Etɛ Biblu ka Ðɔ Dó Nǔ Sá Dó Nukúnmɛ kpo Acɔ́nú lɛ Didó kpo Wu?

Xósin e Biblu na é

Biblu gbajɛ̌mɛ nú xóta enɛ ǎ có, é ka dó nǔ sá dó nukúnmɛ, acɔ́nú lɛ didó kpo acɔ́ɖónú ɖevo lɛ kpo sín sɛ́n ǎ. Biblu dó wusyɛn lanmɛ nú mɛ ɖɔ è ni sɔ́ ayi ɖó lee è cí ɖò wěxo é jí ǎ, é nyɔ́ wà ɔ, é ɖɔ: “Acɔ́ xomɛ tɔn wɛ mi na nɔ ba; acɔ́ enɛ nɔ cá ǎ; é wɛ nyí fífá kpo vivo ɖò ayi mɛ kpo.”—1 Piyɛ́ɛ 3:3, 4.

È dó acɔ́biba sɛ́n ǎ

• Nyɔnu gbejinɔtɔ́ ɖé lɛ b’acɔ́ bɔ Biblu ɖɔ. Hlebeka e da Ablaxamu sín vǐ Izaki é dó sikálɔkɛ́ e è nɔ dó ɖó awɔntín é, sikálɔgan lɛ, kpo acɔ́nú ɖevo e v’axi tawun bɔ asúxɔ́ntɔn tɔn sín tɔ́ na ɛ lɛ é kpo. (Bǐbɛ̌mɛ 24:22, 30, 53) Mɔ̌ ɖokpo ɔ, Ɛsitɛ́ɛ yí gbè nú nǔ e “é na nɔ dó bló éɖée ɖó na,” bɔ nú é nyɔ́ bló ɔ, é na wá nyí axɔ́si ɖò Axɔ́suɖuto Pɛsinu lɛ tɔn mɛ lɛ é. (Ɛsitɛ́ɛ 2:7, 9, 12) “Nǔ e è nɔ sá dó nukúnmɛ lɛ é,” alǒ “acɔ́nú tɛnmɛ tɛnmɛ lɛ” ɖò nǔ enɛ lɛ mɛ ɖɔhun.—New International Version; Easy-to-Read Version.

• Biblu zán acɔ́nú lɛ dó jlɛ̌ nǔ dó nǔ wu. Ði kpɔ́ndéwú ɔ, è ɖɔ ɖɔ mɛ e nɔ ɖè wě ɖagbe xá mɛ é cí “alɔkɛ́ abǐ wlɔ e è zé siká akú dó bló ɔ ɖɔhun nú mɛ e ɖótó è bo bló ɖ’eji é.” (Nǔnywɛxó 25:12) Mɔ̌ ɖokpo ɔ, Mawu ɖesunɔ jlɛ́ lee é wà nǔ xá togun Izlayɛli tɔn gbɔn é dó lee asú ɖé nɔ zán alɔkɛ́ lɛ, kɔjɛ́, kpo tógbé lɛ kpo dó b’acɔ́ nú asì tɔn gbɔn é wu. Acɔ́ enɛ zɔ́n bɔ togun ɔ ‘nyɔ́ ɖɛkpɛ tawun.’—Ezekiyɛli 16:11-13.

Nukúnnúmɔjɛnǔmɛ agɔ dó nǔ sá dó nukúnmɛ kpo acɔ́nú lɛ didó kpo wu

Nukúnnúmɔjɛnǔmɛ agɔ: Nǔ e Axɔ́si nyanya Jezabɛli ‘sá dó wundama’ é xlɛ́ ɖɔ nǔ sá dó nukúnmɛ kún sɔgbe ó.—2 Axɔ́su lɛ 9:30.

Nǔgbo: Nǔ nyanya e Jezabɛli nɔ dósin bo nɔ ɖò azě gbò mɛ wɛ lobo nɔ ɖò mɛ hu wɛ é wɛ zɔ́n bɔ è ɖó hwɛ n’i, é nyí acɔ́biba tɔn wɛ zɔ́n ǎ.—2 Axɔ́su lɛ 9:7, 22, 36, 37.