Jelemíi

25 Ðo axɔ́súɖuɖu Judáa xɔ́sú Yexoyakímu, éé nyí Joziyási ví é tɔn sín xwe ɛnɛgɔ́ ɔ mɛ ɔ, ɛɛn, ɖo axɔ́súɖuɖu Babilɔ́nu xɔ́sú Nabukodonɔzɔ́ɔ* tɔn sín xwe nukɔntɔn ɔ mɛ ɔ, Mawu ɖɔ xó nú Jelemíi dó mɛ e ɖo Judáa lɛ́ é bǐ wú. 2 Nǔ e gbeyíɖɔ Jelemíi ɖɔ dó mɛ e nɔ nɔ Judáa lɛ́ é bǐ kpó mɛ e nɔ nɔ Jeluzalɛ́mu lɛ́ é bǐ kpó wú é* ɖíe:

3 “Sín xwe 23 ɖíe wɛ Jexóva ɖo xó ɖɔ nú mi wɛ, énɛ́ wɛ nyí, sín axɔ́súɖuɖu Judáa xɔ́sú Joziyási, Amɔ́ni ví ɔ tɔn sín xwe 13gɔ́ ɔ mɛ káká jɛ égbé, bɔ un nɔ ɖɔ xó nú mi azɔn gěgé,* amɔ̌, mi nɔ ɖótó ǎ. 4 Bɔ Jexóva sɛ́ mɛsɛntɔ́ tɔn gbeyíɖɔ lɛ́ bǐ dó mi, é sɛ́ yě dó mi azɔn gěgé,* amɔ̌, mi nɔ ɖótó yě, alǒ tɛ́ tó bo se xó yětɔn ǎ. 5 Yě nɔ ɖɔ: ‘Mi lɛ́ kɔ, mi kɛnklɛ́n, mi mɛ ɖokpó ɖokpó ní jó ali nyanya e jí mi ɖe é kpó nǔ nyanya e mi nɔ wa lɛ́ é kpó dó; énɛ́ ɔ, mi ná kpo ɖo to e Jexóva ná mi sín hwenu línlín ɖíe é mɛ nɔ wɛ nú hwenu línlín, ɛɛn, to e é ná mi kpó tɔ́gbó mitɔn lɛ́ kpó é. 6 Mi ma xwedó mawu ɖěvo lɛ́, bo sɛn yě, lobo ɖe kɔ́ nú yě dó dó xomɛsin nú mì gbɔn alɔ mitɔn núwiwa gblamɛ ó; é ma nyí mɔ̌ ǎ ɔ, un ná bló bɔ awě ná xo mi.’

7 “‘Amɔ̌, mi ɖótó mì ǎ,’ wɛ Jexóva ɖɔ. ‘É nyɔ́ wa ɔ, mi dó xomɛsin nú mì gbɔn alɔ mitɔn núwiwa gblamɛ, bo zɔ́n bɔ awě xo mi.’

8 “Énɛ́ wú ɔ, nǔ e Jexóva ahwankpá lɛ́ tɔn ɖɔ é ɖíe: ‘“Ðó mi ma se tónú nú xó ce lɛ́ ǎ wútu ɔ, 9 un ɖo wɛn sɛ́ dó xwédo e ɖo totaligbé lɛ́ é bǐ wɛ,” wɛ Jexóva ɖɔ, “un ɖo wɛn sɛ́ dó Babilɔ́nu xɔ́sú Nabukodonɔzɔ́ɔ mɛsɛntɔ́ ce ɔ wɛ, bɔ un ná bló bɔ yě ná tɔ́n ahwan to élɔ́, mɛ e ɖ’é mɛ lɛ́ é kpó akɔta e lɛ́ lɛ̌ dó è lɛ́ é bǐ kpó. Un ná sú kún yětɔn dó, bo ná bló bɔ yě ná húzú nǔ e xyɔ́ wǔ é, lobo lɛ́ húzú nǔ kiko, bɔ kún yětɔn ná sú dó káká sɔ́yi. 10 Un ná ɖó nǔ agbojlaka ɖúɖú, awǎjijɛ sín xósúsú yětɔn, asisúnɔ sín gbe kpó yawó sín gbe kpó nu. Un ná ɖó nǔ sé sín gbe kpó myɔ sín wěziza kpó nu. 11 Bɔ è ná kíjá to élɔ́ bǐ bɔ é ná húzú nǔ e xyɔ́ wǔ é ɖé, bɔ akɔta énɛ́ lɛ́ ná sɛn Babilɔ́nu xɔ́sú ɔ nú xwe 70.”’

12 “‘Amɔ̌, nú xwe 70 lɛ́ wá vivɔnu ɔ, un ná byɔ́ Babilɔ́nu xɔ́sú ɔ kpó akɔta énɛ́ kpó ɖɔ yě ní ɖó nǔwanyido yětɔn sín gbe,’* wɛ Jexóva ɖɔ, ‘bɔ un ná bló bɔ Kaludéenu lɛ́ sín to ná húzú gbětótló e jɛ vɔ̌ é káká sɔ́yi. 13 Un ná bló bɔ xó ɖěɖěe un ɖɔ dó to élɔ́ wú lɛ́ é bǐ ná jɛnu, énɛ́ wɛ nyí nǔ e è wlán dó wěma élɔ́ mɛ, bɔ Jelemíi ɖɔ ɖ’ayǐ dó akɔta lɛ́ bǐ wú é. 14 Ðó akɔta gěgé kpó axɔ́sú ɖaxó gěgé kpó ná sɔ́ yě dó ɖó kannumɔ, bɔ un ná sú axɔ́ yě sɔgbe xá nǔ e yě wa lɛ́ é bo ná lɛ́ sú yě sɔgbe xá alɔ yěɖésúnɔ tɔn núwiwa.’”

15 Ðó nǔ e Jexóva, Mawu Izlayɛ́li tɔn ɖɔ nú mì é ɖíe: “Yǐ kɔ́fu élɔ́ e mɛ xomɛsin ce sín vɛ̌ɛn ɖe é ɖo alɔ ce mɛ, bo bló bónú akɔta e gɔ́n un sɛ́ we dó lɛ́ é bǐ ní nu. 16 Yě ná nu bo ná fún sa, lobo ná wa nǔ taɖunɔ ɖɔhun ɖó hwǐ e un ɖo sísɛ́dó tɛ́ntin yětɔn wɛ é wútu.”

17 Énɛ́ ɔ, un yí kɔ́fu ɔ ɖo Jexóva lɔ mɛ, bo bló bɔ akɔta ɖěɖěe gɔ́n Jexóva sɛ́ mì dó lɛ́ é bǐ nu: 18 bɛ́ sín Jeluzalɛ́mu, toxo Judáa tɔn lɛ́, axɔ́sú tɔn lɛ́ kpó axɔ́ví tɔn lɛ́ kpó jí, bo ná bló bɔ yě ná kíjá, bo húzú nǔ e xyɔ́ wǔ é, nǔ kiko kpó nudómɛ kpó lěe é ɖe gbɔn égbé é; 19 énɛ́ gúdo ɔ, un ná Ejípu xɔ́sú Falawɔ́ɔn, mɛsɛntɔ́ tɔn lɛ́, axɔ́ví tɔn lɛ́ kpó mɛ tɔn lɛ́ bǐ kpó, 20 gɔ́ nú toɖévomɛnu e nɔ nɔ tɛ́ntin yětɔn lɛ́ é bǐ, axɔ́sú e nɔ nɔ Usi to mɛ lɛ́ é bǐ, axɔ́sú e nɔ nɔ Filisitɛ́ɛn lɛ́ to mɛ lɛ́ é bǐ, Acikelɔ́ni, Gaza, Eklɔ́ni kpó mɛ ɖěɖěe kpo ɖo Acidɔ́di lɛ́ é kpó; 21 Edɔ́mu, Mɔwábu kpó Amumɔ́ɔ ví lɛ́ kpó; 22 Tíi xɔ́sú lɛ́ bǐ, Sidɔ́ɔn xɔ́sú lɛ́ bǐ kpó tɔtɛ́ntinto xu ɔ tɔn lɛ́ sín axɔ́sú lɛ́ kpó; 23 Dedáni, Tema, Bǔzi kpó mɛ ɖěɖěe xwlɛ́ gekplá yětɔn lɛ́ é bǐ kpó; 24 Alabíinu lɛ́ sín axɔ́sú lɛ́ bǐ kpó toɖévomɛnu e nɔ nɔ gbětótló ɔ mɛ lɛ́ é sín axɔ́sú lɛ́ bǐ kpó; 25 Zimúli xɔ́sú lɛ́ bǐ, Elámu xɔ́sú lɛ́ bǐ kpó Mɛ̌di xɔ́sú lɛ́ bǐ kpó; 26 axɔ́sú totaligbé tɔn e sɛkpɔ́ lɛ́ é kpó éé ɖo zɔ lɛ́ é kpó bǐ, ɖějɛɖěgúdo, gɔ́ nú axɔ́súɖuto ayǐkúngban jí tɔn ɖěvo e ɖo ayǐkúngban ɔ nukúnmɛ lɛ́ é bǐ; bɔ Cecáki* xɔ́sú ɔ ná nu bɔ dó yě wú.

27 “Bɔ a ɖó ná ɖɔ nú yě ɖɔ: ‘Nǔ e Jexóva ahwankpá lɛ́ tɔn, Mawu Izlayɛ́li tɔn ɖɔ é ɖíe: “Mi nu, mi mú, mi vi, bo j’ayǐ, káká bo ma sɔ́ kpé wú bo sí te ó, ɖó hwǐ e un ɖo sísɛ́dó tɛ́ntin mitɔn wɛ é wútu.”’ 28 Bɔ ényí yě gbɛ́ ɖɔ émí kún ná yí kɔ́fu e ɖo alɔ towe mɛ é bo nu ó hǔn, ɖɔ nú yě ɖɔ: ‘Nǔ e Jexóva ahwankpá lɛ́ tɔn ɖɔ é ɖíe: “Mi ɖó ná nu! 29 Ðó éɖíe, ényí un sɔ́ awě dó xo toxo e wú nyǐkɔ ce ɖe é jɛ nukɔn ɔ, è ná dɔn tó nú mi ǎ wɛ a?”’

“‘È ná gɔn tó dɔn nú mi ǎ, ɖó un ná sɛ́ hwǐ dó mɛ e nɔ nɔ ayǐkúngban ɔ jí lɛ́ é bǐ,’ wɛ Jexóva ahwankpá lɛ́ tɔn ɖɔ.

É ná dó gbe syɛ́nsyɛ́n dó nɔtɛn tɔn tɛgbɛ tɔn ɔ jí.

Éɖésúnɔ wɛ ná ɖó hwɛ nú gbɛtɔ́* lɛ́ bǐ.

É ná jó mɛdídá lɛ́ nú hwǐ,’ wɛ Jexóva ɖɔ.

32 Nǔ e Jexóva ahwankpá lɛ́ tɔn ɖɔ é ɖíe:

33 “‘Bɔ ɖo gbe énɛ́ gbe ɔ, Jexóva ná hu mɛ, sín fí e ayǐkúngban ɔ bɛ́ sín é yi fí e é kponu ɖó é. È ná nɔ aluwɛ mɛ dó ta yětɔn mɛ ǎ, mɔ̌ jɛ́n è ma ná xo yě kplé, alǒ ɖi yě ǎ é nɛ́. Yě ná cí kanlinmí ɖɔhun ɖo ayǐkúngban ɔ nukúnmɛ.’

34 Lɛ̌ngbɔ́nyitɔ́ lɛ́ mi, mi dó gbɛvíhan, mi sú xó!