NǓ E NǓXATƆ́ LƐ́ KANBYƆ́ LƐ́ É

Akɔjijɛ we tɛ́ lɛ́ xó ɖɔ wɛ mɛsɛ́dó Pɔ́lu ka ɖe ɖo Galátinu lɛ́ 4:24 mɛ?

Ée mɛsɛ́dó Pɔ́lu ɖɔ xó dó kancícá e Ablaxámu ɖó xá Sala kpó Agáa kpó é wú gúdo é ɔ, é ɖɔ: “Nǔ vovo énɛ́ lɛ́ ɖó tínmɛ ɖěvo, ɖó nyɔ̌nu we énɛ́ lɛ́ nɔ te nú akɔjijɛ we.” (Ga. 4:22-24) Ð’ayǐ ɔ, mǐ ɖɔ ɖɔ akɔjijɛ lɛ́ wɛ nyí akɔjijɛ Sɛ́n ɔ tɔn kpó akɔjijɛ yɔ̌yɔ́ ɔ kpó. É ɖo mɔ̌ có, ée è lɛ́ wá gbéjé nǔ lɛ́ kpɔ́n ganjí é ɔ, mǐ mɔ ɖɔ é byɔ́ ɖɔ è ní bló hǔzúhúzú ɖé. É cí ɖɔ é kún nyí akɔjijɛ yɔ̌yɔ́ ɔ xó ɖɔ wɛ Pɔ́lu ɖe ó, loɔ, akɔjijɛ Ablaxámu tɔn xó ɖɔ wɛ é ɖe. Nǔ e wú mǐ ɖɔ mɔ̌ é ɖé lɛ́ ɖíe.a

Pɔ́lu jlɛ́ kannumɔ nyɔ̌nu Agáa dó Sinayíi só ɔ wú. (Ga. 4:25) Agáa nɔ te nú akɔjijɛ Sɛ́n ɔ tɔn e è jɛ ɖo Sinayíi só ɔ jí ɖo 1513 J.H.M. tɔn é. (Tín. 19:5, 6) Gbɛtɔ́ hwɛhutɔ́ ɖěbǔ sixú nyi Sɛ́n énɛ́ bónú nǔ bǐ vɔ ɖ’é wú ǎ, énɛ́ wú ɔ, é nɔ flín Jwifu lɛ́ ɖɔ yě nyí kannumɔ nú hwɛhuhu. Akɔjijɛ énɛ́ sixú d’alɔ akɔta Izlayɛ́li tɔn b’ɛ ná tuun Mɛsíya ɔ. Mɛsíya ɔ ɖokpónɔ géé wɛ ná kpé wú bo nyi Sɛ́n ɔ bɔ nǔ bǐ ná vɔ ɖ’é wú. Hwenu e Mɛsíya ɔ sɔ́ gbɛ maɖóblɔ̌ tɔn dó sá vɔ̌ é ɔ, é hun ali nú gbɛtɔ́ hwɛhutɔ́ lɛ́ bɔ yě ná jɛ yěɖée sí sín hwɛhuhu kpó kú kpó sí. (Ga. 3:19, 24, 25) Ée Jezu bló bɔ linlin Mawu tɔn jɛnu é ɔ, è sɔ́ ɖó hudó Sɛ́n ɔ tɔn ǎ.—Hlɔ̌. 10:4.

Pɔ́lu ɖe vogbingbɔn e ɖo Agáa kpó Sala éé nyí “nyɔ̌nu e ɖo éɖésúnɔ sí” bo ji vǐ ɖó “akpá ɖé wútu” é kpó xlɛ́. (Ga. 4:23) Akɔjijɛ Ablaxámu tɔn wɛ nyí akpá énɛ́. (Ga. 3:29; 4:28, 30) È sɛ sin xwe ná gbɔn lě ɖo Bǐbɛ́mɛ 22:18 mɛ: “Ðó a se tónú nú mì wútu ɔ, un ná wa ɖagbe nú akɔta e ɖo ayǐkúngban jí lɛ́ gbɔn vǐ towe lɛ́ jí.”

Akɔ énɛ́ e è jɛ xá Ablaxámu é wá ná mɔjɛmɛ ɖěvo lɛ́ dó akpá e Jexóva dó ɖo Edɛ́ni é wú. (Bǐb. 3:15) É ɖe xlɛ́ ɖɔ “kúnkan” e xó è ɖɔ ɖ’ayǐ é ná gosín kúnkan Ablaxámu tɔn mɛ. Pɔ́lu tínmɛ ɖɔ mɛ nukɔn nukɔntɔn e “kúnkan” énɛ́ nɔ dó gesí é wɛ nyí Jezu Klísu. Amɔ̌, mɛ ɖěɖěe “ɖo bǔ xá Klísu,” énɛ́ wɛ nyí mɛ 144000 ɖěɖěe ná kpa acɛ xá Jezu ɖo Axɔ́súɖuto tɔn mɛ lɛ́ é lɔ ɖo kúnkan nǔjlɛ́dónǔwú tɔn énɛ́ mɛ. (Ga. 3:16, 29; Nǔɖe. 14:1-3) Akpá e Mawu dó nú Ablaxámu é sín jijɛnu ná hɛn nyɔ̌ná gěgé wá nú mɛ e yí Jezu bo nɔ se tónú n’i lɛ́ é.

Étɛ́wú Pɔ́lu ka zán “tínmɛ ɖěvo” énɛ́? É xlɛ́ ɖɔ ényí Jwifu hwetɔnnu tɔn lɛ́ tɛ́ dó Sɛ́n ɔ wú ɔ, yě ná cí Agáa ɖɔhun, bo ná kpo ɖo kannumɔ nyí wɛ. É ɖo mɔ̌ có, ényí yě yí mɛ tají “kúnkan” Ablaxámu tɔn tɔn, énɛ́ wɛ nyí Jezu Klísu ɔ, Sala ɖɔhun ɔ, yě ná jɛ yěɖée sí. Yě ná jɛ yěɖée sí bǐ mlɛ́mlɛ́ sín hwɛhuhu kpó kú kpó sí. (Jaan 8:32-34) Ényí yě ma yí Jezu ǎ ɔ, yě ná xo hwɛjijɔ tají e wú akɔjijɛ Sɛ́n ɔ tɔn ɖo ayǐ é kpo, énɛ́ wɛ nyí ɖɔ, é ná kplá yě yi jó nú Klísu.

Gěgé Galátinu e Pɔ́lu wlán nǔ sɛ́ dó lɛ́ é tɔn nyí Jwifu ǎ, yě ka lɛ́ nɔ Sɛ́n ɔ glɔ́ kpɔ́n ǎ. Mɛ e nyí Jwifu bo ɖo agun ɔ mɛ é ɖé lɛ́ nɔ ba ɖɔ hǎgbɛ́ agun ɔ tɔn e ma nyí Jwifu ǎ lɛ́ é ní se tónú nú Sɛ́n ɔ káká jɛ éé kunkplá adagbigboxó ɔ é jí. Pɔ́lu zɔ́n tamɛ lin yě bo xlɛ́ yě ɖɔ kannumɔ nyínyí nú Sɛ́n ɔ xlonɔnú wɛ, ɖó Klísu zɔ́n bɔ yě ko jɛ yěɖée sí.—Ga. 5:1, 10-14.