Kúnnuɖetɔ́ Jehovah Tɔn lɛ Huzu Biblu ɔ Bonu É Na Sɔgbe Xá Nǔ E Ye Ði Nǔ Na lɛ É Wɛ À?
Eǒ, mǐ wà mɔ̌ ǎ. É nyɔ́ wà ɔ, nú mǐ wá mɔ nǔ jɛ wu ɖɔ nǔ e mǐ ɖi nǔ na lɛ é ɖé kún sɔgbe xá nǔ e Biblu ɖɔ é tɛnwin lɛnwin ó ɔ, mǐ nɔ huzu sɔgbe xá Biblu ɔ.
Mǐ ko nɔ gbéjé Biblu ɔ kpɔ́n xóxó cobo wá jɛ Owe-Wiwe lẹ—Lẹdogbedevomẹ Aihọn Yọyọ Tọn ɖetɔ́n jí ɖò 1950. Mǐ zán lilɛdógbeɖevomɛ ɖebǔ e tíìn lɛ é bo sɔ́ nǔ e mǐ ɖi nǔ na lɛ é jinjɔn ye jí. Hwiɖesu ni gbéjé nǔ e Kúnnuɖetɔ́ Jehovah tɔn lɛ ɖi nǔ na sín xwè mɔkpan ɖíe é ɖé lɛ kpɔ́n, bo kpɔ́n ɖɔ ye ka sɔgbe xá nǔ e Biblu kplɔ́n mɛ lɛ é à jí.
Nǔ e mǐ ɖi nǔ na é: Mawu nyí Atɔnɖobǔ ǎ. Le Phare de la Tour de Sion (Glɛnsigbe) juillet 1882 tɔn ɖɔ: “Nǔxatɔ́ mǐtɔn lɛ tuùn ɖɔ mǐ ɖi nǔ nú Jehovah, Jezu, kpo Gbigbɔ mímɛ́ kpo, amɔ̌, mǐ gbɛ́ nǔkplɔnmɛ e ɖɔ ɖɔ ye nyí Mawu atɔn bo ɖò mɛ ɖokpo mɛ é, alǒ, lee mɛɖé lɛ nɔ ɖɔ gbɔn é ɔ, Mawu ɖokpo ɖò mɛ atɔn mɛ é, ɖó é sɔgbe xá Mawuxówema ɔ cɛ́nnyícɛ́nnyí ɖé ǎ.”
Nǔ e Biblu ɖɔ é: “AKLUNƆ Mawu mǐtɔn ɔ, AKLUNƆ ɖokpo wɛ.” (Sɛ́nflínmɛ 6:4, Biblu Wiwe lọ—Gun Alada) “Mawu ɖokpo géé wɛ tíìn nú mǐdɛɛ lɛ: é wɛ nyí tɔ́ e ɖó nǔ bǐ é; é wɛ mǐ ɖò gbɛ̀ na; mɔ̌ ɖokpo ɔ, Aklunɔ ɖokpo géé wɛ tíìn; é wɛ nyí Jezu Klisu e jí nǔ lɛ bǐ tíìn gbɔn é; é jí wɛ mǐ ɖò gbɛ̀ gbɔn.” (1 Kɔlɛntinu lɛ 8:6, MAWUXÓWEMA) Jezu ɖesunɔ ɖɔ: “Tɔ́ ɔ hugǎn mì.”—Jaan 14:28, MAWUXÓWEMA.
Nǔ e mǐ ɖi nǔ na é: Zomɛ fí e è nɔ dóya mavɔmavɔ nú mɛ ɖè é ɖě ɖè ǎ. Le Phare de la Tour de Sion (Glɛnsigbe) juin 1882 tɔn ɖè xóta tɔn e nyí “Axɔ́ E Hwɛhuhu Nɔ Sú Mɛ ɔ Wɛ Nyí Kú” é sín Hlɔmanu lɛ 6:23 mɛ ɖò Bible du roi Jacques mɛ, bo ɖɔ: “Nukɛgbe enɛ ɖò wɛn bo lɛ́ bɔkun tawun. É kpaca mɛ tawun ɖɔ mɛ e nɔ yí gbè ɖɔ Biblu nyí Xó Mawu tɔn é gegě jɛ kútamla bo nɔ kpé ta dò nú nukɛgbe enɛ e ɖò wɛn é, bo nɔ ɖɔ ɖɔ emi ɖi nǔ ɖɔ axɔ́ e hwɛhuhu nɔ sú mɛ ɔ wɛ nyí ya mavɔmavɔ jiji ɖò zomɛ, lobo nɔ lɛ́ ɖɔ ɖɔ Biblu kplɔ́n mɔ̌ mɛ.”
Nǔ e Biblu ɖɔ é: “Lindɔ̌n e hu hwɛ é wɛ na kú.” (Ezekiyɛli 18:4, 20, Bible du roi Jacques) Tó gudogudo tɔn e è na dɔn nú mɛ e klán gbè xá Mawu lɛ é nyí ya mavɔmavɔ jiji ɖò zomɛ ǎ, loɔ, “kú mavɔmavɔ” wɛ.—2 Tɛsalonikinu lɛ 1:9, MAWUXÓWEMA.
Nǔ e mǐ ɖi nǔ na é: Acɛkpikpa ɖé wɛ Axɔ́suɖuto Mawu tɔn nyí, é nyí ninɔmɛ ayi mɛ tɔn ɖé ǎ. Le Phare de la Tour de Sion (Glɛnsigbe) décembre 1881 tɔn ɖɔ xó elɔ dó Axɔ́suɖuto Mawu tɔn wu: “É ɖò wɛn ɖɔ axɔ́suɖuto enɛ e è na ɖó ayǐ é na sú kún dó nú axɔ́suɖuto e ɖò ayikúngban jí lɛ é bǐ.”
Nǔ e Biblu ɖɔ é: “Axɔ́su enɛ lɛ sín hwenu ɔ, Mawu jixwé tɔn na ɖè axɔ́suɖuto e mɛɖé ma sixu gbà ǎ é ɖokpo tɔ́n. Acɛkpikpa tɔn na jɛ akɔta ɖevo sí gbeɖé ǎ. Axɔ́suɖuto enɛ ɔ na gbà axɔ́suɖuto e ko ɖò ayǐ lɛ bǐ, bo na hu acɛ nú ye, bɔ ye sɔ́ na tíìn nyǐ ǎ. Loɔ, éyɛ na nɔte kaka sɔyi.”—Daniyɛli 2:44, MAWUXÓWEMA.
Lẹdogbedevomẹ Aihọn Yọyọ Tọn kɛɖɛ wɛ Kúnnuɖetɔ́ Jehovah tɔn lɛ nɔ ɖó gbɛ̀ na dó nɔ gudo nú nǔ e ye ɖi nǔ na lɛ é à?
Eǒ, ɖó mǐ kpò ɖò lilɛdógbeɖevomɛ Biblu tɔn gegě zán wɛ ɖò wɛnɖagbejijlazɔ́ mǐtɔn mɛ. Nǔgbo wɛ ɖɔ nú mǐ ɖò Biblu kplɔ́n xá mɛ lɛ wɛ vɔ̌nu ɔ, mǐ nɔ zé Lẹdogbedevomẹ Aihọn Yọyọ Tọn nú ye ma yí flán ɖokpo; é ɖò mɔ̌ có, kpo xomɛhunhun kpo wɛ mǐ nɔ lɛ́ kplɔ́n nǔ xá mɛ ɖěɖee nɔ ba na zán lilɛdógbeɖevomɛ Biblu tɔn ɖevo lɛ é.