Lěe mɛxó agun tɔn lɛ́ sixú d’alɔ mɛ ɖěɖěe è ɖe sín agun mɛ lɛ́ é gbɔn é

1-2. (a) Linlin tɛ́ Jexóva ka nɔ ɖó dó mɛ ɖěɖěe nɔ hu hwɛ syɛ́nsyɛ́n, bɔ hwɛ yětɔn lɛ́ ma ka nɔ vɛ́ nú yě ǎ lɛ́ é wú? (b) Étɛ́ ɖó nukún wɛ Jexóva ka ɖe ɖo nǔwanyidotɔ́ lɛ́ sí?

JEXÓVA nɔ yí gbe nú nǔwalɔ alɔkpa lɛ́ bǐ ǎ. É gbɛ́ wǎn nú hwɛhuhu. (Ðɛh. 5:5-7) Jexóva nɔ ɖó nukún ɖɔ mǐ ní nɔ ɖó sísí nú nǔgbódodó jlɔ́jlɔ́ émítɔn, éé ɖo Xó émítɔn mɛ bɔ émí ná mǐ lɛ́ é. É ɖo mɔ̌ có, Jexóva nɔ ɖó nukún ɖɔ gbɛtɔ́ hwɛhutɔ́ lɛ́ ní ma hu hwɛ gbeɖé ó ǎ. (Ðɛh. 130:3, 4) Ðo hwe ɖokpó ɔ nu ɔ, é nɔ yí gbe nú mɛ e ma “nɔ sí Mawu ǎ, bo nɔ sɔ́ fɛ́nú Mawu tɔn dó ba hwɛjijɔ nú wunhínhɔ́nnú lɛ́” é ǎ. (Ju. 4) Nǔgbó ɔ, Biblu ɖɔ ɖɔ “è ná sú kún dó nú mɛ e ma nɔ ɖó sísí nú Mawu ǎ lɛ́ é” ɖo ahwan Mawu tɔn Aamagedɔ́ni hwenu.—2 Pi. 3:7; Nǔɖe. 16:16.

² Amɔ̌, Jexóva ba ɖɔ è ní sú mɛ ɖěbǔ sín kún dó ǎ. Lěe mǐ ko ɖɔ gbɔn ɖo xóta ɖěbɔdóɖěwú e wá yi lɛ́ é mɛ é ɔ, Biblu ɖɔ nyi wɛn ɖɔ é “jló ɖɔ ali ní hun nú mɛ lɛ́ bǐ, bónú hwɛ yětɔn lɛ́ ní vɛ́ nú yě.” (2 Pi. 3:9) Mɛxó agun tɔn lɛ́ nɔ xwedó kpɔ́ndéwú Jexóva tɔn bo nɔ tɛ́n kpɔ́n bo nɔ d’alɔ nǔwanyidotɔ́ lɛ́ kpó suúlu kpó bónú hwɛ yětɔn lɛ́ ná vɛ́ nú yě, lobonú nǔ yětɔn ná lɛ́ jɛ Jexóva nukúnmɛ nyɔ́ jí. É ɖo mɔ̌ có, nǔwanyidotɔ́ lɛ́ bǐ wɛ nɔ wa nǔ lěe é jɛxá gbɔn é ǎ. (Eza. 6:9) Mɛxó agun tɔn lɛ́ nɔ dó gǎn azɔn mɔ̌kpán bá d’alɔ yě bónú hwɛ yětɔn lɛ́ ná vɛ́ nú yě có, yě mɛɖé lɛ́ ka nɔ kpo ɖo ali nyanya e yě mlɛ́ é jí. Étɛ́ è ka ɖó ná wa ɖo ninɔmɛ mɔ̌hun mɛ?

‘MI ÐE NǓNYANYAWATƆ́ Ɔ SÍIN’

3. (a) Étɛ́ Biblu ka ɖɔ ɖɔ è ɖó ná bló nú hwɛhutɔ́ e hwɛ yětɔn lɛ́ ma vɛ́ nú yě ǎ lɛ́ é? (b) Étɛ́wú mǐ ka sixú ɖɔ ɖɔ ɖo ali ɖé nu ɔ, nǔwanyidotɔ́ ɔ ɖésú wɛ ba ɖɔ è ní sɔ́ émí ɖó kɛ́n nú agun ɔ?

³ Ényí nǔwanyidotɔ́ ɖé sín hwɛ lɛ́ ma vɛ́ n’i ǎ ɔ, ɖěwagbɛn ɖe nú mɛxó agun tɔn lɛ́ ǎ, yě ɖó ná xwedó wěɖexámɛ élɔ́ e ɖo 1 Kɔlɛ́ntinu lɛ́ 5:13 mɛ é: “Mi ɖe nǔnyanyawatɔ́ ɔ sín tɛ́ntin mitɔn.” Ðo ali ɖé nu ɔ, nǔwanyidotɔ́ ɔ ɖésú wɛ ba mɔ̌; nǔ e é dó é ya wɛ é ɖe. (Ga. 6:7) Étɛ́wú mǐ ka sixú ɖɔ mɔ̌? Ðó é gbɛ́ gbe yí nú alɔ e mɛxó lɛ́ dó gǎn azɔn mɔ̌kpán bo dó è bónú hwɛ tɔn lɛ́ ná vɛ́ n’i é. (2 Axɔ́. 17:12-15) Nǔwiwa tɔn lɛ́ xlɛ́ ɖɔ é wá gbeta ɔ kɔn ɖɔ émí kún ná xwedó nǔgbódodó Jexóva tɔn lɛ́ ó.—Sɛ́n. 30:19, 20.

4. Étɛ́wú è ka nɔ xwlé ɖɔnúese ɖé agun ɔ, hwenu e è sɔ́ nǔwanyidotɔ́ e hwɛ tɔn lɛ́ ma vɛ́ ná ǎ é ɖé ɖó kɛ́n nú agun ɔ é?

⁴ Ényí è ɖe nǔwanyidotɔ́ e hwɛ tɔn lɛ́ ma vɛ́ ná ǎ é ɖé sín agun mɛ ɔ, è nɔ xwlé ɖɔnúese ɖé agun ɔ ɖɔ mɛ énɛ́ kún sɔ́ nyí Kúnnuɖetɔ́ Jexóva tɔn ó. Linlin ɖɔnúese énɛ́ tɔn wɛ nyí ɖɔ è ná dó winnyá nǔwanyidotɔ́ ɔ ǎ. É nyɔ́ wa ɔ, è nɔ wa mɔ̌ bónú agun ɔ ná dó sixú xwedó gbeɖiɖe Biblu tɔn e ɖɔ è “ní ma sɔ́ nɔ dó gbɛ̌” xá mɛ énɛ́ ɖě ó, alǒ ‘tlɛ nɔ ɖu nǔ xá ɛ vɔ́vɔ́ ó’ é. (1 Kɔ. 5:9-11) Hwɛjijɔ ɖagbe wú wɛ è ɖe wě énɛ́ xá mɛ. Mɛsɛ́dó Pɔ́lu wlán ɖɔ: “Tɔ́n kpɛví ɖé wɛ nɔ fɔ́n linfín e è nya é blěbú.” (1 Kɔ. 5:6) Nǔwanyidotɔ́ e hwɛ yětɔn lɛ́ ma vɛ́ nú yě ǎ lɛ́ é sixú vɔ́ da nú gǎn e dó wɛ mɛ ɖěvo lɛ́ ɖe bá zán gbɛ sɔgbe xá nǔgbódodó jlɔ́jlɔ́ Jexóva tɔn lɛ́ é.—Nǔx. 13:20; 1 Kɔ. 15:33.

5. Nukún tɛ́ mǐ ka ɖó ná sɔ́ dó kpɔ́n mɛ e è ɖe sín agun mɛ é ɖé? Étɛ́wú?

⁵ Nukún tɛ́ mǐ ka ɖó ná sɔ́ dó kpɔ́n nǔɖitɔ́ hǎtɔ́ e è ɖe sín agun mɛ é ná lo? Nǔgbó wɛ ɖɔ mǐ nɔ dó gbɛ̌ xá ɛ ǎ, loɔ, mǐ ɖó ná mɔ ɛ dó mɔ lɛ̌ngbɔ́ e bú é ɖé, é nyí mɛ e xó tɔn ko fó é ǎ. Lɛ̌ngbɔ́ e sɛ yi zɔ nú lɛ̌ngbɔ́kpó ɔ é sixú lɛ́ lɛ́ kɔ wá. Flín ɖɔ lɛ̌ngbɔ́ énɛ́ e bú é ko sɔ́ éɖée jó nú Jexóva. É blá wǔ ɖɔ é kún sɔ́ ɖo gbɛ zán wɛ sɔgbe xá sɔ́ énɛ́ e é sɔ́ éɖée jó nú Jexóva é din ó, b’ɛ zɔ́n bɔ é ɖo ali nyanya ɖé jí. (Ezek. 18:31) Amɔ̌, ényí nǔbláwǔkúnúmɛ Jexóva tɔn kpo ɖo te jɛ́n wɛ ɔ, nukúnɖíɖó tíin ɖɔ mɛ énɛ́ ná lɛ́ lɛ́ kɔ wá. Nɛ̌ mɛxó agun tɔn lɛ́ ka nɔ ɖe nukúnɖíɖó mɔ̌hun xlɛ́ mɛ e tlɛ nyí nǔwanyidotɔ́ bɔ è ɖe sín agun mɛ é gbɔn?

LĚE MƐXÓ AGUN TƆN LƐ́ NƆ D’ALƆ MƐ ÐĚÐĚE È ÐE SÍN AGUN MƐ LƐ́ É GBƆN É

6. Afɔ tɛ́ lɛ́ mɛxó agun tɔn lɛ́ ka ná ɖe dó d’alɔ mɛ e è ɖe sín agun mɛ é ɖé?

⁶ Ényí è ɖe mɛɖé sín agun mɛ ɔ, è nɔ ɖó alɔ dídó è bónú é ná lɛ́ kɔ wá Jexóva gɔ́n te wɛ a? Ðěbǔ lɔ ǎ! Ényí wěɖegbɛ́ mɛxó lɛ́ tɔn ɔ ɖɔ nú nǔwanyidotɔ́ e hwɛ tɔn lɛ́ ma vɛ́ ná ǎ é ɖé ɖɔ è ná ɖe è sín agun mɛ ɔ, yě ná lɛ́ tínmɛ afɔ e é sixú ɖe bɔ è ná lɛ́ yí i dó agun ɔ mɛ lɛ́ é n’i. Amɔ̌, mɛxó agun tɔn lɛ́ ná lɛ́ wa nǔ hú mɔ̌. Ðo ninɔmɛ gěgé mɛ ɔ, yě ná ɖɔ nú nǔwanyidotɔ́ ɔ ɖɔ émí lɛ́ ba ná mɔ ɛ ɖo sun yɔywɛ ɖé lɛ́ gúdo, bo ná kpɔ́n ɖɔ é ko húzú ɖo ayi mɛ a jí. Ényí nǔwanyidotɔ́ ɔ yí gbe bo ná lɛ́ mɔ mɛxó agun tɔn lɛ́ ɔ, yě ná byɔ́ ɛ vɛ́návɛ́ná ɖo ayǐ ɖěvo énɛ́ e yě ná jínjɔ́n xá ɛ é hwenu ɖɔ hwɛ tɔn lɛ́ ní vɛ́ n’i, bónú é ní lɛ́ kɔ. Ényí é ná bo ma tlɛ ko húzú ɖo ayi mɛ ɖo hwe énɛ́ nu ǎ ɔ, mɛxó agun tɔn lɛ́ ná tɛ́n kpɔ́n bo lɛ́ mɔ ɛ hweɖévonu bo dó wǔsyɛ́n lanmɛ n’i ɖɔ hwɛ tɔn lɛ́ ní vɛ́ n’i.

7. Nɛ̌ mɛxó agun tɔn lɛ́ ka nɔ ɖe wǔvɛ́sexámɛ Jexóva tɔn xlɛ́, hwenu e yě ɖo nǔ wa xá mɛ e è ɖe sín agun mɛ é ɖé wɛ é gbɔn? (Jelemíi 3:12)

⁷ Mɛxó agun tɔn lɛ́ nɔ tɛ́n kpɔ́n bo nɔ xwedó wǔvɛ́sexámɛ Jexóva tɔn sín kpɔ́ndéwú hwenu e yě ɖo nǔ wa xá mɛ e è ɖe sín agun mɛ é ɖé wɛ é. Ði kpɔ́ndéwú ɔ, ɖo hwexónu ɔ, Jexóva nɔ te bónú Izlayɛ́li ví lɛ́ sín hwɛ lɛ́ vɛ́ nú yě hwɛ̌ cóbónú é tɛ́n kpɔ́n bo d’alɔ yě ǎ. É nyɔ́ wa ɔ, yě tlɛ ko wa nǔ ɖěbǔ dó ɖe xlɛ́ ɖɔ hwɛ émítɔn vɛ́ nú émí ǎ có, Jexóva ɖésú ɖe afɔ nukɔntɔn ɔ bo yi ba yě mɔ. Lěe è ɖɔ gbɔn ɖo xóta wegɔ́ xóta ɖěbɔdóɖěwú lɛ́ tɔn élɔ́ mɛ é ɔ, Jexóva ɖe wǔvɛ́sexámɛ tɔn xlɛ́ gbɔn ɖiɖɔ nú gbeyíɖɔ Ozée ɖɔ é ní dó hwɛ gbɔ xá asi tɔn e kpo ɖo hwɛ hu wɛ é gblamɛ. (Oz. 3:1; Mal. 3:7) Mɛxó agun tɔn lɛ́ nɔ xwedó kpɔ́ndéwú Jexóva tɔn, bo nɔ ba vɛ́návɛ́ná ɖɔ nǔwanyidotɔ́ ɔ ní lɛ́ kɔ, yě ka nɔ bló bónú mɔ̌ wiwa nɔ vɛ́ wǔ n’i ǎ.—Xa Jelemíi 3:12.

8. Nɛ̌ nǔjlɛ́dónǔwú e Jezu ná dó vǐ súnnu e bú é wú é ka d’alɔ mǐ bɔ mǐ mɔ nǔ jɛ wǔvɛ́sexámɛ kpó nǔbláwǔkúnúmɛ kpó Jexóva tɔn wú hú gǎn gbɔn? (Luki 15:7)

⁸ Flín nǔjlɛ́dónǔwú e Jezu ná dó vǐ súnnu e bú bɔ è ɖɔ xó tɔn ɖo xóta wegɔ́ xóta ɖěbɔdóɖěwú lɛ́ tɔn élɔ́ mɛ é wú é. Ée tɔ́ ɔ mɔ vǐ súnnu tɔn sɛ́dó é jɛ́n é “kán wezun bo yi kpl’así kɔ n’i, lobo kí si n’i kpó wǎnyíyí kpó.” (Luk. 15:20) Ð’ayi wú ɖɔ tɔ́ ɔ kún nɔ te káká bónú vǐ súnnu tɔn wá bo wá sa vo n’i dó byɔ́ hwɛsɔ́kɛ hwɛ̌ ó. É nyɔ́ wa ɔ, é ɖe afɔ nukɔntɔn ɔ, lěe tɔ́ wǎnyíyínɔ ɖěbǔ ná ko bló gbɔn é. Mɛxó agun tɔn lɛ́ nɔ tɛ́n kpɔ́n bo nɔ wa nǔ ɖokpó ɔ nú mɛ ɖěɖěe ko zɛ gbě lɛ́ é. Yě nɔ ba ɖɔ lɛ̌ngbɔ́ énɛ́ lɛ́ e bú é ní “lɛ́ kɔ wá xwé.” (Luk. 15:22-24, 32) Ényí hwɛhutɔ́ ɖé lɛ́ kɔ ɔ, è nɔ j’awǎ ɖo jǐxwé, bo nɔ j’awǎ ɖo ayǐkúngban jí lɔmɔ̌!—Xa Luki 15:7.

9. Nɛ̌ Jexóva ka nyi gbehwan sɛ́dó hwɛhutɔ́ lɛ́ kpó akpakpa sɔ́ mɛ kpó gbɔn?

⁹ Kpó nǔ e mǐ kplɔ́n káká jɛ din é kpó ɔ, é ɖo wɛn ɖɔ Jexóva kún nɔ ba ɖɔ mɛ ɖěɖěe hwɛ yětɔn lɛ́ ma vɛ́ nú yě ǎ lɛ́ é ní nɔ agun ɔ mɛ ó. É ɖo mɔ̌ có, é nɔ jó jɛ nyi ko mɛ nú nǔwanyidotɔ́ lɛ́ ǎ. É nɔ ba ɖɔ yě ní lɛ́ kɔ wá. Lěe nǔ nɔ cí nú Jexóva dó nǔwanyidotɔ́ e hwɛ yětɔn lɛ́ vɛ́ nú yě é wú é tɔ́n ɖo Ozée 14:5 mɛ, é ɖɔ: “Un ná sɔ́ afɔ e Izlayɛ́linu lɛ́ dó gbě ɔ kɛ yě. Un ná yí wǎn nú yě titewungbe. Ðó un sɔ́ ná sin xomɛ dó yě ǎ.” Lěe nǔ cí nú Jexóva é tuuntuun nɔ zɔ́n bɔ, mɛxó agun tɔn lɛ́ nɔ ba nǔ ɖěbǔ e xlɛ́ ɖɔ hwɛ mɛɖé tɔn jɛ vǐvɛ́ n’i jí lɛ́ é. Gɔ́ ná ɔ, xó énɛ́ lɛ́ ɖó ná ná gǎnjɛwú mɛ ɖěɖěe ko jó Jexóva dó lɛ́ é ɖɔ é yí wǎn nú yě, bo ba ɖɔ yě ní lɛ́ kɔ.

10-11. Nɛ̌ mɛxó agun tɔn lɛ́ ka ná tɛ́n kpɔ́n, bo d’alɔ mɛ ɖěɖěe è ɖe sín agun mɛ b’ɛ lín lɛ́ é gbɔn?

¹⁰ Mɛ ɖěɖěe è ɖe sín agun mɛ sín hwenu línlín ɖíe, bóyá sín xwe mɔ̌kpán ɖíe lɛ́ é ka lo? Mɛ mɔ̌hun lɛ́ sixú nɔ ma sɔ́ kpo ɖo hwɛ e wú è ɖe yě sín agun mɛ lɛ́ é hu wɛ. Ðo ninɔmɛ ɖé lɛ́ mɛ ɔ, yě tlɛ sixú nɔ ma sɔ́ flín hwɛjijɔ e wú è ɖe yě sín agun mɛ é. Ðěbǔ wɛ é ná bo nyí ɔ, mɛxó agun tɔn lɛ́ ná tɛ́n kpɔ́n bo tuun fí e mɛ énɛ́ lɛ́ ɖe é, bo yi ba yě kpɔ́n. Ðo mɛbakpɔ́n mɔ̌hun lɛ́ hwenu ɔ, mɛxó agun tɔn lɛ́ tlɛ ná xo ɖɛ xá yě, bo byɔ́ yě kpó akpakpa sɔ́ mɛ kpó ɖɔ yě ní lɛ́ kɔ wá agun ɔ mɛ. Ényí mɛ ɔ jó agun dó din é ɔ, xwe ko jɛ tawun ɔ, é ɖo wɛn ɖɔ é ná ko vɔ gǎn tawun ɖo gbigbɔ lixo. Énɛ́ wú ɔ, ényí é ba ná lɛ́ kɔ wá agun ɔ mɛ ɔ, mɛxó agun tɔn lɛ́ sixú bló tito bɔ mɛɖé ná kplɔ́n Biblu xá ɛ, ényí è na bo ma tlɛ ko yí i dó agun mɛ ǎ ɔ nɛ́. Ðo ninɔmɛ lɛ́ bǐ mɛ ɔ, mɛxó lɛ́ wɛ ɖó ná nyí mɛ e nɔ bló tuto Biblu kplɔ́nkplɔ́n ɔ tɔn é.

¹¹ Bo ná dó xwedó nǔbláwǔkúnúmɛ Jexóva tɔn sín kpɔ́ndéwú ɔ, mɛxó agun tɔn lɛ́ nɔ ba ná mɔ mɛ gěgé lěe yě kpé wú gbɔn é, bo d’alɔ yě bónú yě ná tuun ɖɔ kɔlílɛ́ wá sín hɔn ɖo hunhun nú yě. Ényí hwɛhutɔ́ ɖé xlɛ́ ɖɔ hwɛ émítɔn lɛ́ vɛ́ nú émí bo jó ali nyanya e é mlɛ́ é dó ɔ, è sixú yí i dó agun mɛ azɔn ɖokpó.—2 Kɔ. 2:6-8.

12. (a) Ninɔmɛ tɛ́ lɛ́ mɛ é ka byɔ́ ɖɔ mɛxó agun tɔn lɛ́ ní ɖ’ayi te tawun ɖe? (b) Étɛ́wú mǐ ma ka ɖó ná lin ɖɔ hwɛhutɔ́ ɖé lɛ́ kún sixú ɖu nǔbláwǔkúnúmɛ Jexóva tɔn sín le ó ǎ? (Kpɔ́n tínmɛ e ɖo do é lɔmɔ̌.)

¹² Ðo ninɔmɛ ɖé lɛ́ mɛ ɔ, mɛxó agun tɔn lɛ́ ɖó ná ɖ’ayi te tawun dó mɛɖé yíyí dó agun mɛ wú. Ði kpɔ́ndéwú ɔ, ényí mɛɖé xo dǎka vǐ kpɛví wú, alǒ nyí gǔfɔ́ndómawujítɔ́, alǒ ényí é zán ayi wínníwínní bo ɖó nǔ alɔwlíwlí ɖé nu ɔ, mɛxó agun tɔn lɛ́ ɖó ná kú d’é jí ɖɔ hwɛ mɛ énɛ́ tɔn lɛ́ vɛ́ n’i nǔgbó nǔgbó. (Mal. 2:14; 2 Tim. 3:6) Yě ɖó ná nya xɛ ɖo lɛ̌ngbɔ́kpó ɔ jí. Ðo hwe ɖokpó ɔ nu ɔ, mǐ ɖó ná tuun ɖɔ Jexóva ná yí gbe nú nǔwanyidotɔ́ ɖěbǔ e xlɛ́ ɖɔ hwɛ émítɔn lɛ́ vɛ́ nú émí nǔgbó nǔgbó, bo jó gbɛ nyanya e zán wɛ é ɖe é dó é. Énɛ́ wú ɔ, ényí mɛxó agun tɔn lɛ́ ná bo tlɛ ba ná kú d’é jí ɖɔ mɛ e zán ayi wínníwínní xá mɛ ɖěvo lɛ́ é sín hwɛ ka vɛ́ n’i nǔgbó nǔgbó a jí ɔ, yě ɖó ná lin ɖɔ mɛ mɔ̌hun kún sixú jɛxá nǔbláwǔkúnúmɛ Jexóva tɔn gbeɖé ó ǎ.a—1 Pi. 2:10.

NǓ E AGUN Ɔ SIXÚ WA É

13. Vogbingbɔn tɛ́ ka ɖo lěe mǐ nɔ wa nǔ xá mɛ ɖěɖěe mɛxó agun tɔn lɛ́ gbɛ́ nǔ ná lɛ́ é gbɔn é kpó lěe mǐ nɔ wa nǔ xá mɛ e è ɖe sín agun mɛ lɛ́ é gbɔn é kpó tɛ́ntin?

¹³ Lěe mǐ ko ɖɔ gbɔn ɖo xóta e wá yi é mɛ é ɔ, hweɖélɛ́nu ɔ, è nɔ ɖɔ nú agun ɔ ɖɔ è gbɛ́ nǔ nú mɛɖé. Ðo ninɔmɛ mɔ̌hun ɖé mɛ ɔ, mǐ sixú kpo ɖo gbɛ̌ dó xá mɛ ɔ wɛ, bo tuun ɖɔ hwɛ tɔn lɛ́ ko vɛ́ n’i, bɔ é jó ali nyanya e é wlí é dó. (1 Tim. 5:20) É kpo ɖo hǎgbɛ́ agun ɔ tɔn ɖé nyí wɛ, bo ɖó hudó wǔsyɛ́n dó lanmɛ nú mɛ e gbɛ̌ dídó xá nǔɖitɔ́ hǎtɔ́ lɛ́ nɔ hɛn wá é tɔn. (Ebl. 10:24, 25) Amɔ̌, mɛ e è ɖe sín agun mɛ é ɖé tɔn gbɔn vo bǐ sésé. Mǐ “sɔ́ nɔ dó gbɛ̌” xá mɛ énɛ́ ǎ, mǐ “tlɛ nɔ ɖu nǔ xá mɛ mɔ̌hun lɔ vɔ́vɔ́” ǎ.—1 Kɔ. 5:11.

14. Nɛ̌ klisánwun lɛ́ ka sixú zán ayixa yětɔn e yě sɔ́ Biblu dó kplɔ́n ná é, hwenu e yě ɖo nǔ wa xá mɛ ɖěɖěe è ɖe sín agun mɛ lɛ́ é wɛ é gbɔn? (Kpɔ́n ɖiɖe ɔ lɔmɔ̌.)

¹⁴ Xlɛ́xlɛ́ wɛ nǔ e mǐ kplɔ́n é ka ɖe ɖɔ mǐ ná wɔn ya nú mɛ e è ɖe sín agun mɛ é bǐ mlɛ́mlɛ́ a? É nyí mɔ̌ dandan ǎ. É ɖo wɛn ɖɔ, mǐ kún ná dó gbɛ̌ xá ɛ ó. Amɔ̌, klisánwun lɛ́ sixú zán ayixa yětɔn e yě sɔ́ Biblu dó kplɔ́n é dó wá gbeta ɔ kɔn ɖɔ émí ná ylɔ́ mɛ e è ɖe sín agun mɛ é, bóyá hɛ̌nnumɔ ɖé, alǒ mɛ e kpó yě kpó vɛ́ tawun ɖ’ayǐ é ɖé wá kplé alǒ gbɔ. Ényí é ka wá ɔ lo? Ð’ayǐ ɔ, mǐ nɔ dó gbe mɛ mɔ̌hun ǎ. Ðo fí ɖésú ɔ, klisánwun ɖokpó ɖokpó wɛ ɖó ná zán ayixa tɔn e é sɔ́ Biblu dó kplɔ́n é ɖo ninɔmɛ énɛ́ mɛ. Mɛɖé lɛ́ sixú mɔ ɖɔ émí ná dó gbe mɛ ɔ, alǒ dó doo n’i wá kplé ɔ. Amɔ̌, mǐ ɖó ná ɖɔ xó xá mɛ ɔ dín, alǒ dó gbɛ̌ xá ɛ ǎ.

15. Hwɛhutɔ́ alɔkpa tɛ́ lɛ́ xó è ka ɖɔ ɖo 2 Jaan 9-11 mɛ? (Kpɔ́n gbǎví “Hwɛhuhu alɔkpa ɖokpó ɔ xó ɖɔ wɛ Jaan kpó Pɔ́lu kpó ɖe a?” lɔmɔ̌)

¹⁵ Mɛɖé lɛ́ sixú kanbyɔ́ yěɖée ɖɔ: ‘Biblu ɖɔ ɖɔ ényí klisánwun ɖé dó gbe mɛ mɔ̌hun ɖé hǔn, azɔ̌ tɔn nyanya lɛ́ mɛ ɖ’alɔ ɖe wɛ é ɖe ǎ cé?’ (Xa 2 Jaan 9-11.) Nǔ e lɛ́ lɛ̌ dó wěmafɔ ɔ lɛ́ é xlɛ́ ɖɔ gǔfɔ́ndómawujítɔ́ lɛ́ kpó mɛ ɖěvo e nɔ sɔ́ nǔnyanyawiwa ɖó ajo lɛ́ é kpó wɛ wěɖexámɛ énɛ́ kan. (Nǔɖe. 2:20) Énɛ́ wú ɔ, ényí mɛɖé nɔ ván kan dó nǔkplɔ́nmɛ gǔfɔ́ndómawujítɔ́ lɛ́ tɔn lɛ́, alǒ nǔnyanyawiwa ɖěvo lɛ́ sísɔ́ ɖ’ajo wú ɔ, mɛxó agun tɔn lɛ́ ná bló tito bo yi ba ɛ kpɔ́n ǎ. Amɔ̌, nukúnɖíɖó ɖe ɖɔ é ná wá byɔ́ éɖée mɛ. Byɔ̌ jɛ́n mɛ mɔ̌hun ɖé ka ɖó ná to byɔ́ éɖée mɛ hwɛ̌ cóbɔ mǐ ná dó gbe è, alǒ ylɔ́ ɛ ɖɔ é ní wá kplé agun tɔn ɖé.

WǓVƐ́SEXÁMƐ JEXÓVA TƆN KPÓ NǓBLÁWǓKÚNÚMƐ TƆN KPÓ SÍN KPƆ́NDÉWÚ XWIXWEDÓ

16-17. (a) Étɛ́ Jexóva ka ba ɖɔ hwɛhutɔ́ lɛ́ ní wa? (Ezekiyɛ́li 18:32) (b) Nɛ̌ mɛxó agun tɔn lɛ́ ka sixú wa azɔ̌ ɖó kpɔ́ xá Jexóva gbɔn?

¹⁶ Étɛ́ mǐ ka kplɔ́n ɖo xóta ɖěbɔdóɖěwú atɔ́ɔ́n élɔ́ lɛ́ mɛ? Jexóva ba ɖɔ è ní sú kún dó nú mɛ ɖěbǔ ǎ! (Xa Ezekiyɛ́li 18:32.) É ba ɖɔ hwɛhutɔ́ lɛ́ ní wá dó hwɛ gbɔ xá émí. (2 Kɔ. 5:20) Énɛ́ wú wɛ Jexóva nɔ byɔ́ mɛsɛntɔ́ tɔn e ko jó è dó lɛ́ é hwebǐnu ɖɔ hwɛ yětɔn lɛ́ ní vɛ́ nú yě, bónú yě ní lɛ́ kɔ wá émí gɔ́n. È jɔ wǔ mɛxó agun tɔn lɛ́ bɔ yě nyí azɔ̌watɔ́gbɛ́ Jexóva tɔn lɛ́, ée yě ná ɖo tíntɛ́nkpɔ́n wɛ bo ná d’alɔ nǔwanyidotɔ́ lɛ́ bónú hwɛ yětɔn ná vɛ́ nú yě é.—Hlɔ̌. 2:4; 1 Kɔ. 3:9.

¹⁷ Dǒ nukún awǎjijɛ e nɔ ɖo jǐxwé hwenu e hwɛ e hwɛhutɔ́ lɛ́ hu lɛ́ é vɛ́ nú yě é mɛ kpɔ́n! Tɔ́ mǐtɔn jǐxwé tɔn Jexóva ɖésú nɔ j’awǎ hweɖébǔnu e lɛ̌ngbɔ́ tɔn e bú é ɖé lɛ́ kɔ wá agun ɔ mɛ é. Tamɛ linlin dó wǔvɛ́sexámɛ Jexóva tɔn, nǔbláwǔkúnúmɛ tɔn kpó xomɛnyínyɔ́ tɔn e mǐ ma jɛxá ǎ é kpó jí nɔ zɔ́n bɔ wǎn e mǐ yí n’i é nɔ ɖo jijɛjí wɛ.—Luk. 1:78.