Nǔ e nǔxatɔ́ lɛ́ kanbyɔ́ lɛ́ é

Hwetɛ́nu akɔta lɛ́ ka ná jlá ɖɔ “fífá tíin, bɔ ayi j’ayǐ”?

Lěe mǐ mɔ gbɔn ɖo “Nǔ e nǔxatɔ́ lɛ́ kanbyɔ́ lɛ́ é” mɛ ɖo Atɔxwɛa agaɖanu tɔn ɖé mɛ é ɔ, ɖo malínmálín mɛ ɔ, Jexóva ná sɔ́ “linlin tɔn” dó ayi mɛ nú “zo wǒ lɛ́” (é wɛ nyí acɛkpikpa lɛ́ bǐ) ɖɔ yě ní zé hlɔ̌nhlɔ́n yětɔn kpó acɛkpikpa yětɔn kpó jó nú “gběkanlin vɔvɔ cɛ́cɛ́ ɔ,” é wɛ nyí Gbɛ̌ kplékplé akɔta lɛ́ tɔn. È lɛ́ ylɔ́ gběkanlin énɛ́ ɖɔ “gběkanlin ɔ sín akpajlɛ́.” (Nǔɖe. 13:14, 15; 17:3, 16, 17) Énɛ́ gúdo ɔ, “zo wǒ lɛ́” kpó gběkanlin e è ná acɛ yɔ̌yɔ́ é kpó ná sú kún dó nú sinsɛn nǔvú gbɔn gbɛ ɔ bǐ mɛ. Akɔta lɛ́ ná jlá ɖɔ “fífá tíin, bɔ ayi j’ayǐ”b hwɛ̌ cóbɔ è ná sú kún dó nú sinsɛn nǔvú wɛ a, alǒ è ná to sú kún dó nú sinsɛn nǔvú hwɛ̌ cóbɔ yě ná jlá ɖɔ “fífá tíin, bɔ ayi j’ayǐ”?—1 Tɛ. 5:3.

Ðo kléwún mɛ ɔ, mǐ tuun hwenu e akɔta lɛ́ ná jlá ɖɔ “fífá tíin, bɔ ayi j’ayǐ” é pɛ́pɛ́pɛ́ ǎ. Ényí mǐ ko tuun gǒflɛ́mɛ lɛ́ bǐ wɛ ɔ, é sɔ́ ná byɔ́ ɖɔ mǐ ní ɖó ayi te bo lɛ́ nɔ acéjí ǎ. Jezu ka ɖe wě xá ahwanvú tɔn lɛ́ azɔn mɔ̌kpán ɖɔ yě ní “nɔ acéjí.” (Mat. 24:42; 25:13; 26:41) Din ɔ, mi nú mǐ ní gbéjé nǔɖɔɖayǐ e Mawu sɔ́ dó ayi mɛ nú mɛsɛ́dó Pɔ́lu bɔ é wlán dó wěma e é sɛ́ dó Tɛsaloníkinu lɛ́ é mɛ é kpɔ́n ganjí.

Pɔ́lu wlán ɖɔ: “Hwenu e yě ná ɖo ɖiɖɔ wɛ ɖɔ: ‘Fífá tíin, bɔ ayi j’ayǐ!’ é ɔ, kún yětɔn ná sú dó tlóló ɖo ajijimɛ.” (1 Tɛ. 5:2, 3) Wěma mǐtɔn lɛ́ nɔ tínmɛ xó Pɔ́lu tɔn énɛ́ lɛ́ hwɛhwɛ gbɔn lě: È ná jlá ɖɔ “fífá tíin, bɔ ayi j’ayǐ” táan kpɛɖé jɛ nukɔn nú hwenu e wǔvɛ́ ɖaxó ɔ ná bɛ́ é. Hwenu e è ná sú kún dó nú Babilɔ́nu ɖaxó ɔ, éé nyí kplékplé sinsɛn nǔvú lɛ́ tɔn é wɛ ná nyí bǐbɛ́mɛ wǔvɛ́ ɖaxó ɔ tɔn. È nɔ tínmɛ ɖɔ nǔjlájlá énɛ́ e kpo ɖo nukɔn ja é wɛ ná nyí wuntun gǔdo tɔn e ná xlɛ́ ɖɔ wǔvɛ́ ɖaxó ɔ ɖo ná bɛ́ wɛ é.

É ɖo mɔ̌ có, ée è lɛ́ gbéjé nǔɖɔɖayǐ ɔ kpɔ́n ganjí gɔ́ ná é ɔ, é cí ɖɔ è sixú lɛ́ mɔ nukúnnú jɛ mɛ ɖo ali ɖěvo nu. Bóyá kún súsú dó nú sinsɛn nǔvú gúdo wɛ è ná jlá ɖɔ “fífá tíin, bɔ ayi j’ayǐ.” Étɛ́wú nǔ ka sixú nyí mɔ̌? Hwɛjijɔ ɖé lɛ́ ɖíe.

Nɛ̌ sinsɛn nǔvú ka ko ɖ’alɔ ɖo ahwan e akɔta lɛ́ fun lɛ́ é mɛ gbɔn? Biblu tínmɛ ɖɔ: “Toxo énɛ́ [“tonyatɔ́ ɖaxó ɔ,” Babilɔ́nu ɖaxó ɔ] mɛ wɛ è mɔ . . . mɛ e è hu ɖo ayǐkúngban jí lɛ́ é bǐ . . . sín hun ɖe.” (Nǔɖe. 17:1, 5; 18:24) Sín xwe mɔ̌kpán ɖíe wɛ tonyatɔ́ ɖaxó ɔ ko nɔ flɔ́ zo dó glɔ̌ nú ahwan e akɔta lɛ́ nɔ fun lɛ́ é kpó wɔ̌nxixogbɛwú kpó. Hǔn, sinsɛn nǔvú nɔ bló bónú fífá kpó ayijayǐ kpó nɔ tíin ǎ, é nyɔ́ wa ɔ, ɖɔ ahwan kpó hunnyahunnya kpó tɔn wɛ é nyí. Énɛ́ wú ɔ, é sixú nyí hwenu e akɔta lɛ́ ko sú kún dó nú Babilɔ́nu ɖaxó ɔ gúdo é jɛ́n yě ná jlá ɖɔ “fífá tíin, bɔ ayi j’ayǐ.” Amɔ̌, mǐ sixú ɖɔ bo t’afɔ jí ǎ.

Ényí è jlá ɖɔ “fífá tíin, bɔ ayi j’ayǐ” ɔ, étɛ́ ka ná jɛ bɔ d’é wú? Pɔ́lu ɖɔ: “Kún yětɔn ná sú dó tlóló ɖo ajijimɛ.” (1 Tɛ. 5:3) Ényí acɛkpikpa gbɛ ɔ tɔn lɛ́ sú kún dó nú sinsɛn nǔvú cóbó jlá ɖɔ “fífá tíin bɔ ayi j’ayǐ” ɔ, kún e è ná sú dó nú akɔta énɛ́ lɛ́ bǐ ɖo ajijimɛ é wɛ ná bɔ d’é wú.

Nɛ̌ togun Jexóva tɔn ka ná wa nǔ gbɔn dó nǔ énɛ́ lɛ́ e è ko ɖɔ ɖ’ayi é wú? Pɔ́lu ɖɔ: “Nɔví lɛ́, midɛɛ lɛ́ ɔ, mi ɖo ablu mɛ ajotɔ́ lɛ́ ɖɔhun, bónú azǎn ɔ ná wá fyán mi ǎ.” (1 Tɛ. 5:4) Ð’ayi nǔ élɔ́ wú: Ényí è sú kún dó nú sinsɛn nǔvú cóbó jlá ɖɔ “fífá tíin bɔ ayi j’ayǐ” ɔ, togun Jexóva tɔn ná tuun ɖɔ kún súsú dó nú akɔta lɛ́ ko ɖo kɛ́nnɛ́kɛ́nnɛ́, amɔ̌, kún e è ná sú dó nú akɔta lɛ́ é ná wá ajotɔ́ ɖɔhun nú yě, énɛ́ wɛ nyí ɖo ajijimɛ, yě ná ɖó nukún tɔn ǎ.

Étɛ́ mǐ ka sixú ɖó nukún din? Ðo malínmálín mɛ ɔ, “zo wǒ lɛ́” kpó gběkanlin vɔvɔ cɛ́cɛ́ ɔ kpó ná sú kún dó nú sinsɛn nǔvú. Énɛ́ wɛ ná nyí bǐbɛ́ wǔvɛ́ ɖaxó ɔ tɔn. Mǐ lɛ́ tuun ɖɔ ɖo avla ɖé mɛ ɔ, akɔta lɛ́ ná jlá ɖɔ “fífá tíin bɔ ayi j’ayǐ.” Hwetɛ́nu yě ka ná jlá? Mǐ ɖɔ xó dó hwenu e yě sixú wa mɔ̌ dó é we wú. Nukɔntɔn: Yě sixú wa mɔ̌ jɛ nukɔn nú kún súsú dó nú sinsɛn nǔvú. Wegɔ́: Yě sixú lɛ́ wa mɔ̌ hwenu e yě ko sú kún dó nú sinsɛn nǔvú bǐ mlɛ́mlɛ́ gúdo é. Te jɛ́n mǐ ná nɔ bo ná mɔ lěe nǔ lɛ́ ná yi gbɔn é. Hwɛhwɛ ɔ, hwenu e nǔɖɔɖayǐ Biblu tɔn lɛ́ ɖo jijɛnu wɛ alǒ yě ko jɛnu gúdo é wɛ è nɔ wá mɔ nukúnnú jɛ mɛ bǐ mlɛ́mlɛ́.—Sɔ́ jlɛ́ dó Jaan 12:16 wú.

Amɔ̌, nǔ e ɖo tají hú gǎn é wɛ nyí hwenu e akɔta lɛ́ ná jlá ɖɔ “fífá tíin bɔ ayi j’ayǐ” é ǎ, loɔ, gbejíninɔ mǐtɔn nú Mawu wɛ. Mǐ ɖó ná “nɔ wunzɛn, bo lɛ́ zán nǔwúkpíkpé tamɛ linlin tɔn mǐtɔn,” bónú nǔ lɛ́ ná bo wá jɛ gbɔn ɖěbǔ ɔ, mǐ ná dó sixú ɖo gbesisɔmɛ bǐ mlɛ́mlɛ́.—1 Tɛ. 5:6.