Jelemíi
30 Xó e Jexóva ɖɔ nú Jelemíi é ɖíe: 2 “Nǔ e Jexóva, Mawu Izlayɛ́li tɔn ɖɔ é ɖíe: ‘Wlǎn xó e un ɖɔ nú we lɛ́ é bǐ dó wěma ɖokpó mɛ. 3 Ðó “éɖíe, hwe ɔ nu jawě,” wɛ Jexóva ɖɔ, “bɔ un ná xo mɛ e yi kannumɔgbénu ɖo togun ce Izlayɛ́li kpó Judáa kpó mɛ lɛ́ é kplé,” wɛ Jexóva ɖɔ, “bɔ un ná kplá yě lɛ́ kɔ wá to e un ná tɔ́gbó yětɔn lɛ́ é mɛ, bɔ yě ná lɛ́vɔ́ nɔ mɛ.”’”
4 Jexóva ɖɔ xó nú Izlayɛ́li kpó Judáa kpó.
5 Nǔ e Jexóva ɖɔ é ɖíe:
“Mǐ se xɛsi sín xósúsú;
adohu adohu ɖe, fífá ɖe ǎ.
6 Kɛnklɛ́n, kanbyɔ́ ɖɔ súnnu ka sixú ji vǐ a jí.
Étɛ́wú un ka mɔ súnnu hlɔ̌nhlɔ́nnɔ lɛ́ bǐ bɔ yě sɔ́ alɔ ɖó adɔgo jí
nyɔ̌nu e ɖo vǐ ji wɛ é ɖɔhun lo?
Étɛ́wú mɛ lɛ́ bǐ sín nukúnmɛ ka wé?
7 Áo! Azǎn baɖabaɖa ɖé wɛ azǎn énɛ́ nyí.
Mɔ̌hunkɔtɔn ɖě ko tíin ǎ,
wǔvɛ́ hwenu wɛ é nyí nú Jakɔ́bu.
Amɔ̌, è ná hwlɛ́n ɛ gán sín mɛ.”
8 “Ðo azǎn énɛ́ gbe ɔ,” wɛ Jexóva ahwankpá lɛ́ tɔn ɖɔ, “un ná wɛ́n agbanhɛnkpo ɔ sín kɔ towe, bo ná tlɛ́n ajǎkɛn* towe ɖó we; bɔ jǒnɔ* lɛ́ sɔ́ ná sɔ́ ɛ* dó ɖó kannumɔ yětɔn ɖě ǎ. 9 Yě ná sɛn Jexóva Mawu yětɔn, bo ná sɛn axɔ́sú yětɔn Davídi e un ná sɔ́ ɖó yě nu é.”
10 “Hwɛ mɛsɛntɔ́ ce Jakɔ́bu, ma ɖi xɛsi ó,” wɛ Jexóva ɖɔ,
“Izlayɛ́li è, ma nú ado hu we ó.
Ðó un ná hwlɛ́n we sín fí línlín,
bo ná hwlɛ́n kúnkan towe sín to e mɛ yě yi kannumɔgbénu ɖe é mɛ.
Jakɔ́bu ná lɛ́ kɔ, bo ná nɔ vivo mɛ, bɔ mɛ ɖěbǔ sɔ́ ná dó tagba n’i ǎ,
lobɔ mɛ ɖěbǔ ná dó xɛsi yě ǎ.”
11 “Ðó un ɖo kpɔ́ xá we,” wɛ Jexóva ɖɔ, “bo ná hwlɛ́n we.
Amɔ̌, un ná sú kún dó nú nǔ ɖo akɔta e mɛ un fúnfún we kpé gbɔn lɛ́ é bǐ mɛ;
amɔ̌, hwɛ ɔ, un ná sú kún dó nú we ǎ.
Un ná kplɔ́n we,* lěe é jɛxá gbɔn é,
un ná gɔn tó dɔn nú we ɖo ali ɖěbǔ nu ǎ.”
12 Ðó nǔ e Jexóva ɖɔ é ɖíe:
“Amasin ɖě ɖe bo ná gbɔ azɔn towe ǎ.
Akpa towe sixú kú ǎ.
13 Mɛ ɖěbǔ ɖe bo ná sa vo dó ta towe mɛ ǎ,
nǔ e ná hu agadá towe é ɖě ɖe ǎ.
Amasin ɖě ɖe nú we ǎ.
14 Xɔnnɔ towe e a yí wǎn ná tawun lɛ́ é bǐ wɔn we.
Yě sɔ́ nɔ ba we mɔ ɖě ǎ.
Ðó un xo we lěe kɛntɔ́ ɖé ná xo we gbɔn é,
bo dɔn tó nú we lěe dǎkaxotɔ́ ɖé nɔ bló gbɔn é,
ɖó nǔwanyido towe ɖaxó ɖaxó lɛ́ kpó hwɛ tobutóbú e a hu lɛ́ é kpó wú.
15 Étɛ́wú a ka ɖo xó sú wɛ ɖó azɔn towe wú?
Wǔvɛ́ towe ná vɔ gbeɖé ǎ!
Un wa mɔ̌ nú we,
ɖó nǔwanyido towe ɖaxó ɖaxó lɛ́ kpó hwɛ tobutóbú e a hu lɛ́ é kpó wú.
16 Énɛ́ wú ɔ, è ná vúnvún mɛ e ɖo vǔnvún vúnvún we wɛ lɛ́ é bǐ,
bɔ kɛntɔ́ towe lɛ́ lɔ bǐ ná yi kannumɔgbénu.
Mɛ e ɖo nǔ towe bɛ́ wɛ lɛ́ é ɔ, è ná bɛ́ nǔ yě lɔ tɔn lɛ́,
mɛ e ɖo vivɔ we wɛ lɛ́ é ɔ, un ná jó yě bǐ bɔ è ná vɔ yě lɔ.”
17 “Amɔ̌, un ná gbɔ azɔn nú we, bo ná hu akpa towe lɛ́,” wɛ Jexóva ɖɔ,
“yě nɔ ylɔ́ we ɖɔ mɛ e è gbɛ́ é, bo nɔ ɖɔ:
‘Sinyɔ́ɔ, mɛ e mɛɖé ma nɔ ba ǎ é’ có, un ná wa mɔ̌.”
18 Nǔ e Jexóva ɖɔ é ɖíe:
“Un ɖo goxɔ Jakɔ́bu tɔn lɛ́ sín kannumɔ lɛ́ xo kplé wɛ,
bɔ un ná kú nǔbláwǔ nú goxɔ tɔn lɛ́.
È ná vɔ́ toxo ɔ gbá ɖó kɔ́ta tɔn jí,
bɔ atɔxwɛ syɛ́nsyɛ́n ɔ ná nɔ te ɖo fí e é ɖe ɖ’ayǐ é.
19 Kúdídó kpó nǔkiko sín gbe kpó ná nɔ gosín gɔ̌n yětɔn.
20 Vǐ tɔn lɛ́ ná wá cí lěe yě ɖe gbɔn ɖ’ayǐ xóxó é,
yě ná húzú togun syɛ́nsyɛ́n ɖé ɖo nukɔn ce.
Un ná dɔn tó nú yadónúmɛtɔ́ tɔn lɛ́ bǐ.
21 Mɛ éɖésúnɔ tɔn ɖokpó wɛ ná nyí susunɔ tɔn,
bɔ mɛ e ná kp’acɛ dó jǐ tɔn é ná tɔ́n ɖo kúnkan tɔn lɛ́ mɛ.
Un ná byɔ́ ɛ ɖɔ é ní sɛkpɔ́ mì, bɔ é ná sɛkpɔ́ mì.”
“Ðó, nú é ma nyí mɔ̌ ǎ ɔ, mɛ̌ ka ná glá* bo ná sɛkpɔ́ mì?” wɛ Jexóva ɖɔ.
22 “Mi ná húzú togun ce, bɔ un ná nyí Mawu mitɔn.”
23 Éɖíe! Jɔhɔn ɖaxó Jexóva tɔn ná nyi kpó zǐngídi ɖaxó kpó,
jɔhɔn syɛ́nsyɛ́n e nɔ za nǔ é ná cyɔ́n mɛdídá lɛ́ sín ta.
24 Ényí Jexóva ma wa nǔ sɔgbe xá linlin e ɖo ayi tɔn mɛ lɛ́ é, bo bló yi fó mlɛ́mlɛ́ ǎ ɔ,
xomɛsin syɛ́nsyɛ́n e jí é ɖe é ná fá ǎ.
Ðo azǎn gǔdo gúdo tɔn lɛ́ mɛ ɔ, mi ná mɔ nukúnnú jɛ mɛ.