Nylɔ-Ylɔ́-Ví Pɔlu Tɔn Kpankɔ́n

Nǔ mǐ ni kplɔ́n nǔ dó dɔnkpɛvu e hwlɛn nylɔ tɔn gán é ɖé wu. Pɔlu wɛ nyí dɔnkpɛvu ɔ sín nylɔ. Mǐ tuùn dɔnkpɛvu ɔ sín nyikɔ ǎ, amɔ̌, mǐ tuùn ɖɔ é wà akɔ́nkpinkpan sín nǔ ɖaxó ɖé. A ka jló na sè nǔ e é wà é à?—

Pɔlu ɖò gankpá mɛ ɖò Jeluzalɛmu. È wlí i ɖó é ɖò nǔ kplɔ́n mɛ dó Jezu wu wɛ. Mɛ nyanya ɖé lɛ gbɛ́ wǎn nú Pɔlu, enɛ wu ɔ, ye bla gbě tɔn. Ye ɖɔ: ‘Mǐ ni byɔ ahwangán ɖaxó ɔ ɖɔ é ni ɖɔ nú sɔja tɔn lɛ, bonu ye ni kplá Pɔlu wá hwɛ nukɔn. Mǐ na hwlá mǐɖée dó ali ɔ kpá, bɔ enyi Pɔlu jɛ finɛ ɔ, mǐ na hu i!’

Nylɔ-ylɔ́-ví Pɔlu tɔn sè gbě e ye bla é. Etɛ é ka na bló? É yì gankpá ɔ mɛ bo ɖɔ nú Pɔlu. Tlolo ɔ, Pɔlu ɖɔ n’i ɖɔ é ni yì ɖɔ gbě e ye bla é nú ahwangán ɖaxó ɔ. A ka lin ɖɔ xó ɔ ɖiɖɔ nú ahwangán ɖaxó ɔ na bɔwǔ nú nylɔ-ylɔ́-ví Pɔlu tɔn wɛ à?— Eǒ, ɖó ahwangán ɖaxó ɔ nyí mɛ nukúnɖeji ɖé. Amɔ̌, Pɔlu sín nylɔ-ylɔ́-ví ɔ kpankɔ́n bo ɖɔ xó ɔ nú ahwangán ɖaxó ɔ.

Ahwangán ɖaxó ɔ tuùn nǔ e é ɖó na wà é pɛ́ɛ. É fɔ sɔja 500 mɔ̌, bo ɖɔ nú ye ɖɔ ye ni kplá Pɔlu sɔyi Sezalée zǎn enɛ ɔ mɛ! Pɔlu ka gán à?— Ɛɛn, mɛ nyanya lɛ kpéwú bo hu i ǎ! Gbě e ye bla é w’azɔ̌ ǎ.

Etɛ tan enɛ ka kplɔ́n we?— Hwiɖesu hɛn ɔ, a na kpankɔ́n Pɔlu sín nylɔ-ylɔ́-ví ɖɔhun. Mǐ ɖó na kpankɔ́n hwenu e mǐ ɖò xó ɖɔ nú mɛ ɖevo lɛ wɛ dó Jehovah wu wɛ é. A ka na ɖó akɔ́nkpinkpan, bo na kpó ɖò xó ɖɔ dó Jehovah wu wɛ à?— Enyi a bló mɔ̌ ɔ, a sixu hwlɛn mɛɖé gán.