ALƆDÓ NÚ XWÉDO LƐ́ | MƐJITƆ́ZƆ́
D’alɔ vǐ towe lɛ́ bónú yě ná ɖí xwi xá xójɛɖoto e nɔ gba ayi dó nú mɛ lɛ́ é
Xójɛɖoto ɖěɖěe nɔ gba ayi dó nú mɛ lɛ́ é nɔ tíin ɖo televizyɔn lɛ́, alǒkan lɛ́, tablɛ́ti lɛ́, kpó ɔdinatɛ́ɛ lɛ́ kpó jí hwebǐnu. Bɔ hwɛhwɛ ɔ, video e nɔ ɖe nǔ bǐ xlɛ́ vaan lɛ́ é wɛ nɔ ɖo xójɛɖoto énɛ́ lɛ́ mɛ.
Vǐ lɛ́ ka nɔ ɖo kpínkpɔ́n wɛ.
Nɛ̌ a ka sixú nya xɛ ɖo vǐ towe lɛ́ jí bɔ xójɛɖoto lɛ́ ma ná wa nǔ dó yě wú syɛ́nsyɛ́n ǎ gbɔn?
Nɛ̌ xójɛɖoto lɛ́ ka nɔ wa nǔ dó vǐ lɛ́ wú gbɔn?
Vǐ gěgé tíin bɔ nǔ e yě nɔ mɔ ɖo xójɛɖoto lɛ́ mɛ é nɔ gba ayi dó nú yě. Vǐ ɖé lɛ́ sixú nɔ ma ɖɔ lěe nǔ cí nú yě é tɔ́n, amɔ̌, xójɛɖoto lɛ́ sixú gba ayi dó nú yě titewungbe.a Adohu adohu yětɔn sixú syɛ́n d’é jí, ényí mɛjitɔ́ yětɔn lɛ́ ɖo adohu jí zɛ xwé wú ɔ nɛ́.
Vǐ lɛ́ sixú mɔ nǔ jɛ nǔ e yě mɔ ɖo xójɛɖoto lɛ́ mɛ lɛ́ é mɛ nyi do. Ði kpɔ́ndéwú ɔ, yě mɛ ɖé lɛ́ nɔ lin ɖɔ nǔ e yě mɔ é ná jɛ dó xwedó e mɛ yě ɖe é jí. Gɔ́ ná ɔ, vǐ kpɛví e nɔ kpɔ́n video lɛ́ dó nǔ e jɛ é ɖé jí azɔn mɔ̌kpán é sixú vɛ́ dó ɖɔ nǔ énɛ́ ɖo jijɛ wɛ magbokɔ wɛ sín.
Ényí nǔ e jɛ é báɖá sɔ lěe xójɛɖoto lɛ́ ɖe xlɛ́ gbɔn é kpó é gbɔ kpó ɔ, vǐ lɛ́ sixú nɔ ma mɔ nukúnnú jɛ mɛ. Yě sixú nɔ ma tuun ɖɔ azɔ̌xwé xójɛɖoto tɔn lɛ́ ɔ, hwenu e mɛ gěgé kpɔ́n gbeɖíɖó yětɔn lɛ́ é wɛ yě nɔ mɔ akwɛ́ gěgé. Énɛ́ wú ɔ, azɔ̌xwé xójɛɖoto tɔn ɖé sixú bló bɔ nǔ e jɛ é ɖé ná cí nǔgɛ́n ɖé ɖɔhun hú lěe é nyí nǔgbó nǔgbó é, bónú mɛ lɛ́ ná bá ná mɔ nǔ jɛ wú d’é jí, lobo gbɛ kan dó gbeɖíɖó yětɔn lɛ́ kpínkpɔ́n nu.
Nɛ̌ a ka sixú d’alɔ vǐ towe lɛ́, bɔ yě ná ɖí xwi xá xójɛɖoto e nɔ ɖó adohu adohu nú mɛ lɛ é gbɔn?
Ðǒ dogbó nú lěe vǐ towe lɛ́ nɔ kpɔ́n alǒ ɖótó nǔ baɖabaɖa e jɛ lɛ́ é sɔ é. Ðiɖɔ wɛ è ɖe ɖɔ vǐ towe lɛ́ kún ɖó ná tuun nǔ ɖěɖěe ɖo jijɛ wɛ ɖo gbɛ ɔ mɛ lɛ́ é ó ǎ. Amɔ̌, ényí yě fɔ́n ɔ, yě nɔ ɖo xójɛɖoto e nɔ gba ayi dó nú mɛ lɛ́ é kpɔ́n wɛ alǒ ɖótó wɛ gbɛmɛ ɔ, é nyí ɖagbe nú yě ǎ.
“Hweɖélɛ́nu ɔ, nyi kpó asú ce kpó nɔ ɖɔ xó dó xójɛɖoto ɖé jí dǒyidǒslɔ́ tɔn, bó ka nɔ tuun lě do é nɔ wa nǔ dó vǐ mǐtɔn e nɔ gblá tó wú lɛ́ é sɔ é ǎ.”—Maria.
Nǔgbódodó Biblu tɔn: “Linkpɔ́n ɖo ayi mɛ nú mɛ ɔ, kanmɛ nɔ gbɔ́jɔ́ mɛ.”—Nǔnywɛ́xó 12:25.
Ðǒtó mɛ kpó sɔxwixwe kpó, nǎ xósin kpó wǎnyíyí kpó. Ényí é vɛ́ wǔ nú vǐ towe bónú é ná ɖɔ xó dó nǔ e jɛ é ɖé wú hǔn, byɔ̌ ɖɔ é ní gbɔ bó ɖe desɛ́ɛn ɖé d’é wú. Zǎn xógbe e mɛ vǐ towe ná mɔ nukúnnú jɛ lɛ́ é dó ɖɔ xó dó nǔ e ɖo ayǐ mɛ ɖu n’i wɛ lɛ́ é jí, amɔ̌, nyi alɔ nú xó ɖiɖɔ dó gǒflɛ́mɛ e ma ɖo dandan ǎ lɛ́ é jí.
“Ényí mǐ jínjɔ́n ayǐ bó ɖótó vǐ nyɔ̌nu mǐtɔn ɔ, é nɔ mɔ éɖée mɛ hú gǎn. Amɔ̌, ényí mǐ ko ɖɔ: ‘Mɔ̌ wɛ nǔ lɛ́ ɖe gbɔn din é nɛ́, bɔ é ɖó ná má mǐ,’ wɛ ɔ, é ná mɔ éɖée mɛ hú gǎn ǎ.’”—Sarahi.
Nǔgbódodó Biblu tɔn: ‘Ðo gbesisɔmɛ bó ná nɔ ɖótó mɛ, bó ma nɔ zɔn xó jí ó.’—Jaki 1:19.
D’alɔ vǐ towe bónú é ní nɔ jlɛ̌ jí dó xójɛɖoto lɛ́ wú. Ði kpɔ́ndéwú ɔ, gbeɖíɖó ɖé dó mɛfinfin sín xó ɖé wú sixú bló bɔ é ná cí nǔ ɖɔ dǎnúwiwa énɛ́ nɔ jɛ hwɛhwɛ hú gǎn lěe é nyí nǔgbó é. Tínmɛ tuto ɖěɖěe a bló bónú vǐ towe lɛ́ ná nɔ ayijayǐ mɛ lɛ́ é nú yě. Gɔ́ ná ɔ, hɛn dó ayi mɛ ɖɔ hwɛhwɛ ɔ, nǔ baɖabaɖa ɖé nɔ yá wǔ jɛ ǎ wútu wɛ è nɔ ɖó gbe tɔn ɖo xójɛɖoto lɛ́ mɛ, é nyí ɖó é nɔ jɛ hwɛhwɛ wǔtu wɛ ǎ.
“D’alɔ vǐ towe lɛ́ bónú yě ní ɖí xwi xá lěe nǔ cí nú yě é. Hwɛhwɛ ɔ, linlin lɛ́ wɛ nɔ zɔ́n lěe nǔ nɔ cí nú mɛ é, énɛ́ wú ɔ, ényí mǐ d’alɔ vǐ mǐtɔn lɛ́ bɔ yě sɔ́ ayi ɖó nǔ ɖagbe ɖé jí ɔ, yě ná mɔ yěɖée mɛ hú gǎn.”—Lourdes.
Nǔgbódodó Biblu tɔn: “Mɛ e ɖó nǔnywɛ́ ɔ ja xó ɖɔ gbé ɔ, é nɔ tó lin tamɛ kpɔ́n hwɛ̌; énɛ́ wú wɛ é ɖɔ xó ɔ, è nɔ ɖi nǔ nú xó tɔn.”—Nǔnywɛ́xó 16:23.
a Vǐ kpɛví lɛ́ sixú ɖe ado e ɖo yě hu wɛ é xlɛ́ gbɔn aɖɔ̌ ɖíɖɔ́ ɖó xɔ gblamɛ, alǒ gbɔn xɛsiɖiɖi dó wěmaxɔmɛ yiyi kpó zɔ ninɔ nú mɛjitɔ́ yětɔn lɛ́ kpó wú gblamɛ.