Vǐ lɛ́ ɔ “gǔ wɛ yě nyí sín Jexóva gɔ́n”

Ényí a se xókwín “gǔ” ɔ, étɛ́ ka nɔ wá ayi towe mɛ? Ayi towe sixú yi akwɛ́, xwé alǒ “gǔ” xɔ akwɛ́ e mɛ e ɖo xwédo towe mɛ bɔ a yí wǎn ná é ɖé jó dó nú we é jí. É ná bo nyí nǔ ɖěbǔ sín gǔ wɛ a ɖu ɔ, nǔ xɔ akwɛ́ wɛ gǔ nɔ nyí, bɔ é ɖo wɛn ɖɔ a ná ba ná wlí bo ná ganjí.

Biblu ɖɔ ɖɔ “gǔ wɛ [vǐ lɛ́] nyí sín Jexóva gɔ́n.” (Ðɛh. 127:3, nwt) É ɖo wɛn ɖɔ, mɛjitɔ́ klisánwun lɛ́ nɔ mɔ ɖɔ nǔ xɔ akwɛ́ wɛ vǐ émítɔn lɛ́ nyí bɔ Tɔ́ émítɔn jǐxwé tɔn ɔ ná émí, bo nɔ lɛ́ wa nǔ e wú yě kpé é bǐ bónú vǐ lɛ́ ná nɔ ayijayǐ mɛ, lobo lɛ́ kpé nukún dó yě wú ɖo agbaza, lěe nǔ nɔ cí nú mɛ é kpó gbigbɔ kpó lixo.

Ðo égbé ɔ, é blá wǔ ɖɔ mɛjitɔ́ ɖé lɛ́ kún nɔ mɔ vǐ yětɔn lɛ́ dó mɔ ajɔ e Mawu dó yě é ó. (Eza. 49:15; 2 Tim. 3:1-3) Mɛ ɖěvo lɛ́ sixú nɔ ba vɛ́návɛ́ná bá kpé nukún dó vǐ yětɔn lɛ́ wú, amɔ̌, é nɔ vɛ́ wǔ nú yě ɖó wǔvɛ́ ɖé lɛ́ wú. Wǔvɛ́ tɛ́ lɛ́ mɔ̌ ka sixú zɔ́n b’ɛ ná vɛ́ wǔ nú mɛjitɔ́ lɛ́ bɔ yě ná kpé nukún dó vǐ yětɔn lɛ́ wú? Étɛ́ Jexóva ka nɔ ɖó nukún ɖo mɛjitɔ́ lɛ́ sí? Nɛ̌ nukúnkpíkpé dó vǐ lɛ́ wú ka sixú kpa mɛjitɔ́ klisánwun lɛ́ gbɔn?

WǓVƐ́ LƐ́

• Kɔgbídínúmɛ xá e mɛ è ɖe é kpó xwédo mɛtɔn kpó tɔn. Ðo gbɛ ɔ sín akpá ɖé lɛ́ xwé ɔ, mɛ lɛ́ nɔ ké ya nú mɛ e ji vǐ gěgé lɛ́ é hú gǎn. Énɛ́ wú ɔ, hɛ̌nnumɔ mɛtɔn alǒ nɔzo mɛtɔn lɛ́ sixú gbídí kɔ nú mɛ ɖɔ è ní ji vǐ gěgé, bóyá bo tlɛ sixú ji hú nabí e wú hlɔ̌nhlɔ́n mɛtɔn kpé é.

• Adohu adohu jí ninɔ dó sɔgúdo wú. Ðo fí ɖěɖěe é nɔ sín dotóoxwé ma ɖe, nǔɖuɖu hunsin ɖagbe tɔn ma ɖe, kpó azɔn kpó wú bɔ yɔkpɔ́vú lɛ́ nɔ kú sukpɔ́ ɖe lɛ́ é ɔ, asú kpó asi kpó lɛ́ nɔ ji vǐ sukpɔ́ kpó linlin ɔ kpo ɖɔ ɖě ná wá gán ɖ’é mɛ. Asú kpó asi kpó ɖěvo lɛ́ nɔ ji vǐ gěgé bo ná dó mɔ mɛ e ná kpé nukún dó yě wú ɖo kpikpoxɔmɛ é. To ɖěɖěe mɛ acɛkpikpa ma bló tuto ɖě bo ná dó kpé nukún dó mɛxómɔ lɛ́ wú ɖe ǎ lɛ́ é mɛ wɛ nǔ nɔ nyí mɔ̌ ɖe tawun.

• Wlɛnwín e è nɔ zán bá dó ɖó dogbó nú vǐ nabí e è ná ji é (planification familiale). Ðo xá ɖé lɛ́ mɛ ɔ, asú kpó asi kpó ɖé lɛ́ nɔ sixú kpé wú bá ɖó dogbó nú vǐ nabí e yě ná ji é ǎ. Nú mɛ ɖěvo lɛ́ ɔ, ɖó wlɛnwín ɖěɖěe è nɔ zán bo ma ná mɔ xo ǎ lɛ́ é ma nyɔ́ káká ɖé ǎ wútu ɔ, yě nɔ ɖi xɛsi dó nǔ e é sixú wa dó yě wǔ lɛ́ é wú. Mɛ ɖěvo lɛ́ nɔ sixú ɖó dogbó nú vǐ nabí e yě ná ji lɛ́ é ǎ, ɖó wlɛnwín lɛ́ vɛ́ axi dín.a

ÉTƐ́ JEXÓVA KA NƆ ÐÓ NUKÚN ÐO MƐJITƆ́ LƐ́ GƆ́N?

Mi nɔ sú hudó vǐ mitɔn lɛ́ tɔn sín do. Jexóva zɔ́n mɛjitɔ́ lɛ́ ɖɔ yě ní nɔ sú hudó agbaza tɔn vǐ yětɔn e ma ko ɖó mɛxóxwe ǎ lɛ́ é tɔn sín do. É nɔ ɖó nukún ɖɔ mɛjitɔ́ lɛ́ ní dó gǎn syɛ́nsyɛ́n bónú vǐ yětɔn lɛ́ ɖokpó ɖokpó ní mɔ nǔɖuɖu, avɔ kpó xɔ kpó. Jexóva lɛ́ byɔ́ ɖɔ mɛjitɔ́ lɛ́ ní kplɔ́n vǐ yětɔn lɛ́. Énɛ́ wú ɔ, mɛjitɔ́ klisánwun lɛ́ nɔ sɛ́ vǐ yětɔn lɛ́ dó wěmaxɔmɛ e è nɔ dɔ́ lɛ́ é (internats) kpowun ǎ. É nyɔ́ wa ɔ, yě nɔ tɛ́n kpɔ́n bɔ vǐ yětɔn lɛ́ nɔ nɔ akpá yětɔn bo nɔ su. Yě nɔ d’alɔ vǐ lɛ́ bɔ yě nɔ kplɔ́n bo nɔ ɖó nǔwúkpíkpé e ná d’alɔ yě ɖo gbɛzán yětɔn mɛ lɛ́ é. Yě nɔ lɛ́ zán hwenu ɖó kpɔ́ xá vǐ ɖokpó ɖokpó bónú é ná dó sixú mɔ ɖɔ émí ɖo ayijayǐ mɛ, bɔ è lɛ́ yí wǎn nú émí. É ɖo mɔ̌ có, Jexóva nɔ nɔ jlɛ̌ jí; é nɔ ɖó nukún ɖɔ mɛjitɔ́ lɛ́ ní nyí dɔkunnɔ ǎ. Nǔgbó ɔ, Jexóva sɔ́ mɛjitɔ́ e nyí azɔ̌syɛ́nsyɛ́nwatɔ́ bo ka nyí wamamɔnɔ ɖo agbaza lixo lɛ́ é bɔ yě kpé nukún dó Vǐ vívɛ́ tɔn wú.—Mat. 13:55, 56; Luk. 2:24.

Nǔgbódodó Biblu tɔn: “Nǔgbó ɔ, ényí mɛɖé ma nɔ kpé nukún dó mɛ tɔn lɛ́ wú ǎ ɔ, ɖo tají ɔ, mɛ e nyí xwédo tɔn sín hǎgbɛ́ lɛ́ é wú ǎ ɔ, mɛ énɛ́ gbɛ́ nǔɖiɖi ɔ, bo lɛ́ nylá hú nǔmaɖitɔ́.”—1 Tim. 5:8.

Jexóva tuun ɖɔ mɛjitɔ́ lɛ́ sixú ɖó hudó alɔdó tawun tawun lɛ́ tɔn ɖo kpikpoxɔmɛ. Nǔgbó ɔ, ali e nu vǐ lɛ́ sixú wlí yɛ̌yi nú mɛjitɔ́ yětɔn lɛ́ ɖe é ɖokpó wɛ nyí ɖɔ yě ná bló tito bo ná kpé nukún dó yě wú ɖo kpikpoxɔmɛ. (Tín. 20:12; 1 Tim. 5:4) Ényí nukúnkpíkpé dó vǐ lɛ́ wú nɔ myá nukún nú mɛjitɔ́ lɛ́ hú gǎn nukún e vǐ lɛ́ ná wá kpé dó yě wú é ɔ, é nɔ víví nú Jexóva.—2 Kɔ. 12:14.

Mi nɔ sú hudó gbigbɔ tɔn vǐ mitɔn lɛ́ tɔn sín do. Mɛjitɔ́ klisánwun lɛ́ sín azɔ̌ wɛ lɛ́ nyí ɖɔ yě ní kplɔ́n vǐ yětɔn lɛ́ nú yě ní yí wǎn nú Jexóva bo lɛ́ sɛn ɛ. Nú Jexóva ɔ, nǔ tají hú gǎn e mɛjitɔ́ lɛ́ sixú kplɔ́n vǐ yětɔn lɛ́ é nɛ́.—Sɛ́n. 6:6, 7.

Nǔgbódodó Biblu tɔn: “Mi nɔ kplɔ́n [vǐ mitɔn lɛ́] sɔgbe xá nǔgbódodó Jexóva tɔn lɛ́ kpó wěɖexámɛ tɔn lɛ́ kpó.”—Efɛ́. 6:4.

JEXÓVA BA ÐƆ É NÍ KPA MI

Mi sɔ́ nǔ ɖ’ayǐ. Ényí mi ɖo linlin wɛ bo ná ji vǐ hǔn, mi gbéjé ninɔmɛ mitɔn kpɔ́n ganjí. Ði kpɔ́ndéwú ɔ, mi ka ɖó akwɛ́ e ná kpé bɔ mi ná ná nǔɖuɖu vǐ nabí e mi jló ná ji é, tɔ avɔ dó kɔ nú yě bo lɛ́ dó yě wěmaxɔmɛ é a? É ma nyí mɔ̌ ǎ hǔn, ɖɔ xó ɖó kpɔ́ xá mɛ e a da é dó vǐ nabí e mi ná ji bo sixú kpé nukún d’é wú lěe Jexóva ba gbɔn é jí. É ɖo wɛn ɖɔ Jexóva tuun ɖɔ é kún nyí tuto e è bló ɖo gbɛ mɛ é bǐ wɛ nɔ jɛnu ó. (Nǔt. 9:11) Amɔ̌, é ná kɔn nyɔ̌ná dó gǎn ɖěɖěe mi dó dó nǔjɔnǔ mɛ bónú mɛjitɔ́zɔ́ mitɔn ná kpa mi é jí.

Nǔgbódodó Biblu tɔn lɛ́: “Mɛ e nɔ ɖó kan dó nǔ wú é sín tuto lɛ́ nɔ yi ta jɛ́n wɛ, amɔ̌, mɛ e nɔ zɔn kplakpla jí dó wa nǔ lɛ́ é bǐ ná byɔ́ ya mɛ dandan.”—Nǔx. 21:5.

“Mɛ̌ ka ɖo mi mɛ bo ná jló ná gbá atɔxwɛ ɖokpó, bo ma ná to jínjɔ́n ayǐ hwɛ̌, bo lɛ́n akwɛ́ e é ná byɔ́ é, bo ná kpɔ́n ɖɔ émí ɖó akwɛ́ e ná kpé bɔ é ná fó é ǎ?”—Luk. 14:28.

Mi sɔ́ Jexóva ɖó tɛn nukɔntɔn ɔ mɛ ɖo xwédo mitɔn mɛ. Mi sɔ́ Jexóva sinsɛn dó ɖó nǔ e ɖo tají hú gǎn ɖo xwédo mitɔn mɛ é. Ényí mi ko ɖó vǐ wɛ nyí hǔn, mi tɛ́n kpɔ́n bo kplɔ́n yě mɛ ɖokpó ɖokpó bónú yě ní yí wǎn nú Jexóva. Mi d’alɔ yě bónú yě ní nɔ tɛ́ tó ganjí bo nɔ lɛ́ kplɔ́n nǔ ɖo kplé lɛ́ jí. Mi nɔ sɛn Mawu ɖo xwédo mɛ ɖo aklúnɔzángbla ɖokpó ɖokpó mɛ. Mi nɔ kplɔ́n lěe è nɔ ɖe kúnnu gbɔn é vǐ mitɔn lɛ́. Mi ma nɔ jó mɛjitɔ́zɔ́ mitɔn dó nyi kɔ jí nú vǐ mitɔn mɛxó lɛ́ alǒ hɛ̌nnumɔ ɖěvo lɛ́ ó. Vǐ lɛ́ kplɔ́nkplɔ́n bónú yě ná yí wǎn nú Jexóva nɔ byɔ́ hwenu kpó gǎndídó kpó, amɔ̌, mɔ̌ wiwa nɔ hɛn le gěgé wá.

Nǔgbódodó Biblu tɔn: “Ényí un se ɖɔ vǐ ce lɛ́ ɖo nǔgbó ɔ sín ali xwedó wɛ ɔ, nǔɖé sɔ́ nɔ hun xomɛ nú mì hú mɔ̌ ǎ.”—3 Jaan 4.b

Mi nɔ gán jɛ Jexóva wú. Ényí a ɖo linlin wɛ bo ná ɖó xwédo ayǐ, alǒ a ko ɖó vǐ wɛ hǔn, kú d’é jí ɖɔ nǔgbódodó Jexóva tɔn lɛ́ ɖo tají hú gǎn lěe è nɔ wa nǔ lɛ́ gbɔn ɖo xá towe mɛ é.

Ényí mi wá gbeta ɔ kɔn bo ma ná ji vǐ sukpɔ́ ǎ hǔn, kú d’é jí ɖɔ Jexóva ná kpo ɖo nukún kpé dó mi wú wɛ ɖo kpikpoxɔmɛ. Gbǐ dɔn ɖo kɔgbídínúmɛ ɖěbǔ e ná zɔ́n bɔ a ná mɔ ɖɔ émí ɖó ná ji vǐ gěgé bónú yě ná wá kpé nukún dó wǔ we ɖo kpikpoxɔmɛ é nukɔn. Ma nɔ ɖo xɛsi jí ɖɔ émí ná wá nyí mɛmaɖómɛɖé ó. Jexóva ko d’akpá ɖɔ émí ná kpé nukún dó wǔ we, é ka nɔ ɖe akpá tɔn lɛ́ jɛ́n wɛ.—Joz. 23:14.

Nǔgbódodó Biblu tɔn lɛ́: “Ðeji dó Jexóva wú kpó ayi towe bǐ kpó, ma nɔ gán jɛ nukúnnúmɔjɛnǔmɛ hwiɖésúnɔ tɔn wú ó. Nɔ flín i ɖo nǔ e a nɔ wa lɛ́ é bǐ mɛ, énɛ́ ɔ, é ná jlɔ́ ali towe lɛ́.”—Nǔx. 3:5, 6.

“Un ko nɔ dɔ̌nkpɛ mɛ kpɔ́n cóbó wá kpo din; un ka mɔ Mawu jó hwɛjijɔnɔ lɛ́ dó kpɔ́n ǎ, un ka mɔ vǐ yětɔn lɛ́ ɖě byɔ́ nǔ ɖu kpɔ́n ǎ.”—Ðɛh. 37:25.

“Énɛ́ wú ɔ, Axɔ́súɖuto ɔ kpó nǔjlɔ́jlɔ́wiwa Mawu tɔn kpó ní nɔ myá nukún nú mi jɛ nukɔn, énɛ́ ɔ, è ná gɔ́ nǔ ɖě lɛ́ bǐ nú mi.”—Mat. 6:33.

Nǔníná xɔ akwɛ́ wɛ vǐ lɛ́ nyí bɔ Jexóva ná mɛjitɔ́ lɛ́. Ényí Jexóva mɔ bɔ mɛjitɔ́ klisánwun lɛ́ ɖo nukún kpé dó nǔníná énɛ́ wú wɛ ɔ, xomɛ nɔ hun i tawun! Yě nɔ sú hudó vǐ yětɔn lɛ́ tɔn sín do ɖo agbaza, lěe nǔ nɔ cí nú mɛ é kpó gbigbɔ kpó linu, bo ka nɔ wa mɔ̌ kpó wǎnyíyí kpó. Yě nɔ bló tito vǐ nabí e yě ná ji é tɔn, bɔ gbeɖiɖe Mawu tɔn lɛ́ nɔ ɖo tají nú yě hú lěe è nɔ bló nǔ lɛ́ gbɔn ɖo xá yětɔn mɛ é. Ényí asú kpó asi kpó klisánwun lɛ́ ɖo mɔ̌ wa wɛ ɔ, yě nɔ xlɛ́ ɖɔ nǔníná xɔ akwɛ́ wɛ vǐ lɛ́ nyí; ‘gǔ wɛ yě nyí sín Jexóva gɔ́n.’