Ndi Bible Ekeme Ndin̄wam Fi Ini Idiọk Oyobio, Ọkpọsọn̄ Edịm, M̀mê N̄kpọ Ntre Abiatde N̄kpọ?

Ọkpọsọn̄ edịm, idiọk oyobio, m̀mê n̄kpọ ntre esinam ediwak miliọn owo ẹbọ ufen. Ndi ufen oro etiene esịm fi? Awawak usụn̄ emi mme n̄kpọ ntre ẹnamde mme owo ẹbọ ufen. Idiọk oyobio, idio, ye mme n̄kpọ ntre ẹsiwak ndinam ọkpọsọn̄ ofụm abiat n̄kpọ, ẹnam akpa adaha, ẹnyụn̄ ẹnam mmọn̄ akpa oro ọtọ emen obio. Ọkpọsọn̄ edịm ekeme ndinam obot mîdịghe isọn̄ esịbe akabade ebeden̄, ndien oyobio ekeme ndinam emịnen̄mịnen̄ asiaha etieti. Emịnen̄mịnen̄ ama asiaha ntre, akwa ikan̄ ekeme ndibụbede nsak. Unana edịm, ọkpọsọn̄ ufiop, ye ọkpọsọn̄ ofụm ke ini snow ẹsinen̄ede ẹbiat n̄kpọ.

Ke ediwak itie ke ererimbot, idiọk oyobio, ọkpọsọn̄ edịm, m̀mê mme n̄kpọ ntre etịbe etieti idahaemi, ndien edi eyo esiere abiat n̄kpọ akan akpa. Itieutom emi ẹkotde International Federation of Red Cross and Red Crescent Societies ẹdọhọ ẹte: “Mme owo emi ẹbọde ufen idahaemi ke ntak emi mmọn̄ esitọde odụk obio, ọkpọsọn̄ oyobio, ye unana edịm ẹwak ẹkan akpa. Mme n̄kpọ emi ẹwot ediwak owo, uwem onyụn̄ ọsọn̄ ye mme owo. Ndien kpukpru isua, mme owo ke miliọn ke miliọn inyeneke ebietidụn̄ aba.”

Ke ini mme n̄kpọ ntem ẹtịbede, mme owo ẹsibọ ufen, esịt onyụn̄ etịmede mmọ sia ufọk ye inyene mmọ ẹtak mîdịghe owo mmọ akpa.

Ekpedi ọmọbọ ufen ke ntak idiọk oyobio, ọkpọsọn̄ edịm, m̀mê n̄kpọ ntre, Bible ekeme ndin̄wam fi. Bible ọyọdọn̄ fi esịt, an̄wam fi okụt ke n̄kpọ ọyọfọn ke ini iso, onyụn̄ an̄wam fi ọfiọk se akpanamde. Se Bible etịn̄de an̄wam ata ediwak owo emi mme n̄kpọ ntre ẹwọrọde. (Rome 15:4) Bible ọbọrọ mme akpan mbụme emi ẹfịnade ediwak owo, oro edi: Nso inam Abasi ayak utọ n̄kpọ emi etịbe? Ndi enye amia mi ufen?

Abasi idaha idiọk oyobio, ọkpọsọn̄ edịm, m̀mê n̄kpọ ntre imia owo ufen mfịn

Bible ekpep ke idịghe Abasi edi ntak emi mme owo ẹbọde ufen. Bible ọdọhọ ke “owo ikemeke ndida idiọkn̄kpọ ndomo Abasi, enye ke idemesie inyụn̄ idomoke owo ekededi.” (James 1:13) Emi ọwọrọ ke idịghe enye anam idiọk oyobio, ọkpọsọn̄ edịm, m̀mê n̄kpọ ntre anam mme owo ẹbọ ufen.

Bible etịn̄ ke enyene mme ini emi Abasi ekesidade mme n̄kpọ emi enye obotde ọnọ ndiọi owo ufen. Edi se Abasi ekesidade ọnọ ndiọi owo ufen itiehe nte se isụk itịn̄de emi, emi ekemede nditịbe ini owo mîdorike enyịn, abiat n̄kpọ etieti, onyụn̄ anam nti ye ndiọi owo ẹbọ ufen. Mme mbụk Bible ẹwụt ke Abasi ama esibem iso ọdọhọ ke mme n̄kpọ ntre ẹyetịbe, ndien ke ini ẹtịbede, enye ama esikpeme nti owo. N̄kpọ en̄wen edi ke Abasi ama esitịn̄ ntak emi imọ iyomde ndinam mme n̄kpọ ntre ẹtịbe. Ke uwụtn̄kpọ, Abasi ama etịn̄ ntak emi imọ iyomde ndida ukwọ nsobo ndiọi owo ke eyo Noah, etịn̄ anyan ini mbemiso ukwọ oro etịbede, inyụn̄ iyakke n̄kpọ anam Noah ye ubon esie.​—Genesis 6:13; 2 Peter 2:5.

Okpoyom ndidiọn̄ọ nte isan̄ade idiọn̄ọ ke Abasi idaha oto-obot afanikọn̄ emi etịbede mfịn imia owo ufen, se ibuotikọ emi “Nso ke Bible Etịn̄ Aban̄a Oto-obot Afanikọn̄?”

Abasi ekere aban̄a mbon emi ẹbọde ufen ke ntak idiọk oyobio, ọkpọsọn̄ edịm, m̀mê n̄kpọ ntre

Bible anam ikụt ke Jehovaha Abasi esikere aban̄a nnyịn, ke mbọm nnyịn esinyụn̄ anam enye. Se ndusụk ufan̄ikọ emi ẹkemede ndidọn̄ nnyịn esịt mi.

• Isaiah 63:9: “Ofụri ini emi mmọ ẹkedude ke nnanenyịn . . . ama abiak [Abasi].”

  Se ọwọrọde: Esinen̄ede abiak Jehovah enye ama okụt nte mme owo ẹbọde ufen.

• 1 Peter 5:7: ‘Enye ekere aban̄a mbufo.’

  Se ọwọrọde: Jehovah ekere aban̄a nte n̄kpọ etiede ye afo.

Jehovah esinam n̄kpọ man ufen nnyịn etre sia enye ekere aban̄a nnyịn, mbọm nnyịn esinyụn̄ anam enye. Jehovah ada item emi odude ke Bible ọdọn̄ nnyịn esịt, enye onyụn̄ ada Bible ọnọ nnyịn idotenyịn ke idiọk oyobio, ọkpọsọn̄ edịm, m̀mê n̄kpọ ntre idinamke ibọ ufen aba ke ini iso.​—2 Corinth 1:​3, 4.

Ini idiọk oyobio, ọkpọsọn̄ edịm, m̀mê n̄kpọ ntre mîdidụhe aba

Bible ọdọhọ ke Jehovah ọn̄wọn̄ọ ‘ndinọ fi ini iso ye idotenyịn.’ (Jeremiah 29:11) Jehovah oyom mme owo ẹkop inem uwem ke Paradise ke isọn̄ emi, iyomke mmọ ẹdu uwem ndịk ke idiọk oyobio, ọkpọsọn̄ edịm, m̀mê n̄kpọ ntre ayanam mmimọ ibọ ufen.​—Genesis 1:28; 2:15; Isaiah 32:18.

Jehovah edida Obio Ubọn̄ esie emi odude ke heaven, emi Jesus edide Edidem, anam emi etịbe. (Matthew 6:10) Jesus enyene odudu onyụn̄ ọfiọk se enye akpanamde man idiọk oyobio, ọkpọsọn̄ edịm, m̀mê n̄kpọ ntre idinam mme owo ẹbọ ufen aba. Ini enye okodude ke isọn̄, enye ama ada odudu esie anam oyobio etre. (Mark 4:​37-41) Jesus ayada ifiọk ye ọniọn̄ akara mme owo. Enye eyekpep mme owo nte ẹkpesede ẹban̄a isọn̄ emi man nnyịn iditịmede n̄kpọ-obot. (Isaiah 11:2) Ini Jesus edikarade, mme owo idibọhọ ufen aba ke ntak idiọk oyobio, ọkpọsọn̄ edịm, m̀mê n̄kpọ ntre.

Emekeme ndikere, ‘Ini ewe ke Jesus edida odudu esie ikan mme n̄kpọ emi ubọk?’ Okpoyom ndifiọk ibọrọ mbụme oro, kot ibuotikọ emi “Ini Ewe ke Obio Ubọn̄ Abasi Edikara Isọn̄ Emi?”

Se nnyịn ikpanamde idiọk oyobio, ọkpọsọn̄ edịm, m̀mê n̄kpọ ntre ama etịbe

Item Bible ekeme ndin̄wam fi mbemiso idiọk oyobio, ọkpọsọn̄ edịm, m̀mê n̄kpọ ntre abiatde n̄kpọ, ini osụk abiatde, ye ke ama akabiat ama.

• 

  Mbemiso etịbede: Ben̄e idem.

  Se Bible ọdọhọde: “Owo mbufiọk ada okụt afanikọn̄ ndien edịbe, edi ọkọi ebe aka ọkọbọ ufen.”​—Mme N̄ke 22:3.

  Se ọwọrọde: Yom usụn̄ diọn̄ọ utọ oto-obot afanikọn̄ emi ekemede nditịbe ke edem mbufo man ọsọsọp anam n̄kpọ onyụn̄ ekpeme ubon fo.

  Se iketịbede: “Usen emi ikefehede ibọhọ akwa ikan̄ emi okobụberede asak, ima ibeben̄e idem. Ima inyene ekpri ekpat emi ikemede ndimen mfehe n̄kpọ ekpetịbe. Ibọk ye ọfọn̄ nnyịn ẹkesịne ke ekpat oro. Idem ekenyeyek mme mbọhọidụn̄ nnyịn, mmọ ikonyụn̄ ifiọkke se ẹkpenamde. Edi nnyịn ikananake akpan n̄kpọ ndomokiet. Ama enem mi esịt tutu!”​—Tamara, California, U.S.A.

• 

  Ke ini osụk etịbede: Kere se idide akpan n̄kpọ ikan.

  Se Bible ọdọhọde: “Idem ke ini owo enyenede n̄kpọ barasuene, uwem esie itoho ke mme n̄kpọ emi enye enyenede.”​—Luke 12:15.

  Se ọwọrọde: Uwem edi akpan n̄kpọ akan inyene.

  Se iketịbede: “Ini idiọk oyobio emi ẹkotde Typhoon Lawinb akabiatde ufọk nnyịn, n̄kọfiọkke se n̄kpanamde. Edi mma mbọn̄ akam nnọ Jehovah Abasi. Mma ndikụt ke inyene nnyịn atak, idịghe uwem.”​—Leslie, Philippines.

• 

  Ama etịbe ama: Kûtịmede esịt uban̄a n̄kpọn̄.

  Se Bible ọdọhọde: “Ẹkûtịmede esịt ẹban̄a n̄kpọn̄, koro n̄kpọn̄ eyenyene editịmede esịt esie.”​—Matthew 6:34.

  Se ọwọrọde: Kûtịmede esịt ukaha uban̄a se iditịbede ke ini iso.

  Se iketịbede: “Ke ini oyobio emi ẹkotde Hurricane Irma akanamde mmọn̄ ọtọ odụk ufọk mi, mma nnyene ata ediwak n̄kpọ ndibiere ndien ama enen̄ede akak mi. Mma ndomo ndinam se Bible ọdọhọde, oro edi, n̄kûtịmede esịt mban̄a n̄kpọn̄. Mma n̄kụt ke Jehovah an̄wam mi nyọ se ikọwọrọde mi n̄kan nte n̄kekerede.”​—Sally, Florida, U.S.A.

Okpoyom ndikụt mme item efen, se ibuotikọ emi “Se Akpanamde ke Ini Afanikọn̄.”