Afai Isitreke Mfịna

Ata ediwak owo mfịn ẹkere ke ndisịn ntịme ke ini mfịna odude edinam mfịna oro etre. Edi utọ ekikere oro idụke-dụk ye se Jesus Christ ekesikpepde onyụn̄ anamde. Se ndusụk n̄kpọ emi enye eketịn̄de onyụn̄ anamde mi.

Se Jesus eketịn̄de

Ke ọwọrọ etop Ukwọrọ-Ikọ esie oro ke Obot, Jesus ama ekpep ke iyatesịt, afai, ye ntịme isinamke mfịna etre. Se uwụtn̄kpọ ifan̄ mi.

• “Kpukpru n̄kpọ eke mbufo ẹyomde mme owo ẹnam ye mbufo, ana mbufo n̄ko ẹnam kpasụk ntre ye mmọ.” (Matthew 7:12; Luke 6:31) Se Jesus eketịn̄de emi owụt ke ana isinam n̄kpọ ye mbon en̄wen nte ikpamade mmọ ẹnam ye nnyịn. Sia mîdụhe owo emi akpamade ẹnam n̄kpọ afai afai ye enye, ọkpọfọn isinam n̄kpọ ukpono ukpono ye kpukpru owo isinyụn̄ ifọn ido ye mmọ ekpdedi mmọ ẹnam se nnyịn mîmaha.

• “Owo ekededi ama eyịbi fi mfụk nnasia, wọn̄ọde mfụk eken n̄ko nọ enye.” (Matthew 5:38, 39; Luke 6:29) Ikọ Jesus emi ikọwọrọke yak iyak mme owo ẹnam n̄kpọ ye nnyịn nte mmọ ẹmade-ma. Utu ke oro, enye ekekpep ke ifọnke isisio usiene, sia etie nte mme ada iso ido ukpono ẹkesikpep mme owo ndisio usiene. Enye ekekpep mme mbet esie ke ifọnke mmọ ẹsisio usiene, edi yak mmọ ẹsinam n̄kpọ ifụre ifụre ke ini ẹnamde se iyatde mmọ.a

• “Ẹka iso ẹma mme asua mbufo.” (Matthew 5:43, 44; Luke 6:27) Jesus ọkọdọhọ isifọn ido ye mbon oro ẹsuade nnyịn m̀mê ẹdiọkde uwem ye nnyịn. Ikọ esie iwọrọke ke ana ida ye mmọ ke se mmọ ẹnamde oro mîfọnke.b Edi, nnyịn ndisifọn ido ye mbon oro ẹsuade nnyịn ekeme ndinam esịt afiak osụhọde mmọ onyụn̄ ekeme ndinam mmọ ẹtiene ẹfọn ido ye nnyịn.

Se Jesus akanamde ye se enye edinamde

Jesus ekekpep ke afai isitreke mfịna, ndien enye ama onyụn̄ ananam se enye ekekpepde oro. Ke okoneyo usen emi ẹkemụmde Jesus, mbet esie kiet ama an̄wana man n̄kpọ idinam enye, edi Jesus ama ọdọhọ ete: “Sịn akan̄kan̄ fo ke itie esie, koro kpukpru owo eke ẹmende akan̄kan̄ ẹdikpa ke akan̄kan̄.” (Matthew 26:52) Jesus ama owụt ke imama mme asua imọ, ke ndifen nnọ mbon oro ẹkediọkde uwem ye enye, enye ama onyụn̄ ọbọn̄ akam ọnọ mmọ!​—Luke 23:33, 34; 1 Peter 2:23.

Bible ọn̄wọn̄ọ ke Jesus​—emi edide Obọn̄ Emem​—ọmọn̄ ananam afai etre. (Isaiah 9:6, 7) Edieke oyomde ndidiọn̄ọ nte ini iso emi editiede, kot ibuotikọ emi “Nte Ekọn̄ ye En̄wan Ẹdisan̄ade Itre.”