Etɛ Biblu ka Ðɔ Dó Mɛɖesúsíninɔ Wu? Mawu Ðó Acɛ Dó Nǔ E Na Jɛ Ðò Gbɛzán Mɛtɔn Mɛ lɛ É Jí Wɛ À?
Xósin e Biblu na é
Mawu wlí yɛ̌yi nú mǐ bo na mǐ mɛɖesúsíninɔ. Nǔwukpíkpé ɖé wɛ bo nɔ d’alɔ mǐ bɔ mǐ nɔ wá gbeta mǐɖesunɔ tɔn lɛ kɔn, é nyí Mawu wɛ nɔ ɖɔ nǔ e mǐ na wà é, alǒ è ko dó nǔ e mǐ na wà é mǐ jí wɛ ǎ. Mǐ ni kpɔ́n nǔ e Biblu kplɔ́n mɛ é.
Mawu dá gbɛtɔ́ lɛ ɖò akpajlɛ éɖesunɔ tɔn mɛ. (Bǐbɛ̌mɛ 1:26) Ðò kpaa mɛ ɔ, kanlin lɛ nɔ wà nǔ ɖò jɔwamɔ linu, amɔ̌, mǐdɛɛ lɛ ɖi Gbɛɖotɔ́ mǐtɔn bo ɖó nǔwukpíkpé ɔ bo nɔ ɖè jijɔ lěhun lɛ xlɛ́: wanyiyi kpo nǔjlɔjlɔwiwa kpo. Gbɛɖotɔ́ mǐtɔn ɖɔhun ɔ, mǐ lɔ ɖó mɛɖesúsíninɔ.
Mǐ sixu wá gbeta nǔ e sɔgudo mǐtɔn na nyí é tɔn kɔn ɖò ali e gbló ada é ɖé nu. Biblu dó wusyɛn lanmɛ nú mǐ ɖɔ mǐ ni “sɔ́ gbɛ̀” gbɔn ‘xó Mawu tɔn sise’ gblamɛ, enɛ wɛ nyí ɖɔ mǐ ni wá gbeta ɔ kɔn bá setónú nú gbeɖiɖe tɔn lɛ. (Sɛ́nflínmɛ 30:19, 20) Nú mǐ ma ko ɖó mɛɖesúsíninɔ ǎ wɛ ɔ, nǔnina enɛ na hwɛ́n nǔtí ɖò nukún mǐtɔn mɛ ǎ, b’ɛ tlɛ na nyla ɖesu. Mawu nɔ hɛn mǐ gannugánnú ɖɔ mǐ ni wà nǔ e é zɔ́n mǐ é ǎ, é nyɔ́ wà ɔ, é nɔ byɔ mǐ kpo wanyiyi kpo ɖɔ: “Enyi a ko wlí tó nǔ e un zɔ́n we lɛ wu wɛ ɔ, nyɔna sín tɔ̀ ɖé na ko sà wá gɔ̌n towe.”—Ezayíi 48:18.
Nú mǐ na gézé ɖò gbɛ̀ mɛ alǒ gbɔ ɔ, è ko ɖɔ ɖ’ayǐ ǎ. Enyi mǐ jló ɖɔ nǔɖe ni kpa mǐ ɔ, mǐ ɖó na ván kan tawun. Biblu ɖɔ: “Alɔ towe jɛ nǔ ɖebǔ wu hǔn, zě hlɔnhlɔn towe bǐ dó bló.” (Nǔnywɛtɔ́xó 9:10) É lɛ́ ɖɔ: “Mɛ e nɔ kú hǔn bo nɔ tò nǔ e wà gbé é ja ɔ, nɔ mɔ nǔ gegě ɖ’emɛ.”—Nǔnywɛxó 21:5.
Mɛɖesúsíninɔ nyí nǔ xɔ akwɛ ɖé bɔ Mawu na mǐ, ɖó é nɔ zɔ́n bɔ mǐ nɔ yí wǎn n’i “kpodo ayi . . . bǐ kpo,” mǐɖesu wɛ ka ba mɔ̌.—Matie 22:37.
Mawu ɖó acɛ dó nǔ lɛ bǐ jí ǎ wɛ à?
Biblu kplɔ́n mɛ ɖɔ Mawu nyí Nǔbǐwukpétɔ́, bɔ mɛ ɖevo ɖebǔ kún sixu ɖó dogbó nú hlɔnhlɔn tɔn zɛ éɖesunɔ wu ó. (Jɔbu 37:23; Ezayíi 40:26) É ɖò mɔ̌ có, é nɔ zán hlɔnhlɔn tɔn dó kpa acɛ dó nǔ bǐ jí ǎ. Ði kpɔ́ndéwú ɔ, Biblu ɖɔ ɖɔ Mawu ‘ɖu ɖò éɖée jí’ ɖò Babilɔnu hwexónu tɔn e nyí togun tɔn sín kɛntɔ́ ɖé é nukɔn. (Ezayíi 42:14, nwt) Mɔ̌ ɖokpo ɔ, é wá gbeta ɔ kɔn dìn hwɛ̌ bo jó mɛ ɖěɖee nɔ zán mɛɖesúsíninɔ yetɔn nyi dò, b’ɛ nɔ wà nǔ dó mɛ ɖevo lɛ wu é dó. Amɔ̌, Mawu na wà mɔ̌ kaka sɔyi ǎ.—Ðɛhan 37:10, 11.