Gbi Ko Ni Atsu He Nii Jogbaŋŋ

YEHOWA NYƆŊMƆ jɔɔ mɛi ni jaalɛ lɛ amɔdɛŋbɔi. Enɛ jeɔ kpo faŋŋ yɛ yoo Kristofonyo ko ni yɔɔ Amsterdam lɛ niiashikpamɔ mli. Yɛ ewu ni ejɔɔ ehe kɛjɛ nitsumɔ mli ni eyɔɔ shia daa lɛ shiteekɛwoo hewɔ lɛ, efɔɔɔ hegbɛ namɔ ni ekɛ Yehowa Odasefoi lɛ ayashiɛ Maŋtsɛyeli shɛɛ lɛ yɛ shia kɛ shia.

Shi gbi ko lɛ, yoo nɛɛ wu lɛ to gbɛjianɔ akɛ ebaaya woo. Enɛ ji klɛŋklɛŋnɔ̃ yɛ afii pii amli ni nuu nɛɛ baashi shia gbi muu. Yoo lɛ fee ejwɛŋmɔ akɛ ebaaya jaa nɔ aloo ebaayashara shi yɛ ŋshɔ naa nakai gbi lɛ. Shi yɛ no najiaŋ lɛ, esɔle eha Yehowa ni ekɛ nakai hegbɛ lɛ tee shiɛmɔ moŋ.

Nakai gbi lɛ nɔ lɛ, yoo nɛɛ kɛ wolo bibioo ko ha nuu ko ni esako ehe jogbaŋŋ lɛ yɛ shia ko. Beni eyaa shia kroko mli lɛ, nuu lɛ kɛɛ akɛ:

“Ofainɛ, mɛɛ dã. Efee mi akɛ okɛ mi baawie wolo lɛ he.” Kɛkɛ ni yoo lɛ to gbɛjianɔ akɛ ebaaku esɛɛ eba yɛ hiŋmɛitswaa fioo komɛi asɛɛ beni nuu lɛ esaa ehe egbe naa. Nuu lɛ tsɔɔ miishɛɛ kpele yɛ Biblia mli anɔkwale lɛ he, shi ekɛɛ akɛ ‘eŋa’ kɛ ebii eshilɛ. Akɛni sane lɛ efee Odasefonyo lɛ mɔbɔ hewɔ lɛ, etee eyasara yoo lɛ, ni yoo Iɛ kɛɛlɛ akɛ ewu lɛ tɔɔ dãa tsɔ ni eyiɔlɛ kɛ gbekɛbii lɛ fɛɛ. Bɔni nibii balɛ hewɔ lɛ, klɛŋklɛŋ lɛ, ekɛ nuu nɛɛ kɛ yoo lɛ fee Biblia nikasemɔ aŋkroaŋkro. Sɛɛ mli lɛ, amɛbafee ekome ekoŋŋ ni amɛbɔ̃i Kristofoi akpee yaa; etsɛɛɛ ni amɛkɛ amɛgbalashihilɛ lɛ yawo mla shishi. Amɛyi enyɔ lɛ fɛɛ ekpa tawa shɛlemɔ, ni amɛmiiya hiɛ yɛ mumɔ mli. Belɛ Yehowa Odasefonyo nɛɛ kɛ jwɛŋmɔ kpakpa daa Nyɔŋmɔ shi akɛ ejɔɔ nakai gbi ni ekɛtsu nii jogbaŋŋ yɛ esɔɔmɔ mli lɛ.