Wɛn ɖé sín Xó Mawu tɔn mɛ: Nukúnɖíɖó nú mɛ e ɖo bibɛtɛn ba wɛ lɛ́ é!

Ðo xwe ɖokpó ɖokpó mɛ ɔ, gbɛtɔ́ lǐvi mɔ̌kpán wɛ ɖó ná hɔn sín xwé yětɔn lɛ́ gbe, bá dó nɔ ayijayǐ mɛ. Nǔ mɔ̌hun ɖo hwi lɔ gbo wɛ din wɛ a? Nú mɔ̌ wɛ ɔ, kú d’é jí ɖɔ mɛɖé ɖe bo sixú d’alɔ we. Mawu dó gbɛ ɖagbe ɖé sín akpá, bɔ a sixú kplɔ́n nǔ d’é wú ɖo Nǔwlánwlán mímɛ́ lɛ́ mɛ.

Christos Stylianides e nyí Commissaire de l’Union européennea é ɖɔ: “Alɔdó e sín tuto mǐ nɔ yá wǔ bló nú mɛ e ɖo bibɛtɛn ba wɛ lɛ́ é kpó mɛ e sɛ tɛn lɛ́ é kpó é kɛ́ɖɛ́ sín hudó wɛ yě ɖó ǎ, amɔ̌, yě lɛ́ ɖó hudó nukúnɖíɖó tɔn nú sɔgúdo.”b Mɛ e ɖó nukúnɖíɖó lɛ́ é ɖó hwɛjijɔ ɖagbe e wú yě ná ɖó linlin e sɔgbe é dó sɔgúdo yětɔn wú é. Amɔ̌, gɔ́ nú nukúnɖíɖó ɔ, mɛ e ɖo bibɛtɛn ba wɛ lɛ́ é lɛ́vɔ́ ɖó hudó gbɔdónúmɛ tɔn bá dó mɔ kɔ dó sa fún ɖo lěe nǔ nɔ cí nú mɛ é linu.

“Hwenu e un ɖó ná hɔn sín to ce mɛ bo ná jó xwédo ce dó é ɔ, un mɔ nyiɖée ɖo nyiɖokpó mɔ̌ kpɔ́n ǎ. Xɛsi, wǔblá kpó adohu adohu kpó ɖí bú mì.”—Emmanuel, Haiti.

Nǔ ko cí mɔ̌ nú we kpɔ́n a? Ényí a hɔn sín xwé towe gbe ɔ, a ɖó hudó fí e a ná mɔ nukúnɖíɖó kpó gbɔdónúmɛ kpó ɖe é tɔn. Nɛ̌ Xó Mawu tɔn Biblu ɔ ka sixú d’alɔ we gbɔn?

Gbɔdónúmɛ e ɖo Xó Mawu tɔn mɛ é

Biblu ɖɔ: ‘Jexóvac nɔ yí wǎn nú toɖévomɛnu lɛ́.’—Sɛ́nflínmɛ 10:17, 18, nwt.

Biblu ɖɔ: “[Jexóva] ɖo kpɔ́ xá mɛ e nɔ sú xó ylɔ́ ɛ lɛ́ bǐ.”—Ðɛhan 145:18.

Biblu ɖɔ: “Mawu nɔ wa nǔ nyanya gbeɖé ǎ. Nǔbǐwúkpétɔ́ ɔ nɔ dó hwɛ agɔ gbeɖé ǎ.”—Jɔbu 34:10, 12.

Énɛ́ xlɛ́ ɖɔ é kún nyí Mawu wɛ nɔ zɔ́n bɔ a nɔ mɔ wǔvɛ́ ó. É ɖo tó dɔn nú we wɛ ǎ, mɔ̌ jɛ́n é ma lɛ́ hɛn gbɛ vɛ́ wǔ nú bá dó tɛ́n we kpɔ́n ǎ é nɛ́.

Nukúnɖíɖó e ɖo Xó Mawu tɔn mɛ é

Biblu tínmɛ nǔ e Mawu ná wa nú mǐ ɖo sɔgúdo é. Mǐ ní kpɔ́n lěe nukúnɖíɖó énɛ́ ɖo alɔ dó mɛ ɖěɖěe hɔn jó xwé yětɔn dó lɛ́ é wɛ gbɔn é.

Biblu ɖɔ: “[Mawu] ná súnsún ɖasin bǐ sín nukún yětɔn mɛ, kú sɔ́ ná tíin ǎ; mɔ̌ jɛ́n aluwɛ alǒ alěníná alǒ wǔvɛ́ ma sɔ́ ná tíin ǎ é nɛ́.”—Nǔɖexlɛ́mɛ 21:4.

Énɛ́ xlɛ́ ɖɔ è ná ɖe wǔvɛ́ lɛ́ sín nú mǐ. Mawu d’akpá ɖɔ émí ná ɖeɖɛ tagba e sixú zɔ́n égbé bɔ a ná mɔ ɖɔ émí kún sɔ́ ɖó nukúnɖíɖó ɖě ó lɛ́ é bǐ sín.

“Mawu ná ɖó nǔ nǔagɔwiwa kpó nǔnyanyawiwa kpó e ɖo jijɛ lɛ́ lɛ̌ dó mǐ wɛ lɛ́ é nu zaanɖé din. Nukúnɖíɖó énɛ́ nɔ d’alɔ mì bɔ un nɔ ɖo tamɛ lin dó hwenu e wǔvɛ́mimɔ bǐ ná vɔ dó é jí wɛ.”—Karla, El Salvador.

Biblu ɖɔ: “È sɔ́ ná flín nǔ xóxó lɛ́ ǎ, mɔ̌ jɛ́n yě ma sɔ́ ná wá ayi mɛ ǎ é nɛ́.”—Ezayíi 65:17.

Énɛ́ xlɛ́ ɖɔ mǐ sɔ́ ná flín nǔ nyanya e mɛ mǐ gbɔn wá yi lɛ́ é ɖě ǎ. Mawu ná mɔ nǔ jɛ wú ɖɔ nǔ nyanya e mɛ a gbɔn wá yi lɛ́ é kún sɔ́ ná dó tagba nú we ɖo ayi mɛ káká sɔ́yi ó.

“Biblu d’akpá ɖɔ wǔvɛ́ e mǐ nɔ mɔ ɖo lěe nǔ nɔ cí nú mɛ é linu é kpó nǔ e mǐ jó dó hwenu e mǐ hɔn sín xwé mǐtɔn lɛ́ gbe lɛ́ é kpó ɖě kún tlɛ sɔ́ ná wá ayi mɛ nú mǐ ó. Nukúnɖíɖó énɛ́ d’alɔ mì bɔ un ɖí xwi xá ninɔmɛ syɛ́nsyɛ́n e mɛ gbɔn dín wɛ xwédo ce ɖe é, ɖó un tuun ɖɔ zaanɖé din ɔ nǔ lɛ́ ná húzú.”—Natalia, Ukraine.

Biblu ɖɔ: “Mawu jǐxwé tɔn ɔ ná ɖó axɔ́súɖuto ɖé ayǐ, bɔ è ná . . . gba axɔ́súɖuto énɛ́ lɛ́ bǐ hánnyá.”—Daniyɛ́li 2:44.

Énɛ́ xlɛ́ ɖɔ acɛkpikpa jǐxwé tɔn e nǔ bǐ vɔ ɖ’é wú é ɖé ná kpa acɛ dó ayǐkúngban ɔ bǐ jí. Zaanɖé din ɔ, Mawu ná sɔ́ acɛkpikpa tɔn e ná kpa acɛ sín jǐxwé é dó ɖyɔ́ acɛkpikpa gbɛtɔ́ lɛ́ tɔn bǐ. Acɛkpikpa énɛ́ ná hɛn fífá jɔ fífá kpó ayijayǐ jɔ ayijayǐ kpó wá, bo ná wa nǔ xá mɛ bǐ kpó hwɛjijɔ kpó, bo ná bló bɔ mɛ ɖěbǔ sɔ́ ná nyí wamamɔnɔ ǎ.—Micée 4:3, 4.

“Tuun e un tuun ɖɔ adǎkaxixo, mɛ ɖe ɖó vo, nǔvɛdómɛ kpó akɔ kínklán kpó kún ná nɔ ayǐ sɔ́yi ó é nɔ ná hlɔ̌nhlɔ́n mì tawun, ɖó Axɔ́súɖuto Mawu tɔn ná bló bɔ tagba énɛ́ lɛ́ bǐ ná vɔ zaanɖé.”—Mustafa, Moyen-Orient.

Nǔnywɛ́ e ɖo Xó Mawu tɔn mɛ é

Nǔnywɛ́ e ɖo Biblu mɛ bo nyɔ́ zán tawun lɛ́ é sixú d’alɔ we hwenu e a ná ɖo xwi ɖí xá nǔ e ko gbo we wá yi lɛ́ é wɛ é. É sixú lɛ́ d’alɔ we bɔ a ná ɖí xwi xá ninɔmɛ towe e húzú é, káká jɛ nǔɖókan towe e a hɛn bú lɛ́ é jí. Kpɔ́n lěe nǔgbódodó élɔ́ lɛ́ e bɔ d’é wú lɛ́ é ɖo nyɔ̌ná hɛn wá nú mɛ e ɖo bibɛtɛn ba wɛ lɛ́ é wɛ gbɔn é:

Biblu ɖɔ: “Ényí mɛɖé tlɛ ɖó nǔ bɔ é túnflá ɔ, nǔ e é ɖó lɛ́ é wɛ nɔ ná ɛ gbɛ ǎ.”—Luki 12:15.

Kpɔ́n lěe xó élɔ́ lɛ́ e nǔnywɛ́ kpé lɛ́ é sixú d’alɔ we bɔ a ná ɖí xwi xá gbɔn é: Nǔ e jɛ lɛ́ é kpó nǔ e a hɛn bú lɛ́ é kpó sixú dó kpo awa mɛ nú we tawun. Amɔ̌, ényí a yi agbɔ̌n jí bo lin tamɛ dó lěe gbɛ towe xɔ akwɛ́ sɔ́ é jí ɔ, é sixú d’alɔ we bɔ awakanmɛ sɔ́ ná kú we dín ɖó nǔ e a hɛn bú lɛ́ é wú ǎ.

“Gbɛ xɔ akwɛ́ tawun hú nǔɖókan lɛ́. Ðo ninɔmɛ ɖé lɛ́ mɛ ɔ, nǔɖókan lɛ́ alǒ akwɛ́ sixú d’alɔ ǎ kpowun.”—Natalia, Ukraine.

Biblu ɖɔ: “Ma nɔ ɖɔ: ‘Étɛ́wú azǎn e wá yi lɛ́ é ka nyɔ́ hú din tɔn lɛ́?’ ó.”—Nǔnywɛ́tɔ́xó 7:10.

Kpɔ́n lěe xó élɔ́ lɛ́ e nǔnywɛ́ kpé lɛ́ é sixú d’alɔ we bɔ a ná ɖí xwi xá gbɔn é: Ninɔmɛ towe din tɔn sixú vɛ́ wǔ tawun, amɔ̌, ényí a nɔ tɛ́n kpɔ́n bo ma nɔ sɔ́ jlɛ́ dó ninɔmɛ e mɛ a nɔ wá yi lɛ́ é wú ǎ ɔ, é ná d’alɔ we bɔ a ná nyi alɔ nú akpɔmimɔ.

“Un kpé wú bo kpo ɖo linlin e sɔgbe é ɖó wɛ, ɖó un yí gbe nú lěe ninɔmɛ ce ɖe din é wútu.”—Eli, Rwanda.

Biblu ɖɔ: “Ényí mǐ ɖó nǔɖuɖu kpó avɔ kpó ɔ, nǔ énɛ́ lɛ́ ná kpé mǐ.”—1 Timɔtée 6:8.

Kpɔ́n lěe xó élɔ́ lɛ́ e nǔnywɛ́ kpé lɛ́ é sixú d’alɔ we bɔ a ná ɖí xwi xá gbɔn é: Tɛ́n kpɔ́n bónú nǔ tají gbɛ mɛ tɔn lɛ́ ní nɔ kpé we. Ényí nǔ e a ɖó é nɔ kpé we ɔ, é ná d’alɔ we bɔ a ná ɖó fífá ayi mɛ tɔn.

“Biblu ɖo alɔ dó mì wɛ bɔ un nɔ kpɔ́n nǔ lɛ́ ɖo ali ɖěvo nu, bo nɔ sɔ́ ayi ɖó nǔ e mǐ hɛn bú lɛ́ é jí ǎ. Nyi kpó así ce kpó ɖó awǎjijɛ ɖó mǐ ɖo gbɛ, bo lɛ́ ɖo ayijayǐ mɛ.”—Ivan, Ukraine.

Biblu ɖɔ: “Énɛ́ wútu ɔ, nǔ ɖěbǔ e mi ba ɖɔ gbɛtɔ́ lɛ́ ní wa nú mi é ɔ, mi lɔ ɖó ná wa nú yě lɔ.”—Matíe 7:12.

Kpɔ́n lěe xó élɔ́ lɛ́ e nǔnywɛ́ kpé lɛ́ é sixú d’alɔ we bɔ a ná ɖí xwi xá gbɔn é: Ényí a nɔ wa nǔ e wú a kpé é bǐ bo nɔ ɖó suúlu bo nɔ lɛ́ nyɔ́ xomɛ dó mɛ ɖěvo lɛ́ wú ɔ, kpɔ́ninɔ xá yě ná bɔ wǔ nú we hú gǎn. Gǎndídó towe lɛ́ sixú d’alɔ we bɔ a ná ɖu ɖo linlin agɔ e mɛ lɛ́ nɔ ɖó ɖo xá ɔ mɛ lɛ́ é jí, bo ná lɛ́ zɔ́n bɔ yě ná yí we.

“Mɛ gěgé nɔ ba ɖɔ è ní wa nǔ xá émí kpó sísí kpó, kpó xomɛnyínyɔ́ kpó, kpódó wǎnyíyí kpán. Énɛ́ nɔ zɔ́n bɔ è nɔ zun xɔ́ntɔn vívɛ́ xá mɛ e ɖo fí yɔ̌yɔ́ e è jɛ lɛ́ é é.”—Angelo, Sri Lanka.

Biblu ɖɔ: “Mi ní nɔ byɔ́ nǔ Mawu gbɔn ɖɛxixo, vosisa kpó kúdídó kpó gblamɛ; <u202F>énɛ́ ɔ, fífá Mawu tɔn . . . ná nya xɛ ɖo ayi mitɔn kpó linlin mitɔn kpó jí.”—Filípunu lɛ́ 4:6, 7.

Kpɔ́n lěe xó élɔ́ lɛ́ e nǔnywɛ́ kpé lɛ́ é sixú d’alɔ we bɔ a ná ɖí xwi xá gbɔn é: Xo ɖɛ sɛ́dó Jexóva dó lěe nǔ nɔ cí nú we é, hudó towe lɛ́, xɛsi towe lɛ́ kpó adohu adohu towe lɛ́ kpó tamɛ. Ðɛ mɔ̌hun lɛ́ sixú d’alɔ we bɔ a ná jó adohu adohu dó, bo lɛ́ sɔ́ nǔ nú we bɔ a ná tɛ́n kpɔ́n bá húzú sɔgbe xá ninɔmɛ towe yɔ̌yɔ́ ɔ.

“Un nɔ xo ɖɛ nú Mawu hweɖébǔnu e tagba lɛ́ wá é, bɔ é nɔ ná sin nú ɖɛ ce lɛ́. Nǔ e un nɔ kplɔ́n ɖo Biblu mɛ lɛ́ é nɔ ná mì fífá jɔ fífá ɖo ayi mɛ.”—Yol, Soudan du Sud.

“Wěɖexámɛ ɖagbe e ɖo Biblu mɛ lɛ́ é nɔ d’alɔ mì bɔ un nɔ mɔ fífá ayi mɛ tɔn e sín hudó un ɖó bo ná ɖí xwi xá ninɔmɛ vɛ́ wǔ ce lɛ́ é.”—Valentina, Ukraine.

“Tuuntuun ɖɔ Jexóva Mawu dó akpá gbɛ e nyɔ́ hú gǎn é ɖé tɔn nɔ dó wǔsyɛ́n lanmɛ nú mì.”—Emmanuel, Haïti

A ka ba ná kplɔ́n nǔ d’é jí dó akpá e Biblu dó dó gbɔdónúmɛ kpó nukúnɖíɖó kpó wú é wú, bo ba ná lɛ́ tuun nǔ e wú a sixú lɛ́ ɖeji dó yě wú é a? Byɔ̌ ɖɔ Kúnnuɖetɔ́ Jexóva tɔn lɛ́ ní wá ba we kpɔ́n. Alɔ dídó we ná víví nú yě tawun.