Kpo ɖo nǔ kplɔ́n dó Jexóva wú d’é jí wɛ

1. Nú mǐ lin tamɛ dó nǔtuuntuun Jexóva tɔn, nǔnywɛ́ tɔn kpó nǔ e é bló lɛ́ é kpó jí ɔ, nɛ̌ nǔ ka nɔ cí nú mǐ?

A KA ko lin tamɛ dó lěe nǔtuuntuun Jexóva tɔn gɔ́ngɔ́n sɔ é, lěe nǔnywɛ́ tɔn gbló ada sɔ é, alǒ nǔ tootóbú e é ko bló lɛ́ é jí kpɔ́n a? Ényí mǐ lin tamɛ dó Mɛ e dá mǐ é jí ɔ, é nɔ jí wǔ nú mǐ. Bóyá, lěe nǔ cí nú mɛsɛ́dó Pɔ́lu e wlán xó élɔ́ lɛ́ é wɛ é nɔ cí nú hwi lɔ: “Nyɔ̌ná Mawu tɔn, nǔnywɛ́ tɔn kpó nǔtuuntuun tɔn kpó d’agba lóóo! Mɛ̌ ka sixú mɔ do nú hwɛɖiɖɔ tɔn lɛ́? Mɛ̌ ka sixú mɔ nǔ jɛ nǔwiwa tɔn lɛ́ wú?”—Hlɔ̌. 11:33, 34.

2. Étɛ́ ka xlɛ́ ɖɔ mǐ hɛn ɔ, mǐ ná tuun Jexóva?

² Nǔgbó wɛ ɖɔ mǐ sixú tuun Jexóva bǐ mlɛ́mlɛ́ gbeɖé ǎ, amɔ̌, mǐ hɛn ɔ, mǐ ná tuun lěe é cí é ɖó bǎ ɖé mɛ. Axɔ́sú Davídi ɖɔ xó élɔ́ nú vǐ tɔn Salomɔ́ɔ: “Tuun Mawu nyɛ tɔ́ towe tɔn, lobo sɛn éɖokpónɔ géé, kpódó ayixa towe bǐ kpó . . . Ényí a ba ɛ ɔ, é ná jó éɖée dó bɔ a ná mɔ ɛ.” (1 Tan 28:9) Lěe mɛsɛ́dó Jaan flín nǔɖitɔ́ hǎtɔ́ tɔn lɛ́ ɖo xwe kanweko mɔ̌kpán gúdo gbɔn é ɔ, è ná mǐ “nukúnnúmɔjɛnǔmɛ, bónú mǐ ní dó sixú tuun Mawu nǔgbó ɔ.” (1 Jaan 5:20) Gɔ́ ná ɔ, Jezu ɖésú ɖɔ ɖɔ “mɛ ɖěbǔ e Vǐ ɔ jló ná ɖe Tɔ́ ɔ xlɛ́ é” hɛn ɔ, é ná tuun Jexóva.—Mat. 11:27.

3. Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

³ Mǐ mɛ e ɖo Jexóva sɛn wɛ lɛ́ é bǐ wɛ ko kplɔ́n nǔ gěgé dó Jexóva wú. É ɖo mɔ̌ có, mǐ ná gɔn ‘kplɔ́nkplɔ́n bo tuun’ Jexóva gbeɖé ǎ. (Jaan 17:3) Mǐ sixú kplɔ́n nǔ gěgé d’é jí dó nǔ e nɔ dó xomɛhunhun n’i é kpó lěe jiɖe e mǐ ɖó dó wǔ tɔn é ná gɔ́ngɔ́n d’é jí sɔ é kpó wú hwebǐnu. Mi nú mǐ ní ɖɔ xó dó nǔkanbyɔ́ e mǐ mɛ bǐ ɖó ná gbéjé kpɔ́n, ényí mǐ ɖo Jexóva sɛn wɛ sín hwenu línlín ɖíe, alǒ gbɔ ɔ é atɔn jí: Étɛ́ ka nyí tínmɛ è ní kplɔ́n bo tuun Jexóva tɔn? Étɛ́wú mǐ ka ɖó ná kpo ɖo tuuntuun i d’é jí wɛ? Gɔ́ ná ɔ, nɛ̌ mǐ ka ná tuun i ganjí gbɔn?

ÉTƐ́ KA NYÍ TÍNMƐ È NÍ KPLƆ́N BO TUUN JEXÓVA TƆN?

4. Ðɔ ali e nu mǐ ná kplɔ́n bo ná tuun Jexóva ɖe é ɖokpó.

⁴ Nǔ e Jexóva ɖɔ dó Jwifu e ná lɛ́ kɔ sín kannumɔgbénu lɛ́ é wú é gbígbéjé kpɔ́n ná d’alɔ mǐ bɔ mǐ ná tuun nǔ e è ní kplɔ́n bo tuun Jexóva nyí é. Jexóva d’akpá ɖɔ: “Un ná ná yě ayi e ná tuun mì é, bɔ yě ná tuun ɖɔ nyɛ wɛ nyí Jexóva.” (Jel. 24:7) É ɖo wɛn ɖɔ mɛ ɖěɖěe lɛ́ kɔ sín Babilɔ́nu lɛ́ é ko tuun nǔ gěgé dó Jexóva wú. Amɔ̌, ée yě lɛ́ kɔ sín Babilɔ́nu gúdo é ɔ, é byɔ́ ɖɔ yě ní dó gǎn e wú yě kpé é bǐ bo vɛ́ xá Jexóva d’é jí. Wěma alɔdlɛ́ndónǔ tɔn ɖé tínmɛ énɛ́ gbɔn lě: “Vogbingbɔn tají ɖé ɖo nǔtuuntuun dó Mawu wú kpó Mawu tuuntuun kpó tɛ́ntin. È hɛn ɔ, è ná sɔ́ jlɛ́ dó vogbingbɔn e ɖo nǔ xixa dó wǎnyíyí kpó wǎn yí nú mɛɖé kpó tɛ́ntin é wú.” Tuuntuun ɖɔ Mawu ɖé ɖe bɔ nyǐkɔ tɔn nɔ nyí Jexóva kpowun ko kpé ǎ; mǐ ba ná tuun nǔ hú mɔ̌. Mǐ ba ná kplɔ́n bo ná tuun mɛ alɔkpa e mɛ e ɖó nyǐkɔ énɛ́ ta é nyí é.

5. Étɛ́ kpɔ́ndéwú Joziyási tɔn ka kplɔ́n mǐ dó nǔ e è ní kplɔ́n bo tuun Jexóva sín tínmɛ nyí é wú?

⁵ Ényí mǐ ɖo kplɔ́nkplɔ́n bá tuun Jexóva wɛ ɔ, mǐ nɔ tuun nǔ e nɔ nyɔ́ nukún tɔn mɛ lɛ́ é kpó nǔ e ma nɔ nyɔ́ nukún tɔn mɛ ǎ lɛ́ é kpó. Lin tamɛ dó kpɔ́ndéwú axɔ́sú Joziyási tɔn wú. Biblu ɖɔ: “Hwenu e Joziyási ɖo xwe tántɔn bló wɛ ɖo zinkpo jí ɔ, é kpo ɖo vǔ, bo ka jɛ Mawu e tɔ́gbó tɔn Davídi sɛn ɔ sín jlǒ ba ná tuun jí.” (2 Tan 34:3) Amɔ̌, Joziyási wa nǔ hú nǔkplɔ́nkplɔ́n kpowun. É wa nǔ sɔgbe xá nǔ e kplɔ́n wɛ é ɖe é. Jexóva gbɔn gbeyíɖɔ Jelemíi jí bo ɖɔ ɖɔ Joziyási “bló bɔ hwɛjijɔ kpó nǔjlɔ́jlɔ́wiwa kpó tíin,” bo jɛ hun mɛ e ɖo wǔvɛ́ se wɛ é kpó wamamɔnɔ kpó jí. Énɛ́ gúdo ɔ, Jexóva ɖɔ gɔ́ ná ɖɔ: “Nǔ e è ní tuun mì sín tínmɛ nyí é nɛ́ ǎ cé?”—Jel. 22:15, 16.

6. Sɔgbe xá Ðɛhan 9:11 ɔ, ényí mǐ kplɔ́n bo tuun Jexóva d’é jí ɔ, étɛ́ ka nɔ jɛ?

⁶ Xa Ðɛhan 9:11. Lě do mǐ kplɔ́n bo tuun Jexóva sɔ é ɔ, mɔ̌ do wɛ mǐ nɔ ɖeji dó wǔ tɔn sɔ. Nǔgbódodó énɛ́ nyí nǔgbó ɖo ninɔmɛ mɛsɛ́dó Pɔ́lu tɔn mɛ. Azɔn gǔdo gúdo tɔn e è wlí i dó gan mɛ, bɔ é kpo táan kpɛɖé bɔ é ná kú é ɔ, é wlán nǔ élɔ́: “Winnyá hu mì ǎ. Ðó un tuun Mɛ e un ɖi nǔ ná é.” (2 Tim. 1:12) Nǔ e Pɔ́lu kplɔ́n lɛ́ é kpó nǔ e é mɔ kpɔ́n ɖo gbɛzán tɔn mɛ lɛ́ é kpó sísɛ́ ɛ, b’ɛ ɖeji dó Mawu wú bǐ mlɛ́mlɛ́. Pɔ́lu kú d’é jí ɖɔ Jexóva ná flín gbejíninɔgbɛ e émí zán é bá fɔ́n émí sín kú.

ÉTƐ́WÚ MǏ KA ÐÓ NÁ KPO ÐO KPLƆ́NKPLƆ́N WƐ BÁ TUUN JEXÓVA?

7. Ényí mǐ ko ɖo Jexóva sɛn wɛ sín xwe mɔ̌kpán ɖíe ɔ, étɛ́ ka sixú jɛ?

⁷ Ényí hwenu lɛ́ ɖo wǐwá yi wɛ ɔ, mǐ sixú wá túntún da kpo nú gǎn e mǐ nɔ dó bá tuun Jexóva lěe mǐ nɔ bló gbɔn azɔn nukɔntɔn e mǐ kplɔ́n nǔ dó wǔtu tɔn é é. Aniwú? Ényí mǐ ɖo Biblu xa wɛ ɖo xwégbe, alǒ ɖo kplé jí ɔ, hwɛhwɛ ɔ, mǐ nɔ lin tamɛ dó lěe mǐ sixú zán nǔ e mǐ kplɔ́n é mǐɖésúnɔ, alǒ zán dó d’alɔ mɛ ɖěvo lɛ́ gbɔn é jí. Mawuxówéma ɔ dó wǔsyɛ́n lanmɛ nú mǐ ɖɔ mǐ ní wa mɔ̌. (2 Tim. 3:16, 17) Amɔ̌, Biblu lɛ́ ɖe nǔ gěgé xlɛ́ dó Dǒwátɔ́ tɔn wú. (Ðɛh. 25:8-10) Mǐ ɖó ná nɔ sɔ́ ayi ɖó lěe wɛn e ɖo Biblu mɛ é ná hɛn le wá nú mǐ, alǒ mɛ ɖěvo lɛ́ sɔ é jí káká bo ná gɔn nǔ élɔ́ kanbyɔ́ mǐɖée gbeɖé ǎ: ‘Étɛ́ nǔ élɔ́ ka kplɔ́n mì dó Jexóva Mawu wú?’a

8. Ðagbe tɛ́ tíntɛ́nkpɔ́n bá tuun Jexóva d’é jí ka nɔ wa nú xɔ́ntɔn e mǐ zun xá ɛ é? (Ðɛhan 73:24-28)

⁸ Ényí mǐ ɖo kplɔ́nkplɔ́n bo tuun Jexóva d’é jí wɛ ɔ, xɔ́ntɔn e mǐ zun xá ɛ é nɔ ɖo syɛ́nsyɛ́n d’é jí wɛ. Ði kpɔ́ndéwú ɔ, ényí a xa Biblu, kpɔ́n tuto sunmɛ sunmɛ tɔn, yi kpléɖókpɔ́ lɛ̌dó tɔn, alǒ kpléɖókpɔ́ ɖaxó gúdo ɔ, nɛ̌ nǔ ka nɔ cí nú we dó Jexóva wú? Hwɛhwɛ ɔ, mǐ nɔ mɔ ɖɔ mǐ sɛkpɔ́ Tɔ́ mǐtɔn jǐxwé tɔn ɔ d’é jí. Aniwú? Ðó mǐ kplɔ́n nǔ dó wǔtu tɔn d’é jí. Wǎgbɔ tɔn ɔ, akpakpa nɔ sɔ́ mǐ bɔ mǐ nɔ kpa susu n’i, bo nɔ dó kú n’i. Lěe nǔ cí nú Ðɛhanwlántɔ́ e lin tamɛ dó lěe Jexóva nɔ ké ya n’i sɔ é jí, bo wlán nǔ élɔ́ é wɛ é nɔ cí nú mǐ lɔmɔ̌: “Hwi Mawu wɛ ná nyí sósyɛ́n ce, bo ná nyí nyɔ̌ná nyiɖokpónɔ géé tɔn káká sɔ́yi.” (Xa Ðɛhan 73:24-28.) Gǎn ɖěbǔ e mǐ nɔ dó bá tɛ́n kpɔ́n bá tuun Jexóva d’é jí é nɔ zɔ́n bɔ xɔ́ntɔn e mǐ zun xá ɛ bɔ akwɛ́ ma sixú xɔ ǎ é nɔ su nukún mǐtɔn mɛ d’é jí.

9. Ényí mǐ “nɔ flín” Jexóva ɔ, étɛ́ énɛ́ ka ná d’alɔ mǐ bɔ mǐ ná nɔ wa? Jlɛ̌ dó nǔɖé wú.

⁹ Ényí mǐ “nɔ flín” Jexóva, énɛ́ wɛ nyí ɖɔ mǐ nɔ flín nǔ e mǐ ko kplɔ́n dó wǔ tɔn lɛ́ é, bo nɔ lin tamɛ dó lěe nǔwiwa mǐtɔn lɛ́ nɔ cí n’i é jí ɔ, mǐ ná wá gbeta ɖagbe lɛ́ kɔn. (Nǔx. 3:5, 6) Nǔjlɛ́dónǔwú ɖé ɖíe: Nɔví súnnu kpó nɔví nyɔ̌nu kpó gěgé nɔ sɔ́ fɔtóo mɛ e yě da é tɔn ɖó bilóo yětɔn jí, akwɛ́kpo yětɔn mɛ, alǒ alǒkan yětɔn nukúnmɛ. Énɛ́ nɔ zɔ́n bɔ ayi yětɔn nɔ ɖo mɛ e yě da é jí hwebǐnu, bɔ yě nɔ wá gbeta ɖěɖěe yě tuun ɖɔ é ná dó xomɛhunhun n’i lɛ́ é kɔn, bo nɔ ny’alɔ nú nǔ ɖěbǔ e ná dó xomɛsin n’i lɛ́ é. Mɔ̌ ɖokpó ɔ, lě do mǐ nɔ lin tamɛ dó Jexóva jí hwɛhwɛ sɔ é ɔ, mɔ̌ do wɛ mǐ ná ɖibla wá gbeta ɖěɖěe ná nɔ dó xomɛhunhun n’i lɛ́ é kɔn sɔ.—Ðɛh. 19:14, 15.

10. Ényí mǐ ɖo nǔ kplɔ́n dó Jexóva wú wɛ ɔ, étɛ́ mǐ ka ná kpé wú bo wa?

¹⁰ Akpajlɛ́ Jexóva tɔn mɛ wɛ è bló mǐ ɖe, énɛ́ wú ɔ, mǐ ɖó nǔwúkpíkpé ɔ, bo nɔ ɖe jijɔ tɔn lɛ́ xlɛ́. (Bǐb. 1:26) Lě do mǐ kplɔ́n nǔ dó jijɔ Jexóva tɔn lɛ́ wú sɔ é ɔ, mɔ̌ do wɛ mǐ nɔ mɔ nukúnnú jɛ lěe mǐ ná xwedó kpɔ́ndéwú tɔn gbɔn é mɛ ganjí sɔ. Jezu ɖó hwɛ nú Sɛ́nkplɔ́nmɛtɔ́ lɛ́ kpó Falizyɛn lɛ́ kpó ɖó jijɔ Mawu tɔn lɛ́ e ma nɔ tɔ́n ɖo fɛn yětɔn nu ǎ é wútu. Yě nɔ tɛ́ dó gǒflɛ́mɛ wínníwínní e ɖo Sɛ́n ɔ mɛ lɛ́ é wú, bo ka nɔ “dó vɛ̌ nú nǔ e nyí nǔ tají ɖo Sɛ́n ɔ mɛ lɛ́ é, yě wɛ nyí hwɛjijɔ, nǔbláwǔkúnúmɛ kpó gbejíninɔ kpó.” (Mat. 23:23) Mǐ ní ma wa nǔ sinsɛngán énɛ́ lɛ́ ɖɔhun ó, é nyɔ́ wa ɔ, mi nú mǐ ní wa nǔ e wú mǐ kpé é bǐ bo mɔ nukúnnú jɛ lěe jijɔ Jexóva tɔn lɛ́ jɛ wě ɖo sɛ́n tɔn lɛ́ kpó nǔgbódodó tɔn lɛ́ kpó mɛ gbɔn é wú. Mɔ̌ wiwa ná d’alɔ mǐ bɔ mǐ ná ɖe jijɔ ɖaaɖagbe énɛ́ lɛ́ xlɛ́.—1 Jaan 4:8, 11.

NƐ̌ MǏ KA NƆ KPLƆ́N BO NƆ TUUN JEXÓVA D’É JÍ GBƆN?

11. Nɛ̌ a ka kplɔ́n bo tuun Jexóva azɔn nukɔntɔn ɔ gbɔn?

¹¹ Mɛ̌ ka ɖɔ Jexóva sín xó nú we azɔn nukɔntɔn ɔ? Bóyá mɛjitɔ́ klisánwun lɛ́ wɛ kplɔ́n we bɔ a su. Yě sixú ko kpi tan ɖěɖěe ɖo Biblu mɛ bo ɖe jijɔ Jexóva tɔn lɛ́ xlɛ́ lɛ́ é nú we, bo lɛ́ kplɔ́n we lěe nǔ ɖěɖěe é dá lɛ́ é ɖe mɛ alɔkpa e é nyí é xlɛ́ gbɔn é. Alǒ é sixú nyí ɖɔ Kúnnuɖetɔ́ Jexóva tɔn lɛ́ ɖokpó wɛ xwlé we Biblu kplɔ́nkplɔ́n. Biblu kplɔ́nmɛtɔ́ towe sixú ko zán wěma Ðu gbɛ víví káká sɔ́yi! dó d’alɔ we bɔ a lin tamɛ dó tan Biblu tɔn lɛ́ jí, bo lɛ́ kplɔ́n nǔ dó jijɔ ɖaaɖagbe Jexóva tɔn lɛ́ wú gbɔn do biba nú nǔ dó wɛ̌kɛ́ ɔ wú gblamɛ.b (Nɛɛ. 8:8; Mɛ. 14:17) Mi nú mǐ ní kpɔ́n lěe mǐ sixú kpo ɖo nǔ kplɔ́n dó Jexóva wú wɛ gbɔn é.

12-13. Étɛ́ mǐ ka sixú kplɔ́n dó Jexóva wú gbɔn Biblu xixa gblamɛ? Nǎ kpɔ́ndéwú ɖé. (Jelemíi 39:15-18) (Kpɔ́n ɖiɖe ɔ lɔmɔ̌.)

¹² Nukɔntɔn, mǐ sixú kplɔ́n nǔ dó Jexóva wú gɔ́ ná gbɔn Xó tɔn xixa kpó kplɔ́nkplɔ́n kpó gblamɛ. Hweɖélɛ́nu ɔ, Biblu nɔ kɛ nu dó jijɔ Mawu tɔn lɛ́ wú tlɔlɔ. (Tín. 34:6, 7) Amɔ̌, hwɛhwɛ ɔ, é nɔ kpi tan ɖěɖěe ɖɔ xó dó gbɛtɔ́ lɛ́ kpó gbeta e kɔn yě wá lɛ́ é kpó wú lɛ́ é. Ényí a ɖo tan mɔ̌hun lɛ́ xa wɛ hǔn, nɔ lin tamɛ dó nǔ e yě sixú kplɔ́n we dó Jexóva wú lɛ́ é jí.

¹³ Kpɔ́ndéwú ɖé ɖíe. Hwenu e a ná ɖo Jelemíi 38:6-13 xa wɛ é ɔ, a ná kplɔ́n nǔ dó Etiopíinu Ebɛ́di-Mɛlɛ́ki e hwlɛ́n gbeyíɖɔ Jelemíi gán é wú. É ɖo wɛn ɖɔ, a ná yá wǔ ɖ’ayi ali ɖěɖěe nu a sixú xwedó kpɔ́ndéwú mɛɖée sísɔ́ dó sá vɔ̌ Ebɛ́di-Mɛlɛ́ki tɔn, akɔ́nkpinkpan tɔn kpó wǎn yí nú nǔɖitɔ́ hǎtɔ́ tɔn lɛ́ kpó tɔn ɖe é wú. A ka lɛ́ ɖ’ayi jijɔ Jexóva tɔn ɖěɖěe jɛ wě ɖo tan énɛ́ mɛ lɛ́ é wú a? (Xa Jelemíi 39:15-18.) Ði kpɔ́ndéwú ɔ, wěmafɔ tɛ́ ka xlɛ́ ɖɔ nǔ nɔ su Jexóva nukúnmɛ, é nɔ wa nǔ jlɔ́jlɔ́, nɔ ɖe mɛɖé ɖó vo ɖo mɛɖé mɛ ǎ? Jijɔ Jexóva tɔn ɖěvo tɛ́ lɛ́ wú a ka lɛ́ ɖ’ayi ɖo tan énɛ́ mɛ? Ényí a ɖo akpáxwé Mawuxówéma ɔ tɔn ɖé xa wɛ hǔn, nɔ ɖ’ayi jijɔ Jexóva tɔn ɖěɖěe jɛ wě ɖ’é mɛ lɛ́ é wú, bo nɔ dó kú n’i ɖó jijɔ énɛ́ lɛ́ wú, lobo nɔ lɛ́ kpa susu n’i.

14. Étɛ́wú mǐ ka ɖó ná nɔ lin tamɛ dó nǔ e Jexóva dá lɛ́ é jí dó nǔjɔnǔ mɛ?

¹⁴ Wegɔ́, mǐ hɛn ɔ, mǐ ná kplɔ́n nǔ gěgé dó Jexóva wú gbɔn tamɛ linlin dó alɔ tɔn núwiwa lɛ́ jí gblamɛ. (Ðɛh. 145:9, 10) É ɖo wɛn ɖɔ, nǔ e ɖo wɛ̌kɛ́ ɔ mɛ lɛ́ é kpínkpɔ́n kpowun kún ko kpé ó. Mɛɖé lɛ́ zán gbɛhwenu yětɔn bǐ dó kplɔ́n nǔ dó wɛ̌kɛ́ ɔ wú, bo ka kpé wú bo tuun jijɔ Mawu tɔn lɛ́ ǎ, alǒ tlɛ tuun ɖɔ Mawu tíin lɔ vɔ́vɔ́ ǎ! Mɛsɛ́dó Pɔ́lu wlán ɖɔ “è nɔ mɔ jijɔ [Mawu] tɔn e gbɛtɔ́ ma sixú mɔ ǎ lɛ́ é gannaganna sín hwenu e é dá gbɛ ɔ é, ɖó yě jɛ wě ɖo nǔ e é bló lɛ́ é mɛ.” (Hlɔ̌. 1:20) Biblu ɖěvo tínmɛ wěmafɔ énɛ́ bo ɖɔ ɖɔ “mɛ e nɔ lin tamɛ ganjí é sixú mɔ jijɔ Mawu tɔn lɛ́.” Énɛ́ wú ɔ, mǐ ɖó ná nɔ lin tamɛ dó nǔ e mǐ nɔ mɔ lɛ́ é jí bá dó sixú ɖ’ayi jijɔ Mɛ e dá mǐ é tɔn lɛ́ wú.

15. Étɛ́ Patrick ka wa dó kplɔ́n bo tuun Jexóva hú gǎn? Nɛ̌ a ka sixú wa nǔ ɖokpó ɔ gbɔn? (Kpɔ́n ɖiɖe ɔ lɔmɔ̌.)

¹⁵ Gěgé mǐtɔn wɛ nɔ nɔ xá e hun nukún lɛ́ é mɛ, b’ɛ sixú zɔ́n bɔ mǐ gɔn nǔ e ɖo wɛ̌kɛ́ ɔ mɛ lɛ́ é káká ɖé mɔ. Ényí a na bo ɖo ninɔmɛ mɔ̌hun mɛ ɔ, a ka hɛn ɔ, a ná kpo ɖo nǔ kplɔ́n dó nǔɖíɖó lɛ́ wú wɛ a? Lin tamɛ dó Patrick e nɔ nɔ toxo ɖaxó République du Congo tɔn e è nɔ ylɔ́ ɖɔ Brazzaville é mɛ é jí. É ɖɔ: “Gbe bǐ gbe ɔ, un nɔ tɛ́n kpɔ́n bo nɔ kpɔ́n nǔ e Jexóva dá lɛ́ é ɖokpó. Un nɔ mɔ nǔɖogbɛ wínníwínní lɛ́, alǒ xɛví vǔvǔ lɛ́ hwɛhwɛ, bɔ yě nɔ ɖo gǎn dó dó ba nǔɖuɖu wɛ, alǒ ɖo fí e yě ná nɔ é ba wɛ. Un mɔ xɛví ɖé lɛ́ gbe ɖokpó bɔ yě ɖo adɔ̌ yětɔn lɔn wɛ. Yě nɔ ba nǔ e ɖo xá mǐtɔn mɛ lɛ́ é bo nɔ zán dó bló adɔ̌ nú vǐ yětɔn lɛ́.” Amɔ̌, Patrick nɔ te ɖó fínɛ́ ǎ; é lin tamɛ dó Gbɛɖótɔ́ ɔ jí dó nǔjɔnǔ mɛ. É ɖɔ: “É kplɔ́n mì ɖɔ ganjíninɔ nǔɖíɖó lɛ́ tɔn nɔ ɖu ayi mɛ nú Jexóva, é ná bo tlɛ nyí nǔɖíɖó e ma sɔ atɛ́n ǎ lɛ́ é ɔ nɛ́. Énɛ́ ná gǎnjɛwú mì ɖɔ nǔ nyi lɔmɔ̌ tɔn nɔ ɖu ayi mɛ n’i, bɔ é kún ná gɔn nǔ e sín hudó un ɖó lɛ́ é sín do sú nú mì ó.”

16. Étɛ́ ka d’alɔ Jezu sín nɔ Mali b’ɛ wá tuun Jexóva d’é jí? Nɛ̌ mǐ ka sixú xwedó kpɔ́ndéwú tɔn gbɔn? (Kpɔ́n ɖiɖe ɔ lɔmɔ̌.)

¹⁶ Ali atɔngɔ́ e nu mǐ sixú kplɔ́n bo tuun Jexóva d’é jí ɖe é wɛ nyí tamɛ linlin dó nǔ e mǐɖésúnɔ ko mɔ kpɔ́n lɛ́ é jí. Nǔ e Jezu sín nɔ Mali wa é nɛ́. É ko tuun Jexóva ganjí ɖ’ayǐ, bɔ é lɛ́ “jɔ wǔ [i].” (Luk. 1:30) Amɔ̌, énɛ́ gúdo ɔ, è zé azɔ̌ kpinkpɛn ɖé d’así n’i, é wɛ nyí ɖɔ é ná nyí Vǐ Mawu tɔn sín nɔ. Jexóva gbɔn wɛnsagun Gabliyɛ́li kpó hɛ̌nnumɔ Mali tɔn Elizabɛ́ti kpó jí bo ná hlɔ̌nhlɔ́n Mali, bo lɛ́ ná gǎnjɛwú i. É lin tamɛ dó nǔ e wǔjɔmɛ énɛ́ kplɔ́n ɛ dó Jexóva wú é jí ɖo nukɔnmɛ, énɛ́ wɛ nyí hlɔ̌nhlɔ́n Jexóva tɔn, nǔbláwǔkúnúmɛ tɔn, mɛɖé e é ma nɔ ɖe ɖó vo ɖo mɛɖé mɛ ǎ é kpó lěe mɛ e ma tlɛ sɔ atɛ́n ǎ lɛ́ é sín nǔ nɔ ɖu ayi mɛ n’i gbɔn é kpó. (Luk. 1:46-55) Gǔdo e Mawu nɔ nú Mali é su nukún tɔn mɛ, mɔ̌ ɖokpó ɔ, ényí Jexóva d’alɔ mǐ lɔmɔ̌ “ɖo hwetɔnnu” ɔ, é nɔ su nukún mǐtɔn mɛ. (Ebl. 4:16) Ényí a mɔ alɔdó énɛ́ hǔn, kanbyɔ́ hwiɖée ɖɔ: ‘Étɛ́ énɛ́ ka kplɔ́n mì dó Jexóva wú? Jijɔ Jexóva tɔn tɛ́ lɛ́ énɛ́ ka ɖe xlɛ́?’

MǏ NÁ GƆN NǓ KPLƆ́N GBEÐÉ Ǎ

17-18. Étɛ́wú mǐ ka sixú ɖɔ ɖɔ mǐ kún ná gɔn nǔ kplɔ́n dó Jexóva wú gbeɖé ó?

¹⁷ Lin tamɛ dó lěe mǐ ná kplɔ́n nǔ dó Jexóva wú ɖo gbɛ yɔ̌yɔ́ ɔ mɛ sɔ é jí. Mǐ ná mɔ wěma mlámlá yɔ̌yɔ́ ɖěɖěe ná ɖe nǔ ɖěɖěe ɖó nukún wɛ Jexóva ɖe ɖo mǐ sí lɛ́ é xlɛ́ lɛ́ é. (Nǔɖe. 20:12) Mǐ ná lɛ́ kplɔ́n nǔ gěgé dó wǔ tɔn hwenu e mǐ ná ɖo nǔ e é dá lɛ́ é sín vǐví ɖu wɛ bǐ mlɛ́mlɛ́ é. (Eza. 11:6-9) Gɔ́ ná ɔ, nukúnnúmɔjɛnǔmɛ e mǐ ɖó dó Tɔ́ mǐtɔn wú hwenu e mǐ ná ɖo nǔ yɔ̌yɔ́ énɛ́ lɛ́ sín vǐví ɖu wɛ é ná jɛjí; è ná fɔ́n mɛvívɛ́ mǐtɔn lɛ́ sín kú, bɔ mǐ ná ɖo mɛ maɖóblɔ̌ húzú wɛ ayǐhɔ́ngbe ayǐhɔ́ngbe.

¹⁸ Mǐ ná ɖó nǔ kplɔ́nkplɔ́n dó Jexóva wú te gbeɖé ǎ. É ko tíin sín xwe maxamaxa lɛ́ ɖíe, énɛ́ wú ɔ, “nǔnywɛ́ tɔn ɖó dogbó ǎ.” (Ðɛh. 90:2; 147:5) Mǐ “ná tuun azɔ̌ e Mawu nǔgbó ɔ wa sín bǐbɛ́mɛ yi vivɔnu é sín do gbeɖé ǎ.” (Nǔt. 3:11) Énɛ́ wú ɔ, ényí mǐ ɖo nǔgbó ɔ mɛ din é ɔ, é ná bo ko lín gbɔn ɖěbǔ hǔn, mi nú mǐ ní nɔ zán ali e hun nú mǐ lɛ́ é bǐ dó kplɔ́n nǔ dó Tɔ́ wǎnyíyínɔ mǐtɔn wú d’é jí.