A ka ko ɖo gbesisɔmɛ nú wǔvɛ́ e sixú wá xwetɔ́n ɖo batɛ́mu gúdo lɛ́ é a?

1-2. Étɛ́ ka ná d’alɔ mǐ bɔ mǐ ná kpo ɖo vǐvɛ́ xá Jexóva wɛ hwenu e tagba lɛ́ wá xwetɔ́n é? Nǎ kpɔ́ndéwú ɖé.

ÐÓ GBƐ Satáan tɔn mɛ wɛ mǐ ɖe wútu ɔ, mǐ nɔ ɖó nukún ɖɔ mǐ ná mɔ wǔvɛ́ lɛ́. Jezu gba akpá élɔ́ nú ahwanvú tɔn lɛ́: “Afɔklɛ́nnú lɛ́ ná wá jɛ́n wɛ.” (Mat. 18:7) Énɛ́ wú ɔ, mǐ ɖó ná sɔ́ nǔ ɖ’ayǐ nú tagba lɛ́. Tagba e sixú wá tíin ɖo mǐ kpó nǔɖitɔ́ hǎtɔ́ mǐtɔn lɛ́ kpó tɛ́ntin é ɖo tagba énɛ́ lɛ́ mɛ.

² Kpɔ́ndéwú ɖé ɖíe. È nɔ dó wǔsyɛ́n lanmɛ nú togun Jexóva tɔn ɖɔ é ní sɔ́ nǔ ɖ’ayǐ nú adla lɛ́. Nɛ̌ mǐ ka nɔ wa mɔ̌ gbɔn? Jɛ nukɔn hwɛ̌ ɔ, mǐ nɔ ba do nú nǔ dó adla e sixú j’ayǐ ɖo xá mǐtɔn mɛ lɛ́ é wú. Mɔ̌ wiwa ɖo tají tawun, ényí jǒnɔ wɛ mǐ nyí ɖo xá ɔ mɛ ɔ nɛ́. Ényí mǐ tuun adla e sixú wá j’ayǐ lɛ́ é gúdo ɔ, mǐ ɖó ná bló tuto nǔ e mǐ sixú wa bo ná dó sixú ɖo gbesisɔmɛ ná lɛ́ é tɔn. (Nǔx. 21:5) Ðo ali ɖokpó ɔ nu ɔ, é ná nyɔ́ ɖɔ mǐ ní tuun tagba e mǐ sixú wá mɔ ɖo batɛ́mu mǐtɔn gúdo lɛ́ é; énɛ́ ná d’alɔ mǐ bɔ ényí tagba énɛ́ lɛ́ ɖě wá xwetɔ́n jɛ́n wɛ ɔ, mǐ ná tuun nǔ e mǐ ná wa é. Mɔ̌ mɛ ɔ, tagba énɛ́ lɛ́ ná wa nǔ dó mǐ wú dín ǎ, yě ka ná d’akpa xɔ́ntɔn e mǐ zun xá Jexóva é wú ǎ. (Ðɛh. 17:5) Énɛ́ wú ɔ, mi nú mǐ ní ɖɔ xó dó tagba e sixú wá xwetɔ́n é atɔn jí, bá kpɔ́n lěe mǐ sixú sɔ́ nǔ ɖ’ayǐ gbɔn é.a

HWENU E NƆVÍ SÚNNU ÐÉ ALǑ NƆVÍ NYƆ̌NU ÐÉ JƐ AGƆ DÓ WE É

3. Tagba tɛ́ mǐ ka sixú mɔ ɖo agun ɔ mɛ?

³ A ka flín lěe nǔ cí nú we azɔn nukɔntɔn e a yi kplé bo mɔ wǎnyíyí e ɖo mɛ Jexóva tɔn lɛ́ tɛ́ntin é a? A kú d’é jí ɖɔ émí mɔ nǔgbó ɔ ǎ cé? (Jaan 13:35; Koló. 3:12) Lěe nǔ cí nú Blancab é nɛ́. Amɔ̌, ée é bló batɛ́mu gúdo é ɔ, nǔ e é ma ɖó nukún ǎ é ɖé jɛ. É ɖɔ: “Nɔví nyɔ̌nu ɖé wa nǔ xá mì kpó hunnylánylá kpó. Un lɛ́ ɖ’ayi wú ɖɔ é nɔ ɖɔ nǔ masɔgbe lɛ́ dó mɛ ɖěvo lɛ́ wú. Un ɖó nukún nǔ mɔ̌hun ǎ; nǔ e un kplɔ́n é wɛ nyí ɖɔ, Kúnnuɖetɔ́ Jexóva tɔn lɛ́ nɔ tɛ́n kpɔ́n bo nɔ nɔ fífá mɛ xá mɛ, bo nɔ lɛ́ yí wǎn nú mɛ.” É ɖo wɛn ɖɔ, nɔví súnnu kpó nɔví nyɔ̌nu kpó towe lɛ́ nɔ dó gǎn syɛ́nsyɛ́n bo nɔ ɖe jijɔ klisánwun tɔn lɛ́ xlɛ́ hú gǎn, amɔ̌, yě nyí mɛ maɖóblɔ̌ ǎ. (Efɛ́. 4:23, 24; 1 Jaan 1:8) Énɛ́ wú ɔ, hweɖénu sixú wá su bɔ yě mɛ ɖě ɖɔ nǔɖé, alǒ wa nǔɖé b’ɛ ná dó xomɛsin nú we. (Ja. 3:8) É blá wǔ ɖɔ, tagba mɔ̌hun lɛ́ ko zɔ́n bɔ mɛɖé lɛ́ ko jó Jexóva sinsɛn dó.

4. Ényí nɔví súnnu ɖé alǒ nɔví nyɔ̌nu ɖé dó xomɛsin nú mǐ ɔ, étɛ́ ka sixú d’alɔ mǐ bɔ mǐ ná tuun nǔ e mǐ ná wa é? (Efɛ́zinu lɛ́ 4:32)

⁴ Étɛ́ ka sixú d’alɔ we bɔ a ná tuun nǔ e a ná wa hwenu e nɔví súnnu ɖé alǒ nɔví nyɔ̌nu ɖé ná dó xomɛsin nú we é? Tɛ́n kpɔ́n bónú wěɖexámɛ e ɖo Efɛ́zinu lɛ́ 4:32 mɛ é xwixwedó ní má we. (Xa.) Ényí a dó gǎn e wú a kpé é bǐ bo kpo ɖo xomɛ nyɔ́ wɛ, bo lɛ́ kpo ɖo wǔvɛ́ se xá mɛ wɛ ɔ, é ɖo wɛn ɖɔ, a ná nyi alɔ nú tagba gěgé. Hwɛ e mɛ ɖěvo lɛ́ hu dó we é sísɔ́ kɛ yě faa ní nyí nǔ e gbé a ná nɔ nya é. Étɛ́ ka sixú d’alɔ we bɔ a ná kpé énɛ́ wú? Lin tamɛ dó lě do a nɔ byɔ́ Jexóva ɖɔ é ní sɔ́ hwɛ kɛ émí sɔ é kpó lěe é nɔ wa mɔ̌ faa gbɔn é kpó jí. (Mat. 6:12) Ényí lěe Jexóva nɔ sɔ́ hwɛ kɛ we faa gbɔn é nɔ su nukún towe mɛ ɔ, é ná bɔ wǔ nú we hú gǎn bɔ a ná nɔ sɔ́ hwɛ kɛ mɛ ɖěvo lɛ́.

5. Nǔgbódodó Biblu tɔn tɛ́ ka sixú d’alɔ mǐ hwenu e mɛɖé jɛ agɔ dó mǐ é? (Nǔnywɛ́xó 19:11) (Kpɔ́n ɖiɖe lɛ́ lɔmɔ̌.)

⁵ Xa Nǔnywɛ́xó 19:11. Biblu ɖɔ ɖɔ ényí è jɛ agɔ dó mǐ ɔ, nukúnnúmɔjɛnǔmɛc sixú d’alɔ mǐ bɔ mǐ kún ná yá wǔ sin xomɛ ó. Nǔgbódodó énɛ́ d’alɔ Rima, éé bló batɛ́mu xwe yɔywɛ ɖé lɛ́ ɖíe é. É ɖɔ: “Ényí nɔví lɛ́ wa nǔ e sixú dó xomɛsin xomɛ nú mì é ɖé ɔ, un nɔ flín Nǔnywɛ́xó 19:11. Un nɔ lin tamɛ dó nǔ e jɛ dó yě jí ɖo gbɛzán yětɔn mɛ lɛ́ é jí, bo nɔ dó nukún nǔ e wú yě sixú ko wa nǔ gbɔn mɔ̌ é mɛ. Un nɔ lɛ́ w’azɔ̌ xá yě ɖo sinsɛnzɔ́ ɔ mɛ. Mɔ̌ mɛ ɔ, un nɔ tuun yě hú gǎn.” Wěɖexámɛ ɖagbe nɛ́. A sixú kplɔ́n bo tuun nɔví súnnu kpó nɔví nyɔ̌nu kpó towe lɛ́ din. Ényí mǐ tuun yě ganjí ɔ, hwenu e yě ná dó xomɛsin nú mǐ é ɔ, hwɛ sísɔ́ kɛ yě ná bɔ wǔ nú mǐ hú gǎn.

6. Étɛ́ ka sixú d’alɔ mǐ bɔ mǐ ná vɛ́ d’é jí xá nɔví súnnu kpó nɔví nyɔ̌nu kpó e ɖo agun ɔ mɛ lɛ́ é?

⁶ Étɛ́ a ka sixú wa bo ná ɖu xɔ́ntɔn zunzun ɖagbe sín vǐví ɖo agun ɔ mɛ? Ée a ná ɖo tíntɛ́nkpɔ́n wɛ bá tuun nɔví súnnu kpó nɔví nyɔ̌nu kpó towe lɛ́ é ɔ, nɔ sɔ́ ayi ɖó jijɔ ɖagbe yětɔn lɛ́ jí. (Sɔ́ jlɛ́ dó Nǔnywɛ́xó 10:12 wú; Hlɔ̌. 12:10; Filí. 2:2, 3) Kpɔ́n lěe mɔ̌ wiwa d’alɔ nɔví súnnu e nɔ nyí Mark bo bló batɛ́mu yɔ̌yɔ́ é gbɔn é. Ée é jɛ hwenu zán ɖó kpɔ́ xá nɔví súnnu kpó nɔví nyɔ̌nu kpó e ɖo agun tɔn mɛ lɛ́ é jí hú gǎn é ɔ, é wá jɛ ayi ɖó gǎnmaɖó yětɔn lɛ́ wú jí. Étɛ́ ka d’alɔ Mark b’ɛ ma lɔn nú nǔwanyido yětɔn lɛ́ wa nǔ dó wǔ tɔn ǎ? É ɖɔ: “Un wá mɔ nǔ jɛ wú ɖɔ nǔwanyido nɔví ce lɛ́ tɔn kún sɔ nǔtí ɖo nǔ tootóbú e mɛ e ma nyí klisánwun ǎ lɛ́ é nɔ wa nyi do é kpá ó. É wá za wě nú mì ɖɔ un kún ɖó ná nɔ ɖo tamɛ lin dó gǎnmaɖó nǔɖitɔ́ hǎtɔ́ ce lɛ́ tɔn jí wɛ ó. Énɛ́ wú ɔ, un sɔ́ ayi ce ɖó jijɔ ɖagbe yětɔn lɛ́ jí.” Ényí hwi lɔ wa nǔ ɖokpó ɔ ɔ, é ná d’alɔ we bɔ a ná vɛ́ xá nɔví towe lɛ́ ganjí.

HWENU E NǓ E A KO JÓ DÓ LƐ́ É LƐ́ JƐ JLǑJLÓ WE JÍ É

7. Étɛ́ lɛ́ ka sixú zɔ́n bɔ nǔ e mǐ ko jó dó nyi gǔdo lɛ́ é ná lɛ́ jɛ mǐ jló jí?

⁷ Hwenu e a húzú Kúnnuɖetɔ́ Jexóva tɔn é ɔ, é víví nú we ɖɔ a dó gǔdo gbɛ nyanya Satáan tɔn. A sixú ko lin nǔ gbɔn lě: ‘Mɛ̌ ka ná ba ná lɛ́ lɛ́ kɔ yi dɔ̌n?’ É ɖo mɔ̌ có, ényí tagba lɛ́ wá xwetɔ́n ɔ, a sixú jɛ nǔ ɖěɖěe a ko jó dó cóbó jɛ Jexóva sɛn jí lɛ́ é flín jí, a tlɛ sixú lɛ́ jɛ do yětɔn jɛ jí. (Sɔ́ jlɛ́ dó Kɛ́nsísɔ́ 11:4-6 wú.) Ði kpɔ́ndéwú ɔ, nɔví súnnu ɖé lɛ́ sixú ko wá gbeta ɔ kɔn bo jó azɔ̌ e nyɔ́ tawun bo ka nɔ ɖu hwenu mɛtɔn dín é dó. Mɛ ɖěvo lɛ́ tíin bɔ hwenu e yě jɛ Biblu kplɔ́n jí é ɔ, xɔ́ntɔn vívɛ́ yětɔn ɖé lɛ́ sixú ko jó yě dó. Bɔ mɛ ɖěvo lɛ́ sixú ko ɖu ɖo walɔ e blí bɔ yě ka nɔ ɖu vǐví tɔn é ɖé lɛ́ jí. É ná blá wǔ tawun ɖɔ klisánwun ɖé ní lɔn bónú nǔ e é ko jó dó lɛ́ é ɖě ní lɛ́ wá ɖe è sín Jexóva gɔ́n! Étɛ́ a ka sixú wa din bɔ ényí nǔ ɖěbǔ ná bo ɖo jijɛ wɛ ɔ, a ma sɔ́ ná lɛ́ kɔ yi nǔ e a ko dó gǔdo lɛ́ é kɔn gbeɖé ǎ?

8. Étɛ́ kpɔ́ndéwú Ablaxámu kpó Sala kpó tɔn ka kplɔ́n mǐ?

⁸ Mawusɛntɔ́ gbejínɔtɔ́ ɖěɖěe hɛn ɔ, yě ná ko jɛ nǔ e yě jó dó lɛ́ é sín do lɛ́ é sín kpɔ́ndéwú ɖo Biblu mɛ. Ði kpɔ́ndéwú ɔ, Ablaxámu kpó Sala kpó se tónú nú Jexóva bo jó toxo ɖɛɛɖɛkpɛ Wúu tɔn e è mɛ ahohó lɛ́ lɛ̌ dó lɛ́ é dó bo yí nɔ goxɔ lɛ́ mɛ. (Ebl. 11:8, 9) Yě sixú ko nɔ flín vivo gbɛ e yě nɔ zán ɖo Wúu é hweɖélɛ́nu. Amɔ̌, “ényí yě ko nɔ fɔ́n bo nɔ ɖo fí e yě gosín é flín wɛ,” alǒ ényí nǔ e yě jǒ dó lɛ́ é nɔ lɛ́ ɖo jlǒjló yě wɛ wɛ ɔ, yě ná ko ba ná lɛ́ kɔ yi vivo gbɛ énɛ́ kɔn. Yě ka wa mɔ̌ ǎ, é nyɔ́ wa ɔ, yě sɔ́ ayi ɖó akpá e Jexóva dó nú yě dó sɔgúdo wú é jí.—Ebl. 11:15, 16.

9. Nɛ̌ nǔ ka cí nú mɛsɛ́dó Pɔ́lu dó nǔ ɖěɖěe é sɔ́ dó sá vɔ̌ lɛ́ é wú? (Filípunu lɛ́ 3:7, 8, 13)

⁹ Mɛsɛ́dó Pɔ́lu lɔ sɔ́ nǔ ɖé lɛ́ dó sá vɔ̌ bá dó sɛn Jexóva. Cóbónú é ná húzú klisánwun ɔ, é kplɔ́n wěma ɖo sɛ́nkplɔ́nmɛtɔ́ nukúnɖéjí Gamaliyɛ́li gɔ́n. (Mɛ. 22:3) Pɔ́lu sixú ko húzú sinsɛngán Jwifu lɛ́ tɔn nukúnɖéjí ɖé. (Ga. 1:13, 14) É ɖo mɔ̌ có, hwenu e é yí gbe nú wɛn ɖagbe ɔ é ɔ, é dó gǔdo nǔ énɛ́ lɛ́ bǐ. Ée Pɔ́lu húzú klisánwun gúdo é ɔ, hwebǐnu wɛ gbɛ bɔ wǔ n’i a? Éǒ. È xo è, è wlí i dó gan mɛ, bɔ mɛ éɖésúnɔ tɔn lɛ́ lɛ́ gbɛ́ wǎn n’i. (2 Kɔ. 11:23-26) Ényí é ko sɔ́ ayi tɔn bǐ ɖó mɛtɛ́nkpɔ́n énɛ́ lɛ́ jí, bo nɔ jlɛ́ gbɛzán tɔn din tɔn ɔ dó gbɛzán tɔn ɖ’ayǐ tɔn ɔ wú wɛ ɔ, é sixú ko wá gbeta ɔ kɔn ɖɔ lěe émí zán gbɛ gbɔn ɖ’ayǐ cóbó wá jɛ Jezu xwedó jí é kpɔ́n te hú gǎn lěe émí ɖe din é. Pɔ́lu wa mɔ̌ ǎ, é nyɔ́ wa ɔ, é sɔ́ ayi ɖó wǔjɔmɛ ɖaxó e é ɖó bo ɖo sinsɛnzɔ́ wa nú Klísu Jezu wɛ din, bɔ sɔgúdo susunɔ ɖé ɖo te kpɔ́n ɛ é jí. Pɔ́lu kú d’é jí ɖɔ nyɔ̌ná mɔ̌hun lɛ́ zɛ vɔ̌ ɖěbǔ e émí sá é wú flaflá tɔn.—Xa Filípunu lɛ́ 3:7, 8, 13.

10. Étɛ́ lɛ́ jí mǐ ka ɖó ná nɔ lin tamɛ dó hwɛhwɛ? (Maki 10:29, 30) (Kpɔ́n ɖiɖe lɛ́ lɔmɔ̌.)

¹⁰ Étɛ́ ka nyí nǔkplɔ́nmɛ ɔ? Ényí a jɛ tamɛ lin dó nǔ ɖěɖěe a ko jó dó cóbó wá húzú klisánwun lɛ́ é wú jí hǔn, tɛ́n kpɔ́n bo lɛ́ flín nǔ e wú a dó gǔdo nǔ énɛ́ lɛ́ é. (Nǔt. 7:10) Jlɛ̌ nǔ ɖěɖěe a ko dó gǔdo lɛ́ é dó nǔ ɖěɖěe sín víví ɖu wɛ a ɖe ɖo nǔgbó ɔ mɛ lɛ́ é wú. A zun xɔ́ntɔn vívɛ́ xá Nǔbǐwúkpétɔ́ wɛ̌kɛ́ ɔ tɔn. (Nǔx. 3:32) A ɖo xwédo gbigbɔ tɔn e mɛ wǎnyíyí ɖe é ɖé mɛ. (Xa Maki 10:29, 30.) Gɔ́ ná ɔ, sɔgúdo ɖaaɖagbe ɖé ɖo te kpɔ́n we! (Eza. 65:21-23) Ényí a nɔ lin tamɛ dó nyɔ̌ná ɖěɖěe sín vǐví ɖu wɛ a ɖe, ɖó a ɖo Jexóva sɛn wɛ wútu lɛ́ é jí hwɛhwɛ ɔ, a sɔ́ ná jɛ nǔ ɖěɖěe a ko dó gǔdo lɛ́ é sín do káká ɖe ǎ.

11. Étɛ́ kpɔ́ndéwú Rosemary tɔn ka kplɔ́n we?

¹¹ Nɔví nyɔ̌nu ɖé nɔ nyí Rosemary bo bló batɛ́mu hwenu e é ɖo xwe 50 mɔ̌ ɖó wɛ é. Ð’ayi nǔ e é wa bo ma sɔ́ nɔ jɛ nǔ e é ko jó dó lɛ́ é sín do ǎ é wú. É ɖɔ: “Un jɛ Natáaxwe sín do, ɖó hwenu ɖagbe ɖé wɛ é nyí bɔ xwédo ɔ bǐ nɔ ɖu vǐví tɔn ɖ’ayǐ. Nǔ níná mɛ e un yí wǎn ná lɛ́ é nɔ dó xomɛhunhun nú mì. Ényí un mɔ yɔkpɔ́vú lɛ́ bónú yě lɛ́ lɛ̌ dó Natáaxwe sín atín bo hun nǔ e è ná yě lɛ́ é bo ɖo awǎ jɛ wɛ ɔ, é nɔ víví nú mì tawun.” Étɛ́ ka d’alɔ Rosemary? É ɖɔ: “Un ba nǔ e un ná sɔ́ ɖó Natáaxwe sín domɛ é. Ðo xwe ɖokpó ɖokpó mɛ ɔ, un nɔ xo xwédo ce kplé ɖo azǎn vo jí, bo nɔ ná nǔ yě, bo nɔ tín nǔ ɖěɖěe wú un yí wǎn nú yě lɛ́ é mɛ nú yě.” Rosemary lɛ́ mɔ wǔvɛ́ ɖěvo. É ɖɔ: “Hwenu e un húzú Kúnnuɖetɔ́ Jexóva tɔn é ɔ, xɔ́ntɔn ce xóxó lɛ́ gbɛ́ hǎ ce. Hweɖélɛ́nu ɔ, un nɔ jɛ do yětɔn bo nɔ mɔ ɖɔ un zun nyiɖokpó.”d Étɛ́ ka d’alɔ ɛ? É bló tito bo nɔ w’azɔ̌ xá nɔví nyɔ̌nu vovo lɛ́ ɖo sinsɛnzɔ́ ɔ mɛ. É ɖɔ: “Mɔ̌ wiwa zɔ́n bɔ un ɖó xɔ́ntɔn yɔ̌yɔ́ e un yí wǎn ná bɔ yě lɛ́ xɔ akwɛ́ nú mì lɛ́ é.” Étɛ́ kpɔ́ndéwú tɔn ka sixú kplɔ́n we? A sixú jɛ nǔ e nɔ zɔ́n bɔ a nɔ ɖó awǎjijɛ cóbó wá mɔ nǔgbó ɔ é ɖé sín do, amɔ̌, a sixú sɔ́ nǔ e nyɔ́ hú gǎn é ɖé dó ɖyɔ́ nǔ e sín do a nɔ jɛ é. (Filí. 4:8, 9) Amɔ̌, flín: Ényí Jexóva gɔ́n jɛ́n a ɖe ɔ, nǔ e a ná mɔ lɛ́ é ná hú gǎn nǔ e a jó dó lɛ́ é jɛ́n wɛ.

HWENU E MƐ ÐĚVO LƐ́ JÓ JEXÓVA DÓ É

12. Tagba e vɛ́ wǔ é tɛ́ è ka sixú ɖí xwi xá ɖo agun ɔ mɛ?

¹² Hwenu e a húzú Kúnnuɖetɔ́ Jexóva tɔn é ɔ, agbɔ̌n towe jɛ do, ɖó a dó gǔdo gbɛ nyanya élɔ́, bo byɔ́ fí gbigbɔ tɔn e mɛ è nɔ zán walɔ ɖagbe ɖe é. (Eza. 65:14) É ɖo mɔ̌ có, hweɖélɛ́nu ɔ, a sixú se ɖɔ mɛɖé hu hwɛ syɛ́nsyɛ́n ɖo agun ɔ mɛ. È tlɛ sixú ɖe mɛɖé sín agun mɛ. (1 Kɔ. 5:13) Ð’ayi lěe ninɔmɛ mɔ̌hun wa nǔ dó nɔví nyɔ̌nu e nɔ nyí Samar é wú gbɔn é wú. É ɖɔ: “Un bló batɛ́mu é ɔ, é lín ǎ bɔ mɛxó agun tɔn ɖokpó hu hwɛ syɛ́nsyɛ́n, bɔ è ɖe è sín agun mɛ. É cí ɖě nú mì tawun ɖó un sixú ɖi ɖɔ mɛxó agun tɔn ná hu hwɛ dó Jexóva kpó agun ɔ kpó ǎ.” É ɖo wɛn ɖɔ, mǐ ɖó ná nɔ ɖeji hwebǐnu ɖɔ nɔví mǐtɔn lɛ́ yí wǎn nú Jexóva bo ba ná tɛ́ dó wǔtu tɔn. (1 Kɔ. 13:4, 7) É ɖo mɔ̌ có, mǐ ɖó ná nɔ jlɛ̌ jí. Ðo xwe ɖokpó ɖokpó mɛ ɔ, è nɔ ɖe mɛɖé lɛ́ sín agun mɛ. Énɛ́ sixú vɛ́ wǔ, ɖo tají ɔ, ényí mɛvívɛ́ towe, alǒ mɛ e a nɔ ɖó sísí ná tawun é ɖé wɛ wlí ali nyanya ɔ nɛ́.

13. Étɛ́ mǐ ka sixú wa din bɔ ényí mɛvívɛ́ mǐtɔn ɖé wá jó Jexóva dó ɔ, nǔɖiɖi mǐtɔn ma ná vɔ́ da ǎ?

¹³ Étɛ́ a ka sixú wa din bɔ é ná d’alɔ we bɔ hwenu e mɛvívɛ́ towe ɖé ná jó Jexóva dó é ɔ, é ma ná vɔ́ da nú nǔɖiɖi towe ǎ? Kpo ɖo hlɔ̌nhlɔ́n ná xɔ́ntɔn e a zun xá Jexóva é wɛ. (Ja. 4:8) Ma gán jɛ gbejíninɔ mɛɖé tɔn wú dó zun xɔ́ntɔn xá Jexóva ó. Nǔgbó wɛ ɖɔ mǐ nɔ sɛn Mawu ɖó kpɔ́ ɖo xwédo mɛ bo nɔ lɛ́ wa mɔ̌ ɖo agun ɔ mɛ hwɛhwɛ, é ɖo mɔ̌ có, mǐ ɖó ná lɛ́ ɖó tuto ɖɛxixo kpó Biblu xixa kpó tɔn mǐɖésúnɔ tɔn.—Ðɛh. 1:2; 62:9.

14. Étɛ́ kpɔ́ndéwú e mɛsɛ́dó Piyɛ́ɛ sɔ́ ɖ’ayǐ é ka kplɔ́n mǐ? (Jaan 6:66-68)

¹⁴ Lěe mɛsɛ́dó Piyɛ́ɛ wa nǔ gbɔn hwenu e ahwanvú gěgé ɖó Jezu xwixwedó te é sixú lɛ́ kplɔ́n nǔ mǐ. Nǔ lɛ́ sixú ko bǔ vo dó Piyɛ́ɛ lɔmɔ̌ hwenɛ́nu. Amɔ̌, ɖ’ayi nǔ e é ɖɔ ɖo Jaan 6:66-68 mɛ é wú. (Xa.) Piyɛ́ɛ sɔ́ ayi ɖó nǔ e wa wɛ mɛ ɖěvo lɛ́ ɖe é jí ǎ, é nyɔ́ wa ɔ, é sɔ́ ayi ɖó nǔgbó e é mɔ ɖo Jezu gɔ́n é jí. Wǎgbɔ tɔn ɔ, nǔɖiɖi Piyɛ́ɛ tɔn vɔ́ da ǎ. Mɔ̌ ɖokpó ɔ, ɖo égbé ɔ, lěe wa nǔ gbɔn wɛ mɛ ɖěvo lɛ́ ɖe é nɔ ɖyɔ́ lěe nǔgbó e tutoblónúnǔ Mawu tɔn d’alɔ we bɔ a mɔ é xɔ akwɛ́ sɔ é ǎ. Tɛ́ dó nǔgbó énɛ́ wú! Samar e xó mǐ ɖɔ wá yi é ɖɔ: “Un nɔ flín nyiɖée hwebǐnu ɖɔ é kún nyí mɛ ɖokpó wa nǔ nyi do kpowun wɛ xlɛ́ ɖɔ agun ɔ bǐ wɛ nylá alǒ tutoblónúnǔ ɔ bǐ wɛ nylá ó; mɔ̌ jɛ́n é ma ka nɔ lɛ́ xlɛ́ ɖɔ mɔ̌ wɛ Jexóva nɔ wa nǔ gbɔn ǎ é nɛ́.”

15. Étɛ́ nǔ e jɛ dó Emily jí é ka kplɔ́n we?

¹⁵ Lin tamɛ dó nǔ e jɛ dó Emily jí é jí. Emily bló batɛ́mu é ɔ, aklúnɔzángbla ɖokpó kpowun jɛ́n é bló, bɔ nɔ tɔn jó xwédo ɔ dó bɔ è ɖe è sín agun mɛ. Emily ɖɔ: “Un sixú dó nukún mɛ kpɔ́n gbeɖé ɖɔ nǔ mɔ̌hun ná jɛ ǎ. Nǔ énɛ́ e jɛ é wɛ nyí wǔvɛ́ ɖaxó hú gǎn e un mɔ é, un nɔ jɛ nɔ ce do tawun.” Étɛ́ ka d’alɔ Emily? É ɖɔ: “Un nɔ nyiɖokpó ǎ. Tɔ́ ce kɛ́ɖɛ́ wɛ nɔ gǔdo nú mì ǎ, loɔ, mɛ ɖěvo e ɖo agun ɔ mɛ lɛ́ é lɔmɔ̌ cí xwédo ɖɔhun nú mì. Nǔgbomɛ hán mɛɖé ǎ. Nǔ e wú é ɖo tají ɖɔ mǐ ní vɛ́ xá mǐɖée bo nɔ lɛ́ dó wǔsyɛ́n lanmɛ nú mǐɖée é nɛ́.” (1 Pi. 5:9) Tagba ní ma to wá hwɛ̌ cóbónú hwi kpó nɔví towe lɛ́ kpó vɛ́ ó. Hwi kpó yě kpó ní ɖo vǐvɛ́ wɛ din. Mɔ̌ mɛ ɔ, nǔ ɖěbǔ ná bo wá jɛ ɔ, a sɔ́ ná mɔ ɖɔ émí zun émíɖokpó vo ɖé ǎ.

16. Étɛ́ mǐ ka ɖó ná flín? (Kpɔ́n ɖiɖe ɔ lɔmɔ̌.)

¹⁶ Lɛ̌ flín ɖɔ mɛ ɖěɖěe Jexóva yí wǎn ná lɛ́ é wɛ é nɔ dɔn tó ná. (Ebl. 12:6) É ba ɖɔ mɛ e è ɖe sín agun mɛ lɛ́ é bǐ ní lɛ́ kɔ wá. (2 Pi. 3:9) Énɛ́ wú ɔ, ényí è ɖe mɛvívɛ́ towe ɖé sín agun mɛ hǔn, kú d’é jí ɖɔ mɛxó agun tɔn lɛ́ ná wa nǔ e wú yě kpé é bǐ dó d’alɔ ɛ b’ɛ ná lɛ́ kɔ wá.—2 Tim. 2:24, 25.

17. Étɛ́ jí mǐ ka sixú kú dó?

¹⁷ Wǔvɛ́ ɖěɖěe a sixú mɔ ɖo batɛ́mu towe gúdo lɛ́ é kwínwe jí jɛ́n mǐ ɖɔ xó dó. Nǔgbó wɛ ɖɔ ɖé lɛ́ sixú hu ado nú we, amɔ̌, xɛsi ma ɖi we ó. Nǔ gěgé ɖe bɔ a sixú wa dó sɔ́ nǔ ɖ’ayǐ. Ma ka lɛ́ wɔn gbeɖé ɖɔ Jexóva Mawu wɛ nyí alɔdómɛtɔ́ ɖaxó hú gǎn e a ɖó é ó. É ko d’alɔ we, bo ka lɛ́ ba ná ɖo mɔ̌ wa wɛ káká sɔ́yi! (1 Pi. 5:10) É ná ná hlɔ̌nhlɔ́n kpó didɛ kpó e sín hudó a ɖó bá dɛ ɖo mɛtɛ́nkpɔ́n ɖěbǔ nu é we hwebǐnu. Ényí a kpo ɖo gbe yí nú alɔdó Jexóva tɔn wɛ jɛ́n wɛ ɔ, wǔvɛ́ ɖě ná nya we dó zɔ n’i gbeɖé ǎ!—Ðɛh. 119:165; Hlɔ̌. 8:38, 39.