Dǎkaxixo nɔ ɖe ɖɛ tagba lɛ́ bǐ mlɛ́mlɛ́ ǎ

Gěgé mɛ lɛ́ tɔn wɛ nɔ lin égbé ɖɔ dǎkaxixo wɛ nɔ ɖe ɖɛ tagba lɛ́. Amɔ̌, nǔ e Jezu Klísu kplɔ́n mɛ é nɛ́ ǎ, mɔ̌ wɛ é ka lɛ́ wa nǔ gbɔn ǎ. Mǐ ní kpɔ́n ɖé lɛ́ ɖo nǔ e é ɖɔ lɛ́ é kpó nǔ e é wa lɛ́ é kpó mɛ.

Nǔ e Jezu ɖɔ é

Ðo mawuxó ɖiɖɔ só jí tɔn Jezu tɔn e è tuun ganjí é mɛ ɔ, Jezu kplɔ́n mɛ ɖɔ xomɛsin, hunxixo kpó dǎkaxixo kpó kún nyí ali e nu è ná ɖe ɖɛ tagba lɛ́ ɖe é ó. Mǐ ní kpɔ́n kpɔ́ndéwú ɖé lɛ́.

• “Nǔ ɖěbǔ e mi ba ɖɔ gbɛtɔ́ lɛ́ ní wa nú mi é ɔ, mi lɔ ɖó ná wa nú yě lɔ.” (Matíe 7:12; Luki 6:31) È nɔ ylɔ́ wěɖexámɛ énɛ́ e dó wǔsyɛ́n lanmɛ nú mǐ ɖɔ mǐ ní nɔ wa nǔ xá mɛ ɖěvo lɛ́ lěe mǐ ná ba ɖɔ è ní wa nǔ xá mǐ gbɔn é ɖɔ Sɛ́na siká tɔn hwɛhwɛ. Mɛ ɖěbǔ nɔ ba ɖɔ è ní xo dǎka émí wú ǎ, énɛ́ wú ɔ, mǐ ɖó ná nɔ wa nǔ xá mɛ bǐ kpó sísí kpó, kpódó xomɛnyínyɔ́ kpán, ényí mǐ ná bo ma tlɛ ɖó gbe kpɔ́ xá yě ǎ ɔ nɛ́.

• “Mɛ ɖěbǔ xo tómɛ nú we dó klɛ̌n towe ɖisíxwé tɔn jí hǔn, lǐlɛ́ amyɔxwé tɔn ɔ lɔ n’i.” (Matíe 5:38, 39; Luki 6:29) Ðiɖɔ wɛ Jezu ɖe ɖɔ mǐ ná nɔ tin bɔ mɛ ɖěvo lɛ́ ná nɔ xo dǎka mǐ wú ǎ. É nyɔ́ wa ɔ, linlin agɔ e é cí ɖɔ sinsɛngán ɖé lɛ́ nɔ kplɔ́n mɛ ɖɔ é nyɔ́ ɖɔ è ní ba hlɔn é jlá ɖó wɛ é ɖe. Ðiɖɔ nú ahwanvú tɔn lɛ́ wɛ é ɖe ɖɔ yě kún ɖó ná nɔ ba hlɔn ó, é nyɔ́ wa ɔ, yě ná nɔ wa nǔ kpó xomɛfífá kpó hwenu e mɛ ɖěvo lɛ́ wa nǔ nyi do nú yě é.b

• “Mi ní nɔ yí wǎn nú kɛntɔ́ mitɔn lɛ́.” (Matíe 5:43, 44; Luki 6:27) Jezu kplɔ́n mǐ ɖɔ mǐ ɖó ná nɔ wa nǔ xá mɛ ɖěvo lɛ́ kpó xomɛnyínyɔ́ kpó, ényí yě ná bo tlɛ gbɛ́ wǎn nú mǐ alǒ nɔ wa nǔ agɔ xá mǐ ɔ nɛ́. Ðiɖɔ wɛ Jezu ɖe ɖɔ mǐ ná nɔ myɔ́ nukún dó nǔwanyido yětɔn lɛ́ ǎ.c Loɔ, ényí mǐ nɔ nyɔ́ xomɛ dó mɛ e gbɛ́ wǎn nú mǐ lɛ́ é wú ɔ, mǐ sixú bló bɔ yě ná fá xomɛ, bo tlɛ ná nɔ nyɔ́ xomɛ dó mǐ wú.

Nǔ e Jezu wa é kpó nǔ e é ná wá wa é kpó

Jezu kplɔ́n mɛ ɖɔ dǎkaxixo dó ba hlɔn kún nɔ ɖe ɖɛ tagba lɛ́ bǐ mlɛ́mlɛ́ ó, bo ɖe énɛ́ xlɛ́ ɖo nǔwiwa tɔn lɛ́ mɛ. Ðo zǎn e mɛ è wlí Jezu é ɔ, ahwanvú tɔn lɛ́ ɖokpó wa dǎkaxixo sín nǔɖé dó jɛ hun dó jǐ tɔn, amɔ̌, é ɖɔ: “Lɛ̌ sɔ́ hwǐ towe ɖó tɛn tɔn mɛ, ɖó mɛ e sɔ́ hwǐ dó mɛ jí lɛ́ é bǐ wɛ ná kú hwǐ kú.” (Matíe 26:52) Jezu ɖe wǎnyíyí xlɛ́ kɛntɔ́ tɔn lɛ́, gbɔn hwɛ yětɔn lɛ́ sísɔ́ kɛ yě gblamɛ, bo tlɛ lɛ́ xo ɖɛ dó ta yětɔn mɛ!—Luki 23:33, 34; 1 Piyɛ́ɛ 2:23.

Biblu d’akpá ɖɔ Jezu e nyí Axɔ́ví fífá tɔn é ná hɛn fífá wá ɖo malínmálín mɛ, bo ná ɖó nǔ dǎkaxixo bǐ nu. (Ezayíi 9:6, 7) Bo ná dó kplɔ́n nǔ dó sɔgúdo ɖaaɖagbe énɛ́ wú d’é jí hǔn, xa xóta “Lěe è ná ɖó nǔ ahwan kpó hunnyahunnya lɛ́ kpó nu gbɔn é.”