Mɛ e ɖo gbɛ ɔ mɛ lɛ́ é bǐ ná mɔ fífá

Mɛ bǐ nɔ ba ná nɔ gbɛ e mɛ fífá tíin ɖe é. Nú xwe kanweko mɔ̌kpán ɔ, acɛkpatɔ́ gbɛ ɔ tɔn lɛ́ tɛ́n kpɔ́n bo ná ɖó hunnyahunnya lɛ́ te, lobo ná bló bɔ fífá ná tíin. Hweɖélɛ́nu ɔ, gǎndídó yětɔn lɛ́ nɔ hɛn fífá wá nú hwenu ɖé. Amɔ̌, é blá wǔ ɖɔ hunnyahunnya lɛ́ nɔ lɛ́ wá xwetɔ́n. Fífá ka ná wá kpé fí bǐ ɖo gbɛ ɔ mɛ gbe ɖokpó a? Ganjí! Mǐ ní kpɔ́n nǔ e mǐ sixú kplɔ́n dó Jezu wú é.

Nǔ e Jezu ná wá wa é

Biblu ɖe nǔ e Jezu ná wa zaanɖé din bá bló bɔ fífá ná kpé fí bǐ ɖo gbɛ ɔ mɛ é xlɛ́.

• “È ná nɔ ylɔ́ [Jezu] ɖɔ . . . Axɔ́ví fífá tɔn. Acɛkpikpa tɔn ná kpé fí bǐ, bɔ fífá e ná tíin ɖo . . . axɔ́súɖuto tɔn mɛ é ná ɖó vivɔnu ǎ.” (Ezayíi 9:6, 7) Ðó Jezu wɛ nyí Axɔ́sú nú Axɔ́súɖuto Mawu tɔn wútu ɔ, é ná bló bɔ fífá ná tíin káká sɔ́yi, bo ná vɔ gbeɖé ǎ.

• ‘É ná hwlɛ́n wamamɔnɔ e ɖo xó sú wɛ, bo ma ɖó ɖɔxátɔ́ ɖě ǎ é.’ (Ðɛhan 72:12-14) Jezu ná zán acɛ tɔn dó bló bɔ hwɛ jlɔ́jlɔ́ ná tíin, bo ná ɖó nǔ ahwan alɔkpa lɛ́ bǐ, adǎkaxixo kpó wǔvɛ́ mimɔ kpó nu.

• “Akɔta ɖě sɔ́ ná sɔ́ hwǐ dó akɔta ɖěvo jí ɖě ǎ, mɔ̌ jɛ́n yě ma ka sɔ́ ná kplɔ́n ahwanfunfun ɖě ǎ é nɛ́.” (Ezayíi 2:4) Ðo acɛkpikpa Jezu tɔn glɔ́ ɔ, gbɛtɔ́ lɛ́ bǐ ná kplɔ́n fífá kan xixo, é sɔ́ ná nyí ahwan ǎ.

Bo ná dó kplɔ́n nǔ dó lěe Jezu ná bló bɔ fífá ná kpé gbɛ ɔ bǐ mɛ gbɔn é kpó lěe a sixú nɔ gbɛ mɔ̌hun mɛ gbɔn é kpó wú hǔn, kpɔ́n video kléwún élɔ́ e xóta tɔn nyí Étɛ́ ka nyí Axɔ́súɖuto Mawu tɔn? é.

Nǔ e Jezu kplɔ́n mɛ é

Káká jɛ égbé ɔ, nǔkplɔ́nmɛ Jezu tɔn lɛ́ ɖo alɔ dó gbɛtɔ́ lǐvi mɔ̌kpán wɛ, bɔ yě ɖo fífá kan xo wɛ. Ðo mawuxóɖiɖɔ só jí tɔn Jezu tɔn e è tuun ganjí é mɛ ɔ, Jezu kplɔ́n nǔgbódodó ɖěɖěe nɔ d’alɔ mɛ bɔ è nɔ xo fífá kan gbe bǐ gbe lɛ́ é mɛ. Mǐ ní kpɔ́n kpɔ́ndéwú ɖé lɛ́.

• “Awǎjijɛnɔ wɛ nyí fífákanxotɔ́ lɛ́.” (Matíe 5:9) Jezu dó wǔsyɛ́n lanmɛ nú ahwanvú tɔn lɛ́ ɖɔ yě ní hɔn nú hunnyahunnya lɛ́ kpowun ǎ, loɔ, é lɛ́ ɖɔ nú yě ɖɔ yě ní nɔ ba fífá.

• “To yi dó hwɛ gbɔ xá nɔví towe hwɛ̌. Énɛ́ gúdo hǔn, lɛ̌ kɔ bo wá xwlé nǔníná towe Mawu.” (Matíe 5:23, 24) Jezu byɔ́ tóɖóetɔ́ tɔn lɛ́ ɖɔ yě ní nɔ yá wǔ ɖe ɖɛ tagba lɛ́. É kplɔ́n mɛ ɖɔ fífá mɛ ninɔ xá mɛ ɖěvo lɛ́ ɖo tají bónú mǐ ná zun xɔ́ntɔn vívɛ́ xá Mawu.

• “Mi ma sɔ́ nɔ ɖɔ hwɛ xá mɛ ɖě ó, énɛ́ ɔ, è ná ɖɔ hwɛ xá mi lɔ ǎ.” (Matíe 7:1) Jezu gb’akpá nú mǐ ɖɔ mǐ ní ma nɔ ɖɔ hwɛ xá mɛ ɖěvo lɛ́ syɛ́nsyɛ́n alǒ ɖó nukún ɖɔ yě ní wa nǔ e mǐɖésú ma sixú wa ǎ lɛ́ é ó, ɖó nǔwalɔ mɔ̌hun lɛ́ nɔ dɔn tagba nyi ayǐ. Jezu kplɔ́n mǐ ɖɔ mǐ ní ma nɔ ɖo xó mɔ ɖɔ dó mɛ ɖěvo lɛ́ wú wɛ ó, é nyɔ́ wa ɔ, mǐ “ní nɔ sɔ́ hwɛ kɛ mɛ.”—Luki 6:37.

Mɛ lɛ́ ɖo nǔkplɔ́nmɛ Jezu tɔn lɛ́ zán wɛ gbɔn gbɛ ɔ bǐ mɛ. Mɛ lɛ́ ɖo kplɔ́nkplɔ́n wɛ bo ná nɔ ɖe ɖɛ tagba lɛ́ ɖo fífá mɛ, bo ná nɔ sɔ́ hwɛ kɛ mɛ, lobo ná nɔ lɛ́ ɖe wǎnyíyí xlɛ́ mɛ e ma nɔ nyɔ́ xomɛ dó yě wú ǎ lɛ́ é; nǔ ɖo mɔ̌ nyí wɛ ɖo fí e dǎkaxixo kpó kínklán kpó tlɛ syɛ́n ɖe tawun lɛ́ é.

Bo ná dó mɔ lěe nǔkplɔ́nmɛ Jezu tɔn lɛ́ d’alɔ mɛ ɖé lɛ́ bɔ yě mɔ fífá gbɔn é hǔn, xa xóta “Fífá mimɔ ɖo gbɛ e mɛ ahwan kpó hunnyahunnya lɛ́ kpó ɖe é.”