Emem Oyodu ke Ofụri Ererimbot

Kpụkpru owo ẹkpema ndidu ke ererimbot emi etiede emem emem. Ke ediwak tọsin isua idaha-emi, mme andikara ererimbot ẹsidomo nditre en̄wan nnyụn̄ nnam emem odu. Ndusụk ini, mmọ ẹsinam emem odu ke ekpri ini. Edi nte ini akade, en̄wan esifiak ọtọn̄ọ. Ndi eyenyene ini emi emem edidude ke ererimbot emi? Ih! Man ikụt nte emi edisan̄ade itịbe, yak ise se Jesus edinamde ye se enye ekekpepde.

Se Jesus edinamde

Bible anam idiọn̄ọ se Jesus edinamde ke mîbịghike man emem odu ke ofụri ererimbot.

• “Ẹyenyụn̄ ẹsio enye [Jesus] enyịn . . . Ọbọn̄ Emem. N̄kọri ke ubọn̄ ye emem idinyeneke utịt.” (Isaiah 9:6, 7) Nte Andikara Obio Ubọn̄ Abasi, Jesus ayanam emem odu ke ofụri ererimbot ke nsinsi.

• “Enye ayanyan̄a ubuene emi esemede oyom un̄wam . . . ye owo ekededi emi mînyeneke andin̄wam.” (Psalm 72:12-14) Jesus ayada odudu oro ẹnọde enye anam unenikpe odu, anam ekọn̄, afai, ye ufen etre.

• “Idụt idimenke akan̄kan̄ itiene idụt, mmọ idinyụn̄ ikpepke aba ekọn̄.” (Isaiah 2:4) Ini ukara Jesus edisịmde isọn̄ emi, kpukpru owo ẹyekpep ndidu ke emem utu ke ndikpep ekọn̄.

Edieke oyomde ndidiọn̄ọ nte Jesus edisan̄ade inam emem odu ke ofụri ererimbot ye ufọn oro afo edidiade, se ekpri vidio emi Nso Idi Obio Ubọn̄ Abasi?

Se Jesus ekekpepde

Se Jesus ekekpepde ke an̄wam ediwak miliọn owo ẹdu ke emem idem idaha-emi. Ke ọwọrọ-etop Ukwọrọ-Ikọ esie oro ke Obot, Jesus ama ekpep mme item Bible emi ekemede ndinam idu ke emem ye mme owo kpukpru usen. Se ndusụk se enye ekekpepde mi.

• “Mme anam emem ẹkop inemesịt.” (Matthew 5:9) Jesus ikekpepke mbet esie nditre nditọhọ ye owo kpọt, edi enye ama onyụn̄ ekpep mmọ ndisinam emem.

• “Kebem iso nam emem ye eyenete fo, ndien ekem, ke ama akafiak edi, wa enọ fo.” (Matthew 5:23, 24) Jesus ama ọdọhọ mbon oro enye ọkọkwọrọde ikọ ọnọ ete ẹsisọsọp ẹnam emem ke ini mfịna odude. Enye ama ekpep mmọ ke ndisinam emem ye mme owo ayanam inen̄ede ikpere Abasi.

• “Ẹtre ndibiere ikpe nnọ owo mbak owo edibiere ikpe ọnọ mbufo.” (Matthew 7:1) Jesus ama ọdọhọ ikûsubiere ikpe unọ owo ibak ibak m̀mê ndidọhọ mme owo ẹnam n̄kpọ emi nnyịn ke idem nnyịn mîkpamaha ndinam, sia oro ekeme ndida mfịna ndi. Utu ke ndisikụt ndudue nnọ owo, Jesus ekekpep mbet esie ete “ẹsana owo ẹyak,” oro edi, ẹfen ẹnọ owo ke ini owo anamde ndudue.​—Luke 6:37.

Mme owo ke ofụri ererimbot ke ẹnam se Jesus ekekpepde emi. Idem ke mme itie emi afai ye ubahade okponde, mme owo ke ẹkpep ndinam emem itọhọke-tọhọ, ke ẹfen ẹnọ owo, ke ẹnyụn̄ ẹwụt ke imama mbon en̄wen idem ke ini ẹdiọkde uwem ye mmọ.

Edieke oyomde ndikụt nte se Jesus ekekpepde an̄wamde mme owo ẹdu ke emem, kot ibuotikọ emi “Nte Ekemede Ndinyene Emem Kpa ye Ekọn̄ ye En̄wan.”