Ye Kpi Tan Jezu Tɔn

A ka mɔ mɛ e ɖò ɖiɖe ɔ mɛ lɛ é à?— Matie, Maki, Luki, Jaan, Piyɛ́ɛ, Jaki, Judi kpo Pɔlu kpo wɛ. Táan ɖokpo ɔ mɛ wɛ mɛ enɛ lɛ bǐ kpo Jezu kpo nɔ gbɛ̀, bɔ ye kpi tan tɔn. Nǔ mǐ ni kplɔ́n nǔ dó ye wu.

Mɛsɛ́dó atɔn ɖò ye mɛ, bo jla Mawuxó xá Jezu. A ka tuùn mɛ atɔn enɛ lɛ à?— Matie, Jaan kpo Piyɛ́ɛ kpo wɛ. Mɛsɛ́dó Matie kpo Jaan kpo tuùn Jezu ganji, bɔ ye mɛ ɖokpo ɖokpo kpi gbɛzán Jezu tɔn sín tan dó Biblu mɛ. Mɛsɛ́dó Jaan lɛ́vɔ wlan wema e è nɔ ylɔ́ ɖɔ Nǔɖexlɛ́mɛ é kpo wema-sɛ́dó-mɛ atɔn kpo, bɔ è nɔ ylɔ́ ye ɖɔ Jaan Nukɔntɔn, Jaan Wegɔ́ ɔ kpo Jaan Atɔngɔ́ ɔ kpo. Mɛsɛ́dó Piyɛ́ɛ wlan wema-sɛ́dó-mɛ we bɔ ye ɖò Biblu mɛ. È nɔ ylɔ́ ye ɖɔ Piyɛ́ɛ Nukɔntɔn kpo Piyɛ́ɛ Wegɔ́ kpo. Ðò wema-sɛ́dó-mɛ wegɔ́ Piyɛ́ɛ tɔn mɛ ɔ, é ɖɔ xó dó hwenu e Jehovah ɖɔ xó dó Jezu wu sín jixwé é wu bo ɖɔ: ‘Mɛ elɔ ɔ, vǐ ce vívɛ́ná wɛ, bɔ xomɛ ce nɔ hun dó wǔtu tɔn.’

Mɛ ɖevo e mɔ wɛ a ɖè ɖò ɖiɖe ɔ mɛ lɛ é lɔ kplɔ́n nǔ mǐ dó Jezu wu, ɖò wema e ye wlan lɛ é mɛ. Maki ɖò ye mɛ. É sixu ko ɖò finɛ hwenu e è wlí Jezu é bo mɔ nǔ e jɛ lɛ é bǐ. Mɛ ɖevo nɔ nyí Luki. Dotóo wɛ n’i, bɔ é sixu ko nyí kú Jezu tɔn gudo wɛ é huzu Klisanwun.

Biblu wlantɔ́ we ɖevo ɖò ɖiɖe ɔ mɛ, bo nyí nɔví sunnu kpɛví Jezu tɔn lɛ. A ka tuùn nyikɔ yetɔn à?— Ye nɔ nyí Jaki kpo Judi kpo. Tlolo hwɛ̌ ɔ, ye ɖi nǔ nú Jezu ǎ. Ye tlɛ lin ɖɔ tamɛ tɔn kún sɔgbe ganji ó. Amɔ̌, ye wá ɖi nǔ nú Jezu bo huzu Klisanwun.

Pɔlu wɛ nyí Biblu wlantɔ́ gudo tɔn e mɔ wɛ a ɖè ɖò ɖiɖe ɔ mɛ é. Solu wɛ é nɔ nyí hwɛ̌ cobo wá huzu Klisanwun. É gbɛ́ wǎn nú Klisanwun lɛ bo xò daka ye wu tawun. A ka tuùn nǔ e zɔ́n bɔ Pɔlu wá jló bo huzu Klisanwun é à?— Pɔlu ɖò Damasi sín ali jí gbè ɖokpo, bo sè gbè ɖé jɛ xó ɖɔ n’i jí sín jixwé ajijimɛ. Jezu sín gbè wɛ! É kanbyɔ Pɔlu ɖɔ: ‘Etɛwu a ka nɔ xò daka mɛ e ɖi nǔ nú mì lɛ é wu sɔmɔ̌?’ Enɛ gudo ɔ, Pɔlu huzu jujɔ bo wá nyí Klisanwun. É wlan wema 14 ɖò Biblu mɛ, sín Hlɔmanu lɛ jí kaka yì jɛ Eblée lɛ jí.

Mǐ nɔ xà Biblu gbè bǐ gbè, kabǐ?— Gbɔn Biblu xixa gblamɛ ɔ, mǐ nɔ kplɔ́n nǔ gegě dó Jezu wu. A ka jló na kplɔ́n nǔ dó Jezu wu d’eji à?—