Lěe è ná mɔ nukúnnú jɛ nǔjlɛ́dónǔwú e ɖo Biblu mɛ lɛ́ é mɛ gbɔn é

Nǔjlɛ́dónǔwú kanweko mɔ̌kpán wɛ ɖo Biblu mɛ. Amɔ̌, nukúnnú mimɔ jɛ yě mɛ nɔ vɛ́ wǔ nú nǔxatɔ́ gěgé. (Mat. 13:13) Étɛ́ ka sixú d’alɔ we bɔ a ná ɖó nukúnnúmɔjɛnǔmɛ e sɔgbe é dó nǔjlɛ́dónǔwú e è zán ɖo Biblu mɛ lɛ́ é wú? Tɛ́n wlɛnwín élɔ́ lɛ́ kpɔ́n:

• Tɛ́n kpɔ́n bo tuun nǔ e wú ɖɔ xó dó wɛ è ɖe é kpó nǔ e wú è sɔ́ jlɛ́ dó é kpó. Nǔjlɛ́dónǔwú lɛ́ nɔ jlɛ́ nǔ e wú ɖɔ xó dó wɛ è ɖé é dó nǔɖé wú. Ði kpɔ́ndéwú ɔ, Nǔɖexlɛ́mɛ 3:3 jlɛ́ wǐwá Jezu tɔn (nǔ e wú ɖɔ xó dó wɛ è ɖe é) dó lěe ajotɔ́ nɔ wá gbɔn é wú (nǔ e wú è jlɛ́ dó é).

• Tɛ́n kpɔ́n bo tuun lěe nǔ e wú ɖɔ xó dó wɛ è ɖe é kpó nǔ e wú è sɔ́ jlɛ́ dó é kpó ɖi yěɖée lɛ́ gbɔn é. Lin tamɛ dó hwɛjijɔ ɖěɖěe wú è ɖo nǔ ɖě sɔ́ jlɛ́ dó nǔ ɖěvo wú wɛ é jí, bo lɛ́ lin tamɛ dó nǔ e yě ɖó ɖo bǔ é jí.

• Wǎ gbeta ɖagbe ɔ kɔn. Ali e nu nǔ e wú ɖɔ xó dó wɛ è ɖe é kpó nǔ e wú è sɔ́ jlɛ́ dó é kpó ɖi yěɖée ɖe é ɖé lɛ́ sixú zɔ́n bɔ è ná wá gbeta e ma sɔgbe ǎ lɛ́ é kɔn. Ðo kpɔ́ndéwú e è ná ɖo aga é mɛ ɔ, Jezu ja bo ná fin mɛɖénú ǎ. É nyɔ́ wa ɔ, nǔ e lɛ́ lɛ̌ dó wěmafɔ ɔ lɛ́ é xlɛ́ ɖɔ lěe é ná wá gbɔn é ná cí lěe ajotɔ́ nɔ wá fyán mɛ gbɔn é ɖɔhun; é ná wá ɖo hwenu e è ma ɖó nukún tɔn dó ǎ é, ɖo ajijimɛ.