Ðu gbɛ̌ta kúnnuɖegbé tɔn sín tuto e è ɖ’ayǐ é sín le

1-2. Nɛ̌ nǔ ka cí nú mɛ gěgé dó gbɛ̌ta kúnnuɖegbé tɔn sín tuto e è ɖ’ayǐ é wú?

A ka flín gbe e gbe è yí gbe ɖɔ a húzú wɛnjlátɔ́ e ma ko bló batɛ́mu ǎ é a? Ðo awǎjijɛ sín azǎn énɛ́ gbe ɔ, a byɔ́ Jexóva sɛntɔ́ éé ɖo susu kpa nú nyǐkɔ tɔn wɛ lɛ́ é sín gbɛ̌ta ɖaxó ɖé mɛ. (Ðɛh. 148:1, 2, 12, 13) Amɔ̌, gbe nɛ́ gbe ɔ, a sixú ko lɛ́ byɔ́ gbɛ̌ta kléwún e mɛ mɛsɛntɔ́ Jexóva tɔn kwínwe ɖé ɖe é mɛ, gbɛ̌ta kúnnuɖegbé tɔn wɛ è nɔ ylɔ́ gbɛ̌ta énɛ́ ɖɔ. Gbɛ̌ta kúnnuɖegbé tɔn lɛ́ nɔ d’alɔ mǐ bɔ mǐ nɔ se tónú nú gbeɖiɖe e ɖɔ ɖɔ è ní “jlá wɛn ɖagbe Axɔ́súɖuto ɔ tɔn gbɔn ayǐkúngban ɔ bǐ jí” é.—Mat. 24:14.

² Nɛ̌ nǔ ka nɔ cí nú we dó gbɛ̌ta kúnnuɖegbé tɔn sín tuto e è ɖ’ayǐ é wú? Nɔví nyɔ̌nu ɖé nɔ nyí Wendya bo ɖɔ: “Gbɛ̌ta kúnnuɖegbé tɔn e mɛ un ɖe é d’alɔ mì ɖo ali gěgé nu. Un kplɔ́n wlɛnwín mawuxóɖiɖɔ kpó mɛkplɔ́nkplɔ́n kpó tɔn yɔ̌yɔ́ lɛ́ ɖo mɛ ɖěvo lɛ́ gɔ́n, è d’alɔ mì bɔ un sɔ́ nǔ ɖé lɛ́ ɖó nukɔn nú nyiɖée ɖo gbigbɔ lixo bo kpé yě wú, bo lɛ́ zun xɔ́ntɔn vívɛ́ lɛ́; tuto wǎnyíyínɔ énɛ́ e è ɖ’ayǐ é wɛ ka nyí tɔn bɔ un kpé nǔ énɛ́ lɛ́ bǐ wú.” Nɔví súnnu e nɔ nyí Rich é ɖɔ: “Nukúnkpénǔwútɔ́ gbɛ̌ta tɔn e un nyí é ɔ, wǔjɔmɛ titewungbe ɖé wɛ é nyí nú mì. Hwenu e wɛnjlátɔ́ ɖé lɛ́ nɔ d’alɔ mɛɖé b’ɛ nɔ jɛxá bá bló batɛ́mu é ɔ, ali bǔnɔ lɛ́ nɔ hun nú nukúnkpénǔwútɔ́ gbɛ̌ta tɔn ɖé b’ɛ nɔ d’alɔ mɛ énɛ́ b’ɛ nɔ yi nukɔn ɖo gbigbɔ lixo ɖo xwe lɛ́ vlamɛ.” Nɔví nyɔ̌nu ɖé nɔ nyí Dinah bo ɖɔ: “Tuto ɖaaɖagbe ɖé wɛ gbɛ̌ta kúnnuɖegbé tɔn e è ɖ’ayǐ é nyí! Xwédo ɖɔhun wɛ gbɛ̌ta ce cí nú mì.”

3. Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

³ Ðo xóta élɔ́ mɛ ɔ, mǐ ná to ɖɔ xó dó azɔ̌ e nukúnkpénǔwútɔ́ gbɛ̌ta tɔn kpó alɔgɔ́tɔ́ tɔn kpó ɖó é kpó lěe yě nɔ kpé nukún dó mɛ e ɖo gbɛ̌ta yětɔn mɛ lɛ́ é wú gbɔn é kpó wú hwɛ̌. Énɛ́ gúdo ɔ, mǐ ná mɔ lěe mǐ mɛ ɖokpó ɖokpó sixú gɔ́ so nú nukɔnyiyi gbɛ̌ta kúnnuɖegbé tɔn mǐtɔn tɔn gbɔn é. Ðo vivɔnu ɔ, mǐ ná mɔ lěe mǐ sixú ɖu le tuto wǎnyíyínɔ énɛ́ tɔn gbɔn é.

NUKÚNKPÉNǓWÚTƆ́ GBƐ̌TA TƆN Ɔ KPÓ ALƆGƆ́TƆ́ TƆN KPÓ

4. (a) Azɔ̌ tají tɛ́ ka nyí nukúnkpénǔwútɔ́ gbɛ̌ta kúnnuɖegbé tɔn tɔn? (b) Nɛ̌ é ka nɔ xlɛ́ ɖɔ mɛ ɖěɖěe ɖo gbɛ̌ta tɔn mɛ lɛ́ é sín nǔ nɔ ɖu ayi mɛ n’i gbɔn? (Kpɔ́n gbǎví “Wěɖexámɛ ɖé lɛ́ nú nukúnkpénǔwútɔ́ gbɛ̌ta tɔn” lɔmɔ̌.)

⁴ Mɛxó agun tɔn wɛ nukúnkpénǔwútɔ́ gbɛ̌ta kúnnuɖegbé tɔn tɔn ɖé nɔ nyíb bɔ kplékplé mɛxó lɛ́ tɔn nɔ sɔ́ ɛ bónú é ná d’alɔ gbɛ̌ta wɛnjlátɔ́ lɛ́ tɔn ɖé bónú yě ná yi nukɔn ɖo gbigbɔ lixo. Nɛ̌ é ka nɔ wa mɔ̌ gbɔn? Nukɔntɔn, mɛ e ɖo gbɛ̌ta tɔn mɛ lɛ́ é ɖokpó ɖokpó sín nǔ nɔ ɖu ayi mɛ n’i tawun. (Nǔx. 27:23) Ðó lɛ̌ngbɔ́nyitɔ́ e nɔ ɖo acéjí dó hudó lɛ̌ngbɔ́ tɔn lɛ́ tɔn wú é wɛ é nyí wútu ɔ, é nɔ tɛ́n kpɔ́n bo nɔ se nǔ jɛ wɛnjlátɔ́ e ɖo gbɛ̌ta tɔn mɛ lɛ́ é bǐ wú. Mɔ̌ wiwa nɔ d’alɔ ɛ bɔ é nɔ dó wǔsyɛ́n lanmɛ nú yě ɖo gbigbɔ lixo, ɖo lěe nǔ nɔ cí nú mɛ é linu, bo nɔ lɛ́ d’alɔ yě ɖo ali tawun tawun lɛ́ nu. (Nǔx. 12:25; Eza. 32:2; Ja. 2:15-17) Wegɔ́, é nɔ d’alɔ wɛnjlátɔ́ lɛ́ ɖokpó ɖokpó bɔ yě nɔ ɖ’alɔ ɖo sinsɛnzɔ́ ɔ mɛ bǐ mlɛ́mlɛ́. É nɔ ɖ’alɔ ɖo sinsɛnzɔ́ ɔ mɛ kpó kanɖódónǔwú kpó, tají ɔ, ɖo aklúnɔzángbla fífó lɛ́. É nɔ lɛ́ w’azɔ̌ xá wɛnjlátɔ́ lɛ́ ɖokpó ɖokpó hwɛhwɛ ɖo sinsɛnzɔ́ ɔ mɛ bá dó dó wǔsyɛ́n lanmɛ nú yě ɖo gbigbɔ lixo lobo lɛ́ kplɔ́n azɔ̌ yě. Ényí é wá jɛ bɔ é ma sixú yi sinsɛnzɔ́ ɔ mɛ ǎ ɔ, é nɔ tɛ́n kpɔ́n bɔ alɔgɔ́tɔ́ tɔn alǒ wɛnjlátɔ́ e kpé nǔ wú é ɖěvo nɔ kpé nukún dó nǔ lɛ́ wú. Atɔngɔ́, é nɔ d’alɔ nɔví súnnu e ko bló batɛ́mu lɛ́ é bɔ yě nɔ jɛxá wǔjɔmɛzɔ́ lɛ́ ɖo agun ɔ mɛ. (1 Tim. 3:1) É nɔ kpa mɛ kpó ayi bǐ kpó, nɔ ɖe wě e jínjɔ́n Biblu jí lɛ́ é xá mɛ, bo nɔ kplɔ́n azɔ̌ nɔví súnnu lɛ́ bónú yě ná jɛxá bá nyí mɛsɛntɔ́ agun tɔn alǒ mɛxó agun tɔn. Ðó lě do nukúnkpénǔwútɔ́ gbɛ̌ta tɔn sín azɔ̌ ɖo tají sɔ é wútu ɔ, mɛxó agun tɔn e jɛxá hú gǎn bo ná wa azɔ̌ énɛ́ ɔ lɛ́ é wɛ kplékplé mɛxó lɛ́ tɔn nɔ sɔ́.

5. Wǔvɛ́ tɛ́ lɛ́ nukúnkpénǔwútɔ́ gbɛ̌ta tɔn ɖé lɛ́ ka nɔ mɔ?

⁵ Nukúnkpénǔwútɔ́ gbɛ̌ta tɔn sixú mɔ wǔvɛ́ ɖé lɛ́ hwenu e é ɖo nukún kpé dó mɛ e ɖo gbɛ̌ta tɔn mɛ lɛ́ é wú wɛ é. Jörg ɔ, nukúnkpénǔwútɔ́ gbɛ̌ta tɔn wɛ é nyí bo nɔ nɔ Allemagne. Mɛxó agun tɔn gěgé ɖɔhun ɔ, azɔ̌ gěgé wɛ é ɖó ɖo agun ɔ mɛ bo ná wa. É ɖɔ: “Jlɛ̌jíninɔ ɖo wǔjɔmɛzɔ́ gěgé kɔn bɔ wǔ ǎ. Énɛ́ wú ɔ, nǔ sise jɛ mɛ e ɖo gbɛ̌ta ce mɛ lɛ́ é ɖokpó ɖokpó wú nɔ vɛ́ wǔ nú mì.” Abel e nyí mɛxó agun tɔn, bo ɖó xwe 70 bo nɔ nɔ Ouganda é ɖɔ: “Mɛxó agun tɔn kpó mɛsɛntɔ́ agun tɔn kpó sukpɔ́ ɖo agun mǐtɔn mɛ ǎ. Énɛ́ zɔ́n bɔ mɛ e ɖo gbɛ̌ta kúnnuɖegbé tɔn mǐtɔn mɛ lɛ́ é sukpɔ́ tawun. Wǎgbɔ tɔn ɔ, é nɔ vɛ́ wǔ nú mì nú má bló mɛbakpɔ́n lɛ̌ngbɔ́nyitɔ́ tɔn nú wɛnjlátɔ́ lɛ́ ɖokpó ɖokpó lěe é ná ko jló mì ɖɔ má bló gbɔn é.” Mɛxó agun tɔn ɖé nɔ nɔ Suriname bo nɔ nyí Obed bo ɖɔ: “Un yí wǎn nú azɔ̌ kplɔ́nkplɔ́n mɛ ɖěvo lɛ́, amɔ̌, azɔ̌ kplɔ́nkplɔ́n mɛ nɔ byɔ́ hwenu kpó gǎndídó kpó bɔ è ka sixú lɛ́ nɔ ma yá wǔ mɔ le e ná wɛ é ɖe é. Énɛ́ wú ɔ, nǔ e è nɔ yá wǔ dó vɛ̌ ná é ɖokpó wɛ azɔ̌ kplɔ́nkplɔ́n mɛ nyí.” Étɛ́ ka sixú d’alɔ mɛxó agun tɔn e ɖo wǔvɛ́ énɛ́ lɛ́ kpó mɔ̌hun ɖěvo lɛ́ kpó mɔ wɛ lɛ́ é?

6. Ényí mɛ e ɖo gbɛ̌ta kúnnuɖegbé tɔn lɛ́ mɛ é ma sukpɔ́ káká ɖé ǎ ɔ, nɛ̌ é ka nɔ d’alɔ mɛ e nyí nukúnkpénǔwútɔ́ gbɛ̌ta tɔn lɛ́ é bɔ yě nɔ kpé nukún dó mɛ e ɖo gbɛ̌ta yětɔn mɛ lɛ́ é wú gbɔn?

⁶ Ényí é nyɔ́ bló ɔ, mɛ e ná ɖo gbɛ̌ta kúnnuɖegbé tɔn ɖé mɛ lɛ́ é ná sukpɔ́ ǎ, mɔ̌ mɛ ɔ, mɛ e nyí nukúnkpénǔwútɔ́ gbɛ̌ta tɔn lɛ́ é ná kpé wú bo ná tuun mɛ e ɖo gbɛ̌ta yětɔn mɛ lɛ́ é ganjí bo ná d’alɔ yě bɔ yě ná kpo ɖo dǒ lí wɛ ɖo gbigbɔ lixo. Ényí mɛxó agun tɔn e ɖo agun ɔ mɛ lɛ́ é ma ka sukpɔ́ ǎ ɔ ka lo? È ɖó ná lɔn nú mɛ e ná ɖo gbɛ̌ta ɖé mɛ lɛ́ é ná sukpɔ́ sɔmɔ̌ bɔ mɛ e nyí nukúnkpénǔwútɔ́ gbɛ̌ta ɔ tɔn é ná hwedó azɔ̌ tɔn lɛ́ bǐ wiwa wú ǎ, énɛ́ wú ɔ, kplékplé mɛxó lɛ́ tɔn sixú sɔ́ azɔ̌ d’así nú mɛsɛntɔ́ agun tɔn ɖé b’ɛ ná kpé nukún dó gbɛ̌ta ɖé wú nú hwenu ɖé. Ényí mɛ e ɖo gbɛ̌ta lɛ́ mɛ lɛ́ é ma sukpɔ́ káká ɖé ǎ ɔ, nukúnkpénǔwútɔ́ lɛ́ ná kpé wú hú gǎn bo ná wa azɔ̌ yětɔn tají hú gǎn ɔ, énɛ́ wɛ nyí alɔ dídó nɔví yětɔn lɛ́.

7. Ðo agun e mɛ mɛxó agun tɔn ma sukpɔ́ ɖe ǎ é mɛ ɔ, étɛ́ nukúnkpénǔwútɔ́ lɛ́ ka sixú wa bá dó kú d’é jí ɖɔ è kpé nukún dó mɛ e ɖo gbɛ̌ta ɔ mɛ lɛ́ é bǐ wú ganjí? (1 Piyɛ́ɛ 5:2) (Kpɔ́n ɖiɖe ɔ lɔmɔ̌.)

⁷ Ényí nukúnkpénǔwútɔ́ gbɛ̌ta tɔn wɛ a nyí ɖo agun e mɛ mɛxó agun tɔn ma sukpɔ́ ɖe ǎ é ɖé mɛ hǔn, sɔ́ ayi ɖó azɔ̌ kplɔ́nkplɔ́n alɔgɔ́tɔ́ towe bónú mi ná kpé nukún dó lɛ̌ngbɔ́ Mawu tɔn lɛ́ wú jí. (Xa 1 Piyɛ́ɛ 5:2.) Ðe azɔ̌ ɖé lɛ́ nú alɔgɔ́tɔ́ towe. Ði kpɔ́ndéwú ɔ, sín hweɖénu jɛ hweɖénu hǔn, nɔ byɔ́ ɛ ɖɔ é ní kpé nukún dó kplé kúnnuɖegbé tɔn wú. Mi xo ɖɛ bo ɖɔ xó ɖó kpɔ́ dó azɔ̌ wɛnjlátɔ́ e ɖo gbɛ̌ta ɔ mɛ lɛ́ é tɔn wú. Nɔ kplá alɔgɔ́tɔ́ towe yi mɛbakpɔ́n lɛ̌ngbɔ́nyitɔ́ tɔn lɛ́ hwɛhwɛ bo nɔ ɖe wě xá ɛ jɛ nukɔn nú mɛbakpɔ́n ɖokpó ɖokpó, lobo nɔ lɛ́ wa mɔ̌ ɖo mɛbakpɔ́n ɔ gúdo. Ényí hwenu ɖo yiyi wɛ ɔ, alɔgɔ́tɔ́ towe sixú wá jɛxá bá nyí nukúnkpénǔwútɔ́ gbɛ̌ta tɔn. (2 Tim. 2:2) A sixú lɛ́ byɔ́ Klisánwun ɖěvo e zin lɛ́ é ɖɔ yě lɔ ní nɔ kplɔ́n azɔ̌ mɛ ɖěvo lɛ́ ɖo sinsɛnzɔ́ ɔ mɛ. Gběxosín-alijítɔ́ lɛ́ kpó wɛnjlátɔ́ ɖěvo e ko mɔ nǔ kpɔ́n lɛ́ é kpó sixú nɔ w’azɔ̌ xá mɛ yɔ̌yɔ́ e ma ko mɔ nǔ káká ɖé kpɔ́n ǎ lɛ́ é. Gɔ́ ná ɔ, wɛnjlátɔ́ e ko zin ɖo gbigbɔ lixo lɛ́ é sixú d’alɔ mɛ ɖěɖěe ɖó hudó alɔdó tɔn bá dó bɛ́ xóɖɔɖókpɔ́ ɖo sinsɛnzɔ́ ɔ mɛ, bló mɛbakpɔ́n lɛ́ alǒ kpé nukún dó Biblu kplɔ́nkplɔ́n lɛ́ wú lɛ́ é. Din ɔ, mi nú mǐ ní ɖɔ xó dó ali e nu mǐ mɛ ɖokpó ɖokpó sixú d’alɔ bɔ nǔ lɛ́ ná yi ganjí ɖo gbɛ̌ta kúnnuɖegbé tɔn mǐtɔn mɛ ɖe é atɔn wú.

D’ALƆ BÓNÚ NǓ LƐ́ NÍ YI GANJÍ ÐO GBƐ̌TA KÚNNUÐEGBÉ TƆN TOWE MƐ

8. Nɛ̌ mǐ ka sixú d’alɔ bɔ nǔ lɛ́ ná yi ganjí ɖo gbɛ̌ta mǐtɔn mɛ gbɔn? (Hlɔ̌manu lɛ́ 1:12)

⁸ Nɔ ɖe kúnnu xá gbɛ̌ta towe. Ényí a nɔ jlá wɛn ɔ xá mɛ ɖěvo lɛ́ ɔ, yě “ná ná akɔ́nkpinkpan” we, bɔ hwi lɔ “ná ná akɔ́nkpinkpan” yě. (Xa Hlɔ̌manu lɛ́ 1:12.) Wɛn ɖagbe ɔ jíjlá xá mɛ ɖěvo lɛ́ nɔ zɔ́n bɔ ado nɔ hu mɛ zɛ xwé wú hwenu e è ɖo xó ɖɔ xá mɛ ɖěvo lɛ́ wɛ é ǎ, bo sixú lɛ́ zɔ́n bɔ è nɔ ayijayǐ mɛ hwenu e è ɖo wɛn ɔ jlá wɛ ɖo xá ɖé lɛ́ mɛ é. Ényí agbazazɔ́ towe nɔ zɔ́n bɔ hwɛhwɛ ɔ a ma nɔ kpé wú bo nɔ ɖɔ mawuxó xá gbɛ̌ta kúnnuɖegbé tɔn towe ǎ ɔ, a ka hɛn ɔ a ná ɖɔ xó xá mɛ e yí we dó azɔ̌ mɛ é bo ná bló hǔzúhúzú lɛ́ ɖo azɔ̌ ganmɛ towe wú a? Xósin e é ná ná é sixú jí wǔ nukún towe mɛ. (Nɛɛ. 2:4-6) Ényí azɔn alǒ mɛxóxwe zɔ́n b’ɛ vɛ́ wǔ nú we bónú a ná kplé xá gbɛ̌ta ɔ cɔɔ lě ɔ, aniwú a ma ka ná ɖɔ xó xá nukúnkpénǔwútɔ́ gbɛ̌ta ɔ tɔn ǎ? É sixú bló tuto bɔ a ná nɔ nɔ kpɔ́ xá gbɛ̌ta ɔ gbɔn kan jí, bo ná nɔ jlá wɛn ɔ gbɔn wěmasɛ́dómɛ alǒ alǒkan gblamɛ. A nyí mɛ wínnyáwínnyá bo lɛ́ ɖo ganjí ɖo agbaza mɛ có, é ka kpo ɖo wǔ vɛ́ nú we wɛ bónú a ná nɔ yi kúnnuɖegbé hwɛhwɛ wɛ a? Ényí mɔ̌ wɛ ɔ, aniwú a ma ka ná bló tuto xá mɛ e ɖo gbɛ̌ta towe mɛ é ɖé bónú mi ná nɔ w’azɔ̌ ɖó kpɔ́ cɔɔ ɖo aklúnɔzángbla ɖokpó ɖokpó mɛ ǎ? É sixú byɔ́ ɖɔ a ní w’azɔ̌ ɖo nǔ e ɖo tají nú we lɛ́ é kpó lěe a nɔ zán hwenu towe gbɔn é kpó wú. (Hlɔ̌. 12:11; Koló. 4:5) Gǎn ɖěbǔ e a ná dó é sɔ mɔ̌ kɔ. Xo ɖɛ sɛ́ dó Jexóva. É ná “ná [we] jlǒ kpó hlɔ̌nhlɔ́n kpó bǐ, bónú [a] ná wa nǔ.”—Filí. 2:13.

9. Nɛ̌ mǐ ka sixú bló gbɔn bɔ gbɛ̌ta kúnnuɖegbé tɔn mǐtɔn ná cí xwédo ɖé ɖɔhun? (Hlɔ̌manu lɛ́ 12:13)

⁹ Nɔ yí mɛ. Ényí mǐ nɔ yí mɛ ɔ, é ná zɔ́n bɔ mɛ ɖěɖěe ɖo gbɛ̌ta mǐtɔn mɛ lɛ́ é ná mɔ ɖɔ è yí wǎn nú émí. (Xa Hlɔ̌manu lɛ́ 12:13.) Mǐ ka sixú yí gbe bɔ gbɛ̌ta kúnnuɖegbé tɔn ɖé ná nɔ bló kplé kúnnuɖegbé tɔn ɖo xwé mǐtɔn gbe a? Ðo agun ɖé lɛ́ mɛ ɔ, gbɛ̌ta lɛ́ nɔ yí xóɖɔtɔ́ jǒnɔ lɛ́ sín jǒnɔ mɛjíjɛmɛjíjɛ. Ényí é wá jɛ gbɛ̌ta ɖé lɛ́ jí ɔ, mɛ e ɖo gbɛ̌ta ɔ mɛ é ɖé lɛ́ sixú nɔ kpɔ́ bo ɖu nǔ bo lɛ́ dó wǔsyɛ́n lanmɛ nú yěɖée, xóɖɔtɔ́ ɔ wá do tɔn mɛ kpó é gbɔ kpó ɔ nɛ́. Sarah e nyí gběxosín-alijítɔ́ titewungbe é ɖɔ: “Jǒnɔyíyí xó ɔ nɔ ɖó linkpɔ́n nú mì, énɛ́ wú ɔ, un nɔ bló tuto nǔ kléwún ɖé tɔn. Un nɔ tɛ́n kpɔ́n bo nɔ sɔ́ ayi ɖó mɛ ɖěvo lɛ́ tuuntuun jí hú ɖɔ má ɖo adohu adohu jí ɖɔ nǔɖuɖu ɔ ka ná nyɔ́ a jí.” Ényí mǐ d’alɔ bónú gbɛ̌ta kúnnuɖegbé tɔn mǐtɔn cí xwédo ɖé ɖɔhun ɔ, mǐ nɔ vɛ́ xá Jexóva kpó mǐɖée lɛ́ kpó d’é jí.—Nɛɛ. 8:10; Mɛ. 20:35.

10. Ényí mǐ ba ná bló bónú alɔ ná se kpɛ́n nú mǐ ɖo sinsɛnzɔ́ ɔ sín akpáxwé ɖé lɛ́ ɔ, étɛ́ mǐ ka sixú wa? (Nǔnywɛ́xó 1:5; 27:17) (Kpɔ́n ɖiɖe ɔ lɔmɔ̌.)

¹⁰ Dǒ gǎn bo húzú wɛnjlátɔ́ kpó nǔkplɔ́nmɛtɔ́ kpó ɖagbe. Lě do alɔ bí nú mǐ ɖo wɛn ɖagbe jíjlá kpó nǔ kplɔ́nkplɔ́n mɛ lɛ́ kpó sín akpáxwé sɔ é ɔ, mɔ̌ do wɛ akpakpa ná nɔ sɔ́ mǐ dó sinsɛnzɔ́ ɔ mɛ yiyi xá gbɛ̌ta mǐtɔn wú sɔ. Akpáxwé sinsɛnzɔ́ towe tɔn ɖé ka ɖe bɔ a ba ná bló b’ɛ ná kpɔ́n te d’é jí a? Étɛ́wú a ma ka ná ɖe afɔ nukɔntɔn ɔ bo byɔ́ alɔdó mɛɖé tɔn, bóyá gběxosín-alijítɔ́ alǒ wɛnjlátɔ́ e mɔ nǔ kpɔ́n é ɖé tɔn ǎ? (Xa Nǔnywɛ́xó 1:5; 27:17.) Ðɔ nǔ e gbé nya wɛ a ɖe ɖo gbigbɔ lixo lɛ́ é nú nukúnkpénǔwútɔ́ gbɛ̌ta towe tɔn. É hɛn ɔ, é ná d’alɔ we bɔ a ná kpé nǔ e gbé nya wɛ a ɖe é wú. A sixú lɛ́ byɔ́ alɔdó mɛ ɖěvo lɛ́ tɔn. Nɔví nyɔ̌nu ɖé nɔ nyí Heather bo wa mɔ̌. Wínnyá nɔ hu i có, é ɖɔ: “Un byɔ́ gběxosín-alijítɔ́ ɖé ɖɔ ní d’alɔ mì ɖo mɛbakpɔ́n lɛ́ blóbló kpáxwé. É yí wǎn nú mɛ bo lɛ́ nyɔ́ xomɛ, bo nɔ bló tuto bo nɔ w’azɔ̌ xá mì hwɛhwɛ. É tlɛ lɛ́ d’alɔ mì bɔ un bɛ́ Biblu kplɔ́nkplɔ́n xá mɛbakpɔ́n ce lɛ́ ɖokpó. É víví nú mì tawun ɖɔ un byɔ́ alɔdó ɖó un lɛ́ jɛ vǐví mawuxóɖiɖɔ tɔn ɖu jí.” É ɖo wɛn ɖɔ mǐ hɛn ɔ mǐ ná gɔ́ so nú nukɔnyiyi gbɛ̌ta kúnnuɖegbé tɔn mǐtɔn tɔn ɖo ali gěgé nu.

LĚE A SIXÚ ÐU GBƐ̌TA KÚNNUÐEGBÉ TƆN TOWE SÍN LE GBƆN É

11-12. Le tɛ́ lɛ́ gbɛ̌ta kúnnuɖegbé tɔn sín tuto e è ɖ’ayǐ é ka sixú hɛn wá nú we ɖo gbigbɔ lixo? Nǎ kpɔ́ndéwú ɖokpó.

¹¹ Le e è ná ɖu ɖo gbigbɔ lixo lɛ́ é. Mǐ mɛ ɖokpó ɖokpó sixú ɖu le gbɛ̌ta kúnnuɖegbé tɔn sín tuto e è ɖ’ayǐ é tɔn ɖo gbigbɔ lixo. Ði kpɔ́ndéwú ɔ, è nɔ bló mɛbakpɔ́n lɛ̌ngbɔ́nyitɔ́ tɔn e wá dó ganmɛ bo lɛ́ dó wǔsyɛ́n lanmɛ nú mɛ lɛ́ é nú mɛ ɖěɖěe sín nǔ nɔ ɖu ayi mɛ nú Jexóva ɖo ali bǔnɔ ɖé nu lɛ́ é; yě wɛ nyí asúkúsi lɛ́, tɔ́cyɔvǐ nɔcyɔvǐ lɛ́ kpó mɛxómɔ lɛ́ kpó. (1 Tɛ. 2:8; Ja. 1:27) Sinsɛnzɔ́ ɔ mɛ yiyi xá gbɛ̌ta kúnnuɖegbé tɔn mǐtɔn nɔ zɔ́n bɔ alɔ nɔ lɛ́ bí nú mǐ ɖo wɛnjíjlá kpó nǔkplɔ́nkplɔ́n mɛ lɛ́ kpó sín akpá vovo xwé. È nɔ d’alɔ nɔví súnnu e ɖó kpɔ́ndéwú ɖagbe lɛ́ é bónú yě ná jɛxá bá dó kɔ azɔ̌ ɖěvo lɛ́ mɛ ɖo agun ɔ mɛ.—1 Tim. 3:10.

¹² Lin tamɛ dó Wendy e xó mǐ ɖɔ wá yi é wú. É ɖu tuto gbɛ̌ta kúnnuɖegbé tɔn tɔn e è ɖ’ayǐ é sín le. É ɖɔ: “Ðó tɔ́ ce klán gbe xá nǔgbó ɔ wútu ɔ, hwɛhwɛ ɔ, nɔ ce nɔ sixú yi sinsɛnzɔ́ ɔ mɛ ɖo aklúnɔzángbla fífó lɛ́ kpó gbɛ̌ta kúnnuɖegbé tɔn tɔn kpó ǎ. É ɖo mɔ̌ có, é ná gbe nyɛ bɔ nyɛ nɔ yi. Nɔví nyɔ̌nu gběxosín-alijítɔ́ e xwe tɔn ko sɛ yi é ɖé dɔn mì dó wǔ bo d’alɔ mǐ bɔ un ɖó nǔwúkpíkpé e hɛn le wá nú mì ɖo sinsɛnzɔ́ ɔ kpó agun ɔ kpó mɛ lɛ́ é. Un flín ɖɔ azɔn mɔ̌kpán wɛ nukúnkpénǔwútɔ́ gbɛ̌ta ce tɔn ɖe wě e jínjɔ́n Biblu jí lɛ́ é xá mì kpó wǎnyíyí kpó bɔ yě kpo ɖo alɔ dó mì wɛ káká jɛ égbé.”

13. Ényí mǐ nɔ nɔ gǔdo nú gbɛ̌ta kúnnuɖegbé tɔn mǐtɔn ɔ, le tɛ́ lɛ́ mɔ̌ mǐ ka sixú ɖu ɖo lěe nǔ nɔ cí nú mɛ é linu? (Kpɔ́n ɖiɖe ɔ lɔmɔ̌.)

¹³ Le ɖěɖěe é nɔ hɛn wá ɖo lěe nǔ nɔ cí nú mɛ é linu é. Mǐ nɔ vɛ́ xá mɛ ɖěɖěe ɖo gbɛ̌ta mǐtɔn mɛ lɛ́ é hwenu e mǐ ɖo azɔ̌ wa xá yě wɛ “alɔ ɖo alɔ mɛ” ɖo sinsɛnzɔ́ ɔ mɛ é. (Filí. 1:27) Gbɛtɔ́ e ma nɔ sukpɔ́ sɔmɔ̌ ɖo gbɛ̌ta kúnnuɖegbé tɔn mɛ ǎ é sixú lɛ́ zɔ́n bɔ é ná bɔ wǔ nú mɛ e wínnyá nɔ hu, alǒ mɛ e ma nɔ vo ɖo mɛ gěgé tɛ́ntin ǎ lɛ́ é hú gǎn bɔ yě ná zun xɔ́ntɔn vívɛ́ lɛ́. (2 Kɔ. 6:13) Mǐ sixú kú d’é jí ɖɔ xɔ́ntɔn énɛ́ lɛ́ ná d’alɔ mǐ ɖo hwenu vɛ́ wǔ lɛ́ mɛ, ɖi hwenu e mǐ ɖo azɔn jɛ wɛ é, hwenu e mǐ ɖó linkpɔ́n é, alǒ hwenu e mɛvívɛ́ mǐtɔn ɖé kú é. (1 Tɛ. 5:14) É ɖo wɛn ɖɔ, ɖo nukɔnmɛ ɔ, mǐ ná ɖó hudó xɔ́ntɔn ɖagbe lɛ́ tɔn hú gǎn. (Mat. 24:21) Ényí mǐ tuun ɖɔ mǐ sixú ɖeji dó nɔví súnnu kpó nɔví nyɔ̌nu kpó mǐtɔn éé yí wǎn nú mǐ bo nɔ lɛ́ nɔ gǔdo nú mǐ lɛ́ é wú ɔ, tagba lɛ́ ná bo ɖo ayǐ ɔ, é ná bɔ wǔ nú mǐ hú gǎn bɔ mǐ ná ɖí xwi xá.—Nǔx. 17:17.

14. Nɛ̌ mǐ ka nɔ ɖu le gbɛ̌ta kúnnuɖegbé tɔn mǐtɔn tɔn hwenu e adla j’ayǐ alǒ ajijimɛnú ɖé jɛ é gbɔn?

¹⁴ Gbɛ̌ta kúnnuɖegbé tɔn towe ná d’alɔ we hwenu e adla ɖé j’ayǐ alǒ ajijimɛnú ɖé jɛ é. Gbɛ̌ta kúnnuɖegbé tɔn mǐtɔn nɔ d’alɔ mǐ dó ganmɛ hwenu e jɛmɛjí ɖé bɛ́, adla j’ayǐ, ajijimɛnú lɛ́ wá xwetɔ́n ɖo dotóoxwé linu, è dó ya nú mǐ alǒ akwɛ́yózo ɖo nǔ gba wɛ é. Ði kpɔ́ndéwú ɔ, ɖo agun ɖokpó ɖokpó mɛ ɔ, wěɖegbɛ́ sinsɛnzɔ́ tɔn kpó nukúnkpénǔwútɔ́ gbɛ̌ta tɔn lɛ́ kpó nɔ bló tuto lěe è ná d’alɔ mɛ ɖěɖěe ɖó hudó bǔnɔ lɛ́ gbɔn é tɔn. Nukúnkpénǔwútɔ́ gbɛ̌ta tɔn lɛ́ nɔ ylɔ́ xwédo e ɖo gbɛ̌ta kúnnuɖegbé tɔn yětɔn mɛ lɛ́ é ɖokpó ɖokpó bo nɔ d’alɔ yě bɔ è nɔ sú nǔ e sín hudó yě ɖó afɔjíafɔjí lɛ́ é sín do nú yě, ɖi nukúnkpémɛwú dotóoxwé tɔn, nǔɖuɖu, sin, fí e yě ná nɔ é kpó nǔzínzán kpó dó hɛn sɔ yě. Gbɛ̌ta kúnnuɖegbé tɔn towe ná d’alɔ we tawun hwenu e adla j’ayǐ, alǒ, ajijimɛnú ɖé jɛ é!

15. Étɛ́ ka dɔn mǐ mɛ bǐ ɖó bǔ ɖo tutoblónúnǔ Jexóva tɔn mɛ?

¹⁵ Lěe mǐ ko ɖɔ gbɔn wá yi é ɔ, tutoblónúnǔ Jexóva tɔn gbló ada tawun. Wɛnsagun gbejínɔtɔ́ maxamaxa lɛ́ wɛ ɖo akpáxwé tɔn jǐxwé tɔn ɔ kɛ́ɖɛ́ mɛ. Mɛ lǐvi tɛ́nnɛ jɛjí wɛ ɖo akpáxwé tɔn ayǐkúngban jí tɔn ɔ mɛ; bɔ kɛ́n énɛ́ fɔ́n bo lɛ́ ɖo jijɛjí wɛ ayǐhɔ́ngbe ayǐhɔ́ngbe. (Zak. 8:23; Nǔɖe. 5:11) Mɛsɛntɔ́ Jexóva tɔn lɛ́ bǐ ɖo bǔ bo ɖo gǎn do wɛ bá jlá wɛn ɖagbe Axɔ́súɖuto Mawu tɔn tɔn! (Nǔɖe. 14:6, 7) Mi nú mǐ ní ɖu gbɛ̌ta kúnnuɖegbé tɔn sín tuto, éé nɔ d’alɔ mǐ bɔ mǐ nɔ kpa Jexóva kpó ayi mǐtɔn bǐ kpó é sín vǐví bǐ mlɛ́mlɛ́.—Ðɛh. 111:1.