Biblu Kplɔ́n Vɔ̌jɔ Mɛ Wɛ À?
Xósin e Biblu na é
Eǒ, Biblu kplɔ́n mɔ̌ mɛ ǎ. Xókwín “vɔ̌jɔ” (réincarnation) ɔ alǒ linlin enɛ tlɛ tɔ́n ɖò Biblu ɔ mɛ vɔ́vɔ́ ǎ. Nǔkplɔnmɛ lindɔ̌n jɔmakú tɔn jí wɛ vɔ̌jɔ xó ɔ jinjɔn.a Amɔ̌, Biblu kplɔ́n mɛ ɖɔ kɔ́ wɛ è dó bló gbɛtɔ́, bɔ nú gbɛtɔ́ kú gudo ɔ, é sɔ́ nɔ tíìn ǎ. Nǔtí ɖò gbɛtɔ́ mɛ bo nɔ kpò ɖò gbɛ̀ nɔ wɛ ɖò kú tɔn gudo ǎ.—Bǐbɛ̌mɛ 3:19; Nǔnywɛtɔ́xó 9:5, 6.
Vogbingbɔn tɛ ka ɖò vɔ̌jɔ kpo fínfɔ́n sín kú kpo tɛntin?
Nǔ e Biblu kplɔ́n mɛ dó fínfɔ́n sín kú wu é jinjɔn lindɔ̌n jɔmakú sín xó jí ǎ. Ðò fínfɔ́n sín kú hwenu ɔ, Mawu na zán hlɔnhlɔn tɔn dó fɔ́n mɛ e ko kú lɛ é wá gbɛ̀. (Matie 22:23, 29; Mɛsɛ́dó 24:15) Fínfɔ́n sín kú ɔ na hun ali nú mɛ bɔ è na lɛkɔ wá gbɛ̀ dó ayikúngban yɔyɔ̌ ɖé jí, bo sɔ́ na kú gbeɖé ǎ.—2 Piyɛ́ɛ 3:13; Nǔɖexlɛ́mɛ 21:3, 4.
Nukúnnúmɔjɛnǔmɛ agɔ lɛ dó vɔ̌jɔ kpo Biblu kpo wu
Nukúnnúmɔjɛnǔmɛ agɔ: Biblu kplɔ́n mɛ ɖɔ gbeyiɖɔ Elíi wɛ nyí jɔtɔ́ Jaan Baptɛmublonúmɛtɔ́ ɔ tɔn.
Nǔgbo: Mawu ɖɔ ɖ’ayǐ ɖɔ, “Un na sɛ́ gbeyiɖɔ ce Elíi dó,” bɔ Jezu ɖexlɛ́ ɖɔ nǔɖɔɖ’ayǐ enɛ jɛnu gbɔn Jaan Baptɛmublonúmɛtɔ́ ɔ jí. (Malacíi 3:23, 24; Matie 11:13, 14) É ɖò mɔ̌ có, tinmɛ enɛ tɔn wɛ nyí ɖɔ Elíi nyí jɔtɔ́ Jaan Baptɛmublonúmɛtɔ́ ɔ tɔn ǎ. Jaan ɖesunɔ ɖɔ ɖɔ emi kún nyí Elíi ó. (Jaan 1:21) É nyɔ́ wà ɔ, Jaan wà azɔ̌ e Elíi wà é ɖɔhunkɔ́, é wɛ nyí ɖɔ é jlá wɛn Mawu tɔn bo byɔ mɛ lɛ ɖɔ ye ni lɛkɔ sín hwɛ yetɔn lɛ gudo. (1 Axɔ́su lɛ 18:36, 37; Matie 3:1, 2) Jaan lɛ́vɔ ɖókan dó nǔ wu bo lɛ́ ɖó hlɔnhlɔn gbeyiɖɔ Elíi ɖɔhun.—Luki 1:13-17.
Nukúnnúmɔjɛnǔmɛ agɔ: Vɔ̌jɔ xó ɖɔ wɛ Biblu ɖè hwenu e é ɖɔ ɖɔ è ɖó na “vɔ́ jɔ” (naître de nouveau) é.
Nǔgbo: Biblu ɖexlɛ́ ɖɔ gbigbɔ lixo wɛ è nɔ vɔ́ jɔ ɖè, bɔ nǔ ka nɔ nyí mɔ̌ hwenu e è kpò ɖò gbɛ̀ é. (Jaan 1:12, 13) È vɔ́ jɔ enɛ ɔ ka nyí nǔ e è wà wá yì lɛ é sín sin súnsún ǎ, loɔ, nyɔna Mawu tɔn wɛ, bɔ mɛ e vɔ́ jɔ gbɔn mɔ̌ lɛ é nɔ ɖó nukúnɖiɖó bǔnɔ ɖé nú sɔgudo.—Jaan 3:3; 1 Piyɛ́ɛ 1:3, 4.
a Babilɔnu hwexónu tɔn ɔ mɛ wɛ nǔkplɔnmɛ lindɔ̌n jɔmakú kpo vɔ̌jɔ kpo tɔn ɔ wú kun sín. Nukɔnmɛ ɔ, tamɛ-núkplɔnmɛtɔ́ Inde tɔn lɛ wá dó nǔkplɔnmɛ sinsɛn tɔn e nɔ nyí Karma é wá. Wema Britannica Encyclopedia of World Religions ɖɔ ɖɔ Karma nyí “sɛ́n nǔɖe wu jɛn nǔɖe nɔ sín tɔn, bo xlɛ́ ɖɔ nǔ e mɛɖé wà ɖò gbɛhwenu tɔn dìn é ɔ, é na sún sin tɔn ɖò gbɛ̀ tɔn sɔgudo tɔn ɔ mɛ.”—Wexwɛ 913.