Kpo ɖo hlɔ̌nhlɔ́n ná xɔ́ntɔn e hwi kpó mɛ e a da é kpó zun é wɛ

1. Étɛ́wú xɔ́ntɔn ɖagbe lɛ́ ka nyí nǔníná sín Jexóva gɔ́n?

NǓNÍNÁ wɛ xɔ́ntɔn jɔ xɔ́ntɔn lɛ́ nyí sín Jexóva gɔ́n. (Ja. 1:17) Yě nɔ yí wǎn nú Mawu, bo nɔ yí wǎn nú mǐ lɔmɔ̌. Yě nɔ j’awǎ xá mǐ, nɔ dó gbɔ nú mǐ hwenu e awakanmɛ kú mǐ é, bo nɔ lɛ́ ɖe wě jɔ wě xá mǐ. Gbejí e yě nɔ nɔ é zɔ́n bɔ mǐ sixú ɖeji dó yě wú. Xɔ́ntɔn mɔ̌hun lɛ́ “nɔ bló bɔ ayi nɔ j’awǎ” nú mǐ nǔgbó nǔgbó.—Nǔx. 27:9.

2. Étɛ́wú é ka ɖo tají ɖɔ asú kpó asi kpó lɛ́ ní kpo ɖo vǐvɛ́ d’é jí wɛ? (Matíe 19:6)

² É ɖo tají ɖɔ asú kpó asi kpó lɛ́ ní nyí xɔ́ntɔn alɔ ma yi mɛ. Yě ɖó ná lin ɖɔ émí ko nyí xɔ́ntɔn bɔ xó fó ǎ, yě ɖó ná lɛ́ kpo ɖo vǐvɛ́ d’é jí wɛ. Ényí yě jɛ vɛ̌ dó nú yěɖée lɛ́ jí ɔ, yě sixú jɛ mimɔ jí ɖɔ émí zun émíɖokpó, akpɔ ná nɔ ɖó yě bɔ xomɛ tlɛ ná sin yě. Amɔ̌, ényí yě ná hlɔ̌nhlɔ́n xɔ́ntɔn zunzun yětɔn ɔ, é ná zɔ́n bɔ yě ná vɛ́ tawun. (Xa Matíe 19:6.) Ðo xóta élɔ́ mɛ ɔ, mǐ ná mɔ lěe asú kpó asi kpó lɛ́ sixú kpo ɖo vǐvɛ́ d’é jí wɛ gbɔn é. Amɔ̌ jɛ nukɔn hwɛ̌ ɔ, mǐ ná kpɔ́n lěe klisánwun tlɛnnɔ lɛ́ sixú sɔ́ mɛ e yě ná da, bɔ é ná húzú xɔ́ntɔn vívɛ́ yětɔn ɖo gbɛhwenu yětɔn bǐ é gbɔn é.

LĚE È NÁ SƆ́ MƐ E NÁ NYÍ XƆ́NTƆN MƐTƆN NÚ GBƐHWENU MƐTƆN BǏ É GBƆN É

3-4. Étɛ́ lɛ́ ka ná d’alɔ mɛɖé b’ɛ ná mɔ mɛ ɖagbe e é ná wlí alɔ xá é? (Nǔnywɛ́xó 18:22)

³ Cóbónú mǐ ná wá gbeta tají ɖěbǔ kɔn ɔ, mǐ ɖó ná lin tamɛ dó nǔ nyanya, alǒ nǔ ɖagbe e é sixú wá ji é jí. Gbeta e kɔn mǐ nɔ wá lɛ́ é sixú húzú gbɛzán mǐtɔn blěbú dó nyanya alǒ ɖagbe jí, énɛ́ wú ɔ, é ɖo tají ɖɔ mǐ ní lin tamɛ kpɔ́n ganjí.

⁴ Ényí mǐ ɖo gbeta mɛ e ná nyí xɔ́ntɔn mǐtɔn nú gbɛhwenu mǐtɔn bǐ é, énɛ́ wɛ nyí mɛ e mǐ ná da é tɔn kɔn wá wɛ hǔn, gbeta tají hú gǎn e kɔn mǐ ná wá lɛ́ é ɖokpó kɔn wá wɛ mǐ ɖe mɔ̌ nɛ́. Ðó Jexóva wɛ ɖó tuto alɔwlíwlí tɔn ayǐ wútu ɔ, é ná nyɔ́ ɖɔ è ní ba wěɖexámɛ ɖo gɔ̌n tɔn hwenu e è ɖo gbeta mɛ e è ná da é tɔn kɔn wá wɛ é. É ba ɖɔ súnnu ní mɔ asi ɖagbe, bónú nyɔ̌nu ní mɔ asú ɖagbe. Jexóva tuun nǔ e nyɔ́ nú mǐ hú gǎn é hwebǐnu. (Xa Nǔnywɛ́xó 18:22; Eza. 48:17, 18) Nǔgbódodó e ɖo Xó Mawu tɔn mɛ lɛ́ é sixú d’alɔ klisánwun ɖé b’ɛ ná mɔ mɛ e jɛxá ɛ é.

5. Étɛ́wú é ka ɖo tají ɖɔ mɛ e bló batɛ́mu é wɛ è ná byɔ́ xɔ́ntɔn mɛ xá?

⁵ Ényí mǐ bló batɛ́mu ɔ, mǐ nɔ húzú xɔ́ntɔn Mawu tɔn. (Ðɛh. 25:14) Énɛ́ wú ɔ, ényí a jló ná wlí alɔ ɔ, a ɖó ná ba mɛ e a ná wlí alɔ xá é ɖo xɔ́ntɔn Jexóva tɔn lɛ́ tɛ́ntin. (1 Kɔ. 7:39) Mɔ̌ wiwa ná xlɛ́ ɖɔ nǔgbódodó Jexóva tɔn lɛ́ nɔ su nukún towe mɛ, bɔ a ná wá mɔ ɖɔ nyɔ̌ná wɛ mɛ e émí da é nyí sín Jexóva gɔ́n. (Nǔx. 19:14) A ná lɛ́ nyi alɔ nú tagba ɖěɖěe kɔ dídó “agbanhɛnkpo” ɖokpó ɔ mɛ xá nǔmaɖitɔ́ ɖé ná dɔn wá lɛ́ é. (2 Kɔ. 6:14) Ényí è nɔ lin ɖɔ è kún mɔ mɛ e jɛxá mɛ é ɖě ɖo nǔɖitɔ́ hǎtɔ́ lɛ́ tɛ́ntin ó, bo yi byɔ́ xɔ́ntɔn mɛ xá nǔmaɖitɔ́ ɔ, é nyí nǔnywɛ́nú ǎ. Mɔ̌ ɖokpó ɔ, a ná ba hwɛjijɔ bo ná byɔ́ xɔ́ntɔn mɛ xá mɛ e ma nyí nǔɖitɔ́ ǎ é ɖé bo ná lin ɖɔ é sixú wá kplɔ́n nǔgbó ɔ ǎ.

6-7. Nǔkanbyɔ́ tɛ́ lɛ́ mɔ̌ è ka ɖó ná ba xósin ná ɖo xɔ́ntɔnmɛninɔ hwenu?

⁶ É ɖo wɛn ɖɔ, é kún nyí mɛ e bló batɛ́mu é bǐ wɛ nɔ jɛxá mɛ ó. Ényí a yí wǎn nú mɛɖé ɔ, é ná nyɔ́ ɖɔ a ní kan nǔɖé lɛ́ byɔ́ hwiɖée dó wǔ tɔn.a Ði kpɔ́ndéwú ɔ: ‘Nɛ̌ é ka nɔ wa nǔ xá xwédo tɔn gbɔn? É ka nɔ ké ya nú mɛ bo nɔ lɛ́ ɖó sísí nú mɛ a? Mɛ̌ ka nyí xɔ́ntɔn tɔn lɛ́? Nɛ̌ é ka nɔ ɖe ɖɛ gbemanɔkpɔ́ lɛ́ gbɔn? É ka nɔ tɛ́ dó linlin éɖésúnɔ tɔn wú wɛ a? Alǒ, é nɔ ɖo gbesisɔmɛ bá jó xó dó hwenu e mɔ̌ wiwa ma tɛ afɔ nǔgbódodó Biblu tɔn ɖé jí ǎ é? Linlin tɛ́ é ka nɔ ɖó dó akwɛ́ wú?’

⁷ A sixú lɛ́ kan nǔ élɔ́ lɛ́ byɔ́ hwiɖée: ‘Mɛ e ná da wɛ un ɖe é ka ɖó wǎnyíyí e gɔ́ngɔ́n é nú Jexóva a? É ka ɖo “gbɛtɔ́ yɔ̌yɔ́ ɔ” sɔ́ dó wɛ a? É ka ná d’alɔ mì bɔ ná kpo ɖo Jexóva sɛn wɛ bǐ mlɛ́mlɛ́ a? Mǐ ka ɖo nǔ ɖokpó ɔ lɛ́ gbé nya wɛ ɖo gbigbɔ lixo a? Mǐ ka ná sixú wá nyí xɔ́ntɔn ɖagbe hú gǎn lɛ́ a?’ (Koló. 3:9, 10) Ényí nɔví nyɔ̌nu wɛ nú we ɔ, nɔví súnnu e kpó hwi kpó ɖo xɔ́ntɔn mɛ é ka ná nyí xɔ́ntɔn ɖagbe kpó tatɔ́ xwédo tɔn ɖagbe kpó a? (1 Kɔ. 11:3) Ényí nɔví súnnu wɛ nú we ɔ, nɔví nyɔ̌nu e kpó hwi kpó ɖo xɔ́ntɔn mɛ é ka ná yí gbe bɔ, ényí gǎnmaɖó towe lɛ́ ná bo ɖo fínɛ́ ɔ, a ná nyí tatɔ́ n’i a? É ná byɔ́ hwenu cóbɔ mɛɖé ná kpé wú bo ná xósin nú nǔkanbyɔ́ mɔ̌hun lɛ́. Énɛ́ wú ɔ, zǎn xɔ́ntɔnmɛninɔ towe dó tuun mɛ e ná wá da wɛ a ɖe é ganjí.

8-9. Étɛ́ ka sixú d’alɔ mɛ e ɖo xɔ́ntɔn mɛ é b’ɛ ná wá gbeta e nǔnywɛ́ kpé é kɔn? (Kpɔ́n ɖiɖe ɔ lɔmɔ̌.)

⁸ Ðo xɔ́ntɔnmɛninɔ ɔ hwenu ɔ, ényí a tɛ́n kpɔ́n bo tuun mɛ e mɛ ɔ nyí nǔgbó nǔgbó é ɔ, é ná ɖibla bɔ wǔ nú we hú gǎn bɔ a ná wá gbeta e nǔnywɛ́ kpé é kɔn. Tɛ́n kpɔ́n bo tuun linlin e mɛ ɖěvo lɛ́ nɔ ɖó dó wǔ tɔn é. A sixú tɛ́n kpɔ́n bo tuun nyǐkɔ alɔkpa e mɛ ɔ ɖó ɖo ta é kpó jijɔ tɔn lɛ́ kpó. Ði kpɔ́ndéwú ɔ, è ka tuun ɖɔ é nɔ sɔ́ éɖée hwe, nɔ nyɔ́ xomɛ, bo nɔ lɛ́ nɔ jlɛ̌ jí a? Nɔví nyɔ̌nu ɖé nɔ nɔ Guyane française bo nɔ nyí Sarah, bo wlí alɔ xá nɔví súnnu e nɔ nyí Daniel é, é ɖɔ: “Un kan nǔ byɔ́ dó Daniel wú ɖo mɛ e kpó é kpó nɔ nɔ xɔ ɖokpó ɔ mɛ bo nyí gběxosín-alijítɔ́gbɛ́ tɔn é, mɛxó agun tɔn e ɖo agun tɔn mɛ é ɖé, xɔ́ntɔn e tuun nyi kpó é kpó lɛ́ é, gɔ́ nú nɔví nyɔ̌nu e ɖo agun tɔn mɛ lɛ́ é gɔ́n.” A hɛn ɔ, a ná kan nǔ byɔ́ mɛ e kpó hwi kpó ɖo xɔ́ntɔn mɛ é kpó xomɛnyínyɔ́ kpó ɖɔ nǔɖé ka jɛ ɖo gbɛzán tɔn mɛ wá yi, alǒ alɔnu din b’ɛ byɔ́ ɖɔ émí ní tuun wɛ a jí. Ðó nǔ mɔ̌hun lɛ́ sixú wá dɔn tagba syɛ́nsyɛ́n byɔ́ alɔwlíwlí ɔ mɛ.

⁹ Ma wɔn ya nú nǔ e a sixú ɖo xixo kpɔ́n wɛ dó nǔjɔnǔ mɛ, alǒ wě ɖagbe e xɔ́ntɔn e zin lɛ́ é ɖe xá we lɛ́ é ó. Wlɛnwín mɔ̌hun ná zɔ́n bɔ a ná tuun nú é ná nyí nǔnywɛ́nú ɖɔ émí ní gbɛ kan dó xɔ́ntɔnmɛninɔ ɔ nu alǒ gbɔ a jí.b Din ɔ, ɖo xóta élɔ́ sín akpáxwé e kpo é mɛ ɔ, mǐ ná sɔ́ ayi ɖó mɛ e ko wlí alɔ lɛ́ é jí.

HWENU ZÍNZÁN ÐÓ KPƆ́ XÁ MƐ E A DA É NÁ ZƆ́N BƆ MI NÁ LƐ́ VƐ́ D’É JÍ

10. Étɛ́wú é ka nyɔ́ ɖɔ asú kpó asi kpó lɛ́ ní nɔ mɔ hwenu nú yěɖée lɛ́ bo nɔ sɔ́ ayi ɖó yěɖée lɛ́ jí?

¹⁰ Asú kpó asi kpó lɛ́ sixú kpo ɖo hlɔ̌nhlɔ́n ná vɛ̌ e yě vɛ́ é kpó alɔwlíwlí yětɔn kpó wɛ gbɔn hwenu zínzán ɖó kpɔ́ gblamɛ, alɔnu yětɔn ná bo ján gbɔn ɖěbǔ ɔ nɛ́. Énɛ́ nɔ hun ali nú yě bɔ yě nɔ ɖɔ xó dó lěe kéze ɖokpó ɖokpó yi gbɔn é kpó lěe nǔ cí nú yě tawun é kpó wú, nɔ ɖe wǎnyíyí xlɛ́ yěɖée lɛ́, bo nɔ lɛ́ ɖɔ fanfún ɖó kpɔ́.

11. Étɛ́ ka sixú wa nǔ dó asú kpó asi kpó ɖé wú?

¹¹ Asú kpó asi kpó e nyí xɔ́ntɔn alɔ ma yi mɛ lɛ́ é nɔ ba ná nɔ zɔ nú yěɖée lɛ́ ǎ, loɔ, kpɔ́ wɛ yě nɔ ba ná nɔ. Yě sixú wá nɔ vokán vokán nú táan kléwún ɖé hweɖélɛ́nu. Amɔ̌, vokán vokán ninɔ sixú dɔn xó wá. Ði kpɔ́ndéwú ɔ, mɛɖé lɛ́ ko yí gbe nú azɔ̌ e ná zɔ́n bɔ yě ná yi to ɖěvo mɛ bo nɔ zɔ nú xwédo yětɔn nú hwenu línlín é. Tuto mɔ̌hun sixú hɛn akwɛ́ wá, amɔ̌, xwédo mɛtɔn kpá ma nɔ nú hwenu línlín sixú wa nǔ dó alɔwlíwlí ɔ wú tawun.

12-13. (a) Étɛ́ asú kpó asi kpó ɖé lɛ́ ka ko wa bá dó zán hwenu ɖó kpɔ́? (Kpɔ́n ɖiɖe ɔ lɔmɔ̌.) (b) Nɛ̌ kancícá e ɖo mɛ e a da é kpó hwi kpó tɛ́ntin é ka ɖó ná ɖo tají nú we sɔ? (Kpɔ́n gbǎví “Tɛn e mɛ mɛ e a da é ɖe ɖo gbɛzán towe mɛ é.”)

¹² Ð’ayi nǔ e asú kpó asi kpó ɖé lɛ́ ko wa bá mɔ tɛn dó zán hwenu ɖó kpɔ́ é wú. Leah e nɔ nɔ Guam é ɖɔ: “Nyɛ kpó asú ce kpó nɔ wa nǔ vovo lɛ́ ɖó kpɔ́. É nɔ yá bónú mǐ nɔ jó mǐɖée dó bo nɔ yi mɛkplékpɔ́mɛ núwiwa ɖé domɛ alǒ tɔ́n yi fí ɖé ǎ.” Roxanne e nɔ nɔ États-Unis é ɖɔ: “Ðó alɔnu mǐtɔn nɔ ján tawun wútu ɔ, mǐ nɔ gbɔ bo nɔ bló tuto hwenu e mǐ mɛ we lɛ́ ná nɔ kpɔ́ é tɔn azǎn gěgé jɛ nukɔn lěe é nɔ nyí gbɔn nú nǔwiwa tají lɛ́ é ɖɔhun.” (Sɔ́ jlɛ́ dó Amɔ́si 3:3 wú.) Damien e nɔ nɔ France é tínmɛ ɖɔ: “Mǐ kplɔ́n bɔ nǔ e mɛ ɖě ɔ yí wǎn ná é ɔ, mɛ wegɔ́ ɔ lɔ nɔ yí wǎn ná.” (Mat. 7:12) Katie e é lɔmɔ̌ nɔ nɔ États-Unis é ɖɔ: “Hweɖélɛ́nu ɔ, mǐ nɔ sɔ́ alǒkan mǐtɔn lɛ́ ɖó zɔ bónú yě ní ma fɛ́ ayi mǐtɔn ó.”

¹³ Hú gǎn bǐ ɔ, mi nɔ zán hwenu ɖó kpɔ́ ɖo nǔ gbigbɔ tɔn lɛ́ kɔn. Myriam e nɔ nɔ France é ɖɔ: “Mǐ nɔ bɛ́ kéze mǐtɔn kpó Biblu xixa kpó, bo nɔ má nǔ e mǐ yí wǎn ná é kpó nǔ e mǐ sixú zán ɖo gbɛzán mǐtɔn mɛ é kpó xá mǐɖée lɛ́. Hwe énɛ́ lɛ́ nu nɔ xɔ akwɛ́ nú mì tawun.” É ɖɔ gɔ́ ná ɖɔ: “Un lɛ́ yí wǎn nú hwenu e mǐ nɔ xo ɖɛ ɖó kpɔ́ bɔ ali nɔ hun nú mì bɔ un nɔ mɔ lě do asú ce yí wǎn nú Jexóva sɔ é é.” Katie e xó mǐ ɖɔ wá yi é ɖɔ: “Hwenu e mǐ nɔ zán ɖó kpɔ́ ɖo sinsɛnzɔ́ ɔ mɛ é wɛ un nɔ yí wǎn ná hú gǎn. Ényí mǐ ɖo nǔ e mǐ ɖi nǔ ná lɛ́ é sín xó ɖɔ wɛ ɔ, é nɔ víví nú mǐ tawun, bɔ mǐ nɔ lɛ́ ɖo nǔ yɔ̌yɔ́ lɛ́ kplɔ́n wɛ ɖo mǐɖée lɛ́ gɔ́n.”—Nǔx. 27:17.

MI TƐ́ DÓ MǏÐÉE LƐ́ WÚ HWENU E TAGBA LƐ́ WÁ XWETƆ́N É

14-15. Étɛ́wú asú kpó asi kpó lɛ́ ka ɖó ná wa nǔ e wú yě kpé é bǐ bo ɖu ɖo tagba ɖěɖěe sixú fɔ́n ɖo alɔwlíwlí yětɔn mɛ lɛ́ é jí? Jlɛ̌ dó nǔɖé wú.

¹⁴ Hwɛhutɔ́ wɛ súnnu kpó nyɔ̌nu kpó e da yěɖée lɛ́ é nyí, énɛ́ wú ɔ, yě ná ba tagba lɛ́ kpo ɖo alɔwlíwlí yětɔn mɛ ǎ. Biblu ɖɔ ɖɔ “mɛ e wlí alɔ lɛ́ é ná mɔ wǔvɛ́ gěgé.” (1 Kɔ. 7:28) Tínmɛ e Biblu nǔkplɔ́nkplɔ́n tɔn ná dó wěmafɔ énɛ́ wú é ɖɔ ɖɔ xógbe énɛ́ “nɔ dó gesí tagba kpó wǔvɛ́ kpó e asú kpó asi kpó lɛ́ nɔ mɔ ɖo kpaa mɛ é.” Ényí tagba mɔ̌hun lɛ́ wá xwetɔ́n ɔ, étɛ́wú yě ka ɖó ná wa nǔ e wú yě kpé é bǐ bo tɛ́ dó yěɖée wú bo ɖu ɖo wǔvɛ́ ɔ jí?

¹⁵ Nǔjlɛ́dónǔwú ɖé ɖíe. Ényí akpa jɛ xwé ɖaxó ɖé alǒ nǔ xɔ akwɛ́ ɖé wú ɔ, mɛ e tɔn é nyí é nɔ ba ná blóɖó. É sixú zán akwɛ́ kpó nǔɖókan kpó gěgé dó takún tɔn mɛ, b’ɛ sixú lɛ́ ɖu xwe gěgé. Aniwú? Ðó xwé énɛ́ alǒ nǔ énɛ́ xɔ akwɛ́ n’i. Mɔ̌ ɖokpó ɔ, alɔwlíwlí lɛ́ bǐ wɛ xɔ akwɛ́. É ná bo tlɛ nyí ɖo alɔwlíwlí ɖagbe hú gǎn lɛ́ mɛ ɔ, tagba nɔ wá xwetɔ́n. Amɔ̌, hwɛhwɛ ɔ, lěe è sixú bló xwé e wú akpa jɛ é alǒ nǔ xɔ akwɛ́ e wú akpa jɛ é ɖé ɖó gbɔn é ɔ, è sixú hwlɛ́n alɔwlíwlí e mɛ tagba ɖe é. Azɔ̌ e è ná wa ɖ’é wú é sixú ɖu hwenu bo lɛ́ byɔ́ gǎndídó syɛ́nsyɛ́n. É ɖo mɔ̌ có, ényí asú kpó asi kpó lɛ́ dó gǎn syɛ́nsyɛ́n bo ná hlɔ̌nhlɔ́n alɔwlíwlí yětɔn bo kpo ɖo kpɔ́ ɔ, xomɛ nɔ hun Jexóva. (Mal. 2:16) Ényí yěɖée lɛ́ kɛ́ɖɛ́ wɛ yě nɔ ɖe wǎnyíyí kpó sísí kpó xlɛ́ hwenu e yě ɖo mɔ̌ wa wɛ é ǎ, loɔ, yě nɔ lɛ́ wa mɔ̌ nú Jexóva e nyí Dǒwátɔ́ alɔwlíwlí tɔn é.

16. Sɔgbe xá 1 Kɔlɛ́ntinu lɛ́ 13:4-8a ɔ, étɛ́ ka sixú d’alɔ asú kpó asi kpó e ɖo xwi ɖí xá tagba syɛ́nsyɛ́n ɖé wɛ ɖo alɔwlíwlí yětɔn mɛ é? (Kpɔ́n ɖiɖe ɔ kpó gbǎví “Nǔ ɖěɖěe sixú d’alɔ we bɔ a ná vɛ́ xá mɛ e a da é lɛ́ é” ɔ kpó lɔmɔ̌.)

¹⁶ Ényí tagba lɛ́ fɔ́n ɖo xwédo mitɔn mɛ hǔn, mi ma zɔn kplakpla jí bo klán ó. (1 Kɔ. 7:10, 11) É nyɔ́ wa hǔn, kanbyɔ́ hwiɖée ɖɔ: ‘Nǔ ɖěvo lɛ́ ka ɖe bɔ un sixú wa dó ná hlɔ̌nhlɔ́n xwédo mǐtɔn a?’ Lɛ̌ gbéjé nǔ e Biblu ɖɔ dó wǎnyíyí ɖiɖexlɛ́ wú é kpɔ́n, bo kanbyɔ́ hwiɖée ɖɔ émí ka sixú dó gǎn d’é jí ɖo nǔ e è ɖɔ ɖo 1 Kɔlɛ́ntinu lɛ́ 13:4-8a mɛ é ɖé lɛ́ bíbló kpáxwé a jí. (Xa.) Ma nɔ mɔ ɖɔ ali wɛ hun nú émí bɔ émí ná jó mɛ e émí da é dó ó, é nyɔ́ wa hǔn, wa nǔ e wú a kpé é bǐ bónú mi ní lɛ́ vɛ́. Sɔ́ ayi ɖó nǔ e hwɛ sixú wa dó bló bɔ kancícá e ɖo tɛ́ntin mitɔn é ná lɛ́ lí dǒ d’é jí é jí. Xo ɖɛ bo byɔ́ Jexóva ɖɔ é ní d’alɔ émí. Ényí a ɖó hudó alɔdó tɔn ɔ, wěma mǐtɔn lɛ́, video mǐtɔn lɛ́, mɛxó agun tɔn lɛ́ kpó klisánwun ɖěvo e zin lɛ́ é kpó sixú d’alɔ we. Gbɔn Jexóva e nyí kan atɔngɔ́ bo lɛ́ dɛ hú gǎn ɖo kan atɔn e “è gbɛ . . . kplé” é mɛ é wú gíngánjɛ gblamɛ ɔ, alɔwlíwlí mitɔn ná “yá wǔ wɛ́n ǎ.”—Nǔt. 4:12.

17. Nɛ̌ mɛ e ɖo linlin ná wlí alɔ wɛ lɛ́ é kpó mɛ e ko wlí alɔ lɛ́ é kpó ka sixú ɖ’awǎjijɛ gbɔn?

¹⁷ Jexóva ba ɖɔ mɛsɛntɔ́ émítɔn lɛ́ bǐ ní ɖ’awǎjijɛ, káká jɛ mɛ ɖěɖěe ɖo biba wɛ bo ná wlí alɔ lɛ́ é kpó mɛ e ko wlí lɛ́ é kpó jí. Énɛ́ wú ɔ, ényí tlɛnnɔ wɛ nú we bɔ a ɖo linlin wɛ bo ná wlí alɔ hǔn, yi agbɔ̌n jí cóbó sɔ́ mɛ e ná nyí xɔ́ntɔn towe nú gbɛhwenu towe bǐ é. É ka nyí alɔ ɔ wɛ a ko wlí hǔn, kpo ɖo vǐvɛ́ xá mɛ e a da é wɛ. Mi dó gǎn bo ɖu ɖo tagba ɖěɖěe sixú wá xwetɔ́n ɖo alɔwlíwlí mitɔn mɛ lɛ́ é jí gbɔn Jexóva wú gíngánjɛ bónú é ná d’alɔ mi gblamɛ. Ényí a nɔ wa nǔ énɛ́ lɛ́ ɔ, hwi kpó mɛ yí wǎn ná towe e a da é kpó ná ɖu gbɛ víví!—Nǔt. 9:9.