Nɔ sɔ́ nǔ nú xósin e ná dó wǔsyɛ́n lanmɛ nú mɛ lɛ́ é

Ðo kplé agun tɔn lɛ́ jí ɔ, mǐ nɔ ɖó wǔjɔmɛ ɔ bo ná dó wǔsyɛ́n lanmɛ nú nɔví súnnu kpó nɔví nyɔ̌nu kpó mǐtɔn lɛ́ gbɔn xósin mǐtɔn lɛ́ gblamɛ. (Ebl. 10:24, 25) Nɛ̌ mǐ ka sixú sɔ́ nǔ nú xósin ɖěɖěe ná dó wǔsyɛ́n lanmɛ nú mɛ ɖěvo lɛ́ nǔgbó nǔgbó lɛ́ é gbɔn?

• Nɔ xo ɖɛ sɛ́ dó Jexóva. Byɔ̌ ɛ ɖɔ é ní d’alɔ we nú a ná ná xósin e ná wlí yɛ̌yi n’i, bo lɛ́ dó wǔsyɛ́n lanmɛ nú mɛ ɖěvo lɛ́ é.—Ðɛh. 35:18.

• Ma nɔ xa nǔ e ɖo wěma ɔ mɛ é kpowun ó. Ényí a zán xógbe hwiɖésúnɔ tɔn lɛ́ dó ná xósin ɔ, mɛ ɖěvo lɛ́ ná ɖu lěe a ɖɔ nǔ e a ɖi nǔ ná lɛ́ é gbɔn é sín vǐví.

• Xósin towe lɛ́ ní nɔ nɔ kléwún. Hwɛhwɛ ɔ, xósin e ɖo kléwún, bo lɛ́ bɔkun lɛ́ é wɛ nɔ dó wǔsyɛ́n lanmɛ nú mɛ hú gǎn, bo nɔ lɛ́ hun ali nú mɛ gěgé bɔ yě nɔ ɖ’alɔ ɖo kplé ɔ mɛ.—Nǔx. 10:19.

• Nɔ ɖɔ nǔ e ná dó wǔsyɛ́n lanmɛ nú mɛ lɛ́ é ɖo xósin towe lɛ́ mɛ. Ma nɔ ɖe wě xá agun ɔ, alǒ nǔɖitɔ́ hǎtɔ́ ɖé ɖo xósin towe lɛ́ mɛ ó, ma ka nɔ lɛ́ mɔ xó ɖɔ dó yě wú ɖo xósin towe lɛ́ mɛ ó.

Ényí è ma tlɛ ɖe we bónú a ná ná xósin ǎ ɔ, a hɛn ɔ, a ná dó wǔsyɛ́n lanmɛ nú mɛ ɖěvo lɛ́. Nɔ tɛ́ tó ganjí, bo nɔ dó kú nú mɛ ɖěvo lɛ́ nú xósin yětɔn lɛ́.—Nǔx. 10:21.