Ndi Emeben̄e Idem Ọnọ Mme Mfịna Ama Ana Baptism Ama?

1-2. Nso ye nso ke ikeme ndinam man iben̄e idem inọ mme mfịna ke ima ikana baptism ima? Nọ uwụtn̄kpọ.

IMỌDIỌN̄Ọ ke iyenyene mfịna ke ererimbot Satan emi. Jesus ama ọdọhọ mme mbet esie ete ke se idude edi ke “mme n̄kpọ iduọ ẹnyene ndidi.” (Matt. 18:7) Ke ntak se Jesus eketịn̄de oro, oyom iben̄e idem inọ mme mfịna, mfịna emi itịn̄de mi esịne enye emi inyenede ye nditọ-ete nnyịn.

² Kop uwụtn̄kpọ emi ise. Ẹsidọhọ ikọt Jehovah ẹben̄e idem ẹnọ mme afanikọn̄ utọ nte mmọn̄, oyobio, ikan̄ m̀mê unyekisọn̄ ndibiat n̄kpọ mme owo. Isiben̄e idem didie? Akpa kan̄a, imesibem iso idiọn̄ọ utọ afanikọn̄ emi ekemede nditịbe ke edem nnyịn. Edieke ikade ikodụn̄ ke n̄kan̄ oro obufa, esinen̄ede ọfọn idiọn̄ọ utọ afanikọn̄ emi ekemede nditịbe do. Ke ima ikọdiọn̄ọ utọ afanikọn̄ emi ekemede nditịbe ke edem nnyịn, oyom iben̄e idem idiọn̄ọ se ikemede ndinam edieke enye etịbede. (N̄ke 21:5) Ukem ntre, imekeme ndiyom usụn̄ idiọn̄ọ mme mfịna emi ẹkemede nditịbe ke ima ikana baptism ima, inyụn̄ itịm idem man mmọ ẹma ẹsịm nnyịn. Ke ini inamde ntre, iyekeme ndisọn̄ọ nda nyọ mme afanikọn̄ oro inyụn̄ ika iso ikpere Jehovah. (Ps. 17:5) Ke ntak oro, ẹyak ineme mfịna ita emi ẹkemede nditịbe ke ima ikana baptism ima ye nte ikemede ndiben̄e idem nnọ mfịna oro kiet kiet.a

KE INI BRỌDA M̀MÊ SISTA EDUEDE FI

3. Ewe mfịna ke ikeme ndinyene ke ima ikana baptism ima?

³ Ndi emeti nte eketiede fi ke idem akpa ini emi okodụkde mbono esop onyụn̄ okụtde nte ikọt Jehovah ẹmade idemmọ? Ndi ama enen̄ede enịm ke omokụt akpanikọ? (John 13:35; Col. 3:12) Nte eketiede Blancab ke idem ekedi oro. Edi ke enye ama akana baptism ama, n̄kpọ ama etịbe emi enye mîkodorike enyịn. Enye ọdọhọ ete: “Sista kiet ama ọdiọk uwem ye ami. Mma n̄kụt n̄ko ke enye ama esitịn̄ ikọ abiat mbon en̄wen, n̄kekereke ke utọ n̄kpọ emi ekpetịbe. Ẹkekpep mi ke Mme Ntiense Jehovah ẹsisịn ofụri ukeme mmọ ẹdu ke emem ye mme owo ẹnyụn̄ ẹma mme owo.” Imọdiọn̄ọ ke nditọ-ete fo ẹsisịn idem ẹnam n̄kpọ man ẹtetịm ẹnyene mme edu emi Christian ekpenyenede, edi ikọt Jehovah ifọnke ima. (Eph. 4:23, 24; 1 John 1:8) Ntre, ekeme ndidi eyenyene ini emi owo kiet ke otu mmọ editịn̄de mîdịghe edinamde n̄kpọ emi edibiakde fi. (Jas. 3:8) Edi ọdiọk eti-eti nte utọ mfịna emi anamde ndusụk owo ẹtre ndinam n̄kpọ Jehovah.

4. Nso ikeme ndin̄wam nnyịn iben̄e idem inọ ini emi brọda m̀mê sista eduede nnyịn? (Ephesus 4:32)

⁴ Nso ke ekeme ndinam idaha-emi man eben̄e idem ọnọ ini emi eyenete fo anamde se ibiakde fi mîdịghe eduede fi? Nam yak edi ido fo ndinam item emi odude ke Ephesus 4:32. (Kot.) Edieke anamde ofụri se ekemede man aka iso ọfọn ido onyụn̄ okop mme owo mbọm, udûkunyeneke mfịna ye mbon en̄wen ke n̄kpọ emi mîkpedịghe se enyenede. Biere ndisifen mbon en̄wen ke ofụri esịt ke ini mmọ ẹduede fi. Nso ikeme ndin̄wam fi anam oro? Kere adan̄a ediwak ini emi esidọhọde Jehovah efen ọnọ fi ke mme ndudue fo ye nte enye esinamde oro ke ofụri esịt. (Matt. 6:12) Ama ekere adan̄a ediwak ini emi Jehovah esifende fi, eyenen̄ede emem fi utom ndifen mbon en̄wen ke ini mmọ ẹduede fi.

5. Ewe item Bible ikeme ndin̄wam nnyịn ke ini owo eduede nnyịn? (Mme N̄ke 19:11) (Se mme ndise n̄ko.)

⁵ Kot Mme N̄ke 19:11. Bible ọdọhọ ke ikikec ekeme ndinam ikûsọp uyat esịt ke ini ẹduede nnyịn. Item emi an̄wam Rima emi ama akana baptism ke isua ifan̄ idaha-emi. Sista oro ọdọhọ ete: “Ke ini n̄kụtde nte nditọ-ete ẹnamde n̄kpọ emi abiakde mi m̀mê afịnade mi, mmesibem iso nti Mme N̄ke 19:11. Mmesikere nte n̄kpọ etiede ye mmọ ye nte ẹkebọkde mmọ, mmesidomo ndikere n̄ko se ikpanamde mmọ ẹnam n̄kpọ ntre. Mmesidomo n̄ko ndisan̄a ye mmọ n̄kwọrọ ikọ. Kpukpru oro ẹn̄wam mi ntetịm ndiọn̄ọ mmọ.” Eti item edi oro. Emekeme ndinam n̄kpọ man ọdiọn̄ọ nditọ-ete fo idaha-emi. Nte enen̄erede ọdiọn̄ọ mmọ aka, ntre ke edinen̄ede imem fi utom ndifen nnọ mmọ edieke mmọ ẹdinamde se idibiakde fi.

6. Nso ikeme ndin̄wam nnyịn ika iso ikpere nditọ-ete ke esop?

⁶ Nso ke ekeme ndinam man aka iso ekpere nditọ-ete ke esop? Nte osụk odomode ndidiọn̄ọ nditọ-ete fo, kụt ete ke nti edu mmọ ke esinen̄ede ese. (Men Mme N̄ke 10:12 domo; Rome 12:10; Phil. 2:2, 3) Se nte se itịn̄de oro akan̄wamde Brọda Mark emi anade baptism obufa. Ini enye ọtọn̄ọde ndinen̄ede ndu ye nditọ-ete ke esop mmọ, enye ama edikụt mme n̄kpọ emi mmọ mînamke ọfọn. Nso ikan̄wam Mark okûkpọn̄ Jehovah onyụn̄ aka iso ekpere nditọ-ete esie? Enye ọdọhọ ete: “Mma ndikụt ke n̄kesịn ekikere ke n̄kpri n̄kpri ndudue oro nditọ-ete ẹnamde emi edide imenke-men udomo ye ikpọ idiọkn̄kpọ emi ọyọhọde-yọhọ ererimbot. Mma ndikụt ke idịghe se n̄kade iso nsịn ekikere ke mme ndudue nditọ-ete mi. Ntre n̄kedinen̄ede n̄kere mban̄a nti edu mmọ.” Edieke anamde ukem n̄kpọ oro, ayaka iso ekpere nditọ-ete ke esop.

KE INI MME N̄KPỌ EMI ỌKỌKPỌN̄DE KE EDEM ẸTỌN̄ỌDE NDIFIAK NDỌN̄ FI

7. Nso ikeme ndinam mme n̄kpọ emi ikọkpọn̄de ke edem ẹfiak ẹtọn̄ọ ndidọn̄ nnyịn?

⁷ Akpa ini emi ekekpepde akpanikọ, imenịm ke ama en̄wek ọduọk ke ọmọkpọn̄ ererimbot Satan. Ekeme ndidi emekere, ‘Nso ikpananam owo afiak ọnyọn̄ aka utọ itie oro?’ Edi ke ini mfịna emi ọsọn̄de owo ndiyọ esịmde fi, emekeme ndifiak nti ndusụk n̄kpọ emi ọkọkpọn̄de ini ọkọtọn̄ọde ndinam n̄kpọ Jehovah, mme n̄kpọ oro ẹkam ẹkeme ndifiak ndọn̄ fi itọn̄. (Men Numbers 11:4-6 domo.) Ke uwụtn̄kpọ, ekeme ndidi ndusụk nditọ-ete ẹma ẹbiere ndikpọn̄ ọwọrọ-etop utom emi akanamde mmọ ẹnyene okụk eti-eti edi akadiade mmọ ini akaha. Ke eke mbon en̄wen, ekeme ndidi mme ata ufan mmọ ẹma ẹkpọn̄ mmọ ini mmọ ẹketọn̄ọde ndikpep Bible. Edi ikụreke do. Eke ndusụk owo ekeme ndidi ke mmọ ẹma ẹkan ndiọi edinam emi ẹkedụkde mmọ iyịp kpa ye emi ekesinemde-nem mmọ edi Jehovah imaha. Ọkpọdiọk eti-eti edieke Christian akpayakde n̄kpọ ekededi emi enye ọkọkpọn̄de ke edem anam enye ọkpọn̄ Jehovah sụn̄sụn̄ sụn̄sụn̄! Enyene mme n̄kpọ emi ọkọkpọn̄de ke ini edem emi edide ama ọfọn nte akanamde ntre. Nso ke ekeme ndinam idaha-emi man n̄kpọ ekededi idinam fi afiak aka ebịne mme n̄kpọ oro?

8. Nso ke ikpep ito uwụtn̄kpọ Abraham ye Sarah?

⁸ Mbụk mbon emi ẹkesọn̄ọde ẹda ẹtuak ibuot ẹnọ Jehovah emi ẹkpekeyakde se mmọ ẹkeyakde atak afiak ọdọn̄ mmọ ẹdu ke Bible. Ke uwụtn̄kpọ, Abraham ye Sarah ẹma ẹkop uyo Jehovah ẹkpọn̄ obio Ur emi ikpọ ibibene ẹkedude ẹkpeme obio oro ẹkedụn̄ ke tent. (Heb. 11:8, 9) Imekere ke ekeme ndidi ke ini ke ini mmọ ẹma ẹsiti nte uwem ekenemde mmọ ke Ur. Edi “edieke ekpedide mmọ ẹma ẹka iso ẹti” mîdịghe ekpedi mmọ ẹma ẹka iso ẹkere nte ikpakade iso inyene mme n̄kpọ emi mmimọ ikayakde atak do, ekeme ndidi ọkpọkọdọn̄ mmọ ndifiak nnyọn̄ n̄ka Ur. Edi mmọ ikanamke ntre, mmọ ẹkekam ẹkere ẹban̄a nti n̄kpọ emi Jehovah ọkọn̄wọn̄ọde ndinam nnọ mmọ ke ini iso.​—Heb. 11:15, 16.

9. Apostle Paul akada didie mme n̄kpọ emi enye ọkọkpọn̄de ke edem? (Philippi 3:7, 8, 13)

⁹ Apostle Paul ama okpụhọde mme n̄kpọ mme n̄kpọ man anam n̄kpọ Jehovah. Mbemiso enye akakabarede edi Christian, Gamaliel emi ọkọdiọn̄ọde Ibet eti-eti ekesikpep enye n̄kpọ. (Utom 22:3) Ekpedi Paul ama akama ke ubọk oro, ekeme ndidi enye akpakakabade edi ata akamba owo ke ido ukpono mme Jew. (Gal. 1:13, 14) Edi ke ini enye ekenyịmede eti mbụk, enye ama asana kpukpru oro ayak. Ndi kpukpru ini ke n̄kpọ ekesimem ọnọ enye? Ihih-o! Ẹma ẹtịm enye, ẹkọbi enye, idem mbon edem esie ẹma ẹkam ẹsua enye. (2 Cor. 11:23-26) Edieke edide n̄kukụre se enye ekekerede ekedi mfịna emi ekesịmde enye, enye onyụn̄ emen nte n̄kpọ eketiede ye enye akpa akpa odomo ye nte n̄kpọ editiede ye enye idaha-emi, ekeme ndidi enye ekpekekere ke nte n̄kpọ eketiede ye imọ mbemiso imọ idide Christian ọfọn akan. Edi idịghe se Paul akanamde edi oro. Enye akakam esịn ekikere ke utọ ukpono emi enye enyenede ke ntak emi enye edide mbet Christ Jesus ye utịbe utịbe n̄kpọ emi Jehovah ọn̄wọn̄ọde ndinam nnọ enye ke ini iso. Paul ama enen̄ede enịm ke mme edidiọn̄ oro ẹma ẹkan n̄kpọ ekededi emi enye akayakde atak!​—Kot Philippi 3:7, 8, 13.

10. Nso ke ikpesiwak ndikere mban̄a? (Mark 10:29, 30) (Se mme ndise n̄ko.)

¹⁰ Nso ke ikpep? Edieke ọtọn̄ọde ndikere mban̄a mme n̄kpọ emi akayakde ẹtak man akabade edi Christian, kụt ete ke emeti n̄ko ntak emi akayakde mmọ ẹtak. (Eccl. 7:10) Men se akayakde atak domo ye mme edidiọn̄ emi enyenede ke ntak emi edidiọn̄ọde akpanikọ. Afo edi ufan ye Akakan Andikara ke enyọn̄ ye ke isọn̄. (N̄ke 3:32) Emenyene ediwak nditọ-ete ke esop mbufo ye ke ofụri ererimbot emi ẹmade fi. (Kot Mark 10:29, 30.) Jehovah onyụn̄ ọn̄wọn̄ọ ndinọ fi nti n̄kpọ ke ini iso! (Isa. 65:21-23) Edieke esiwakde ndikere mme edidiọn̄ emi afo esinyenede ke ntak emi anamde n̄kpọ Jehovah, ana-edi mme n̄kpọ emi akayakde ẹtak ke ini edem ididọn̄ke fi aba.

11. Nso ke ekpep oto mbụk Rosemary?

¹¹ Sista Rosemary akana baptism ke enye ama ekebe isua 50. Se se enye akanamde mi man mme n̄kpọ emi enye ọkọkpọn̄de ke edem idifiak idọn̄ enye. Enye ọdọhọ ete: “Ke nsonso oro, ama esidọn̄ mi itọn̄ ndifiak ndia Christmas, sia ini Christmas oro mma nsitie ye ubon mi n̄kop inem uwem. Ama esinem mi ndinọ mbon emi mmade mme enọ. Ama esinem mi nte nditọ nditọ mi ẹkande eto Christmas ẹkụk ye nte esịt enemde mmọ ini mmọ ẹtatde enọ emi nnọde mmọ.” Nso in̄wam Rosemary? Enye ọdọhọ ete: “Mmokụt n̄kpọ en̄wen emi nnamde yak ada itie Christmas. Kpukpru isua, ke usen en̄wen, mmesikot mbonubon mi mbok, nnọ mmọ mme enọ, nnyụn̄ ndọhọ mmọ ntak emi mmade mmọ.” Mfịna Rosemary ikokụreke do. Enye ọdọhọ ete: “Ini n̄kekpepde akpanikọ, n̄kani ufan mi ẹma ẹkpọn̄ mi. Ndusụk ini, itọn̄ mmọ esidọn̄ mi esinyụn̄ etie mi ikpọn̄ ikpọn̄ ke idem.”d Nso ikan̄wam enye? Enye ama ọtọn̄ọ ndidọhọ nsio nsio nditọ-ete iban ẹdisan̄a ye imọ ẹkwọrọ ikọ. Enye ọdọhọ ete: “Se nnamde oro an̄wam mi nnyene mbufa ufan emi mmade, emi mmennyụn̄ ndaha mbre mbre.” Nso ke ekeme ndikpep nto Rosemary? Idem ekpededi unyeneke aba ndusụk n̄kpọ emi ẹkesinamde esịt enem fi mbemiso afo edikponode Jehovah, ti ke emekeme ndinyene mme n̄kpọ en̄wen emi ẹtịmde ẹfọn ẹkan oro, emi ẹnyụn̄ ẹkemede ndinam esịt enen̄ede enem fi idaha-emi. (Phil. 4:8, 9) Ndien kûfre ke edieke enyenede Jehovah, ke enye ọyọnọ fi se iwakde ikan se afo akayakde atak.

KE INI MBON EN̄WEN ẸKPỌN̄DE JEHOVAH

12. Nso ikeme nditịbe ke esop emi ekemede ndinen̄ede nsọn̄ ndiyọ?

¹² Ini akakabarede edi Ntiense Jehovah, ama enen̄ede enem fi nte mûdịghe aba ubak idiọk ererimbot emi onyụn̄ esịnede idaha-emi ke n̄kukụre otu emi ẹkpepde akpanikọ ẹnyụn̄ ẹdomode ndinam se inende. (Isa. 65:14) Kpa ye oro, ndusụk ini emekeme ndikop nte ẹdọhọde ke owo anam idiọkn̄kpọ ke esop, ndien edieke owo oro mîkabakede esịt, ẹkeme ndisio enye mfep ke esop. (1 Cor. 5:13) Kop nte n̄kpọ oro eketiede Sista Samar mi ke idem. Enye ọdọhọ ete: “Ikebịghike ke mma n̄kana baptism, ebiowo ama anam akwa idiọkn̄kpọ ndien ẹma ẹsio enye efep ke esop. Ayak nsịn̄, n̄kpọ oro akpakanam n̄kpọn̄ esop sia n̄kenịmke ke ebiowo ekeme ndinam idiọkn̄kpọ ndue Jehovah ye nditọ-ete.” Edi akpana isinịm kpukpru ini ke nditọ-ete nnyịn ẹma Jehovah, ke mmọ inyụn̄ iyomke ndikpọn̄ enye. (1 Cor. 13:4, 7) Edi se idude edi, kpukpru isua, ẹsisio ndusụk owo ẹfep ke esop. Ndien ekeme ndinen̄ede nsọn̄ ye afo edieke edide ufan fo, owo ke ubon fo, mîdịghe owo emi afo enen̄erede okpono eti-eti emekde ndikpọn̄ Jehovah.

13. Nso ke ikeme ndinam idaha-emi man nnyịn idikpọn̄ Jehovah edieke owo idem nnyịn ọkpọn̄de enye?

¹³ Nso ke afo ekeme ndinam idaha-emi man afo udûkpọn̄ Jehovah edieke owo idemfo ọkpọn̄de enye? Ka iso nam se idinamde afo ye Jehovah ẹtetịm ẹdi ufan. (Jas. 4:8) Kûyak nte owo ọsọn̄ọde ada anam n̄kpọ Abasi edi n̄kukụre ntak emi anamde afo n̄ko anam n̄kpọ Abasi. Ke uwụtn̄kpọ, kpa ye edide imesidiana kiet ikpono Abasi nte ubon ye ke esop, ana nnyịn ke idem nnyịn isisio ini ibọn̄ akam inyụn̄ ikpep idem nnyịn Bible n̄ko.​—Ps. 1:2; 62:8.

14. Nso ke ikpep ito uwụtn̄kpọ apostle Peter? (John 6:66-68)

¹⁴ Imekeme ndikpep n̄kpọ n̄ko nto nte apostle Peter akanamde n̄kpọ ini ediwak mbet Jesus ẹketrede nditiene Jesus. Ekeme ndidi se Jesus eketịn̄de ikan̄wan̄ake Peter ke idemesie ini oro, edi enyene se Peter eketịn̄de ke John 6:66-68. (Kot.) Utu ke Peter ndikesịn ekikere ke se mbon en̄wen ẹkenamde, enye akakam esịn ekikere ke ikọ akpanikọ emi Jesus ekekpepde enye. Ke ntak oro, Peter ikọkpọn̄ke Jesus. Ukem ntre n̄ko mfịn, nte mbon en̄wen ẹnamde n̄kpọ inamke yak ọsọn̄urua akpanikọ emi esop Abasi ẹkpepde fi akabade edi nsu. Kûkpọn̄ akpanikọ oro! Samar emi ima iketetịn̄ iban̄a ọdọhọ ete: “Mmesiti idemmi kpukpru ini nte ke owo kiet ndinam idiọkn̄kpọ iwọrọke nte ke se kpukpru owo ke esop ẹsinamde edi oro, m̀mê ke se esop Abasi ẹsikpepde edi nsu. Inyụn̄ iwọrọke ke Jehovah onyụn̄ etie ntre.”

15. Nso ke ekpep oto uwụtn̄kpọ Emily?

¹⁵ Kop uwụtn̄kpọ Emily. Ke urua kiet kpọt ama ekebe tọn̄ọ Emily akana baptism, eka esie ama ọkpọn̄ ubon mmọ ndien ẹma ẹnyụn̄ ẹsio eka esie oro ẹfep ke esop. Emily ọdọhọ ete: “Akanam ndabake-daba ke utọ n̄kpọ emi eyetịbe. Se isọn̄de mi ikan ndiyọ edi emi, eka mi esinyụn̄ ọdọn̄ mi itọn̄ eti-eti.” Nso in̄wam Emily? Enye ọdọhọ ete: “Ndụhe ikpọn̄. Ete mi esin̄wam mi, mbon en̄wen ke esop ẹsinyụn̄ ẹn̄wam mi, mmọ ẹtie nte ubon mi. Idụhe owo ndomokiet emi mînyeneke mfịna. Ntak edi oro ọfọnde ndida kiet eken nte ufan nnyụn̄ nsọn̄ọ kiet eken idem.” (1 Pet. 5:9) Kûbet tutu mfịna edi mbemiso afo anamde se idinamde afo ye nditọ-ete fo ẹkpere. Ka iso nam se itịn̄de emi. Edieke anamde oro, inamke n̄kpọ m̀mê nso iditịbe inọ fi, ana-edi iditiehe fi nte ke unyeneke owo.

16. Nso ke nnyịn mîkpefreke? (Se ndise n̄ko.)

¹⁶ Kûfre n̄ko, ke Jehovah esitụnọ mbon emi enye amade. (Heb. 12:6) Enye oyom kpukpru mbon emi ẹsiode ẹfep ke esop ẹfiak ẹnyọn̄ ẹbịne imọ. (2 Pet. 3:9) Ntre, edieke edide ẹsio owo idemfo ẹfep ke esop, nịm ke mbiowo ẹyenam ofụri se mmọ ẹkemede man enye afiak ọnyọn̄ ebịne Jehovah.​—2 Tim. 2:24, 25.

17. Nso ke ikpenen̄ede inịm?

¹⁷ Imeneme mfịna ifan̄ kpọt emi ẹkemede ndisịm fi ke ama akana baptism ama. Ndusụk ẹkeme nditie nte ke ẹkpon ẹkan fi, enye oro edi akpanikọ, edi kûyak ndịk anam fi. Mme n̄kpọ awak emi ekemede ndinam mben̄e idem nnọ mfịna. Kûnyụn̄ ufre ke emenyene Jehovah Abasi emi edide akakan Owo emi edin̄wamde fi. Enye an̄wan̄wam fi, onyụn̄ oyom ndin̄wam fi ke nsinsi nsinsi! (1 Pet. 5:10) Enye iditreke ndinọ fi odudu akan mfịna ekededi emi esịmde fi onyụn̄ an̄wam fi aka iso ọyọ mme mfịna oro. Edieke akade iso ayak Jehovah an̄wam fi, afo ayaka iso ekpere enye inamke n̄kpọ m̀mê mfịna ewe ke enyene!​—Ps. 119:165; Rome 8:38, 39.