Dzé ya tilen na a duben ai asu dzé é ne nfi

1. Dzé ya lere na ayegele asu nduen a ne nfi abui?

BI NE mintak éyòng bia yen a ne abui bot ba duben! Bekristen ya mintet mimbu osu be nga woren fe akia mintak té éyòng abui bot be nga duben amos Pentékosté ya mbu 33. Amos té, apostel Pierre a nga timi ai zen ya ékat mam asu dzé é ne nfi na bot be duben (Mimbòen 2:​38, 40, 41) Amvus ya été apostel Paul “a nga lere na “ayegele asu nduen” a ne ayegele da ya “minyegelen mi osu mi bebege Yésus”. (Héb. 6:​1, 2) Nduen o ne hm dzom dzia ya Kristen ése a yeane dzeng na a tuene wog. Asu dzé?

2. Asu dzé bia yeane dzeng na bi tuene wog é mam Bibel a yegele me bebege nduen?

² Nge mot a yi na a long é nda é seki dzam ku abog nkulu a vung, a yeane dzò tuene yem a si. Dzam deda fe, nge mot a yi na a bi mbunen o ne ngul, a yeane dzeng na a tuene yem dzé nduen wa tilen ai asu dzé o ne nfi. Ayègè di, bia zu yalen é minsili milè mi: Dzé nduen wa tilen? Akia afé nduen wa yeane bòben? Ai asu dzé bia duben a dzoé Ésia, Mòn ai mfufub nsisim?

DZÉ NDUEN WA TILEN

3. Nduen wa lere dzé?

³ Dzé wò lere é bot bevòk éyòng wò duben? Wò lere na wò yebe é mam mese o nga yègè a Bibel me bebege Yéhova ai Yésus Kristu. Na o maneya singi minsem mié ai na o tséndéya énying dzoé asu yi na o bò Yéhova ésié. Wò yebe na Yésus a ne Nkoré waan, ai na wò veeben nguma abe Yéhova asu yi na wò bò nyè ésié.

4. Dzé ya tilen na a du mot a mendim étéré? (Bebege fe évegele.)

⁴ Éyòng wò duben, ba du nyòl dzoé ése a mendim étéré be bare wò kuli a mendim,a é ne ve ane o he wu éyòng té o nga bare womo. (Bebege fe Kolosi 2:12.) Nduen o ne ndem yi na o bòya abui mintsénden énying dzoé. Akia afé nduen wa bòben? Éyòng ba du wò a mendim wò lere na o he telé énying o he nying osusua. Éyòng wò kui a mendim, wò tari mkpamen énying, nala té a tilen na wò wulu a meméendé me Yéhova, mmò ma yi dang bò nfi asu doé.

5. Asu dzé bi ne dzam veg ésié bia bò asu yi na bi komezen asu nduen ai ésié Noa a nga bò asu yi na a long arka? (1 Pétrus 3:​18-21)

⁵ Lang’a 1 Pétrus 3:​18-21. O ne dzam veg mintsénden mise wò bò asu yi na wò duben ai ésié Noa a nga bò asu na a long arka. Nge o ndem tari na wò yègè Bibel, o ne dzam tsog na mbòen té o ne ayié. Ye é ne fò nfi na o ve mengul meté mese? Owé. Yéhova nyémen nnye a nga kat Noa akia a yeane long arka, ndò Noa a nga tong betebega beté. Bi fe, ane Noa, nge bia tong memvéndé me Yéhova, a yi bi vòli na bi bò é mam mese ma sili asu yi na bi duben.—Yén. 6:22.

6. Dzé Pierre a nga yi na a dzo éyòng a nga til na nduen wa “koré mina”?

⁶ Apostel Pierre a nga til éfus 21 na nduen wò “koré mina”. Nala a tilen ki na nduen étam wa koré bia ngeki na wa vaa bia minsem. Meki me Yésus étam mmò me ne ngul ya vaa minsem. (1 Yoh. 1:7) Ve éyòng bia duben bia bò nyien Yéhova, bia dzaa fe nyè na a ve bia “mfuben feg nnem”. Yéhova ane mintak ya dzu minsem miaan ai zen ya ntang. Dzom té bia dzo va na, nduen wò “koré wò”.

AKIA AFÉ NDUEN WA YEANE BÒBEN

7. Nduen wò loren ya?

⁷ Bibel a lere na asu yi na bi duben ba yeane du nyòl dzaan ése a mendim étéré, veda a kare ki bia é ban mam mefe ma yeane bòben éyòng mot a duben. Ve dzam da, Bibel a lere bia é mam ma sili éyòng mot a duben. Mvulna é ne na, Bibel a lere é ba ba duben akia ya ba yeane bòt, a vòli fe é ba ba bebe na be yem é mam be ne dzam bò. (1 Kòr. 14:40; 1 Tim. 2:9) É melu maan ma, bemvendé mbò ba du, ve bia, bia lugu ki bò asu ésié té. (1 Kòr. 1:​14, 15) Abim bot ba tòbò éyòng ba du mot a seki nfi tò nde be ne abui ngeki abòt.—Mimbòen 8:36.

8. Minsili mibè mifé ba kare sili é ba ba yi na ba duben, asu dzé? (Mimbòen 2:​38-42) (Bebege fe évegele.)

⁸ Bibel a lere na “ai anyu ndò bia mem asu akoré daan” nala té a tilen na bia mem mbunen waan a yob été, a zang bot. (Rom. 10:​9, 10.) A ne fò mbeng ya bò nala amu é ne nfi abui asu akoré daan! Dzom té ndzò ba kare sili é bot ba ke duben minsili mibè. É hi osu, “Ye o maneya singi minsem mié, o ve wòmen nguma abe Yéhova, o yebe fe na Yésus nnye a ne é zen Yéhova a belen ai dzò na a nyii bot?” Nsili té wò lere é mam mot a bòya osusua yi na a ke duben. Pierre a nga dzo dzam deda amos Pentékosté éyòng a nga kat bot na be singi minsem miaba, nde be zu ke duben. É hi bèè, “Ye wò tuene wog na nduen woé wa lere bot bese a ngeng na o ntòya Mboala Yéhova ya a ke lat ai Ékoen dzié?” Nsili té wò lere ntsigen é mot a yi duben a nòng. A ve ngaaga yi na a yi tong betebega ya Ékoen Yéhova ya ve, na a sié fe Yéhova fufulu ai bekristen bevòk. Dzam deda fe ane é ba ya abog Pentékosté be nga bò amvus nduen waba. (Lang’a Mimbòen 2:​38-42.) É ba bese ba yalen na ‘owé’ a minsili mité mibè ai nnem waba ose mbò ba yeane ai nduen.

9. Dzé mot ose a yeane bò mbol yi na a bi mvam Zamba?

⁹ Dzam bò na o nga ndziki bò nsem o ne ngul osusua yi na wò yègè Bibel ngeki na bebondé boé be nga nèè wò be toa Beboala be Yéhova, be nga vòli fe wò na o yem Yéhova. Ye wò fe wò yang’en na o mem minsem mié o lum miè mvus, o duben fe mbol yi na o bi é mvam ya sò abe Zamba ngaa? Owé. Afiang’en bò é vom bia sò, bia yeane yem na bi nga biali a nsem été, ngò o nga kèène bia ai Yéhova. (Sal. 51:5) A ne été na, éyòng bia yègè na bia yem Yéhova, bia tòb na bia telé nyien woé osu a dzam ase. Éyòng bi bòya nala, bi nga singi abé ase bi nga bò osusua yi na bia yem nyè, bi nga ve mengul na bi bò é mam ma fû Tara waan ya yob nnem. Abog té hm, bi ne dzam ke duben.—Mimbòen 3:19.

10. Dzé wò yeane bò nge o nga dubeneya a nyebe mfe?

¹⁰ Nge o nga be o dubeneya a nyebe mfe, wò yeane bare duben asu yi na o bò Mboala Yéhova. Asu dzé? Amu o nga be o beki tuene wog é bebebela bese be tii ai Yéhova Zamba ban Yésus. Mfaa mbòk, yeme na seki amu yi na o nga tuene wog é ban mam bese be tii ai nyien Zamba ngò o nga ve wòmen nguma abe nyè ai zen ya ngogelen. Éyòng apostel Paul a nga toben ai é bot be nga be be dubeneya a tisòn Éfési, mbol be nga be tegè tuene yem ayegele Kristu, a nga bò é dzam ase é mbe siligi asu yi na be bare duben.b(Mimbòen 19:​1-5) Dzam deda fe, é melu maan ma, Yéhova a yebe nduen mot nge mot té a he nòng abog ya tuene yem nyien woé.

“A DZOÉ ÉSIA, MÒN AI MFUFUB NSISIM”

11. Dzé ya tilen na a duben “a dzoé Ésia, Mòn ai mfufub nsisim”? (Matéus 28:​18-20)

¹¹ Yésus a nga béndé na mimkpamen beyègè mia yeane duben “a dzoé Ésia, Mòn ai mfufub nsisim.” (Lang’a Matéus 28:​18-20.) Dzé a nga be yi na a dzo? A Bibel, ébug ba belen ai dzò asu “dzoé” ya lere biyòng bizing akia mot a ne, nge mbe mot ngeki mbembe mot. É ne fe lere asu ésié mot a bò ngeki nkong woé. Asu té éyòng bia bò dzom “a dzoé” mot zing ngeki dzom zing, bia lere na bia yebe nkong o tii ai dzoé té. (Bebege fe Matéus 10:41) Dzam deda fe éyòng bia duben a dzoé Ésia ai Mòn, bia lere na bia yebe na ba lot bia ai na be bele ngul ya kat bia é mam bia yeane bò. Éyòng bia duben a dzoé mfufub nsisim, nala té a tilen na, bia yi tong é melebega Yéhova a yi bi ve ai zen ya mfufub nsisim woé.

12. Dzé ya tilen na a duben a dzoé Ésia? (Akuli Mam 4:11) (Bebege fe bivegele.)

¹² A dzoé Ésia. Bia yebe na a ne Ésia waan ya yob ai na nnye a nga ve bia énying. A ne Zamba ngul mese nnye fe a nga tié dzom ése. (Lang’a Akuli Mam 4:11.) Bia yebe na nnye étam étam a wog mengogelen ai bia belen ai dzoé dié éyòng bia kogelen, éyòng fe bia bò ésié ékat foé. (Sal. 65:2) Veda, dzam afe a ne a bia yeane yem. Abog Pentékosté, é bot be nga vogolo Pierre be nga be be yeme Yéhova, veda be nga be yeane yebe na Yéhova a ve bia énying ai zen ya abe Mòn woé Yésus Kristu.—Rom. 5:8.

13. Dzé ya tilen na a duben a dzoé Mòn? (Bebege fe évegele.)

¹³ A dzoé Mòn. Bia yebe na Yésus a ne mbang Mòn Yéhova. Yésus a ne “zen,” nnye étam a ne bi dzam vòli na bi bi mbembe élat ai Yéhova. (Yoh. 14:6) Yésus a ne fe nkoré waan amu a nga wu asu daan na bi bi énying kòm. Nyemen té wò tindi bia na bi tong mvulna Yésus énying dzaan ése, seki ve éyòng bia duben. (1 Yoh. 2:6) Asu té bia bò ésié ékat foé ai évak ése, akia nyémen a nga bò tegè suu mò a si. (Lukas 4:43) Bi ne a ngomezen na bia yi toben ai mindzug mbol bia tong Yésus, bi bò fe Yéhova ésié a susuo été. (2 Tim. 3:12) Bia ve Yésus olugu amu nnye a ne nlo ékoen bekristen, asu té ndò bia bò é bot a nga telé bia osu na be tòng’lò bia mewog.—Éf. 4:​8, 11, 12; 5:23.

14. (a) Dzé ya tilen na a duben a dzoé mfufub nsisim? (Bebege fe évegele.) (b) Minwòan mia nòng minduen mifé fe? (Bebege nkaala “É minduen mife bekristen be ne minwòan mia nòng.”)

¹⁴ A dzoé mfufub nsisim. Bia lere na bia duben a dzoé mfufub nsisim éyòng bia yebe é bebela a tii ai wa. Mfufub nsisim o ne é ngul Yéhova a belen ai dzò, o seki nguma mot. Bia yem na Yéhova a nga belen ai mfufub nsisim woé asu yi na a vòli bekuli medzo na be yem dzé ba yeane til a Bibel, asu té nde bia lang Bibel mban bi tong’o fe é meyegele bia kòb été. (2 Pét. 1:​20, 21) Bia ve mengul na bi saala nsem, amu Yéhova a ne bia dzam vaa mfufub nsisim woé ngeki a vaa wò ékoen bekristen.—Éf. 4:30.

15. Mengul mefé wò yeane ve asu yi na o ke duben?

¹⁵ Nge o dubeneya, nòng’o abog ya kare fas asu dzé nduen wa dang nfi abui,c kele fe osu a baala ntsigen o nga nòng na wò ve wòmen nguma abe Yéhova, o bò fe nyè ésié. Nge o ngene tegè duben, dzé o ne dzam bò? Ye dzom zing é ngene é ndegele wò ngaa? Ayègè a tsaa la yi bi timi akia ya bi ne dzam ve mengul na bi duben.