Ndi Enyene Ini Emi N̄kpọ Edifọnde ye Kpukpru Owo Ukem Ukem?
Mme owo ke nsio nsio idụt ẹwọrọ ọkwọkudịm ẹsan̄a ke efak ẹsịn ntịme ke ntak emi mmọ ẹkerede ke n̄kpọ ọfọn ye ndusụk owo akan ndusụk. Udọn̄ọ COVID-19 ama anam nte n̄kpọ etiede ye mme owo etetịm ọdiọk enyịn onyụn̄ ayat mmọ esịt sia nte ẹkedọhọde mme owo ẹkûwọrọ an̄wa, udia ye mme n̄kpọ ntre mîkemke owo ubọk, ye nte mme owo mîkekemeke ndika ufọkibọk aba nte ẹkesikade, ama anam ẹnen̄ede ẹkụt ke mme ubuene idụkke-dụk ida ye mme imọ owo.
Ndi enyene ini emi idikụtde nte nsọn̄ọn̄kpọ ye mme n̄kpọ ntre emi ẹnamde ibọ nsat ufen ẹditrede? Ih. Bible etịn̄ nte Abasi edinamde mme mfịna emi idụkde inyịne mi ẹtre.
Mme mfịna emi Abasi edinamde ẹtre
Mfịna: Idụhe se mme owo ẹnamde yak n̄kpọ ọfọn ye kpukpru owo ukem ukem.
Se iditrede mfịna oro: Abasi oyosobo ukara owo efep, eke esie ikpọn̄ edidu. Ẹkot ukara Abasi oro Obio Ubọn̄ Abasi. Ukara Abasi edidu ke heaven ikara mme owo ke ofụri isọn̄ emi.—Daniel 2:44; Matthew 6:10.
Nte n̄kpọ editiede: Sia ukara Abasi edisịmde kpukpru itie ke isọn̄, n̄kpọ ọyọfọn ama. Mme owo idibueneke aba tutu amama, m̀mê ndikere m̀mê iyenyene se ididade idu uwem. (Psalm 9:7-9, 18) Utu ke oro, mmọ ẹyedia ufọn utom mmọ. Mmọ ye ubon mmọ idifiọn̄ọke-fiọn̄ọ ubọk iyom se ẹdade ubọk ẹka inua, uwem oyonyụn̄ enem mmọ. Se se Bible ọn̄wọn̄ọde mi: “Mmọ ẹyebọp ufọk ẹnyụn̄ ẹdụn̄ ke esịt; mmọ ẹyenyụn̄ ẹtọ in̄wan̄ vine ẹnyụn̄ ẹdia mbun̄wụm mmọ. Mmọ idibọpke ndien owo en̄wen odụn̄; mmọ iditọhọ ndien owo en̄wen adia.”—Isaiah 65:21, 22.
Mfịna: Kpa ye se ẹtịmede, mfịna osụk ananam mme owo ẹbọ ufen ẹkûnyụn̄ ẹnyene se ẹdade ẹdu uwem.
Se iditrede mfịna oro: Abasi ayada ukara esie etre n̄kpọ ekededi emi esinamde mme owo ndịk onyụn̄ anamde mmọ ẹkere m̀mê iyosụk ika iso inyene se ididade idu uwem.
Nte n̄kpọ editiede: Ini Abasi edikarade mme owo, se isinamde mme owo m̀mê ubon mmọ ẹkûnyene aba se ẹdade ẹdu uwem ididụhe aba. Utọ n̄kpọ nte ekọn̄, akan̄, ye ndiọi udọn̄ọ emi ẹsisịmde ofụri ererimbot ẹdidi n̄kpọ eset. (Psalm 46:9; 72:16; Isaiah 33:24) Abasi ọdọhọ ete: “Ikọt mi ẹyedụn̄ ke ebietidụn̄ emem ye ke ebiet ifụre ye ke ebiet nduọkodudu emi anade sụn̄.”—Isaiah 32:18.
Mfịna: Mbon idiọkitọn̄ ye mbon ibụk ẹsiwak ndiwo nnyụn̄ ntụk mme owo.
Se iditrede mfịna oro: Mbon emi ẹdidude ke Obio Ubọn̄ Abasi ẹyekpep ndima mme owo n̄kan nte ẹmade idemmọ.—Matthew 22:37-39.
Nte n̄kpọ editiede: Ini Obio Ubọn̄ Abasi edikarade, mme owo ẹyema mbon en̄wen nte Abasi amade. Utọ ima oro ‘isiyomke ufọn idemesie.’ (1 Corinth 13:4, 5) Se se Bible ọdọhọde mi: “Mmọ idinamke ibak, idinyụn̄ ibiatke n̄kpọ ke ofụri edisana obot mi koro ifiọk Jehovaha ọyọyọhọ isọn̄ kpa nte mmọn̄ ofụkde inyan̄.”—Isaiah 11:9.
Bible owụt ke idu uwem ke ekpri ini emi osụhọde ọnọ ererimbot emi ndikụre, ndien ibịghike, Abasi ayanam kpukpru se isinamde uwem ọsọn̄ ye mme owo ẹtre nte enye ọkọn̄wọn̄ọde.b (Psalm 12:5) Edi nte mme n̄kpọ oro mîtịbeke kan̄a, mme item Bible ẹkeme ndin̄wam fi ọyọ mme n̄kpọ emi ẹnamde uwem ọsọn̄ ye afo idahaemi. Ke uwụtn̄kpọ, se mme ibuotikọ emi “Se Akpanamde ke Ini Okụk Asatde Fi ke Ekpat” ye “Didie ke Ikpese Okụk?”
a Bible ọdọhọ ke Abasi ekere Jehovah.—Psalm 83:18.
b Okpoyom ndifiọk ntak emi ekpenịmde se Bible etịn̄de, se ibuotikọ emi “Bible Edi N̄wed Akpanikọ.”