Nɔ xwedó kpɔ́ndéwú mɛɖéesɔ́hwe tɔn Jexóva tɔn

1. Aniwú mɛɖéesɔ́hwe Jexóva tɔn ka jí wǔ?

ÉNYÍ a kpɔ́n mɛ ɖěɖěe ɖo tɛn acɛkpikpa tɔn mɛ ɖo égbé lɛ́ é ɔ, a ka ná ɖɔ ɖɔ yě nɔ sɔ́ yěɖée hwe a? Dóó ǎ. É ɖo mɔ̌ có, Jexóva e nyí Nǔbǐwúkpétɔ́ ɔ é nɔ sɔ́ éɖée hwe. (Ðɛh. 113:5-8) Mɛ ɖěbǔ nɔ sɔ́ éɖée hwe sɔ Jexóva ǎ; goyíyí sín wuntun ɖěbǔ ɖo wǔ tɔn ǎ. Ðo xóta élɔ́ mɛ ɔ, mǐ ná gbéjé ali ɖaaɖagbe e nu Jexóva nɔ wa nǔ xá mǐ ɖe é ɛnɛ kpɔ́n, bo ná lɛ́ kpɔ́n lěe ali énɛ́ lɛ́ ɖokpó ɖokpó nɔ xlɛ́ ɖɔ é nɔ sɔ́ éɖée hwe tawun gbɔn é. Mǐ ná lɛ́ mɔ lěe Jezu xwedó kpɔ́ndéwú mɛɖéesɔ́hwe tɔn Tɔ́ tɔn tɔn gbɔn é. Nǔ énɛ́ lɛ́ gbígbéjé kpɔ́n ná d’alɔ mǐ bɔ mǐ ná sɛkpɔ́ Jexóva bo ná lɛ́ xwedó kpɔ́ndéwú mɛɖéesɔ́hwe tɔn tɔn hú gǎn.

JEXÓVA NYƆ́ LYÁ

2. Étɛ́ Ðɛhan 62:9 ka ɖe xlɛ́ dó Jexóva wú? (Kpɔ́n ɖiɖe ɔ lɔmɔ̌.)

² Goyítɔ́ lɛ́ nɔ nyɔ́ lyá hwebǐnu ǎ. Mɔ e yě nɔ mɔ yěɖée zɛ xwé wú é nɔ zɔ́n bɔ yě nɔ wa nǔ ɖo ali ɖé lɛ́ nu, b’ɛ nɔ zɔ́n bɔ mɛ ɖěvo lɛ́ nɔ xo nǔ kpɔ́n dó sisɛkpɔ́ yě wú, alǒ, nɔ gbɔ bo nɔ ɖó wǔ zɔ nú yě. Jexóva ka gbɔn vo tawun! Ðó Tɔ́ mǐtɔn jǐxwé tɔn ɔ nɔ sɔ́ éɖée hwe wútu ɔ, é byɔ́ mǐ ɖɔ mǐ ní sɛkpɔ́ émí, bo nɔ ɖɔ nǔ ɖěɖěe ɖo ayi mɛ ɖu nú mǐ wɛ lɛ́ é nú émí. (Xa Ðɛhan 62:9.) Lěe Tɔ́ wǎnyíyínɔ ɖé nɔ ɖo gbesisɔmɛ bá ɖótó nǔ e ɖo ayi mɛ ɖu nú vǐ tɔn lɛ́ wɛ é gbɔn é ɔ, Jexóva nɔ ɖótó ɖɛ mɛsɛntɔ́ tɔn lɛ́ tɔn kpó akpakpa sɔ́ mɛ kpó. Nǔgbó ɔ, ɖɛ énɛ́ lɛ́ gěgé ɖo Biblu mɛ. Énɛ́ xlɛ́ lěe é nyɔ́ lyá sɔ é. (Joz. 10:12-14; 1 Sam. 1:10-18) Amɔ̌, ɖó hwɛjijɔ ɖé lɛ́ wú ɔ, ényí mǐ ka mɔ ɖɔ mǐ kún jɛxá bá sɛkpɔ́ Jexóva ó hweɖélɛ́nu ɔ ka lo?

3. Étɛ́wú a ka sixú kú d’é jí ɖɔ Jexóva ba ɖɔ hwi ní nɔ xo ɖɛ sɛ́dó émí hwɛhwɛ?

³ Mǐ sixú sɛkpɔ́ Jexóva ɖo ɖɛ mɛ ényí mǐ tlɛ mɔ ɖɔ mǐ kún jɛxá wǎnyíyí tɔn ó ɔ nɛ́. Étɛ́wú mǐ ka sixú ɖɔ mɔ̌? Ðo nǔjlɛ́dónǔwú Jezu tɔn e kunkplá vǐ súnnu e bú é mɛ ɔ, é jlɛ́ Jexóva dó vǐtɔ́ wǎnyíyínɔ e vǐ súnnu tɔn sín hwɛ vɛ́ ná b’ɛ mɔ ɖɔ émí kún sɔ́ jɛxá bónú è ná lɛ́ yí émí dó xwédo ɔ mɛ ó é wú. Nɛ̌ vǐtɔ́ ɔ ka wa nǔ gbɔn hwenu e vǐ ɔ lɛ́ kɔ wá xwé é? Jezu ɖɔ ɖɔ hwenu e vǐtɔ́ ɔ mɔ vǐ súnnu tɔn sɛ́dó tlóló é ɔ, é “kán wezun bo yi kpl’así kɔ n’i, lobo kí si n’i kpó wǎnyíyí kpó.” (Luk. 15:17-20) Vǐtɔ́ énɛ́ ɖɔhun wɛ Jexóva cí. Ényí é se ɖɛ mɛ ɖěɖěe hwɛ dídó mɛɖée, alǒ linkpɔ́n zɔ́n bɔ ayi yětɔn gba dó lɛ́ é tɔn lě tlóló ɔ, mɛɖéesɔ́hwe nɔ sísɛ́ ɛ b’ɛ nɔ tɛ́ tó ganjí bo nɔ ɖótó yě. (Gbɛ. 3:19, 20) Wǔvɛ́sexámɛ nɔ sísɛ́ Jexóva b’ɛ nɔ kán wezun yi yě gɔ́n, ényí è sixú ɖɔ gbɔn mɔ̌ ɔ nɛ́, bo nɔ dó gbɔ nú yě lobo nɔ lɛ́ vɔ́ gǎnjɛwú ná yě ɖɔ émí nɔ kú nǔbláwǔ nú yě bo lɛ́ yí wǎn nú yě. (Eza. 57:15) Nɛ̌ Jexóva ka nɔ “kán wezun wá mǐ gɔ́n” ɖo égbé gbɔn? Hwɛhwɛ ɔ, é nɔ zán mɛxó agun tɔn lɛ́, xwédo mǐtɔn kpó xɔ́ntɔn e yí wǎn n’i lɛ́ é kpó dó dó gbɔ nú mǐ. (Ja. 5:14, 15) Jexóva nɔ d’alɔ mǐ gbɔn mɔ̌, ɖó é ba ɖɔ mǐ ní sɛkpɔ́ émí wútu.

4. Nɛ̌ Jezu ka xlɛ́ ɖɔ émí nyɔ́ lyá gbɔn?

⁴ Jezu nɔ wa nǔ Tɔ́ tɔn ɖɔhun. Jezu nɔ sɔ́ éɖée hwe Tɔ́ tɔn ɖɔhun. Énɛ́ zɔ́n bɔ hwenu e é ɖo ayǐkúngban jí é ɔ, mɛ lɛ́ nɔ vo bo nɔ sɛkpɔ́ ɛ. Yě nɔ vo bo nɔ kan nǔ byɔ́ ɛ. (Mak. 4:10, 11) Énɛ́ wú ɔ, ényí é byɔ́ yě ɖɔ yě ní ɖɔ nǔ e yě lin dó xó ɖé wú é ɔ, yě nɔ ɖɔ nǔ e yě lin tawun é n’i. (Mat. 16:13-16) Gɔ́ ná ɔ, ényí yě wa nǔ nyi do ɔ, yě nɔ bɛ́ xɛsi ǎ; yě tuun ɖɔ Jezu nɔ nyɔ́ xomɛ, nɔ kú nǔbláwǔ nú mɛ bo nɔ lɛ́ ɖó suúlu. (Mat. 17:24-27) É ɖo wɛn ɖɔ ɖó Jezu xwedó kpɔ́ndéwú Tɔ́ tɔn tɔn ganjí wútu ɔ, ahwanvú tɔn lɛ́ wá tuun Jexóva hú gǎn. (Jaan 14:9) Yě kplɔ́n ɖɔ Jexóva kún cí sinsɛngán hunnylámɔnɔ kpó goyítɔ́ kpó e è ma sixú nɔ sɛkpɔ́ ǎ ɖo hwe ɔ nu lɛ́ é ɖěbǔ ɖɔhun ó. É nyɔ́ wa ɔ, é nɔ sɔ́ éɖée hwe bo lɛ́ nyɔ́ lyá.

5. Nɛ̌ mɛɖéesɔ́hwe ka sixú d’alɔ mǐ bɔ mǐ ná nɔ nyɔ́ lyá hú gǎn gbɔn?

⁵ Nɛ̌ mǐ ka sixú xwedó kpɔ́ndéwú Jexóva tɔn gbɔn? Ényí mǐ nɔ tɛ́n kpɔ́n bo nɔ sɔ́ mǐɖée hwe ɔ, mǐ ná nyɔ́ lyá hú gǎn. Mɛɖéesɔ́hwe ná d’alɔ mǐ bɔ mǐ ná nyi alɔ nú mɛnújlójló, goyíyí kpó mɛhɛndóxomɛ kpó; jijɔ énɛ́ lɛ́ nɔ nya mɛ ɖěvo lɛ́ dó gbě. Amɔ̌, mɛɖéesɔ́hwe ná d’alɔ mǐ bɔ mǐ ná nɔ nyɔ́ xomɛ, ná nɔ ɖó suúlu bo ná nɔ lɛ́ sɔ́ hwɛ kɛ mɛ; jijɔ énɛ́ lɛ́ nɔ dɔn mɛ ɖěvo lɛ́. (Koló. 3:12-14) Tají ɔ, mɛxó agun tɔn lɛ́ ɖó ná dó gǎn dó nǔjɔnǔ mɛ bo ná nɔ nyɔ́ lyá. É ɖo wɛn ɖɔ, cóbónú yě ná nyɔ́ lyá ɔ, è ɖó ná nɔ mɔ yě. Tínmɛ énɛ́ tɔn wɛ nyí ɖɔ yě ná dó gǎn bo ná nɔ yi kplé lɛ́ cɔɔ hú ɖɔ yě ní nɔ bló gbɔn kannu, ényí é ma byɔ́ mɔ̌ dandan ǎ ɔ nɛ́. Gɔ́ ná ɔ, ényí ninɔmɛ yětɔn yí gbe ná ɔ, yě nɔ tɛ́n kpɔ́n bo nɔ w’azɔ̌ xá nɔví lɛ́ hwenu e yě ɖo mawuxó ɖɔ wɛ sín xwé ɖé gbe jɛ xwé ɖé gbe é. Ényí nɔví lɛ́ má dó mɛxó agun tɔn lɛ́ ganjí ɔ, yě ná vo bo ná nɔ ɖɔ xomɛ nú yě hwenu e yě ɖó hudó tɔn dó é.

JEXÓVA NƆ NƆ JLƐ̌ JÍ

6-7. Nǎ kpɔ́ndéwú e xlɛ́ lěe Jexóva ɖo gbesisɔmɛ bá húzú linlin hwenu e mɛsɛntɔ́ tɔn lɛ́ xo ɖɛ sɛ́dó è é gbɔn é tɔn ɖé lɛ́.

⁶ Goyítɔ́ gěgé nɔ nɔ jlɛ̌ jí hwenu e yě ɖo nǔ wa xá mɛ ɖěvo lɛ́ wɛ é ǎ. Amɔ̌, ɖó Jexóva nɔ sɔ́ éɖée hwe wútu ɔ, é nɔ nɔ jlɛ̌ jí, alǒ, nɔ ɖótó linlin mɛ ɖěvo lɛ́ tɔn, có é wɛ ka hú gǎn mɛ bǐ ɖo ali bǐ nu. Kpɔ́n lěe é wá nǔ xá Mɔyízi sín nɔví nyɔ̌nu Miliyámu gbɔn é. É kpó Aalɔ́ɔn kpó húnhún nǔ ɖɔ dó Mɔyízi e nyí afɔsɔ́ɖótetɔ́ Jexóva tɔn é wú. Énɛ́ wú ɔ, nú è ná ɖɔ ɔ, nǔ e Miliyámu wa é ɔ, Jexóva wɛ é ma sí ǎ. Wǎgbɔ tɔn ɔ, Jexóva sin xomɛ dó Miliyámu bo dó guduzɔn ɛ. Amɔ̌, hwenu e Aalɔ́ɔn sa vo dó ta tɔn mɛ, bɔ Mɔyízi sa vo nú Jexóva ɖɔ é ní gbɔ azɔn nú nɔví nyɔ̌nu émítɔn é ɔ, nɛ̌ Mawu ka wa nǔ gbɔn? Mawu yí go bo tɛ́ dó gbeta e kɔn é wá dó wǔ tɔn é wú ǎ. Ðó Jexóva nɔ sɔ́ éɖée hwe wútu ɔ, é ɖótó Mɔyízi bo gbɔ azɔn nú Miliyámu.—Kɛ́n. 12:1-15.

⁷ Jexóva lɛ́ ɖe xlɛ́ ɖɔ émí nɔ sɔ́ émíɖée hwe ɖo lěe é wa nǔ xá axɔ́sú Ezekiyási gbɔn é kpáxwé. Jexóva zán gbeyíɖɔ tɔn bo ɖɔ nú axɔ́sú ɔ ɖɔ é ná kú. Ezekiyási sa vo nú Jexóva kpó avǐ kpó ɖɔ é ní gbɔ azɔn nú émí. Wǎgbɔ tɔn ɔ, Jexóva kú nǔbláwǔ nú axɔ́sú ɔ, bo dó xwe 15 xwe jí n’i. (2 Axɔ́. 20:1, 5, 6) Ɛɛn, mɛɖéesɔ́hwe nɔ sísɛ́ Jexóva b’ɛ nɔ se wǔvɛ́ xá mɛ bo nɔ lɛ́ ɖótó mɛ.

8. Kpɔ́ndéwú tɛ́ lɛ́ ka xlɛ́ ɖɔ Jezu nɔ nɔ jlɛ̌ jí? (Maki 3:1-6)

⁸ Jezu nɔ wa nǔ Tɔ́ tɔn ɖɔhun. Hwenu e Jezu ɖo ayǐkúngban jí é ɔ, é gɔn ɖagbe wa nú mɛ ɖěvo lɛ́ hwenu e é jɛxá ɖɔ è ní wa mɔ̌ dó é ǎ. Ði kpɔ́ndéwú ɔ, é gbɔ azɔn nú mɛ ɖo gbɔjɛzángbe, ényí é ná bo ma tlɛ nyɔ́ gbeklánxámɛtɔ́ nukúnsyɛ́ntɔ́ tɔn lɛ́ nukúnmɛ ǎ ɔ nɛ́. (Xa Maki 3:1-6.) Jezu nɔ nɔ jlɛ̌ jí, bo nɔ lɛ́ se wǔvɛ́ xá mɛ ɖo égbé ɖo ali e nu é nɔ xlɛ́ ali agun lɛ́ ɖe é kpáxwé. Ði kpɔ́ndéwú ɔ, ényí mɛ e ɖo agun ɔ mɛ é ɖé hu hwɛ syɛ́nsyɛ́n ɖé ɔ, é nɔ ɖó suúlu dó wǔ tɔn bo nɔ hun ali n’i bónú é ná lɛ́ kɔ sín hwɛ tɔn gúdo.—Nǔɖe. 2:2-5.

9. Nɛ̌ mǐ ka sixú nɔ lin nǔ bo ná nɔ lɛ́ wa nǔ kpó jlɛ̌jíninɔ kpó gbɔn? (Kpɔ́n ɖiɖe lɛ́ lɔmɔ̌.)

⁹ Nɛ̌ mǐ ka sixú wa nǔ Jexóva ɖɔhun gbɔn? Mǐ ɖó ná nɔ tɛ́n kpɔ́n bo sɔ́ mǐɖée hwe lobo xwedó lěe Jexóva nɔ lin nǔ, bo nɔ lɛ́ wa nǔ gbɔn é sín kpɔ́ndéwú ɖo lěe mǐ nɔ lin nǔ gbɔn é kpó lěe mǐ nɔ wa nǔ gbɔn é kpó kpáxwé. (Ja. 3:17) Ði kpɔ́ndéwú ɔ, nǔgbó wɛ ɖɔ mɛjitɔ́ e nɔ nɔ jlɛ̌ jí lɛ́ é nɔ jó alɔ nyi kɔ jí nú vǐ yětɔn lɛ́ ǎ, amɔ̌, yě nɔ ɖó nukún nǔ ɖo yě sí zɛ xwé wú ǎ. Jakɔ́bu sín kpɔ́ndéwú xlɛ́ mɔ̌ nyi wɛn, lěe tan e ɖo Bǐbɛ́mɛ 33:12-14 mɛ é xlɛ́ gbɔn é. Mɛjitɔ́ e nɔ sɔ́ yěɖée hwe bo nɔ lɛ́ nɔ jlɛ̌ jí lɛ́ é ɖó ná lɛ́ tɛ́n kpɔ́n bo ná nɔ nyi alɔ nú vǐ ɖě sísɔ́ jlɛ́ dó ɖě wú. Mɛxó agun tɔn lɛ́ lɔ ɖó ná nɔ nɔ jlɛ̌ jí. Ali e nu yě sixú wa mɔ̌ ɖe é ɖokpó wɛ nyí ɖɔ yě ná yí gbe nú gbeta e kɔn gěgé mɛxó agun tɔn éé ɖo kplékplé ɔ mɛ é wá é tɔn, ényí mɔ̌ wiwa ma t’afɔ nǔgbódodó Biblu tɔn lɛ́ jí ǎ ɔ nɛ́. (1 Tim. 3:2, 3) Gɔ́ ná ɔ, mǐ bǐ sixú tɛ́n kpɔ́n bo mɔ nǔ jɛ linlin mɛ ɖěvo lɛ́ tɔn wú, ényí mǐ ná bo ma tlɛ nɔ mɔ nǔ lɛ́ ɖo ali ɖokpó ɔ nu ǎ ɔ nɛ́. (Hlɔ̌. 14:1) Mɛ e ɖo agun ɔ mɛ lɛ́ é bǐ ɖó ná tɛ́n kpɔ́n bɔ ‘mɛ lɛ́ bǐ ná nɔ mɔ ɖɔ yě nɔ nɔ jlɛ̌ jí.’—Filí. 4:5.

JEXÓVA NƆ ÐÓ SUÚLU

10. Ali tɛ́ lɛ́ nu Jexóva ka ɖó suúlu ɖe?

¹⁰ A sixú ko ɖó ayi wú ɖɔ goyítɔ́ lɛ́ kún nɔ ba ná nɔ te kpɔ́n mɛ ó. Goyíyí nɔ zɔ́n bɔ yě nɔ kú hǔn ǎ. Yě gbɔn vo tawun nú Jexóva e nyí kpɔ́ndéwú ɖaxó hú gǎn hǔnkúkú tɔn é. Ði kpɔ́ndéwú ɔ, ɖo Nɔwée hwenu ɔ, Jexóva ɖɔ ɖɔ émí ná nɔ te xɔ xwe 120 cóbá sú mɛ nyanya lɛ́ sín kún dó. (Bǐb. 6:3) Nɔwée mɔ hwenu dó kplɔ́n vǐ tɔn lɛ́, bɔ xwédo tɔn lɛ́ d’alɔ ɛ b’ɛ gbá tɔjíhún ɔ. Nukɔnmɛ ɔ, wɛnsagun e sɔ́ Jexóva sín afɔ ɖó te é ɖótó Ablaxámu kpó suúlu kpó hwenu e Ablaxámu ɖo nǔ kanbyɔ́ ɛ dó kún e è ná sú dó nú Sodɔ́mu kpó Gomɔ́ɔ kpó é wú wɛ é. Goyítɔ́ ɖé sixú ko ná xósin gbɔn lě: ‘A glá káká bo ɖo nǔkanbyɔ́ mì wɛ wɛ mɛ!’ Amɔ̌, wɛnsagun ɔ wa nǔ Jexóva ɖɔhun bo ɖó suúlu dó Ablaxámu wú.—Bǐb. 18:20-33.

11. Lěe è ɖɔ gbɔn ɖo 2 Piyɛ́ɛ 3:9 mɛ é ɔ, étɛ́wú Jexóva ka kpo ɖo suúlu ɖó wɛ ɖo hwe mǐtɔn nu?

¹¹ Jexóva kpo ɖo suúlu ɖó wɛ ɖo hwe mǐ lɔmɔ̌ tɔn nu. É ɖo te kpɔ́n hwenu e é ɖó dó é bá dó sú kún dó nú gbɛ ɔ. Étɛ́wú é ka ɖo suúlu ɖó wɛ? “Ðó é jló ɖɔ è ní sú mɛ ɖěbǔ sín kún dó ǎ, loɔ, é jló ɖɔ ali ní hun nú mɛ lɛ́ bǐ, bónú hwɛ yětɔn lɛ́ ní vɛ́ nú yě.” (Xa 2 Piyɛ́ɛ 3:9.) Jexóva ka ɖo suúlu ɖó dó wǔvɔ́ wɛ wɛ a? Éǒ! Ayijlɔ́jlɔ́nɔ lǐvi mɔ̌kpán wɛ ko sɛkpɔ́ ɛ. Bɔ mǐ ɖo nukún ɖó wɛ ɖɔ gbɛtɔ́ lǐvi mɔ̌kpán ná lɛ́ wa mɔ̌. É ɖo mɔ̌ có, suúlu Jexóva tɔn ɖó dogbó. Jexóva yí wǎn nú gbɛtɔ́ lɛ́, amɔ̌, é nɔ jó jɛ nyi ko mɛ nú nǔ ǎ. É ná lɔn bónú nǔnyanyawiwa ná nɔ ayǐ káká sɔ́yi ǎ.—Xab. 2:3.

12. Nɛ̌ Jezu ka ɖo suúlu ɖó wɛ Jexóva ɖɔhun gbɔn?

¹² Jezu nɔ wa nǔ tɔ́ tɔn ɖɔhun. Jezu ko ɖó suúlu Jexóva ɖɔhun nú xwe afatɔ́n mɔ̌kpán. Jezu mɔ bɔ Satáan dó ji Jexóva kpó gbɛtɔ́ gbejínɔtɔ́ lɛ́ kpó. (Bǐb. 3:4, 5; Jɔb. 1:11; Nǔɖe. 12:10) Jezu lɛ́ nyí kúnnuɖetɔ́ wǔvɛ́ syɛ́nsyɛ́n e mɛ lɛ́ nɔ mɔ lɛ́ é tɔn. Dǒ nukún lě do é ná ko bá “ná sú kún dó nú nǔwiwa Awǒvi tɔn lɛ́” sɔ é mɛ kpɔ́n! (1 Jaan 3:8) Étɛ́ ka d’alɔ Jezu b’ɛ ɖo te kpó suúlu kpó nú Jexóva ná ɖe gbe bónú é ná sú kún dó nú Awǒvi sín nǔ lɛ́ bǐ mlɛ́mlɛ́? Hwɛjijɔ e wú wɛ é ɖokpó wɛ nyí ɖɔ Jezu nɔ sɔ́ éɖée hwe. É tuun ɖɔ Jexóva wɛ nyí mɛ e ná wá gbeta hwenu e è ná sú kún dó nú gbɛ ɔ é tɔn kɔn é.—Mɛ. 1:7.

13. Nɛ̌ Jezu ka ɖó suúlu dó mɛsɛ́dó tɔn lɛ́ wú gbɔn? Étɛ́wú?

¹³ Jezu lɛ́ ɖó suúlu dó mɛsɛ́dó tɔn lɛ́ wú hwenu e é ɖo ayǐkúngban jí é. Ði kpɔ́ndéwú ɔ, hwenu e mɛsɛ́dó lɛ́ nɔ ɖo nǔ dɔn wɛ dó mɛ e ná nyí gǎn ɖo tɛ́ntin yětɔn é wú wɛ é ɔ, Jezu jó gbe dó yě wú ǎ. É nyɔ́ wa ɔ, é kpo ɖo suúlu ɖó wɛ. (Luk. 9:46; 22:24-27) É kú d’é jí ɖɔ ényí hwetɔnnu su ɔ, yě ná bló hǔzúhúzú e jɛxá lɛ́ é. A ka nɔ ɖo nǔ ɖokpó ɔ wa nyi do wɛ gbɛmɛ wɛ wɛ a? Ényí mɔ̌ wɛ ɔ, é su nukún towe mɛ ɖɔ Axɔ́sú e ɖo gǎn ɖu dó jǐ towe wɛ é nɔ sɔ́ éɖée hwe bo nɔ lɛ́ ɖó suúlu ǎ cé?

14. Nɛ̌ mǐ ka sixú tɛ́n kpɔ́n bo nɔ ɖó suúlu gbɔn?

¹⁴ Nɛ̌ mǐ ka sixú wa nǔ Jexóva ɖɔhun gbɔn? Ényí mǐ nɔ tɛ́n kpɔ́n bo nɔ ɖó “linlin Klísu tɔn” ɔ, mǐ ná kpé wú hú gǎn bo ná lin nǔ lobo lɛ́ wa nǔ Jexóva ɖɔhun. (1 Kɔ. 2:16) Nɛ̌ mǐ ka sixú mɔ nǔ jɛ linlin Klísu tɔn mɛ hú gǎn gbɔn? Wlɛnwín we ɖe ǎ. Mǐ ɖó ná nɔ xa Wɛnɖagbewéma lɛ́. Énɛ́ gúdo ɔ, mǐ ɖó ná ba hwenu bo lin tamɛ dó lěe tan e mǐ xa lɛ́ é ɖe linlin e Jezu nɔ ɖó dó xó lɛ́ wú é xlɛ́ gbɔn é jí. Gɔ́ ná ɔ, é ɖo wɛn ɖɔ, mǐ ɖó ná nɔ byɔ́ Jexóva ɖɔ é ní d’alɔ mǐ bónú mǐ ná nɔ sɔ́ mǐɖée hwe lobo ná nɔ lɛ́ ɖó suúlu Jezu ɖɔhun. Ée mǐ ná ɖo tíntɛ́nkpɔ́n bo ná ɖó linlin Klísu tɔn wɛ é ɔ, mǐ ná kpé wú bo ná nɔ wa nǔ Mawu ɖɔhun hú gǎn gbɔn suúlu ɖíɖó dó mǐɖée kpó nǔɖitɔ́ hǎtɔ́ mǐtɔn lɛ́ kpó wú d’é jí gblamɛ.—Mat. 18:26-30, 35.

JEXÓVA NƆ WLÍ YƐ̌YI NÚ MƐÐÉESƆ́HWETƆ́ LƐ́

15. Nɛ̌ Jexóva ka wa nǔ sɔgbe xá xó e ɖo Ðɛhan 138:6 mɛ é gbɔn?

¹⁵ Xa Ðɛhan 138:6. Wǔjɔmɛ ɖaxó wɛ é nyí nú mɛɖéesɔ́hwetɔ́ lɛ́ ɖɔ Nǔbǐwúkpétɔ́ wɛ̌kɛ́ ɔ tɔn tuun yě! Lin tamɛ dó kpɔ́ndéwú mɛɖéesɔ́hwetɔ́ ɖěɖěe Jexóva wlí yɛ̌yi ná ɖo xwe lɛ́ vlamɛ é tɔn ɖé lɛ́ jí. Ayi sixú nɔ ma yá wǔ yi yě mɛ ɖé lɛ́ jí, amɔ̌, è ɖɔ xó yětɔn ɖo Biblu mɛ. Jexóva sɔ́ dó ayi mɛ nú Mɔyízi b’ɛ wlán nyǐkɔ vǐwúkpénukúndótɔ́ éé nɔ nyí Debóla bo nɔ gbɛ ɖo tɔ́gbó lɛ́ hwenu e tɔn dó Biblu mɛ. É wa mɛsɛntɔ́zɔ́ nú xwédo Izáki kpó Jakɔ́bu kpó tɔn kpó gbejíninɔ kpó nú xwe 125 mɔ̌! È tuun nǔ káká ɖé dó nyɔ̌nu gbejínɔtɔ́ énɛ́ wú ǎ có, Jexóva bló bɔ è wlán lěe è yí wǎn n’i sɔ é dó Biblu mɛ. (Bǐb. 24:59; 35:8.) Xwe kanweko mɔ̌kpán gúdo ɔ, nyaví lɛ̌ngbɔ́nyitɔ́ e nɔ nyí Davídi é wɛ Jexóva sɔ́ axɔ́sú ɖó togun Izlayɛ́li tɔn ɔ nu. (2 Sam. 22:1, 36) È ji Jezu b’ɛ ná nɔ zaan gúdo é ɔ, Mawu sɛ́ wɛnsagun ɖé dó, bɔ é ɖɔ nú lɛ̌ngbɔ́nyitɔ́ lɛ́ ɖɔ è ji mɛ e ná wá nyí Mɛsíya ɔ é ɖo malínmálín dó yě ɖo Bɛteleyɛ́mu. Mɔ̌ e é wa é ɔ, yɛ̌yi wɛ é wlí nú yě. (Luk. 2:8-11) Gɔ́ ná ɔ, hwenu e Jozɛ́fu kpó Mali kpó kplá Jezu yi sinsɛnxɔ mɛ é ɔ, Jexóva wlí yɛ̌yi nú Sinmɛnyɔ́ɔ kpó Ana kpó éé ko nyí mɛxómɔ é gbɔn vǐ tɔn xíxlɛ́ yě gblamɛ. (Luk. 2:25-30, 36-38) Ɛɛn, ‘Jexóva ɖo káká jǐxwé aga nǔgbó; é ná mɔ mɛ e nɔ sɔ́ yěɖée hwe lɛ́’ é!

16. Nɛ̌ Jezu ka xwedó kpɔ́ndéwú lěe Tɔ́ tɔn nɔ wa nǔ xá mɛ ɖěvo lɛ́ gbɔn é tɔn gbɔn?

¹⁶ Jezu nɔ wa nǔ Tɔ́ tɔn ɖɔhun. Jezu nɔ wlí yɛ̌yi nú mɛ e nɔ sɔ́ yěɖée hwe lɛ́ é Tɔ́ tɔn ɖɔhun. É kplɔ́n nǔgbó e kunkplá Axɔ́súɖuto Mawu tɔn lɛ́ é mɛ e ma ‘se wěma ǎ bo lɛ́ nyí gbɛtɔ́ kpaa lɛ́ é.’ (Mɛ. 4:13; Mat. 11:25) Jezu lɛ́ gbɔ azɔn nú mɛ lɛ́, é ka nyí azɔn kɛ́ɖɛ́ wɛ é gbɔ nú yě ǎ, loɔ, é lɛ́ wa nǔ xá yě ɖo ali e wlí yɛ̌yi é nu. (Luk. 5:13) Ðo zǎn e jɛ nukɔn nú kú Jezu tɔn é mɛ ɔ, é wa mɛsɛntɔ́zɔ́ nú mɛsɛ́dó tɔn lɛ́, énɛ́ wɛ nyí ɖɔ é klɔ́ afɔ nú yě. (Jaan 13:5) Gɔ́ ná ɔ, cóbónú é ná yi jǐxwé ɔ, é wlí yɛ̌yi nú ahwanvú tɔn mɛɖéesɔ́hwetɔ́ lɛ́ bǐ, énɛ́ wɛ nyí hwenɛ́nu tɔn lɛ́ kpó éé ná wá bɔ d’é wú lɛ́ é kpó, bo zé azɔ̌ e ɖo tají hú gǎn bɔ gbɛtɔ́ sixú wa é ɖé d’alɔ mɛ nú yě, énɛ́ wɛ nyí alɔ dídó mɛ ɖěvo lɛ́ bónú yě ná mɔ gbɛ mavɔmavɔ.—Mat. 28:19, 20.

17. Nɛ̌ mǐ ka sixú nɔ wlí yɛ̌yi nú mɛ ɖěvo lɛ́ gbɔn? (Kpɔ́n ɖiɖe ɔ lɔmɔ̌.)

¹⁷ Nɛ̌ mǐ ka sixú xwedó kpɔ́ndéwú Jexóva tɔn gbɔn? Mǐ nɔ wlí yɛ̌yi nú mɛ lɛ́ hwenu e mǐ ɖo wɛn ɖagbe ɔ jlá wɛ é, bo nɔ kpɔ́n fí e yě gosín é, sinmɛ agbaza tɔn yětɔn, alǒ bǎ e mɛ yě yi wěmaxɔmɛ yi ɖó é ǎ. Gɔ́ ná ɔ, mǐ nɔ wlí yɛ̌yi nú nɔví súnnu kpó nɔví nyɔ̌nu kpó mǐtɔn lɛ́, bo nɔ mɔ ɖɔ yě hú gǎn mǐ, ényí mǐ ná bo ɖó nǔwúkpíkpé, alǒ wǔjɔmɛzɔ́ ɖěbǔ ɔ nɛ́. (Filí. 2:3) Ényí kpó mɛɖéesɔ́hwe kpó ɔ, mǐ nɔ “jɛ nukɔn” ɖo yɛ̌yi wlíwlí nú mɛ ɖěvo lɛ́ mɛ ɖo ali énɛ́ lɛ́ kpó ɖěvo lɛ́ kpó nu ɔ, é nɔ víví nú Jexóva.—Hlɔ̌. 12:10; Sof. 3:12.

18. Étɛ́wú a ka ba ná xwedó kpɔ́ndéwú mɛɖéesɔ́hwe tɔn Jexóva tɔn?

¹⁸ Ée mǐ ná ɖo gǎn dó wɛ, bo ná nɔ wa nǔ Tɔ́ mǐtɔn jǐxwé tɔn wǎnyíyínɔ e nɔ sɔ́ éɖée hwe é ɖɔhun é ɔ, mǐ ná nyɔ́ lyá hú gǎn, ná nɔ nɔ jlɛ̌ jí hú gǎn, bo ná nɔ lɛ́ ɖó suúlu hú gǎn. Gɔ́ ná ɔ, mǐ ná nɔ wlí yɛ̌yi nú mɛ ɖěvo lɛ́ Jexóva ɖɔhun. Mi nú gǎn e dó wɛ mǐ ɖe bo ná sɛkpɔ́ Mawu mɛɖéesɔ́hwetɔ́ mǐtɔn é ní bló bónú mǐ mɛ ɖokpó ɖokpó ní lɛ́ xɔ akwɛ́ ɖo nukún tɔn mɛ hú gǎn!—Eza. 43:4.