Etɛ Biblu ka Ðɔ Dó Alɔwliwli Xá Mɛ E Ðó Sinmɛ Agbaza Tɔn Vo É Wu?
Xósin e Biblu na é
Mawu yí gbè nú alɔ e sunnu ɖé kpo nyɔnu ɖé kpo ee ɖó sinmɛ agbaza tɔn vovo é wlí é, ɖó sinmɛ agbaza tɔn lɛ bǐ wɛ nyí nǔ ɖokpo ɔ ɖò nukún tɔn mɛ. Biblu ɖɔ: “Mawu kún nɔ ɖè mɛɖé ɖó vo ɖò mɛɖé mɛ ó.”—Mɛsɛ́dó 10:34, 35.
Mǐ ni gbéjé nǔgbododó Biblu tɔn ɖevo e cá kan xá sinmɛ agbaza tɔn lɛ bǐ wɛ nyí nǔ ɖokpo ɔ xó ɔ kpo alɔwliwli kpo é ɖé lɛ kpɔ́n.
Fí ɖokpo ɔ wɛ sinmɛ agbaza tɔn lɛ jɔ sín
Adamu e nyí sunnu nukɔntɔn ɔ é kpo asì tɔn Ɛvu e Biblu ylɔ́ ɖɔ “gbɛtɔ́ lɛ bǐ sín nɔ” é kpo wɛ dó kún gbɛtɔ́ lɛ bǐ tɔn. (Bǐbɛ̌mɛ 3:20) Ðó hwɛjijɔ enɛ wu ɔ, Biblu ɖɔ dó Mawu wu ɖɔ: “Gbɛtɔ́ ɖokpo géé jí wɛ é ɖó togun lɛ bǐ gbɔn.” (Mɛsɛ́dó 17:26) Gbɛtɔ́ lɛ na bo ɖó sinmɛ agbaza tɔn ɖebǔ ɔ, xwédo ɖokpo ɔ wɛ ye bǐ nyí. Amɔ̌, nú wǎn gbɛ́ nú akɔ, alǒ mɛ ɖiɖe ɖó vo syɛn tawun ɖò fí e a nɔ nɔ é ɔ ka lo?
Nǔnywɛtɔ́ lɛ nɔ “ba wěɖexámɛ”
Mawu yí gbè nú alɔwliwli mɛ e ɖó sinmɛ agbaza tɔn vovo lɛ é tɔn có, gbɛtɔ́ lɛ bǐ ka yí gbè nú linlin tɔn ǎ. (Ezayíi 55:8, 9) Enyi a ɖò linlin wɛ bo na wlí alɔ xá mɛ e ɖó sinmɛ agbaza tɔn ɖevo é wɛ ɔ, hwi kpo mɛ e na da wɛ a ɖè é kpo ɖó na ɖɔ xó ɖó kpɔ́ dó nǔ elɔ lɛ jí:
Nɛ̌ mi ka sixu ɖí xwi xá kɔ e mɛ e ɖò xá mitɔn mɛ lɛ é alǒ xwédo mitɔn sixu gbidí nú mi lɛ é gbɔn?
Nɛ̌ mi ka sixu d’alɔ vǐ mitɔn lɛ bɔ ye na ɖí xwi xá wǎn gbɛ́ nú akɔ gbɔn?
‘Wěɖexámɛ biba’ ɖò ali enɛ nu sixu d’alɔ we bɔ alɔwliwli towe na yì ta.—Nǔnywɛxó 13:10, nwt; 21:5.