Nɛ̌ Alɔwliwli Kúnnuɖetɔ́ Jehovah Tɔn lɛ Tɔn ka Nɔ Nyí Gbɔn?

Hwɛhwɛ ɔ, alɔwliwli Kúnnuɖetɔ́ Jehovah tɔn lɛ tɔn nɔ nyí nǔwiwa klewun e wlí yɛ̌yi é ɖé, bɔ è nɔ xwlé xóɖiɖɔ jinjɔn Biblu jí ɖé mɛ. Nǔwiwa ɔ gudo ɔ, è sixu nɔ kpɔ́ bo j’awǎ, lobo sixu lɛ́ yí jonɔ.a Jezu yì agɔ̌ mɔ̌hun ɖé tɛnmɛ ɖò toxo Kana tɔn mɛ ɖò sinsɛnzɔ́ tɔn sín bǐbɛ̌mɛ.—Jaan 2:1-11.

• Etɛ lɛ ka nɔ jɛ ɖò alɔwliwli sín nǔwiwa ɔ hwenu?

• Fitɛ Kúnnuɖetɔ́ Jehovah tɔn lɛ ka nɔ wlí alɔ ɖè?

• Mɛ̌ ɖětɛ lɛ ka sixu wá tɛn tɔn mɛ?

• Nɛ̌ jonɔ lɛ ka ɖó na sɔnǔ gbɔn ɖò alɔwliwli Kúnnuɖetɔ́ Jehovah tɔn lɛ tɔn ɖé hwenu?

• Jonɔ lɛ nɔ hɛn nǔnina alɔwliwli tɔn lɛ wá wɛ à?

• È nɔ xò kɔ́fu e mɛ ahan ɖè é ɖě dó ɖě wu ɖò alɔwliwli sín jonɔyiyi ɔ hwenu wɛ à?

• Jonɔ lɛ nɔ fúnfún mɔ̌likún alǒ confetti lɛ dó yawó ɔ kpo asisúnɔ ɔ kpo wu wɛ à?

• Nǔɖuɖu kpo ahan kpo ka nɔ wá jonɔyiyi ɔ tɛnmɛ wɛ à?

• È ka nɔ xò nǔ alǒ ɖúwe à?

• Kúnnuɖetɔ́ Jehovah tɔn lɛ ka nɔ ɖu alɔwliwli sín xwekpéxwenu à?

Etɛ lɛ ka nɔ jɛ ɖò alɔwliwli sín nǔwiwa ɔ hwenu?

Xóɖiɖɔ alɔwliwli tɔn ɔ wɛ nyí nǔ taji e nɔ tíìn ɖò alɔwliwli sín nǔwiwa ɔ hwenu é. Cɛju 30 mɔ̌ wɛ xóɖiɖɔ ɔ nɔ ɖu, bɔ sinsɛnzɔ́watɔ́ Kúnnuɖetɔ́ Jehovah tɔn ɖé wɛ nɔ xwlé mɛ. Xóɖɔɖókpɔ́ enɛ e nɔ sɔ́ akpakpa mɛ bo nɔ lɛ́ dó wusyɛn lanmɛ nú mɛ é nɔ tɛɖɛ̌ lee Biblu sixu d’alɔ asú kpo asì kpo ɔ, bɔ alɔwliwli yetɔn na nɔ ayǐ sɔyi, lobɔ wanyiyi kpo awǎjijɛ kpo na lɛ́ ɖ’emɛ gbɔn é jí.—Efɛzinu lɛ 5:33.

Ðò tò gegě mɛ ɔ, acɛkpikpa lɛ na gbè sinsɛnzɔ́watɔ́ Kúnnuɖetɔ́ Jehovah tɔn lɛ bɔ ye nɔ kpé nukún dó alɔwliwli sín akpáxwé e wu sɛ́n ɖɔ nǔ dó lɛ é wu. Ðò ninɔmɛ mɔ̌hun mɛ ɔ, ɖibla yì xóɖiɖɔ ɔ sín vivɔnu ɔ, asú kpo asì kpo ɔ nɔ d’akpá nú yeɖée lɛ. Ye sixu lɛ́vɔ dó alɔkɛ́ nú yeɖée lɛ. Enɛ gudo ɔ, Kúnnuɖetɔ́ Jehovah tɔn e è na gbè bɔ é na wlí alɔ nú ye ɖò sɛ́n lixo é nɔ ɖɔ ɖɔ ye huzu asú kpo asì kpo.

Ðò tò ɖevo lɛ mɛ ɔ, sɛ́n ɔ byɔ ɖɔ axɔ́suxwé wɛ asú kpo asì kpo ɖé na nɔ wlí alɔ ɖè. Asú kpo asì kpo ɔ nɔ wà mɔ̌ táan klewun ɖé jɛ nukɔn nú xóɖiɖɔ alɔwliwli tɔn ɔ. Enyi yawó ɔ kpo asisúnɔ ɔ kpo má d’akpá nú yeɖée lɛ ɖò axɔ́suxwé ɔ ǎ ɔ, ye sixu wà mɔ̌ ɖò ɖibla yì xóɖiɖɔ alɔwliwli tɔn ɔ sín vivɔnu. Nú ye ka ko d’akpá nú yeɖée lɛ ɖò axɔ́suxwé ɔ, ye sixu wá gbeta ɔ kɔn ɖɔ emi na lɛ́vɔ wà mɔ̌, amɔ̌ dìn ɔ, ye ka nɔ zán xógbe ɖěɖee xlɛ́ ɖɔ ye ko bló mɔ̌ ɖ’ayǐ lɛ é. Ðò xóɖiɖɔ ɔ gudo ɔ, è nɔ xoɖɛ bo nɔ byɔ Mawu ɖɔ é ni kɔn nyɔna dó asú kpo asì kpo yɔyɔ̌ ɔ jí.

Fitɛ Kúnnuɖetɔ́ Jehovah tɔn lɛ ka nɔ wlí alɔ ɖè?

Kúnnuɖetɔ́ Jehovah tɔn gegě nɔ wá gbeta ɔ kɔn bo nɔ bló alɔwliwli yetɔn sín nǔwiwa ɖò Kpléxɔ Axɔ́suɖuto ɔ tɔn ɖé mɛ, enyi é vo ɔ nɛ.b Enyi asú kpo asì kpo ɔ na yí jonɔ ɖò nǔwiwa alɔwliwli tɔn ɔ gudo wɛ ɔ, ye nɔ ba fí ɖevo bo nɔ wà mɔ̌ ɖè.

Mɛ̌ ɖětɛ lɛ ka sixu wá tɛn tɔn mɛ?

Enyi Kpléxɔ Axɔ́suɖuto ɔ tɔn ɖé mɛ wɛ è bló alɔwliwli sín nǔwiwa ɔ ɖè ɔ, ɖò kpaa mɛ ɔ, mɛ ɖebǔ sixu wá tɛn tɔn mɛ: mɛ e nyí Kúnnuɖetɔ́ Jehovah tɔn lɛ é kpo mɛ e ma nyí ǎ lɛ é kpo. Enyi asú kpo asì kpo ɔ na yí jonɔ wɛ ɔ, yeɖesunɔ wɛ nɔ cyan mɛ e ye na ylɔ́ dó jonɔyiyi ɔ tɛnmɛ lɛ é.

Nɛ̌ jonɔ lɛ ka ɖó na sɔnǔ gbɔn ɖò alɔwliwli Kúnnuɖetɔ́ Jehovah tɔn lɛ tɔn ɖé hwenu?

Ðò alɔwliwli sín nǔwiwa ɖé tɛnmɛ ɖò Kpléxɔ Axɔ́suɖuto ɔ tɔn ɖé mɛ ɔ, é byɔ ɖɔ alɔkpa ɖě jɛn è na sɔnǔ gbɔn ǎ. É ɖò mɔ̌ có, Kúnnuɖetɔ́ Jehovah tɔn lɛ nɔ tɛ́n kpɔ́n bo nɔ xwedó alixlɛ́mɛ Biblu tɔn e ɖɔ ɖɔ mǐ ni nɔ sɔnǔ ɖò jlɛ̌ jí kpo sísí kpo é. Enyi mɛ ɖevo e wá alɔwliwli ɔ tɛnmɛ lɛ é lɔ xwedó nǔgbododó enɛ lɛ ɔ, é nɔ nyɔ́ tawun. (1 Timɔtée 2:9) Nǔgbododó ɖokpo ɔ lɛ wɛ è na xwedó ɖò jonɔyiyi ɔ tɛnmɛ, enyi asú kpo asì kpo ɔ yí jonɔ ɔ nɛ.

Jonɔ lɛ nɔ hɛn nǔnina alɔwliwli tɔn lɛ wá wɛ à?

Biblu dó wusyɛn lanmɛ nú mǐ ɖɔ mǐ ni nɔ hun alɔ dó na nǔ mɛ. (Ðɛhan 37:21) Xomɛ nɔ hun Kúnnuɖetɔ́ Jehovah tɔn lɛ ɖɔ ye ni na nǔ mɛ e wlí alɔ yɔyɔ̌ lɛ é alǒ ɖɔ è ni na ye. (Luki 6:38) É ɖò mɔ̌ có, Kúnnuɖetɔ́ Jehovah tɔn lɛ nɔ byɔ nǔnina lɛ ǎ, ye ka nɔ lɛ́ jlá mɛ e na nǔ ye lɛ é sín nyikɔ ǎ. (Matie 6:3, 4; 2 Kɔlɛntinu lɛ 9:7; 1 Piyɛ́ɛ 3:8) Nǔwalɔ mɔ̌hun lɛ sɔgbe xá nǔ e Biblu ɖɔ é ǎ, bo na lɛ́ jɛ gǒ jí nú mɛ e wá nǔwiwa ɔ tɛnmɛ lɛ é.

È nɔ xò kɔ́fu e mɛ ahan ɖè é ɖě dó ɖě wu ɖò alɔwliwli sín jonɔyiyi ɔ hwenu wɛ à?

Eǒ. Kúnnuɖetɔ́ Jehovah tɔn lɛ nɔ xò kɔ́fu e mɛ ahan ɖè é ɖě dó ɖě wu ǎ, ɖó aca sinsɛn nǔvú tɔn lɛ mɛ wɛ nǔwalɔ enɛ jɔ sín.c Kúnnuɖetɔ́ Jehovah tɔn lɛ nɔ byɔ awǎjijɛ nú asú kpo asì kpo yɔyɔ̌ ɔ, amɔ̌, ye ka nɔ xò kɔ́fu e mɛ ahan ɖè é ɖě dó ɖě wu dó wà mɔ̌ ǎ.

Jonɔ lɛ nɔ fúnfún mɔ̌likún alǒ confetti lɛ dó yawó ɔ kpo asisúnɔ ɔ kpo wu wɛ à?

Eǒ. Ðò xá ɖé lɛ mɛ ɔ, mɛ lɛ nɔ fúnfún mɔ̌likún, conffeti, alǒ nǔ mɔ̌hun ɖé dó asú kpo asì kpo e wlí alɔ tlolo lɛ é wɛ wu. Ye nɔ ɖi ɖɔ mɔ̌ biblo na hɛn taɖagbe, awǎjijɛ kpo jidɔ́ kpo wá nú ye. Amɔ̌, Kúnnuɖetɔ́ Jehovah tɔn lɛ nɔ nyi alɔ nú nǔwalɔ ɖěɖee cá kan xá xɛxó lɛ é. Kúnnuɖetɔ́ Jehovah tɔn lɛ nɔ byɔ “taɖagbe” nú mɛ ɖevo lɛ ǎ, ɖó mɔ̌ wiwa sɔgbe xá Biblu ǎ.—Ezayíi 65:11.

Nǔɖuɖu kpo ahan kpo ka nɔ wá jonɔyiyi ɔ tɛnmɛ wɛ à?

Nǔɖuɖu kpo ahan kpo nɔ nɔ nǔwiwa alɔwliwli tɔn ɖé sín tɛnmɛ ɖò Kpléxɔ Axɔ́suɖuto ɔ tɔn ɖé mɛ ǎ. Asú kpo asì kpo ɖé lɛ nɔ wá gbeta ɔ kɔn bo nɔ má nǔɖuɖu alǒ nǔ e na fá kɔ nú mɛ lɛ é ɖò nǔwiwa ɔ gudo. (Nǔnywɛtɔ́xó 9:7) Enyi ye wá gbeta ɔ kɔn bo na na ahan syɛnsyɛn mɛ ɔ, ye nɔ hɛn gegě tɔn wá tɛn ɔ mɛ bonu jonɔ lɛ na wá nu ahan mú ǎ, mɛ ɖěɖee sín xwè sɔgbe xá sɛ́n lɛ é kɛɖɛ wɛ ye ka nɔ lɛ́ na.—Luki 21:34; Hlɔmanu lɛ 13:1, 13.

È ka nɔ xò nǔ alǒ ɖúwe à?

Enyi asú kpo asì kpo ɔ bló tuto jonɔyiyi tɔn ɔ, ye sixu wá gbeta ɔ kɔn bɔ è xò nǔ bo ɖúwe. (Nǔnywɛtɔ́xó 3:4) Nǔxixo ɖěɖee ye na cyan lɛ é ɖó na nyí nǔxixo ɖagbe lɛ, sɔgbe xá nǔ e ye yí wǎn lɛ é kpo aca yetɔn kpo. Hwɛhwɛ ɖò nǔwiwa alɔwliwli tɔn ɔ hwenu ɖò Kpléxɔ Axɔ́suɖuto ɔ tɔn ɖé mɛ ɔ, nǔxixo ɖěɖee jinjɔn Biblu jí lɛ é nɔ dín.

Kúnnuɖetɔ́ Jehovah tɔn lɛ ka nɔ ɖu alɔwliwli sín xwekpéxwenu à?

Nǔgbododó Biblu tɔn lɛ yí gbè nú alɔwliwli sín xwekpéxwenu ɖuɖu ǎ, mɔ̌ jɛn ye ma ka lɛ́ dó sɛ́n tɔn ǎ é nɛ. Enɛ wu ɔ, Kúnnuɖetɔ́ Jehovah tɔn asú kpo asì kpo lɛ ɖesunɔ wɛ nɔ wá gbeta ɔ kɔn ɖɔ emi na ɖu alɔwliwli emitɔn sín xwekpéxwenu alǒ gbɔ. Enyi ye wá gbeta ɔ kɔn ɖɔ emi na ɖu ɔ, ye sixu ɖu yeɖokponɔ alǒ xá xɔ́ntɔn yetɔn lɛ kpo hɛ̌nnumɔ yetɔn lɛ kpo.