Wěma Jɔbu tɔn sixú d’alɔ we hwenu e a ɖo wě ɖe xá mɛ wɛ é

1-2. Étɛ́wú é ka vɛ́ wǔ nú xɔ́ntɔn Jɔbu tɔn atɔn lɛ́ kpó Elihu kpó bónú yě ná dó gbɔ nú Jɔbu?

XÓ Ɔ gba kpé ɖo mɛ e ɖo zǎnzǎnhwe jí lɛ́ é tɛ́ntin afín e è nyi dó jɔhɔn mɛ é ɖɔhun. Jɔbu e è tuun gbɔn fí bǐ ɖó dɔkun tɔn wú é ba nǔ tɔn lɛ́ bǐ kpo. Xɔ́ntɔn Jɔbu tɔn atɔn, yě wɛ nyí Elifázi, Biludádi kpó Sofáa kpó se nǔ e xá Jɔbu é, bo yi Wúsi bá dó dó gbɔ n’i. Amɔ̌, yě ɖó nukún nǔ e yě wá mɔ é ǎ.

² Dǒ nukún ninɔmɛ ɔ mɛ kpɔ́n. Ðo ali ɖé nu ɔ, Jɔbu ba nǔ e é ɖó lɛ́ é bǐ kpo. Lɛ̌ngbɔ́ tootóbú e é ɖó lɛ́ é, nyibú tɔn lɛ́, lǎkúnmí tɔn lɛ́ kpó tócí tɔn lɛ́ kpó bǐ vɔ. È hu vǐ tɔn lɛ́ kpó mɛsɛntɔ́ tɔn lɛ́ gěgé kpó. Gɔ́ ná ɔ, xwé e gbe vǐ tɔn lɛ́ kú dó é húzú dǒglin. É víví hwe bɔ Jɔbu lɛ́ bɛ́ azɔn syɛ́nsyɛ́n. Din ɔ, akpa gbɔn wǔ tɔn bǐ b’ɛ nɔ ɖo wǔvɛ́ se wɛ. Súnnu atɔn lɛ́ mɔ Jɔbu sɛ́dó sín zɔ, b’ɛ ɖo aluwɛ mɛ bo ɖo ayǐ jínjɔ́n ɖo afín mɛ. Nɛ̌ yě ka wa nǔ gbɔn? Nú azǎn tɛ́nwe mɔ̌ ɔ, yě ɖɔ nǔɖé nú nya énɛ́ e ɖo wǔvɛ́ ɖaxó se wɛ é ǎ. (Jɔb. 2:12, 13) Hweɖénu wá su bɔ dɔ̌nkpɛvú e nɔ nyí Elihu é wá, bo jínjɔ́n zɔ zaan. Jɔbu wá kɛ nu lo, bo dó nu gbe e gbe è ji i é bo byɔ́ kú. (Jɔb. 3:1-3, 11) É ɖo wɛn ɖɔ Jɔbu ɖó hudó alɔdó tɔn! Nǔ e súnnu énɛ́ lɛ́ ná ɖɔ é kpó lěe yě ná ɖɔ gbɔn é kpó ná xlɛ́ ɖɔ xɔ́ntɔn jɔ xɔ́ntɔn Jɔbu tɔn lɛ́ wɛ yě nyí bɔ ganjíninɔ tɔn nɔ ɖu ayi mɛ nú yě nǔgbó nǔgbó alǒ gbɔ.

3. Étɛ́ lɛ́ jí mǐ ka ná sɔ́ ayi ɖó din?

³ Jexóva zán Mɔyízi bɔ é wlán nǔ e xɔ́ntɔn Jɔbu tɔn atɔn lɛ́ kpó Elihu kpó ɖɔ, bo lɛ́ wa lɛ́ é ɖ’ayǐ. É jɛxá ɖɔ è ní ɖ’ayi wú ɖɔ é cí ɖɔ gbigbɔ nyanya ɖé wɛ sɔ́ nǔ e Elifázi ɖɔ é ɖé lɛ́ d’ayi mɛ n’i ɖɔhun. Amɔ̌, nǔ e Elihu ɖɔ lɛ́ é ɔ, Jexóva wɛ sɔ́ d’ayi mɛ n’i. (Jɔb. 4:12-16; 33:24, 25) Énɛ́ wú ɔ, é sɔ́ kpácá mɛ ǎ ɖɔ ényí wě ɖagbe hú gǎn e è ɖe xá mɛ kpɔ́n lɛ́ é ɖé lɛ́ tlɛ ɖo wěma Jɔbu tɔn mɛ ɔ, éé nylá hú gǎn lɛ́ é ɖé lɛ́ lɔ ɖ’é mɛ. Nǔ tají e sín le mǐ sixú ɖu ɖo wěma Jɔbu tɔn mɛ é wɛ nyí lěe é sixú d’alɔ mǐ gbɔn hwenu e é byɔ́ ɖɔ mǐ ní ɖe wě xá mɛɖé é. Jɛ nukɔn hwɛ̌ ɔ, mǐ ná gbéjé kpɔ́ndéwú nyanya e Jɔbu sín xɔ́ntɔn atɔn lɛ́ sɔ́ ɖ’ayǐ lɛ́ é kpɔ́n. Énɛ́ gúdo ɔ, mǐ ná ɖɔ xó dó kpɔ́ndéwú ɖagbe e Elihu sɔ́ ɖ’ayǐ é jí. Ðo ninɔmɛ ɖokpó ɖokpó mɛ ɔ, mǐ ná kplɔ́n lěe Izlayɛ́li ví lɛ́ sixú ko ɖu wěma Jɔbu tɔn sín le gbɔn é kpó lěe mǐ sixú ɖu le tɔn ɖo égbé gbɔn é kpó.

LĚE XƆ́NTƆN JƆBU TƆN ATƆN LƐ́ ÐE WĚ XÁ Ɛ GBƆN É

4. Étɛ́wú Jɔbu sín xɔ́ntɔn atɔn lɛ́ ka xo nǔ e gbé nya wɛ yě ɖe é kpo? (Kpɔ́n ɖiɖe ɔ lɔmɔ̌.)

⁴ Biblu ɖɔ ɖɔ Jɔbu sín xɔ́ntɔn atɔn lɛ́ yi bo “ná ɖe wǎnyíyí e yě ɖó nú Jɔ̌bu ɔ xlɛ́ ɛ, bo ná dó wǔsyɛ́n lanmɛ n’i” hwenu e yě se awě e xo è lɛ́ é. (Jɔb. 2:11) Amɔ̌, é kpa yě ǎ. Étɛ́wú? É hwe bǐ ɔ, ɖó hwɛjijɔ atɔn wú. Nukɔntɔn, yě zán hwenu yětɔn dó ɖótó Jɔbu bo tɛ́n kpɔ́n bo mɔ nǔ jɛ ninɔmɛ tɔn mɛ ǎ. Ði kpɔ́ndéwú ɔ, yě lin ɖɔ hwɛ e Jɔbu hu lɛ́ é sín sin sún wɛ é ɖe; linlin yětɔn ka sɔgbe ǎ.a (Jɔb. 4:7; 11:14) Wegɔ́, gěgé wě e súnnu énɛ́ lɛ́ ɖe xá Jɔbu é tɔn d’alɔ ɛ ǎ, ɖe xomɛnyínyɔ́ xlɛ́ ǎ, bo lɛ́ d’akpa ayi tɔn wú. Ði kpɔ́ndéwú ɔ, nǔ e súnnu atɔn énɛ́ lɛ́ bǐ ɖɔ é cí nǔ ɖagbe ɖɔhun, amɔ̌, yě ka nyí nǔgbó ǎ. (Jɔb. 13:12) Biludádi ɖɔ nú Jɔbu ɖɔ é ɖo xó ɖɔ wɛ suu; xó énɛ́ lɛ́ ka ɖe xomɛnyínyɔ́ xlɛ́ ǎ. (Jɔb. 8:2) Bɔ Sofáa ɖɔ alǎnnú nú Jɔbu bo sɔ́ ɛ jlɛ́ dó “gbɛtɔ́ e ma ɖó fɔn taglo mɛ ǎ é” wú. (Jɔb. 11:12) Atɔngɔ́, yě sixú nɔ ma sú xó dó Jɔbu ta hwenu e yě ɖo xó ɖɔ n’i wɛ é, amɔ̌, hwɛhwɛ wɛ kɔnugbe yětɔn nɔ xlɛ́ ɖɔ yě hú gǎn ɛ, ɖo zunzun i wɛ, bo ɖo hwɛ dó è wɛ. (Jɔb. 15:7-11) Wǎgbɔ tɔn ɔ, xlɛ́xlɛ́ ɖɔ Jɔbu sín hwɛ kún jɔ ó myá nukún nú súnnu énɛ́ lɛ́ hú gbɔ dídó n’i alǒ hlɔ̌nhlɔ́n níná nǔɖiɖi tɔn.

5. Étɛ́ wě e Jɔbu sín xɔ́ntɔn lɛ́ ɖe xá ɛ é ka ná?

⁵ É sɔ́ kpácá mɛ ǎ ɖɔ wě e xɔ́ntɔn Jɔbu tɔn lɛ́ ɖe xá ɛ é kún wa ɖagbe ó. Xó yětɔn lɛ́ hu Jɔbu ɖ’akpo. (Jɔb. 19:2) A sixú mɔ nǔ jɛ nǔ e wú é lɛ́ mɔ ɖɔ émí ɖó ná jɛ hun dó émíɖée jí é mɛ. Énɛ́ zɔ́n bɔ é sɔ́ ɖó linlin e ɖo jlɛ̌ jí é ǎ bo ɖɔ xlonɔxó lɛ́. (Jɔb. 6:3, 26) Jɔbu sín xɔ́ntɔn lɛ́ má linlin e sɔgbe xá linlin Jexóva tɔn lɛ́ é xá ɛ ǎ; yě ka wa nǔ xá ɛ kpó wǔvɛ́sexámɛ kpó ǎ. Wǎgbɔ tɔn ɔ, yě húzú alyánnú ɖo Satáan sín alɔ mɛ ɖo manywɛ́ mɛ. (Jɔb. 2:4, 6) Nɛ̌ mɛ e nɔ gbɛ ɖo hwexónu lɛ́ é ka ɖu tan élɔ́ sín le gbɔn? Nɛ̌ mǐ ka sixú ɖu le tɔn ɖo égbé gbɔn?

6. Nǔ tɛ́ lɛ́ kpɔ́ndéwú nyanya e xɔ́ntɔn Jɔbu tɔn atɔn lɛ́ zé ɖ’ayǐ é ka sixú ko kplɔ́n mɛxó e ɖo Izlayɛ́li lɛ́ é?

⁶ Lěe Izlayɛ́li ví lɛ́ sixú ko ɖu le tɔn gbɔn é. Ée Jexóva ɖó akɔta Izlayɛ́li tɔn ɔ ayǐ gúdo é ɔ, é sɔ́ súnnu e jɛxá lɛ́ é, mɛxó lɛ́, bónú yě ná nɔ xwedó nǔgbódodó jlɔ́jlɔ́ tɔn lɛ́ dó ɖɔ hwɛ nú akɔta ɔ. (Sɛ́n. 1:15-18; 27:1) Súnnu mɔ̌hun lɛ́ ɖó ná xwe sɔ bo ɖótó mɛ cóbó ɖe wě xá mɛ alǒ ɖɔ hwɛ. (2 Tan 19:6) Yě ɖó ná nɔ lɛ́ kan nǔ byɔ́ hú ɖɔ yě ní lin ɖɔ émí ko ɖó kúnnuɖenú lɛ́ bǐ. (Sɛ́n. 19:18) Wěɖexámɛtɔ́ Izlayɛ́li tɔn énɛ́ lɛ́ ɖó ná nɔ lɛ́ nyi alɔ nú gbe vɛ́sin dídó nú mɛ e wá ba alɔdó yětɔn lɛ́ é. Aniwú? Ðó xomɛsin ɖiɖexlɛ́ sixú zɔ́n bɔ awakanmɛ kú mɛɖé dó nǔ e ɖo ayi tɔn mɛ é ɖiɖɔ wú. (Tín. 22:21-23) Mɛxó e ɖo Izlayɛ́li bo gbéjé tan Jɔbu tɔn kpɔ́n lɛ́ é sixú ko mɔ nǔkplɔ́nmɛ lɛ́ ɖ’é mɛ.

7. Gbɔn vo nú mɛxó e ɖo Izlayɛ́li lɛ́ é ɔ, mɛ̌ mɛ̌ e ka sixú lɛ́ ɖe wě xá mɛ? Nɛ̌ yě ka sixú ko ɖu tan Jɔbu tɔn sín le gbɔn? (Nǔnywɛ́xó 27:9)

⁷ É ɖo wɛn ɖɔ é kún nyí súnnu e ko zin ɖo Izlayɛ́li lɛ́ é kɛ́ɖɛ́ wɛ sixú ɖe wě xá mɛ ó. Nǔgbó ɔ, Izlayɛ́li ví ɖěbǔ, mɛ wínnyáwínnyá alǒ mɛxó, súnnu alǒ nyɔ̌nu, sixú ɖe wě xá nɔví tɔn e ɖó hudó alɔdó tɔn bá dó sixú w’azɔ̌ ɖo mawusinsɛn tɔn wú alǒ jlá walɔ tɔn ɖó é. (Ðɛh. 141:5) Wě mɔ̌hun e è ɖe xá mɛ nyi wɛn é xlɛ́ ɖɔ xɔ́ntɔn jɔ xɔ́ntɔn wɛ mɛ e ɖe wě ɔ xá mɛ é nyí. (Xa Nǔnywɛ́xó 27:9.) Kpɔ́ndéwú nyanya e Jɔbu sín xɔ́ntɔn atɔn lɛ́ zé ɖ’ayǐ é sixú nyí kpɔ́ndéwú gbɛɖe nǔ e è ma ɖó ná ɖɔ ǎ é kpó nǔ e è ma ɖó ná wa ǎ é kpó tɔn hwenu e è ɖo wě ɖe xá mɛ wɛ é nú Izlayɛ́li ví lɛ́.

8. Fɛ́ca tɛ́ lɛ́ mǐ ka ɖó ná nyi alɔ ná hwenu e mǐ ɖo wě ɖe xá mɛ wɛ é? (Kpɔ́n ɖiɖe lɛ́ lɔmɔ̌.)

⁸ Lěe mǐ sixú ɖu le tɔn gbɔn é. Mǐ mɛ klisánwun lɛ́ nɔ ba ná d’alɔ nɔví súnnu kpó nɔví nyɔ̌nu kpó mǐtɔn lɛ́ hwenu e yě ɖo tagba lɛ́ mɛ gbɔn wɛ é. Amɔ̌, bo ná dó kpé énɛ́ wú ɔ, mǐ ɖó ná nyi alɔ nú nǔ e xɔ́ntɔn Jɔbu tɔn atɔn lɛ́ wa é wiwa. Nukɔntɔn, mǐ ɖó ná nyi alɔ nú kplakpla jí ninɔ dó wá gbeta lɛ́ kɔn, bo lɛ́ kú d’é jí ɖɔ nǔ e ɖɔ wɛ mǐ ɖe lɛ́ é jínjɔ́n kúnnuɖenú ɖejidéwú lɛ́ jí. Wegɔ́, wěɖexámɛ mǐtɔn ɖó ná jínjɔ́n nǔgbó e ɖo Xó Mawu tɔn mɛ é jí, hú ɖɔ é ní jínjɔ́n linlin mǐɖésúnɔ tɔn lɛ́ jí lěe Elifázi bló gbɔn azɔn mɔ̌kpán é. (Jɔb. 4:8; 5:3, 27) Atɔngɔ́, mǐ ɖó ná nyi alɔ nú gbe vɛ́sin dídó alǒ xómɔɖɔdómɛwú. Flín ɖɔ nǔ e Elifázi kpó gbɛ̌ tɔn lɛ́ kpó ɖɔ é ɖé lɛ́ nyí nǔgbó; bibluwlántɔ́ ɖokpó tlɛ ɖe xó sín xó e yě ɖɔ lɛ́ é ɖokpó mɛ. (Sɔ́ Jɔbu 5:13 jlɛ́ dó 1 Kɔlɛ́ntinu lɛ́ 3:19 wú.) É ɖo mɔ̌ có, gěgé nǔ e yě ɖɔ dó Mawu wú lɛ́ é tɔn nyí nǔgbó ǎ, bo lɛ́ dó wǔvɛ́ nú Jɔbu, énɛ́ wú ɔ, Jexóva ɖɔ ɖɔ nǔ e yě ɖɔ lɛ́ é kún nyí nǔgbó ó. (Jɔb. 42:7, 8) Wěɖexámɛ ɖagbe ɖé nɔ xlɛ́ ɖɔ Jexóva kún nɔ nɔ jlɛ̌ jí ó, alǒ é kún yí wǎn nú mɛsɛntɔ́ tɔn lɛ́ ó gbeɖé ǎ. Mi nú mǐ ní ɖɔ xó dó nǔ e kpɔ́ndéwú Elihu tɔn sixú kplɔ́n mǐ é jí din lo.

LĚE ELIHU ÐE WĚ XÁ JƆBU GBƆN É

9. Tínmɛ nǔ e wú Jɔbu ɖó hudó alɔdó tɔn hwenu e xɔ́ntɔn tɔn lɛ́ ɖó xó ɖiɖɔ te é kpó lěe Jexóva d’alɔ ɛ gbɔn é kpó.

⁹ Hwenu e Jɔbu kpó xɔ́ntɔn tɔn lɛ́ kpó ɖó adɔn e dɔn wɛ yě ɖe é te é ɔ, lěe nukún yětɔn lɛ́ mɛ ná ko ɖe é ná nyɔ́ kpɔ́n ɖěbǔ ǎ. Xó e súnnu énɛ́ lɛ́ ɖɔ lɛ́ é sukpɔ́ káká bo gɔ́ wěmata Biblu tɔn 28, bɔ gěgé nǔ e yě ɖɔ lɛ́ é tɔn nyí kpó xomɛsin kpó alǒ kpó akpɔ kpó. Yǎyá wú wɛ Jɔbu kpo ɖo wǔvɛ́ se wɛ ǎ! É kpo ɖo hudó gbɔdónúmɛ kpó wěɖexámɛ kpó tɔn ɖó wɛ. Nɛ̌ Jexóva ka d’alɔ Jɔbu gbɔn? É zán Elihu dó ɖe wě xá ɛ. Étɛ́wú Elihu ma ka ɖɔ xó ɖ’ayǐ ǎ? É ɖɔ: “Mɛxó wɛ nú mi, yɔkpɔ́vú wɛ nyɛ ka nyí; énɛ́ ɔ wú wɛ un ɖi xɛsi bo ma glá ɖɔ nǔ e nyɛ tuun ɔ ǎ.” (Jɔb. 32:6, 7) Dɔ̌nkpɛvú Elihu ɖ’ayi nǔ élɔ́ e mɛ gěgé nɔ wá ɖ’ayi wú ɖo égbé é wú: Mɛxómɔ lɛ́ ko nɔ gbɛ nú xwe gěgé bo lɛ́ kplɔ́n nǔ gěgé, wǎgbɔ tɔn ɔ, nǔnywɛ́ yětɔn kpó nǔ e yě ko mɔ kpɔ́n ɖo gbɛ mɛ lɛ́ é kpó nɔ hú gǎn mɛ e yě hú xwe lɛ́ é tɔn hwɛhwɛ. Amɔ̌, ée Elihu ɖótó Jɔbu kpó xɔ́ntɔn tɔn lɛ́ kpó, kpó sɔxwixwe kpó gúdo é ɔ, é sɔ́ sixú nɔ nu ma kɛ ǎ. É ɖɔ: “Nǔnywɛ́ ɖíɖó ɔ ɖo xwe nu ǎ. Nǔ jlɔ́jlɔ́ tuuntuun ɖo mɛxó nyínyí nu ǎ.” (Jɔb. 32:9) Étɛ́ Elihu ka ɖɔ bɔ d’é wú? Nɛ̌ é ka ɖɔ gbɔn?

10. Étɛ́ Elihu ka wa cóbó ɖe wě xá Jɔbu? (Jɔbu 33:6, 7)

¹⁰ Cóbónú Elihu ná ɖe wě ɖěbǔ xá Jɔbu ɔ, é to bló ayǐ ɔ jí ɖó hwɛ̌. Gbɔn nɛ̌ é? Jɛ nukɔn hwɛ̌ ɔ, é ɖu ɖo lěe nǔ cí n’i é jí. Mǐ tuun mɔ̌ ɖó Biblu ɖɔ ɖɔ ɖo bǐbɛ́mɛ ɔ, Elihu sin xomɛ. (Jɔb. 32:2-5) É ɖo mɔ̌ có, Elihu ɖɔ xó nú Jɔbu kpó xomɛsin kpó azɔn ɖokpó vɔ́vɔ́ ǎ. É nyɔ́ wa ɔ, é ɖɔ xó dó vɔ́ gǎnjɛwú ná ɛ. Ði kpɔ́ndéwú ɔ, é ɖɔ nú Jɔbu ɖɔ: “Nyi kpó hwi kpó ɔ, nǔ ɖokpó ɔ wɛ mǐ nyí ɖo Mawu nukɔn.” (Xa Jɔbu 33:6, 7.) Énɛ́ gúdo ɔ, Elihu ɖe xlɛ́ Jɔbu ɖɔ émí ɖótó è kpó sɔxwixwe kpó. Nǔgbó ɔ, é sɛ sin xwe nú xó tawun tawun e ɖo xóɖiɖɔ Jɔbu tɔn ayizɛ́n lɛ́ mɛ lɛ́ é. (Jɔb. 32:11; 33:8-11) Elihu lɛ́ wa nǔ mɔ̌hun hweɖévonu e é ɖo wě ɖe xá Jɔbu wɛ é.—Jɔb. 34:5, 6, 9; 35:1-4.

11. Nɛ̌ Elihu ka ɖe wě xá Jɔbu gbɔn? (Jɔbu 33:1)

¹¹ Hwenu e Elihu ɖo wě ɖe xá Jɔbu wɛ é ɔ, é bló ɖo ali ɖé nu bɔ é wlí yɛ̌yi nú nya gbejínɔtɔ́ énɛ́. Ði kpɔ́ndéwú ɔ, Elihu zán nyǐkɔ Jɔbu tɔn, é ka cí ɖɔ súnnu atɔn ɖě lɛ́ kún wa mɔ̌ ó. (Xa Jɔbu 33:1.) Elihu sixú ko flín lě do é ba ná ɖɔ xó sɔ hwenu e Jɔbu kpó xɔ́ntɔn tɔn lɛ́ kpó ɖo nǔ dɔn wɛ é. Énɛ́ wú ɔ, é hun ali nú Jɔbu nú é ná ɖɔ xó hwenu e é ɖo wě ɖe xá ɛ wɛ é. (Jɔb. 32:4; 33:32) Elihu lɛ́ gb’akpá nú Jɔbu dó awǒvinú e ɖo xó tɔn ɖé lɛ́ mɛ é wú nyi wɛn, bo flín nǔ i kpó xomɛnyínyɔ́ kpó dó nǔnywɛ́, hlɔ̌nhlɔ́n, nǔjlɔ́jlɔ́wiwa kpó wǎnyíyí e ma nɔ sɛ do ǎ é kpó Jexóva tɔn wú. (Jɔb. 36:18, 21-26; 37:23, 24) É ɖo wɛn ɖɔ wě ɖagbe e Elihu ɖe xá Jɔbu é zɔ́n bɔ é ɖó ninɔmɛ ayi mɛ tɔn e jɛxá é bónú è ná ɖe wě ɖěvo lɛ́ xá ɛ, gayɛnu tɔn ɔ, sín Mɛ e dá ɛ é gɔ́n. (Jɔb. 38:1-3) Nɛ̌ kpɔ́ndéwú Elihu tɔn ka sixú ko hɛn le wá nú mɛ lɛ́ ɖo hwexónu gbɔn? Nɛ̌ é ka sixú hɛn le wá nú mǐ ɖo égbé gbɔn?

12. Nɛ̌ Jexóva ka zán gbeyíɖɔ lɛ́ dó d’alɔ togun tɔn gbɔn? Nɛ̌ kpɔ́ndéwú ɖagbe Elihu tɔn ka sixú ko d’alɔ Izlayɛ́li ví lɛ́ gbɔn?

¹² Lěe Izlayɛ́li ví lɛ́ sixú ko ɖu le tɔn gbɔn é. Ðo hwenuxó Izlayɛ́li tɔn bǐ mɛ ɔ, Jexóva nɔ sɔ́ gbeyíɖɔ lɛ́ bɔ yě nɔ bló bɔ Izlayɛ́li ví lɛ́ nɔ tuun linlin tɔn. Ði kpɔ́ndéwú ɔ, ɖo hwɛɖɔtɔ́ lɛ́ hwenu ɔ, Debóla xlɛ́ ali akɔta ɔ vǐnɔ ɖé ɖɔhun ɖo gbigbɔ lixo, bɔ Samuwɛ́li wa ɖɛ̌mɛnu Jexóva tɔn sín azɔ̌ kpó kanɖódónǔwú kpó sín vǔhwenu tɔn. (Hwɛ. 4:4-7; 5:7; 1 Sam. 3:19, 20) Énɛ́ gúdo ɔ, ɖo axɔ́sú lɛ́ hwenu ɔ, ɖibla nyí hwelɛ́bǐnu wɛ Jexóva sɛ́ gbeyíɖɔ lɛ́ dó bónú yě ná ná hlɔ̌nhlɔ́n togun tɔn ɖo gbigbɔ lixo, bo ɖe wě xá mɛ ɖěɖěe jɛ zɔ nú mawusinsɛn mímɛ́ ɔ lɛ́ é. (2 Sam. 12:1-4; Mɛ. 3:24) Kpɔ́ndéwú Elihu tɔn e è wlán dó wěma Jɔbu tɔn mɛ é sixú ko d’alɔ súnnu kpó nyɔ̌nu kpó gbejínɔtɔ́ lɛ́ bɔ yě mɔ nukúnnú jɛ nǔ e yě ná ɖɔ hwenu e yě ɖo wě ɖe xá mɛ wɛ é kpó lěe yě ná ɖɔ gbɔn é kpó wú.

13. Nɛ̌ klisánwun lɛ́ ka sixú dó wǔsyɛ́n lanmɛ nú nǔɖitɔ́ hǎtɔ́ yětɔn lɛ́ ɖo égbé gbɔn?

¹³ Lěe mǐ sixú ɖu le tɔn gbɔn é. Mǐ mɛ klisánwun lɛ́ lɔ nɔ bló bɔ mɛ lɛ́ nɔ tuun jlǒ Mawu tɔn gbɔn nǔ e ɖo Xó tɔn Biblu ɔ mɛ é jlájlá gblamɛ. Ali ɖěvo e nu mǐ nɔ wa mɔ̌ ɖe é wɛ nyí ɖɔ mǐ nɔ ɖɔ xó e nɔ ná hlɔ̌nhlɔ́n nǔɖitɔ́ hǎtɔ́ mǐtɔn lɛ́, bo nɔ lɛ́ dó wǔsyɛ́n lanmɛ nú yě lɛ́ é. (1 Kɔ. 14:3) Mɛxó agun tɔn lɛ́ ɖó ná nɔ ɖó ayi te hwebǐnu bo ná nɔ ɖɔ xó kpó xomɛnyínyɔ́ kpó, kpó wǎnyíyí kpó, yě tlɛ ná wa mɔ̌ nú mɛ e ɖo akpɔ jí é alǒ ɖɔ nǔ e é ma ɖó ná ɖɔ ǎ é ɖé é.—1 Tɛ. 5:14; Jɔb. 6:3.

14-15. Nǎ kpɔ́ndéwú lěe mɛxó agun tɔn ɖé sixú wa nǔ Elihu ɖɔhun hwenu e é ɖo wě ɖe xá mɛ wɛ é gbɔn é tɔn.

¹⁴ Dǒ nukún ninɔmɛ élɔ́ mɛ kpɔ́n. Mɛxó agun tɔn ɖé se ɖɔ linkpɔ́n vun blá nɔví nyɔ̌nu e ɖo agun tɔn mɛ é ɖé. É kpó nɔví súnnu ɖěvo kpó yi ba ɛ kpɔ́n bo tɛ́n kpɔ́n bo dó wǔsyɛ́n lanmɛ n’i. Ðo mɛbakpɔ́n ɔ hwenu ɔ, nɔví nyɔ̌nu ɔ tínmɛ ɖɔ émí kpo ɖo mawuxó ɖɔ wɛ bo lɛ́ kpo ɖo kplé lɛ́ yi wɛ có, émí kún ka nɔ ɖó awǎjijɛ ó. Nɛ̌ mɛxó agun tɔn ɔ ka ná wa nǔ gbɔn?

¹⁵ Jɛ nukɔn hwɛ̌ ɔ, é ná tɛ́n kpɔ́n bo mɔ nukúnnú jɛ ninɔmɛ nɔví nyɔ̌nu ɔ tɔn mɛ hú gǎn. Bo ná dó kpé énɛ́ wú ɔ, é ɖó ná ɖótó è kpó sɔxwixwe kpó. É ka nɔ mɔ ɖɔ émí kún jɛxá wǎnyíyí Mawu tɔn ó wɛ a? “Adohu adohu gbɛ ɔ tɔn” wɛ ka gba ayi dó n’i a? (Luk. 21:34) Wegɔ́, Mɛxó agun tɔn ɔ ná ba ali ɖěɖěe nu é ná kpa nɔví nyɔ̌nu ɔ ɖe lɛ́ é. È ná ɖɔ ɔ, linkpɔ́n tɔn lɛ́ ɖo fínɛ́ có, é ka kpo ɖo kplé lɛ́ yi wɛ bo lɛ́ kpo ɖo alɔ ɖó wɛ ɖo sinsɛnzɔ́ ɔ mɛ. Atɔngɔ́, ényí mɛxó agun tɔn ɔ mɔ nukúnnú jɛ ninɔmɛ ɔ kpó nǔ e zɔ́n bɔ awakanmɛ kú nɔví nyɔ̌nu ɔ é kpó wú ɔ, é ná zán Biblu dó ná hlɔ̌nhlɔ́n jiɖe e nɔví nyɔ̌nu ɔ ɖó ɖɔ Mawu yí wǎn nú émí é.—Ga. 2:20.

KPO ÐO WĚMA JƆBU TƆN SÍN LE ÐU WƐ

16. Nɛ̌ mǐ ka sixú kpo ɖo wěma Jɔbu tɔn sín le ɖu wɛ gbɔn?

¹⁶ Wěma Jɔbu tɔn e mǐ gbéjé kpɔ́n é hɛn le wá mɛ nya! Lěe mǐ kplɔ́n gbɔn ɖo xóta e wá yi é mɛ é ɔ, tan énɛ́ e Mawu sɔ́ dó ayi mɛ nú mɛ bɔ è wlán é kplɔ́n mǐ nǔ e wú Mawu tin bɔ wǔvɛ́ mimɔ tíin é kpó lěe mǐ sixú dɛ ɖ’é nu gbɔn é kpó. Gɔ́ ná ɔ, lěe mǐ gbéjé kpɔ́n gbɔn ɖo xóɖɔɖókpɔ́ élɔ́ mɛ é ɔ, mǐ bǐ sixú kplɔ́n bo ná nɔ ɖe wě ɖagbe xá mɛ; é ka ná nyí gbɔn kpɔ́ndéwú nyanya e Jɔbu sín xɔ́ntɔn atɔn lɛ́ zé ɖ’ayǐ é xwixwedó gblamɛ ǎ, loɔ, gbɔn kpɔ́ndéwú ɖagbe e Elihu zé ɖ’ayǐ é xwixwedó gblamɛ. Étɛ́wú a ma ka ná vɔ́ nǔ ɖěɖěe a kplɔ́n ɖo wěma Jɔbu tɔn mɛ lɛ́ é gbéjé kpɔ́n cóbó ɖe wě xá mɛ ɖěvo lɛ́ hweɖévonu ǎ? Gɔ́ ná ɔ, ényí a xa wěma Jɔbu tɔn din é ɔ, é ko lín kpɛɖé wɛ hǔn, sɔ́ wěma ɖaaɖagbe énɛ́ vívɔ́ xa dó ɖó nǔ e gbé a ná nya é. A ná ɖu le tɔn égbé lěe é nyí gbɔn hwenu e è wlán é ɖɔhun.