Russie tɔ́n ahwan Ukraine

Ðo 24 février 2022 zǎnzǎn tɛɛn ɔ, Russie tɔ́n ahwan Ukraine; gǎn gbɛ ɔ tɔn lɛ́ gěgé ka ko tɛ́n kpɔ́n bónú nǔ mɔ̌hun ma jɛ ó. Nɛ̌ ahwan énɛ́ ka sixú wa nǔ dó gbɛ ɔ wú gbɔn? Azǎn nabíɖé ɖíe ɔ, António Guterres, éé nyí wěgbójínɔtɔ́ ɖaxó Gbɛ̌ kplékplé akɔta lɛ́ tɔn tɔn é ɖɔ: “Mǐ tlɛ sixú ɖɔ wǔvɛ́ e ahwan énɛ́ ná dɔn wá é, nǔ e é ná hɛn gblé lɛ́ é kpó lěe é ná wa nǔ dó ayijayǐ to ɖěɖěe ɖo Elɔ́pu lɛ́ é kpó éé gbɔn gbɛ ɔ bǐ mɛ lɛ́ é kpó tɔn wú gbɔn é ǎ.”

Sɔgbe xá Biblu ɔ, étɛ́ ka nyí tínmɛ nǔ énɛ́ lɛ́ e ɖo jijɛ wɛ lɛ́ é tɔ́n?

• Jezu Klísu ɖɔ ɖ’ayǐ ɖɔ hwe ɔ nu ná wá su bɔ “akɔta ɖě ná sí te dó ɖě jí, bɔ axɔ́súɖuto ɖě ná sí te dó ɖě jí.” (Matíe 24:7) Xa xóta “Étɛ́ ka nyí wuntun ‘azǎn gǔdo gúdo tɔn lɛ́,’ alǒ ‘hwenu e gbɛ élɔ́ ná vɔ dó ɔ’ tɔn lɛ́?” bá mɔ lěe Biblu xlɛ́ ɖɔ ahwan égbé tɔn lɛ́ nyí nǔɖɔɖayǐ Jezu tɔn sín jijɛnu gbɔn é.

• Wěma Biblu tɔn e nɔ nyí Nǔɖexlɛ́mɛ é sɔ́ ahwan jlɛ́ dó sɔ́xátɔ́ e jínjɔ́n “sɔ́ vɔvɔ” jí, bo ‘bló bɔ ahwanfunfun gba kpé ayǐkúngban ɔ jí’ é wú. (Nǔɖexlɛ́mɛ 6:4) Xa xóta “Sɔ́xátɔ́ ɛnɛ lɛ́: mɛ̌ mɛ̌ e ka nú yě?” bá mɔ lěe nǔɖɔɖayǐ énɛ́ cá kan xá ahwan égbé tɔn lɛ́ gbɔn é.

• Wěma Daniyɛ́li tɔn ɖɔ ɖ’ayǐ ɖɔ “axɔ́sú totaligbé tɔn ɔ” ná ɖe kɛnfɔ xá “axɔ́sú tofɔligbé tɔn ɔ.” (Daniyɛ́li 11:25-45) Kpɔ́n video Nǔɖɔɖayǐ éé jɛnu é: Daniyɛ́li wěmata 11 bá kpɔ́n nǔ e wú è sixú ylɔ́ Russie kpó ahwan tɔn lɛ́ kpó ɖɔ axɔ́sú totaligbé tɔn ɔ é.a

• Nǔɖexlɛ́mɛ lɛ́vɔ́ ɖɔ xó dó “ahwan e è ná fun ɖo Mawu Nǔbǐwúkpétɔ́ ɔ sín azǎn ɖaxó ɔ gbe é” wú. (Nǔɖexlɛ́mɛ 16:14, 16) Amɔ̌, ahwan énɛ́ nyí ahwan bɔ to lɛ́ ná fun xá yěɖée, éé fun wɛ yě ɖe ɖo alɔnu din bɔ mǐ ɖo mimɔ wɛ é ɖɔhun ǎ. Xa xóta “Étɛ́ ka nyí ahwan Aamagedɔ́ni tɔn?” bá ɖó mɔjɛmɛ dó nǔ énɛ́ e ná jɛ ɖo sɔgúdo é wú d’é jí.

Étɛ́wú a ka sixú ɖeji dó sɔgúdo wú?

• Biblu ɖɔ ɖɔ Mawu ná “sú ahwan kún dó gbɔn gbɛ ɔ bǐ mɛ.” (Ðɛhan 46:10) Xa xóta “Une espérance réelle pour des jours meilleurs” bá tuun nǔ dó sɔgúdo e sín akpá Mawu dó é wú d’é jí.

• Jezu kplɔ́n ahwanvú tɔn lɛ́ ɖɔ yě ní nɔ xo ɖɛ ɖɔ Axɔ́súɖuto Mawu tɔn ní wá. (Matíe 6:9, 10) Axɔ́súɖuto énɛ́ nyí acɛkpikpa jǐxwé tɔn, bo ná bló bɔ linlin e Mawu ɖó nú ayǐkúngban ɔ é ná jɛnu; fífá ná tíin gbɔn gbɛ ɔ bǐ mɛ lɔ ɖo linlin Mawu tɔn mɛ. Nú a ná mɔ lěe Axɔ́súɖuto ɔ ná hɛn le wá nú we gbɔn é hǔn, kpɔ́n video Étɛ́ ka nyí Axɔ́súɖuto Mawu tɔn?

Kúnnuɖetɔ́ Jehovah tɔn 129 000 jɛjí wɛ ɖo Ukraine. Kúnnuɖetɔ́ e ɖo to ɖě lɛ́ bǐ mɛ é ɖɔhun ɔ, yě nɔ xwedó kpɔ́ndéwú Jezu tɔn bo nɔ ɖ’alɔ ɖo toxóɖiɖɔ mɛ ǎ, yě ka nɔ lɛ́ fun ahwan ǎ. (Jaan 18:36) Gbɔn gbɛ ɔ bǐ mɛ ɔ, Kúnnuɖetɔ́ Jehovah tɔn lɛ́ kpo ɖo “axɔ́súɖuɖu Mawu tɔn sín Wɛn ɖagbe” jlá wɛ ɖɔ Axɔ́súɖuto ɔ wɛ ná ɖe ɖɛ tagba gbɛtɔ́ tɔn lɛ́, káká jɛ ahwan jí. (Matíe 24:14) Mǐ byɔ́ we ɖɔ a ní wlán nǔ sɛ́dó mǐ alǒ ylɔ́ mǐ, bá kplɔ́n nǔ dó wɛn nukúnɖíɖó tɔn Biblu tɔn wú d’é jí.