Ezekiyɛ́li
39 “Hwɛ gbɛtɔ́ví è, ɖɔ nǔ e ná jɛ dó Gɔ̌gu wú é ɖ’ayǐ, bo ɖɔ n’i ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Gɔ̌gu, gǎn* ɖaxó Mɛcɛ́ki kpó Tubálu kpó tɔn è, un ná húzú kpan nukɔn we. 2 Un ná bló bɔ a ná lɛ́ kɔ, un ná xlɛ́ ali we, bo ná bló bɔ a ná gosín fí e jɛ zɔ hú gǎn ɖo totaligbé lɛ́ é, bo ná kplá we wá só Izlayɛ́li tɔn lɛ́ jí. 3 Un ná xo daswé* towe sín amyɔlɔ towe mɛ, bo ná bló bɔ gǎ towe lɛ́ ná j’ayǐ sín ɖisílɔ towe mɛ. 4 A ná j’ayǐ ɖo só Izlayɛ́li tɔn lɛ́ jí, hwi kpó ahwankpá towe lɛ́ bǐ kpó, gɔ́ nú togun e ná ɖo kpɔ́ xá we lɛ́ é. Un ná sɔ́ we ná nǔwlíxɛ alɔkpa lɛ́ bǐ kpó gběkanlin lɛ́ kpó, bɔ a ná nyí nǔɖuɖu nú yě.”’
5 “‘A ná j’ayǐ jɛ gle mɛ agbawungba, ɖó nyɛɖésúnɔ wɛ ɖɔ xó,’ wɛ Aklúnɔ Nǔbǐwúkpétɔ́ Jexóva ɖɔ.
6 “‘Un ná sɛ́ myɔ dó Magɔ́gu kpó mɛ ɖěɖěe nɔ nɔ tɔtɛ́ntinto lɛ́ mɛ ɖo ayijayǐ mɛ lɛ́ é kpó, bɔ è ná wá tuun ɖɔ nyɛ wɛ nyí Jexóva. 7 Un ná bló bɔ è ná tuun nyǐkɔ mímɛ́ ce ɖo togun ce Izlayɛ́li tɛ́ntin, un sɔ́ ná lɔn bɔ è ná sɔ́ nyǐkɔ mímɛ́ ce dó xo kɔ́ ɖě ǎ; bɔ akɔta lɛ́ ná wá tuun ɖɔ nyɛ wɛ nyí Jexóva, Mɛ mímɛ́ e ɖo Izlayɛ́li é.’
8 “‘Ɛɛn, nǔ énɛ́ jawě, bɔ é ná jɛnu,’ wɛ Aklúnɔ Nǔbǐwúkpétɔ́ Jexóva ɖɔ. ‘Azǎn e xó un ɖɔ é wɛ. 9 Mɛ e nɔ nɔ Izlayɛ́li sín toxo lɛ́ mɛ lɛ́ é ná tɔ́n bo ná sɔ́ ahwanfunnú lɛ́, énɛ́ wɛ nyí gǎglónú kpɛví lɛ́* kpó gǎglónú ɖaxó lɛ́ kpó, daswé* lɛ́ kpó gǎ lɛ́ kpó, kpo e è nɔ dó fun ahwan ná lɛ́ é* kpó hwǎn lɛ́ kpó dó flɔ́ myɔ. Yě ná zán nǔ énɛ́ lɛ́ dó flɔ́ myɔ xɔ xwe tɛ́nwe. 10 É ná byɔ́ ɖɔ yě ní yi gbo atín ɖo gle mɛ alǒ yi ba nakí ɖo zungbó lɛ́ mɛ ǎ, ɖó ahwanfunnú lɛ́ wɛ yě ná zán dó flɔ́ myɔ.’
“‘Yě ná yí nǔ ɖo ahwangbénu ɖo mɛ ɖěɖěe xo nǔ yětɔn lɛ́ yí é sí, bo ná vɔ mɛ ɖěɖěe vɔ nǔ yětɔn lɛ́ ɖ’ayǐ lɛ́ é,’ wɛ Aklúnɔ Nǔbǐwúkpétɔ́ Jexóva ɖɔ.
11 “‘Ðo gbe énɛ́ gbe ɔ, un ná ná yɔdo ɖé Gɔ̌gu ɖo fínɛ́, ɖo Izlayɛ́li, ɖo mɛ ɖěɖěe nɔ yi tomɛ gbɔn zǎnzǎnhwe jí xu* ɔ tɔn lɛ́ é sín tɔdo mɛ, bɔ tɔdo énɛ́ ná sú ali dó mɛ ɖěɖěe nɔ gbɔn fínɛ́ dín lɛ́ é. Fínɛ́ wɛ è ná ɖi Gɔ̌gu kpó ahwan tɔn wɔ̌búwɔ́bú ɔ bǐ kpó dó, bɔ è ná ylɔ́ fínɛ́ ɖɔ tɔdo Hamɔ́ni-Gɔ̌gu tɔn.* 12 Togun Izlayɛ́li tɔn ná zán sun tɛ́nwe dó ɖi yě bo ná dó slá wǔ nú to ɔ. 13 Mɛ e ɖo to ɔ mɛ lɛ́ é bǐ ná ɖ’alɔ ɖo yě ɖiɖi sín azɔ̌ ɔ mɛ, bɔ énɛ́ ná zɔ́n bɔ yě ná húzú mɛ nukúnɖéjí ɖo gbe e gbe un ná ɖe susu ce xlɛ́ é,’ wɛ Aklúnɔ Nǔbǐwúkpétɔ́ Jexóva ɖɔ.
14 “‘È ná sɔ́ azɔ̌ dó así nú súnnu ɖé lɛ́ bónú yě ná nɔ ɖo to ɔ mɛ gbɔn wɛ, bo ná nɔ ɖi cyɔ e kpo ɖo ayǐkúngban ɔ nukúnmɛ lɛ́ é, bo ná dó slá wǔ nú to ɔ. Yě ná kpo ɖo cyɔ lɛ́ biba sín azɔ̌ énɛ́ wú káká nú sun tɛ́nwe. 15 Ényí mɛ e ɖo to ɔ mɛ gbɔn wɛ lɛ́ é mɔ gbɛtɔ́ xú ɖé ɔ, yě ná nɔ sɔ́ wuntun ɖé ɖó akpá tɔn. Énɛ́ gúdo ɔ, mɛ ɖěɖěe è sɔ́ azɔ̌ dó así ná bónú yě ná nɔ ɖi mɛ lɛ́ é ná ɖi i dó tɔdo Hamɔ́ni-Gɔ̌gu tɔn mɛ. 16 Bɔ toxo ɖé ná lɛ́ ɖo fínɛ́ bɔ è ná nɔ ylɔ́ ɖɔ Hamɔ́na.* Bɔ yě ná bló bɔ to ɔ ná mɛ́.’
17 “Amɔ̌ hwɛ gbɛtɔ́ví è, nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Ðɔ nú xɛ alɔkpa lɛ́ bǐ kpó gběkanlin lɛ́ bǐ kpó ɖɔ: “Mi xo miɖée kplé bo wá. Mi xo miɖée kplé lɛ́ lɛ̌ dó vɔ̌sánú ce e sɔ́ nǔ ná nú mi wɛ un ɖe é, vɔ̌sánú ɖaxó ɖé ɖo só Izlayɛ́li tɔn lɛ́ jí. Mi ná ɖu lan bo ná nu hun. 18 Mi ná ɖu agbɔ̌nnɔ lɛ́ sín lan, bo ná nu gǎn ayǐkúngban ɔ jí tɔn lɛ́ sín hun: agbo lɛ́, lɛ̌ngbɔ́ lɛ́, gbɔ̌ lɛ́ kpó nyibú lɛ́ kpó, ɛɛn, yě bǐ wɛ nyí kanlin dó jǒ Basáni tɔn lɛ́. 19 Mi ná ɖu jǒ bɔ é ná jɛmɛ nú mi, bo ná nu hun káká bɔ é ná mú mi, ɖó vɔ̌sánú e un sɔ́ nǔ ná nú mi é wú.’”
20 “‘Mi ná ɖu sɔ́ lɛ́ kpó mɛ e nɔ kun ahwankɛkɛ́ lɛ́ é kpó sín lan, agbɔ̌nnɔ lɛ́ kpó ahwanfuntɔ́ alɔkpa lɛ́ bǐ kpó sín lan gɔ́ xo ɖo távo ce tó,’ wɛ Aklúnɔ Nǔbǐwúkpétɔ́ Jexóva ɖɔ.
21 “‘Un ná ɖe susu ce xlɛ́ ɖo akɔta lɛ́ tɛ́ntin, bɔ akɔta lɛ́ bǐ ná mɔ hwɛɖónúmɛ e un dɔn wá yě jí é kpó hlɔ̌nhlɔ́n* e un ɖe xlɛ́ ɖo tɛ́ntin yětɔn é kpó. 22 Bɛ́ sín gbe énɛ́ gbe ɔ, togun Izlayɛ́li tɔn ná tuun ɖɔ nyɛ wɛ nyí Jexóva Mawu yětɔn. 23 Bɔ akɔta lɛ́ ná wá tuun ɖɔ nǔwanyido togun Izlayɛ́li tɔn ɖésúnɔ tɔn, ɛɛn, gbejí e é ma nɔ nú mì ǎ é wú wɛ é yi kannumɔgbénu. Énɛ́ wú ɔ, un sɔ́ nukúnmɛ ce hwlá dó yě, bo jó yě nú kɛntɔ́ yětɔn lɛ́, bɔ yě bǐ kú hwǐ kú. 24 Un wa nǔ xá yě sɔgbe xá nǔblíblíwiwa yětɔn kpó hwɛhuhu yětɔn lɛ́ kpó, bo sɔ́ nukúnmɛ ce hwlá dó yě.’
25 “Énɛ́ wú ɔ, nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Un ná kplá Jakɔ́bu sín mɛ e yi kannumɔgbénu lɛ́ é lɛ́ kɔ, bo ná kú nǔbláwǔ nú togun Izlayɛ́li tɔn ɔ blěbú. Un ná jɛ hun dó nyǐkɔ mímɛ́ ce jí kpó akpakpa sɔ́ mɛ kpó. 26 Ée è ná ko dó winnyá yě ɖó gbejímanɔ núwiwa yětɔn lɛ́ bǐ wú gúdo é ɔ, yě ná nɔ ayijayǐ mɛ ɖo to yětɔn mɛ, bɔ mɛ ɖěbǔ ná dó xɛsi yě ǎ. 27 Hwenu e un ná kplá yě lɛ́ kɔ sín togun lɛ́ mɛ, bo ná xo yě kplé ɖó kpɔ́ sín kɛntɔ́ yětɔn lɛ́ sín to lɛ́ mɛ é ɔ, un ná lɛ́ ɖe xlɛ́ ɖɔ mɛ mímɛ́ wɛ un nyí ɖo tɛ́ntin yětɔn ɖo akɔta gěgé nukúnmɛ.’
28 “‘Hwenu e un ná sɛ́ yě dó kannumɔgbénu ɖo akɔta lɛ́ tɛ́ntin, bɔ énɛ́ gúdo ɔ, un ná xo yě kplé lɛ́ kɔ wá to yětɔn mɛ, bo ma ná jó yě mɛ ɖěbǔ dó ǎ é ɔ, yě ná wá tuun ɖɔ nyɛ wɛ nyí Jexóva Mawu yětɔn. 29 Un sɔ́ ná sɔ́ nukúnmɛ ce hwlá dó yě ɖě ǎ, ɖó un ná gba gbigbɔ ce kɔn nyi togun Izlayɛ́li tɔn jí,’ wɛ Aklúnɔ Nǔbǐwúkpétɔ́ Jexóva ɖɔ.”