɛ ji nɔni kɛ mɔ yaa hiɛkpatamɔ mli, ni mɛi pii ji mɛi ni tsɔɔ nakai gbɛ lɛ nɔ. Kwɛ bɔni agbo lɛ yɔɔ fintɔɔ ni enɔ etsa eha, ni no ji nɔni kɛ mɔ yaa wala mli! Ni mɛi fioo pɛ ji mɛi ni naa no.”​—Mat. 7:​13, 14. “Catholic Confraternity.”

● Kɛyashi beni nakai gbɔmɛi lɛ aaatsake amɛsubaŋ lɛ, bɔni Nyɔŋmɔ jwɛŋmɔ ji yɛ sane lɛ he lɛ jeɔ kpo lolo yɛ mla nɛɛ mli akɛ: “Okɛ nyɛmi Kristofonyo ni baa jeŋba gbonyo, aloo eji ojotswalɔ, aloo wɔŋjalɔ, aloo oshekuyelɔ, aloo dãatɔlɔ, aloo eyeee anɔkwa lɛ akabɔ; okɛ mɛi ni tamɔ nakai lɛ akaye nii tete. . . . Esani nyɛshwie nɛkɛ efɔŋfeelɔ nɛɛ kɛjɛ nyɛteŋ.”​—1 Kor. 5:​11, 13, Katolik “Jerusalem Bible.”

December Daa Gbi Ŋmalɛ

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)