Etɛ Biblu ka Ðɔ Dó Mɛ E Ðò Azɔn Syɛnsyɛn Jɛ Wɛ É Huhu Wu?

Xósin e Biblu na é

Biblu ɖɔ xó dó mɛ e ɖò azɔn syɛnsyɛn jɛ wɛ é huhu wu tlɔlɔ lě ǎ.a É ɖò mɔ̌ có, nǔ e é ɖɔ dó gbɛ̀ kpo kú kpo wu é ɖò jlɛ̌ jí. É nyla ɖɔ è ni bló bonu mɛɖé ni kú, amɔ̌, è ka byɔ ɖɔ è ni wà nǔ bǐ bo hɛn mɛ e ɖò kúkú wɛ é ɖó gbɛ̀ dandan ǎ.

Biblu ɖɔ ɖɔ Mawu “gɔ́n wɛ gbɛ̀ ɔ jɔ sín,” é wɛ nyí Gbɛɖotɔ́ mǐtɔn. (Ðɛhan 36:10; Mɛsɛ́dó 17:28) Ðò Mawu nukúnmɛ ɔ, gbɛ̀ xɔ akwɛ tawun. Enɛ wu ɔ, Mawu gbɛ́ mɛhuhu kpo mɛɖée huhu kpo. (Tíntɔ́n 20:13; 1 Jaan 3:15) Gɔ́ na ɔ, Biblu xlɛ́ ɖɔ mǐ ɖó na wà nǔ e ɖò jlɛ̌ jí lɛ é dó nya xɛ ɖò gbɛ̀ mǐɖesunɔ tɔn kpo mɛ ɖevo lɛ tɔn kpo jí. (Sɛ́nflínmɛ 22:8) É ɖò wɛn ɖɔ Mawu jló ɖɔ nùnina e gbɛ̀ nyí é ni xɔ akwɛ nú mǐ.

Enyi mɛɖé ka ɖò kúzɔn jɛ wɛ ɔ ka lo?

Biblu yí gbè nú mɛ e kú tlɛ ko ɖò wǎn hwɛ́n dó wɛ, b’ɛ ma sɔ́ na gblá gbeɖé ǎ é ɖé huhu ǎ. Axɔsu Izlayɛli tɔn Sawulu sín kpɔ́ndéwú xlɛ́ mɔ̌. Hwenu e é gblewu ɖò ahwangbenu bo ɖò kúdónú é ɔ, é byɔ mɛ e nɔ hɛn ahwanfunnu tɔn lɛ n’i é ɖɔ é ni hu emi kpé. (1 Samuwɛli 31:3, 4) Nya ɔ gbɛ́. Amɔ̌, mɛ ɖevo wá ɖ’adingban ɖò nukɔnmɛ ɖɔ nǔ e ba wɛ Sawulu ɖè é wɛ emi wà n’i. Davidi e nyí mɛ bo nɔ ɖó linlin e Mawu nɔ ɖó dó nǔ lɛ wu é ɖó hwɛ nú nya enɛ ɖɔ é hu mɛ.—2 Samuwɛli 1:6-16.

È ɖó na wà nǔ bǐ dó hɛn mɛ ɖó gbɛ̀ dandan wɛ à?

Enyi é na bo ɖò wɛn ɖɔ mɛ ɔ na kú jɛn wɛ ɔ, Biblu byɔ ɖɔ è ni sísɛ́ ɛ dó kpé ǎ. É nyɔ́ wà ɔ, Biblu xwlé linlin e ɖò jlɛ̌ jí é ɖé mɛ. Kɛntɔ́ mǐtɔn ɖaxó ɔ wɛ nyí kú, bo nyí nǔ e hwɛhuhu sín ninɔmɛ mǐtɔn jì é. (Hlɔmanu lɛ 5:12; 1 Kɔlɛntinu lɛ 15:26) Kú nyí nǔ bo na nɔ jló mɛ ǎ, mɔ̌ jɛn è ma ka na nɔ lɛ́ ɖi xɛsi na ǎ é nɛ, ɖó Mawu d’akpá ɖɔ emi na fɔ́n mɛkúkú lɛ. (Jaan 6:39, 40) Mɛ e ɖó sísí nú gbɛ̀ é na ba nukúnkpédómɛwu dotóoxwé tɔn ɖagbe hugǎn e ɖè é. É ɖò mɔ̌ có, mɔ̌ biblo byɔ ɖɔ è ni yí gbè nú nukúnkpédómɛwu dotóoxwé tɔn e na sísɛ́ mɛ dó kú kpé é ǎ.

Mɛɖée huhu nyí hwɛ e ma ɖó sisɔkɛ ǎ é ɖé wɛ à?

Eǒ, Biblu slɛ́ mɛɖée huhu dó hwɛ e ma ɖó sisɔkɛ ǎ lɛ é mɛ ǎ. Nugbǒ wɛ ɖɔ mɛɖée huhu nyí hwɛ syɛnsyɛn ɖé,b amɔ̌, Mawu mɔ nukúnnú jɛ ninɔmɛ e sixu dɔn mɛɖée huhu xó wá lɛ é wu mlɛ́mlɛ́, ɖi taglomɛ sín azɔn, linkpɔ́n zɛ xwé wu, alǒ nǔ e sín gǔ è ɖu lɛ é. (Ðɛhan 103:13, 14) Gbɔn Biblu gblamɛ ɔ, é nɔ dó gbɔ nú mɛ ɖěɖee ɖò wubla mɛ lɛ é. Gɔ́ na ɔ, Biblu ɖɔ ɖɔ “Mawu na wá fɔ́n mɛ ɖagbe lɛ, kpodo mɛ nyanya lɛ kpo sín kú.” (Mɛsɛ́dó 24:15) Enɛ xlɛ́ ɖɔ nukúnɖiɖo fínfɔ́n sín kú tɔn ɖè nú mɛ ɖěɖee hu hwɛ syɛnsyɛn lɛ, ɖi mɛɖée huhu lɛ é.