Abudiyási: Tɛ́n kpɔ́n bo nɔ ɖó sísí e gɔ́ngɔ́n é nú Mawu

Nǔjíkpɔ́ntɔ́ wɛ Abudiyási nyí ɖo axɔ́sú nyanya Akábu e yí gbe bɔ Baálu sinsɛn gba kpé ɖo Izlayɛ́li é sín xwé gbe. É ɖo mɔ̌ có, “sín vǔ ɖokpóó” wɛ Abudiyási ko nɔ ɖó sísí nú Jexóva. (1 Axɔ́. 18:1-13) Énɛ́ wú ɔ, hwenu e axɔ́si Jezabɛ́li ɖe gbe ɖɔ è ní hu gbeyíɖɔ Jexóva tɔn lɛ́ bǐ é ɔ, Abudiyási tuun ɖɔ émí ɖó ná wa nǔ kpó akɔ́nkpinkpan kpó bónú nǔ nyanya énɛ́ ní ma jɛ ó. Gbeyíɖɔ ɖokpó yǎyá sísɔ́ hwlá ko nyí awǒvinú có, Abudiyási ka sɔ́ gbeyíɖɔ 100 hwlá, bo lɛ́ ná nǔɖuɖu yě ɖo adɔ syɛ́nsyɛ́n hwenu! Abudiyási ɖó ná wa nǔ e wú é kpé é bǐ bɔ hunnɔ kanweko mɔ̌kpán e nɔ w’azɔ̌ nú axɔ́sú ɔ kpó axɔ́si ɔ kpó lɛ́ é ná mɔ ɛ ǎ. Kpɔ́n lěe mɔ̌ wiwa ná ko vɛ́ wǔ n’i sɔ é.—1 Axɔ́. 18:19.

Étɛ́ nya énɛ́ e nɔ ɖó sísí nú Mawu é sín kpɔ́ndéwú ka sixú kplɔ́n mǐ? Sísí e Abudiyási ɖó nú Mawu é d’agba hú xɛsi e é ɖi nú Akábu é. Énɛ́ zɔ́n bɔ é kpankɔ́n bo sɔ́ gbɛ tɔn ɖó axɔ́ nu dó nya xɛ ɖo nɔví tɔn lɛ́ jí. Ényí è gbɛ́ mawusinsɛn nǔgbó ɔ ɖo fí e mǐ nɔ nɔ é ɔ, mǐ lɔ sixú tɛ́n kpɔ́n bo ɖó sísí nú Mawu gbɔn mɔ̌. Sísí mɔ̌hun ná ná hlɔ̌nhlɔ́n mǐ bɔ mǐ ná nɔ gǔdo nú nɔví súnnu kpó nɔví nyɔ̌nu kpó mǐtɔn ɖěɖěe ɖo tagba lɛ́ ɖí xwi xá wɛ lɛ́ é.