Ke Ẹn̄wana Ekọn̄ ke Middle East​—Nso ke Bible Etịn̄?

Ekọn̄ oro akade iso ke ufọt United States, Israel, ye Iran anam esịt etịmede mme owo ke ererimbot. Ndi ekọn̄ emi ọyọsọn̄ ubọk tutu mme idụt en̄wen ẹtiene ẹsịn ubọk? Ndi enyene se ukara ẹkemede ndinam man ekọn̄ etre, emem onyụn̄ odu ke nsinsi?

Mbon oro ẹmehede ye mme prọfesi Bible ẹkeme ndikere m̀mê ekọn̄ oro akade iso ke Middle East akam edi ntọn̄ọ ekọn̄ Armageddon oro ẹtịn̄de ẹban̄a ke n̄wed Ediyarade.

Nso ke Bible etịn̄?

Ndi ukara ẹkeme nditre ekọn̄ oro akade iso ke Middle East?

Bible ọdọhọ ete: “Mbufo ẹkûbuọt idem ye mbọn̄, ẹkûnyụn̄ ẹbuọt ye eyen owo, emi edinyan̄a mîdụhe enye ke ubọk.”​—Psalm 146:3.

Nnyịn idiọn̄ọke m̀mê ukara ẹyekeme nditre ekọn̄ oro akade iso ke Middle East ẹnyụn̄ ẹnam emem odu. Edi, Bible anam idiọn̄ọ ke idụhe andikara ndomokiet, ukara owo m̀mê mme owo emi ẹkemede nditre ekọn̄ nnyụn̄ nnam emem odu ke nsinsi. Abasi kpọt ekeme ndinam “ekọn̄ etre tutu esịm utịt isọn̄.”​—Psalm 46:9.

• Edieke oyomde ndidiọn̄ọ n̄kpọ en̄wen mban̄a se inemede emi, mbọk kot Enyọn̄-Ukpeme emi ibuotikọ edide “Ekọn̄ Edisan̄a Didie Itre?”

Ndi Bible ama etetịn̄ aban̄a ekọn̄ oro ẹn̄wanade ke Middle East?

Bible ọdọhọ ete: “Mbufo ẹyekop ẹban̄a ekọn̄ ye mme etop ekọn̄. . . . Idụt ayadaha an̄wana ye idụt, obio ubọn̄ kiet oyonyụn̄ adaha an̄wana ye obio ubọn̄ en̄wen.”​—Matthew 24:6, 7.

Ekọn̄ emi ẹn̄wanade ke Middle East esịne ke otu n̄kpọ emi ẹwụtde ke idu ke “akpatre ini editịm n̄kpọ emi” m̀mê ke “mme akpatre usen.” (Matthew 24:3; 2 Timothy 3:1) Mme ekọn̄ oro ẹkade iso mfịn ẹwụt ke Abasi ọyọsọp anam n̄kpọ man ekọn̄ ye mme n̄kpọ eken oro anamde mme owo ẹbọ ufen ẹtre.

• Edieke oyomde ndidiọn̄ọ n̄kpọ en̄wen mban̄a se inemede emi, mbọk kot ibuotikọ emi “Nso Idi Idiọn̄ọ ‘Mme Akpatre Usen,’ M̀mê ‘Utịt Ini’?”

Ndi Armageddon editọn̄ọ ke Middle East?

Bible ọdọhọ ete: “Ẹtan̄ mmọ ẹbon ọtọkiet ke ebiet emi ẹkotde ke usem Hebrew, ete, Har–​Magedon.”​—Ediyarade 16:16.

Ekọn̄ Armageddon idịghe ekọn̄ emi ukara ẹdin̄wanade ye idemmọ, emi editọn̄ọde ke Middle East. Enye edi ekọn̄ emi ukara ofụri ererimbot ẹdin̄wanade ye Abasi.

• Edieke oyomde ndidiọn̄ọ n̄kpọ en̄wen mban̄a se inemede emi, mbọk kot ibuotikọ emi “Nso Idi Ekọn̄ Armageddon?”

Nso idin̄wam nnyịn ke ini mme n̄kpọ oro ẹtibede ẹnamde esịt etịmede nnyịn?

Bible ọdọhọ ete: “Ẹkûtịmede esịt ke baba n̄kpọ kiet, edi ke kpukpru n̄kpọ ẹda akam ye n̄kpeubọk ọkọrọ ye ekọm ẹben̄e Abasi se mbufo ẹyomde.”​—Philippi 4:6.

Jehovaha Abasi ọdọhọ ibọn̄ akam inọ imọ. Sia Abasi ekerede aban̄a nnyịn, enye oyokop akam nnyịn̄ onyụn̄ an̄wam nnyịn iyọ editịmede esịt. (1 Peter 5:7) Usụn̄ kiet oro enye anamde emi edi ndinam nnyịn idiọn̄ọ se inamde ekọn̄ aka iso odu, se enye anamde man ekọn̄ etre, ye se enye edinamde man mfịna nnyịn ye ubiak nnyịn ẹtre.​—Ediyarade 21:3, 4.

• Edieke oyomde ndidiọn̄ọ n̄kpọ en̄wen oro Abasi anamde an̄wam nnyịn, mbọk kot ibuotikọ emi “Ndi Bible Ekeme Ndidọn̄ Mi Esịt?”