Jelemíi

52 Xwe 21 wɛ Sedesiyási ɖó hwenu e é húzú axɔ́sú é, bɔ é kpa acɛ nú xwe 11 ɖo Jeluzalɛ́mu. Nɔ tɔn nɔ nyí Hamutálu, Jelemíi Libúnanu ɔ ví wɛ. 2 É wa nǔ e nylá ɖo Jexóva nukúnmɛ é lěe Yexoyakímu wa gbɔn é. 3 Xomɛsin Jexóva tɔn wú wɛ nǔ énɛ́ lɛ́ jɛ ɖo Jeluzalɛ́mu kpó Judáa kpó, bɔ wǎgbɔ tɔn ɔ, é nya yě sín nukɔn tɔn. Sedesiyási fɔ́n gǔ dó Babilɔ́nu xɔ́sú ɔ jí. 4 Ðo axɔ́súɖuɖu Sedesiyási tɔn sín xwe tɛ́nnɛgɔ́ ɔ mɛ, ɖo sun wǒgɔ́ ɔ sín azǎn wǒgɔ́ ɔ gbe ɔ, Babilɔ́nu xɔ́sú Nabukodonɔzɔ́ɔ* kpó ahwankpá tɔn bǐ kpó wá tɔ́n ahwan Jeluzalɛ́mu. Yě ján go dó è, bo mɛ dǒ lɛ́ lɛ̌ dó è. 5 È ján go dó toxo ɔ káká jɛ axɔ́súɖuɖu axɔ́sú Sedesiyási tɔn sín xwe 11gɔ́ ɔ mɛ.

6 Ðo sun ɛnɛgɔ́ ɔ sín azǎn tɛ́nnɛgɔ́ ɔ gbe ɔ, adɔ syɛ́n ɖo toxo ɔ mɛ káká bɔ é sɔ́ kpo nǔɖuɖu ɖě nú togun ɔ ɖo to ɔ mɛ ǎ. 7 Wǎgbɔ tɔn ɔ, yě tɔ́n dǒ toxo ɔ tɔn, bɔ sɔ́ja lɛ́ bǐ dɔn zǎn dó wǔ, bo gbɔn axɔ́sú ɔ sín jikpá kpá lobo hɔn tɔ́n sín toxo ɔ mɛ; yě gbɔn hɔntogbó e ɖo ahohó we lɛ́ tɛ́ntin é nu, hwenu e Kaludéenu lɛ́ lɛ́ lɛ̌ dó toxo ɔ é, lobo sɔ́ Alába sín ali ɔ ɖidó. 8 Amɔ̌, ahwankpá Kaludéenu lɛ́ tɔn kán wezun jɛ axɔ́sú Sedesiyási gúdo, bo xwedó wǔ tɔn ɖo gbětótló Jelíko tɔn mɛ, bɔ ahwangɔnu tɔn lɛ́ bǐ gba dó. 9 Énɛ́ gúdo ɔ, yě wlí axɔ́sú ɔ, bo kplá ɛ yi Babilɔ́nu xɔ́sú ɔ gɔ́n ɖo Hlibla, ɖo Hamáti to mɛ, bɔ é ɖó hwɛ n’i. 10 Babilɔ́nu xɔ́sú ɔ hu Sedesiyási sín vǐ lɛ́ ɖo nukún éɖésúnɔ* tɔn mɛ, bo lɛ́ hu axɔ́ví Judáa tɔn lɛ́ bǐ ɖo Hlibla fínɛ́. 11 Énɛ́ gúdo ɔ, Babilɔ́nu xɔ́sú ɔ tɔ́n nukún Sedesiyási, é sɔ́ ganvɔwlɔ dó blá ɛ, bo kplá ɛ yi Babilɔ́nu, lobo jó è nyi gan mɛ káká jɛ gbe e gbe é kú é.

12 Ðo sun atɔ́ɔ́ngɔ́ ɔ sín azǎn wǒgɔ́ ɔ gbe ɔ, énɛ́ wɛ nyí ɖo axɔ́súɖuɖu Babilɔ́nu xɔ́sú Nabukodonɔzɔ́ɔ* tɔn sín xwe 19gɔ́ ɔ mɛ ɔ, sɔ́ja e nɔ cɔ́ axɔ́sú ɔ lɛ́ é sín gǎn Nɛbuzaladáni wá Jeluzalɛ́mu; é wɛ lɛ́ nyí nǔjíkpɔ́ntɔ́ Babilɔ́nu xɔ́sú ɔ tɔn. 13 É dó xwé Jexóva tɔn, axɔ́sú ɔ sín xwé* kpó xwé e ɖo Jeluzalɛ́mu lɛ́ é bǐ kpó zo; é lɛ́vɔ́ dó xwé ɖaxó lɛ́ bǐ zo. 14 Ahwankpá Kaludéenu lɛ́ tɔn e ɖo kpɔ́ xá sɔ́ja e nɔ cɔ́ axɔ́sú ɔ lɛ́ é sín gǎn é blěbú mu ahohó e lɛ́ lɛ̌ dó Jeluzalɛ́mu lɛ́ é zin dɛ́.

15 Sɔ́ja e nɔ cɔ́ axɔ́sú ɔ lɛ́ é sín gǎn Nɛbuzaladáni kplá wamamɔnɔ ɖé lɛ́ yi kannumɔgbénu, gɔ́ nú togun ɔ sín mɛ e kpo, bɔ è jó dó nyi toxo ɔ mɛ lɛ́ é. É lɛ́ kplá mɛ e ko hɔn yi su Babilɔ́nu xɔ́sú ɔ lɛ́ é kpó alɔlyɛnzɔ́watɔ́ alɔsekpɛ́nnánɔ e kpo lɛ́ é kpó yi kannumɔgbénu. 16 Amɔ̌, sɔ́ja e nɔ cɔ́ axɔ́sú ɔ lɛ́ é sín gǎn Nɛbuzaladáni jó mɛ e jɛ hɛ̌n klókló ɖo to ɔ mɛ é ɖé lɛ́ dó, bónú yě ná nyí vǐwungbowúkpénukúndótɔ́ kpó azɔ̌watɔ́ e è ɖó azɔ̌ kɔ jí ná lɛ́ é kpó.

17 Kaludéenu lɛ́ gba ganvɔdotín e ɖo xwé Jexóva tɔn gbe lɛ́ é, kɛkɛ́ví lɛ́ kpó basya ɖaxó e è sɔ́ ganvɔ dó bló, bɔ é ɖo xwé Jexóva tɔn gbe é kpó hánnyá, bo bɛ́ ganvɔ lɛ́ bǐ yi Babilɔ́nu. 18 Yě lɛ́ bɛ́ afíngannú lɛ́, pɛ́li lɛ́, zocínú lɛ́, gannú lɛ́, kɔ́fu lɛ́ kpó nǔ e è sɔ́ ganvɔ dó bló ná, bɔ è nɔ zán dó wa sinsɛnzɔ́ ná ɖo sinsɛnxɔ ɔ mɛ lɛ́ é bǐ kpó. 19 Sɔ́ja e nɔ cɔ́ axɔ́sú ɔ lɛ́ é sín gǎn fɔ basya lɛ́, akánhɛnnú lɛ́, gannú lɛ́, afíngannú lɛ́, zogbɛ́nhɛnnú lɛ́, kɔ́fu lɛ́ kpó gannú e è sɔ́ siká akú kpó kpatágan akú kpó dó bló lɛ́ é kpó. 20 Ganvɔ e è zán dó bló dotín we lɛ́, basya ɖaxó ɔ, nyibúsú 12 e è sɔ́ ganvɔ dó bló ná bɔ yě ɖo basya ɖaxó ɔ glɔ́ lɛ́ é kpó kɛkɛ́ví e axɔ́sú Salomɔ́ɔ bló nú xwé Jexóva tɔn lɛ́ é kpó é ɔ, è sixú da ǎ.

21 Dotín lɛ́ ɖokpó ɖokpó sín jǐyiyi nyí awabá* 18, bɔ nǔjlɛ́kan e ɖó awabá 12 é sixú lɛ́ lɛ̌ dó è; dotín lɛ́ ɖokpó ɖokpó ɖó alɔví ɛnɛ sín gblǒ,* bo ɖó so ɖo xomɛ. 22 Ganvɔ wɛ è dó bló ata e ɖo dotín nukɔntɔn ɔ jí é ná; bɔ ata ɖokpó sín jǐyiyi nyí awabá atɔ́ɔ́n; ganvɔ wɛ è dó bló ɖɔ kpó glenádi kpó e lɛ́ lɛ̌ dó ata ɔ lɛ́ é bǐ ná. Dotín wegɔ́ ɔ cí nukɔntɔn ɔ ɖɔhun pɛ́pɛ́pɛ́, gɔ́ nú glenádi lɛ́ lɔmɔ̌. 23 Glenádi 96 wɛ ɖo wěxo; amɔ̌, glenádi 100 wɛ nyí glenádi e lɛ́ lɛ̌ dó ɖɔ ɔ lɛ́ é bǐ.

24 Sɔ́ja e nɔ cɔ́ axɔ́sú ɔ lɛ́ é sín gǎn lɛ́vɔ́ kplá Seláya vɔ̌sánúxwlémawutɔ́gán ɔ, Sofoníi vɔ̌sánúxwlémawutɔ́ wegɔ́ ɔ kpó hɔnjínɔtɔ́ atɔn lɛ́ kpó. 25 É kplá mɛ élɔ́ lɛ́ sín toxo ɔ mɛ: hɔnmɛzɔ́watɔ́ e nyí nukúnkpénǔwútɔ́ ɖo sɔ́ja lɛ́ nu é ɖokpó, mɛ e sɛkpɔ́ axɔ́sú ɔ hú gǎn ɖo toxo ɔ mɛ lɛ́ é tɛ́nwe, gɔ́ nú wěgbójínɔtɔ́ ahwangán ɔ tɔn e nɔ xo mɛ lɛ́ kplé ɖo to ɔ mɛ é kpó to ɔ mɛ nu kpaa e kpo ɖo toxo ɔ mɛ é 60 kpó. 26 Sɔ́ja e nɔ cɔ́ axɔ́sú ɔ lɛ́ é sín gǎn Nɛbuzaladáni kplá yě wá nú Babilɔ́nu xɔ́sú ɔ ɖo Hlibla. 27 Babilɔ́nu xɔ́sú ɔ xo yě bo hu yě ɖo Hlibla ɖo Hamáti to mɛ. Mɔ̌ mɛ ɔ, è ɖe Judáa sín to tɔn mɛ, bo kplá ɛ yi kannumɔgbénu.

28 Mɛ nabí e Nabukodonɔzɔ́ɔ* kplá yi kannumɔgbénu lɛ́ é ɖíe: ɖo axɔ́súɖuɖu tɔn sín xwe tɛ́nwegɔ́ ɔ mɛ ɔ, Jwifu 3 023 wɛ é kplá yi.

29 Ðo axɔ́súɖuɖu Nabukodonɔzɔ́ɔ* tɔn sín xwe 18gɔ́ ɔ mɛ ɔ, mɛ* 832 wɛ è kplá sín Jeluzalɛ́mu.

30 Ðo axɔ́súɖuɖu Nabukodonɔzɔ́ɔ* tɔn sín xwe 23gɔ́ ɔ mɛ ɔ, sɔ́ja e nɔ cɔ́ axɔ́sú ɔ lɛ́ é sín gǎn Nɛbuzaladáni kplá Jwifu 745 yi kannumɔgbénu.

Nú è lɛ́n bǐ kplé ɔ, é bló gbɛtɔ́* 4 600 wɛ è kplá yi kannumɔgbénu.

31 Hwenu e Judáa xɔ́sú Yexoyakíni bló xwe 37 ɖo kannumɔgbénu é ɔ, ɖo sun 12gɔ́ ɔ sín azǎn 25gɔ́ ɔ gbe ɔ, Babilɔ́nu xɔ́sú Ewílu-Mɛlodáki ɖe Judáa xɔ́sú Yexoyakíni nyi te* sín gankpá mɛ, ɖo xwe e xwe é ɖu axɔ́sú é. 32 É ɖɔ xó xá ɛ kpó xomɛnyínyɔ́ kpó, bo wlí yɛ̌yi n’i hú gǎn axɔ́sú ɖěvo e ɖo kpɔ́ xá ɛ ɖo Babilɔ́nu lɛ́ é. 33 Énɛ́ ɔ, Yexoyakíni ɖe gantɔ́ sín awu tɔn lɛ́, bo nɔ ɖu nǔ xá axɔ́sú ɔ gbe bǐ gbe, nú gbɛhwenu tɔn e kpo é bǐ. 34 Babilɔ́nu xɔ́sú ɔ ɖɔ bɔ è nɔ ná ɛ nǔɖuɖu ayǐhɔ́ngbe ayǐhɔ́ngbe, káká jɛ gbe e gbe é kú é, ɛɛn, nú gbɛhwenu tɔn e kpo é bǐ.