Ezayíi
19 Hwɛ e è ɖɔ dó Ejípu é ɖíe:
Éɖíe! Jexóva zɔn akpɔ́kpɔ́ e ɖo wezun jí é jí bo jawě Ejípu.
Nǔmɛsɛn maɖótaɖé Ejípu tɔn lɛ́ ná sísɔ́ ɖo nukɔn tɔn,
bɔ Ejípunu lɛ́ sín ayi ná gba dó.
2 “Un ná bló bɔ Ejípunu ɖě ná sí te dó ɖě jí,
bɔ yě ná tɔ́n ahwan yěɖée lɛ́,
mɛ ɖokpó ɖokpó ná sí te dó nɔví tɔn kpó nɔzo tɔn kpó jí,
toxo ɖě ná sí te dó ɖě jí, axɔ́súɖuto ɖě ná sí te dó ɖě jí.
3 Ejípunu lɛ́ sín ayi ná gba dó,
bɔ un ná húzú tuto yětɔn lɛ́.
Yě ná gbɔ bo lílɛ́ kpanta nǔmɛsɛn maɖótaɖé lɛ́,
nǔnyíylɔ́númɛtɔ́ lɛ́, bokantɔ́ lɛ́ kpó amɔɛkantɔ́ lɛ́ kpó.
4 Un ná jó Ejípu dó alɔ mɛ nú gǎn tasyɛ́ntɔ́ ɖé,
bɔ axɔ́sú hunnylámɔnɔ ɖé ná kp’acɛ dó yě nu,” wɛ Aklúnɔ nǔgbó ɔ, Jexóva ahwankpá lɛ́ tɔn ɖɔ.
5 Sin e ɖo xu mɛ é ná xú,
bɔ tɔsisa ɔ ná mɛ lobo ná xú.
6 Tɔsisa lɛ́ ná hwɛ́n wǎn gblégblé;
Nilu Ejípu tɔn sín tɔhwín lɛ́ ná ɖe kpo, bo ná mɛ.
Fántín lɛ́ kpó fɛ́n lɛ́ kpó ná nyɔ.
7 Gběhan e ɖo tɔsisa Nilu tó káká yi lɛ́ é, ɛɛn, éé ɖo Nilu sín nu lɛ́ é,
kpó ayǐkúngban e jí è dó nǔkún ɖó ɖo Nilu sín tó káká yi lɛ́ é bǐ kpó ná xú.
Jɔhɔn ná d’alɔ mɛ, bɔ é sɔ́ ná tíin ǎ.
8 Hwehutɔ́ lɛ́ ná byɔ́ aluwɛ mɛ,
mɛ e nɔ ɖó mlɛ dó Nilu mɛ lɛ́ é ná ná alě,
bɔ mɛ ɖěɖěe nɔ nyi ɖɔ dó tɔ mɛ lɛ́ é sín kɛ́n sɔ́ ná sɔ atɛ́n ǎ.
9 Mɛ ɖěɖěe nɔ zán lɛ̌ɛnkan dó lɔn avɔ ná lɛ́ é
kpó mɛ ɖěɖěe nɔ lɔn avɔ wěwé ɖo avɔlɔnnú jí lɛ́ é kpó ɔ, è ná dó wínnyá yě.
10 Awakanmɛ ná gbɔjɔ́ avɔlɔntɔ́ lɛ́;
jokóxotɔ́ e è yí lɛ́ é bǐ ná nɔ aluwɛ mɛ.
11 Axɔ́ví Sowáan tɔn lɛ́ jɔ xlo.
Wěɖexámɛtɔ́ Falawɔ́ɔn tɔn e nyɔ́nǔi hú gǎn lɛ́ é nɔ ɖe wě e ma nyi ta fí ɖě ǎ é xá mɛ.
Nɛ̌ a ka ná ɖɔ nú Falawɔ́ɔn ɖɔ:
“Nǔnywɛ́tɔ́ lɛ́ sín kún mɛ wɛ un gosín,
axɔ́sú hwexónu tɔn lɛ́ sín kún mɛ wɛ un gosín” gbɔn?
12 Bɔ fítɛ́ súnnu nǔnywɛ́tɔ́ towe lɛ́ ka ɖe?
Nú yě tuun gbeta e kɔn Jexóva ahwankpá lɛ́ tɔn wá dó Ejípu wú é hǔn, nǔ yě ní ɖɔ nú we.
13 Axɔ́ví Sowáan tɔn lɛ́ nɔ wa xlonɔnú;
è blɛ́ axɔ́ví Nɔfu* tɔn lɛ́;
akɔta tɔn lɛ́ sín gǎn lɛ́ bló bɔ Ejípu zɛ gbě.
14 Jexóva kɔn gbigbɔ e nɔ dɔn nǔ wlú é dó jǐ tɔn;
yě bló bɔ Ejípu zɛ gbě ɖo nǔ ɖěbǔ e é nɔ wa é mɛ,
ahannumúnɔ e ɖo sa fún wɛ gbɔn nǔ e é vi é mɛ é ɖɔhun.
15 Ejípu ná ɖó azɔ̌ ɖě bo ná wa ǎ,
ta alǒ sí, ala alǒ fɛ́n,* ná ɖó azɔ̌ ɖě bo ná wa ǎ.
16 Ðo azǎn énɛ́ gbe ɔ, Ejípu ná cí nyɔ̌nu lɛ́ ɖɔhun, é ná sísɔ́, bɔ ado ná lɛ́ hu i, ɖó alɔ adǎngblɔ́nnúmɛ tɔn e Jexóva ahwankpá lɛ́ tɔn sɔ́ dó jǐ tɔn é wú. 17 Judáa to ɔ ná húzú xɛsidómɛ sín nǔ ɖaxó nú Ejípu. È ké xó tɔn lě ɔ, xɛsi ná jɛ yě jí, ɖó gbeta e kɔn Jexóva ahwankpá lɛ́ tɔn wá dó yě wú é wú.
18 Azǎn énɛ́ gbe ɔ, toxo atɔ́ɔ́n ná ɖo Ejípu to ɔ mɛ, bo ná nɔ dó Kanáanu lɛ́ sín gbe, lobo ná xwlé nǔ ɖɔ émí ná nɔ gbejí nú Jexóva ahwankpá lɛ́ tɔn. È ná ylɔ́ toxo ɖokpó ɖɔ Toxo kún súsú dó nú nǔ tɔn.
19 Azǎn énɛ́ gbe ɔ, vɔ̌sákpe Jexóva tɔn ɖokpó ná ɖo Ejípu to ɔ tɛ́ntin, bɔ dotín e sɔ́ Jexóva su é ɖé ná ɖo dogbó to ɔ tɔn jí. 20 Vɔ̌sákpe ɔ ná nyí wuntun ɖé, bo ná nyí kúnnuɖenú ɖé nú Jexóva ahwankpá lɛ́ tɔn ɖo Ejípu to mɛ; yě ná sú xó ylɔ́ Jexóva ɖó yadónúmɛtɔ́ lɛ́ wú, bɔ é ná sɛ́ mɛhwlɛ́ngántɔ́ ɖé dó yě, ɛɛn, mɛhwlɛ́ngántɔ́ ɖaxó ɖokpó, bɔ é ná hwlɛ́n yě. 21 Jexóva ná ɖe éɖée xlɛ́ Ejípunu lɛ́, bɔ Ejípunu lɛ́ ná tuun Jexóva ɖo azǎn énɛ́ gbe, yě ná sá vɔ̌, bo ná nǔ, yě ná dó akpá nú Jexóva bo ná ɖe. 22 Jexóva ná xo Ejípu, é ná xo è, bo ná gbɔ azɔn n’i; yě ná lɛ́ kɔ wá Jexóva gɔ́n bɔ é ná se vosisa yětɔn bo gbɔ azɔn nú yě.
23 Ðo azǎn énɛ́ gbe ɔ, ali ɖaxó ɖokpó ná gosín Ejípu yi Asilíi. Énɛ́ gúdo ɔ, Asilíi ná wá Ejípu, bɔ Ejípu ná yi Asilíi, lobɔ Ejípu ná sɛn Mawu ɖó kpɔ́ xá Asilíi. 24 Ðo azǎn énɛ́ gbe ɔ, Izlayɛ́li ná nyí togun atɔngɔ́ ɔ, bo ná gɔ́ nú Ejípu kpó Asilíi kpó lobo ná nyí nyɔ̌ná ɖé ɖo ayǐkúngban ɔ tɛ́ntin, 25 ɖó Jexóva ahwankpá lɛ́ tɔn ná kɔn nyɔ̌ná dó jǐ tɔn, bo ná ɖɔ: “Nǔ nyɔ́ nú togun ce Ejípu, alɔ ce núwiwa Asilíi kpó gǔ ce Izlayɛ́li kpó.”