Nditọ Ẹdi “Udeme Emi Otode Jehovah”

KE INI ẹsikopde ikọ emi “udeme” m̀mê n̄kpọ-akpa, nso isidụk mbufo ekikere? Ekeme ndidi ẹmesikere ẹban̄a okụk, isọn̄ m̀mê ufọk, mîdịghe ọsọn̄urua n̄kpọ-uto ubon emi owo ubon mbufo ọkọkpọn̄de ọnọ mbufo. Inamke n̄kpọ m̀mê nso ke edi, udeme m̀mê n̄kpọ-akpa esidi ọsọn̄urua n̄kpọ, ndien mbufo ẹyom ndinam ofụri se ẹkemede man ẹse ẹban̄a enye.

Bible okot nditọ “udeme emi otode Jehovah.” (Ps. 127:3) Ete ye eka emi ẹdide mme Christian ẹsida nditọ mmọ nte ọsọn̄urua enọ emi Ete mmọ eke heaven ọnọde mmọ, ndien mmọ ẹyom ndinam ofụri se mmọ ẹkemede man ẹkpeme nditọ mmọ, ẹse ẹban̄a mmọ, ẹkụt ẹte ke mmọ ẹkop inemesịt, ẹnyụn̄ ẹn̄wam mmọ ẹkpere Jehovah.

Edi ọdiọk eti-eti nte ndusụk ete ye eka mîsidaha nditọ mmọ nte enọ emi Abasi ọnọde. (Isa. 49:15; 2 Tim. 3:1-3) Mbon eken ẹkeme ndinen̄ede nyom ndise mban̄a nditọ mmọ oro, edi ọsọn̄ mmọ ndinam ntre ke ntak nsio nsio mfịna. Nso idi ndusụk mfịna oro? Nso ke Jehovah oyom mme ete ye eka ẹnam? Ndien nso ikeme ndin̄wam mme ete ye eka emi ẹdide Christian ẹkụt ibuot ke ndibọk nditọ mmọ?

MME MFỊNA

• Mbonubon ye mme owo ke obio ẹkeme ndidọhọ ebe ye n̄wan ẹnyene ediwak nditọ. Ke ndusụk itie ke ererimbot, ẹsinen̄ede ẹkpono ebe ye n̄wan emi ẹnyenede ediwak nditọ ẹkan mbon emi mînyeneke ediwak nditọ. Ke ntak oro, mbonubon m̀mê mme mbọhọ-idụn̄ ẹkeme ndidọhọ ebe ye n̄wan yak mmọ ẹnyene ediwak nditọ, idem ekpededi mmọ idikemeke ndise mban̄a kpukpru nditọ oro.

• Mme ebe ye n̄wan ẹsifịna idem ẹban̄a ini iso. Ke mme idụt emi nseknditọ ẹsinen̄erede ẹkpan̄a ke ntak emi eti udia mîdụhe se mmọ ẹdia, ntak udọn̄ọ, ye ntak emi ufọkibọk mînen̄ekede idu, ndusụk ebe ye n̄wan ẹsinyene ediwak nditọ man ndusụk ẹsụk ẹdu ẹkponi owo. Mme ebe ye n̄wan eken ẹkeme ndibiere ndinyene ediwak nditọ man mmọ ẹkụt ẹte ke ẹyese ẹban̄a mmimọ ke ini mmimọ isọn̄de. N̄kpọ enye emi esinen̄ede etịbe ke mme idụt emi ukara mîsisehe iban̄a mbon emi ẹsọn̄de.

• Esisọn̄ ndinam n̄kpọ mbak n̄wan idisan̄a ye idịbi. Mme n̄kpọ emi ẹkemede ndinam yak n̄wan okûsan̄a ye idịbi ẹwak, edi ke ndusụk itie emi ebe ye n̄wan ẹdụn̄de, mme n̄kpọ oro iwakke. Ke ndusụk itie, mme n̄kpọ oro ẹsidu, edi isidịghe ata enye. Ntre, ndịk esinam ebe ye n̄wan ke mmimọ ikpedep mme n̄kpọ oro, ke ẹkeme ndinọ mmimọ mfịna edieke idade mmọ. Kpa ye oro, mbon en̄wen ikemeke ndidep mme n̄kpọ oro ke ntak emi mmọ ẹsọn̄de urua eti-eti.a

JEHOVAH OYOM ETE YE EKA ẸNAM NSO?

Ẹnọ nditọ mbufo se mmọ ẹyomde. Jehovah ọnọ ete ye eka utom ndinọ n̄kpri nditọ mmọ se mmọ ẹyomde. Jehovah oyom mme ete ye eka ẹnen̄ede ẹsịn idem ẹnam utom man ẹnọ nditọ mmọ kiet kiet se mmọ ẹdiade, ọfọn̄, ye ebiet emi mmọ ẹdụn̄de tutu nditọ oro ẹkponi. Jehovah onyụn̄ oyom ete ye eka ẹdọn̄ nditọ mmọ n̄wed. Mme ete ye eka emi ẹdide Christian isimenke nditọ mmọ ikọdọn̄ ke ufọkn̄wed emi nditọ mmọ ẹdidụn̄de-dụn̄ do. Utu ke oro, mmọ ẹsikụt ete ke nditọ mmimọ ẹdụn̄ ye mmimọ tutu mmọ ẹkponi man mmọ ẹkeme ndidọn̄ nditọ oro n̄wed, ẹsinyene ini ẹdu ye mmọ, ndien enye oro ayanam nditọ oro ẹkụt ke ẹkpeme mmimọ ẹnyụn̄ ẹma mmimọ. Kpa ye oro, Jehovah enyene eti ibuot; enye idọhọke ke ana ete ye eka ẹnyene enyọn̄ ye isọn̄. Se idude edi ke Jehovah ekemek mbon emi ẹkedide ubuene, edi ẹsịnde idem ẹnam utom yak ẹdi ete ye eka edima Eyen esie.​—Matt. 13:55, 56; Luke 2:24.

Item Bible: “Ke akpanikọ edieke owo ekededi mîtịmke n̄kpọ inọ ikọt esie, akpan akpan mbonufọk esie, enye akan̄ mbuọtidem onyụn̄ ọdiọk akan owo eke mînịmke ke akpanikọ.”​—1 Tim. 5:8.

Jehovah ọdiọn̄ọ ke ete ye eka ẹkeme ndiyom yak ẹse ẹban̄a mmọ nte mmọ ẹsụk ẹkponde owo. Se idude edi ke usụn̄ kiet emi nditọ ẹkemede ndikpono ete ye eka mmọ edi mmọ ndise mban̄a ete ye eka mmọ oro ke ini mmọ ẹsọn̄de. (Ex. 20:12; 1 Tim. 5:4) Edi esịt esinem Jehovah ke ini mme ete ye eka ẹnen̄erede ẹkere ẹban̄a nte mmọ ẹkpesede ẹban̄a nditọ mmọ utu ke nte nditọ mmọ ẹkemede ndise mban̄a mmimọ.​—2 Cor. 12:14.

Ẹn̄wam nditọ mbufo ẹma Jehovah. Utom en̄wen emi mme ete ye eka emi ẹdide Christian ẹnyenede edi ndikpep nditọ mmọ ẹma Jehovah ẹnyụn̄ ẹtuak ibuot ẹnọ enye. Jehovah ada mme ete ye eka ndin̄wam nditọ mmọ ẹma enye nte ata akpan n̄kpọ emi anade mmọ ẹnam nte mmọ ẹsụk ẹbọkde nditọ mmọ oro.​—Deut. 6:6, 7.

Item Bible: “Ẹka iso ẹkama [nditọ mbufo] ke ntụnọ ye ke item Jehovah.”​—Eph. 6:4.

JEHOVAH OYOM ẸKỤT IBUOT

Ẹkere m̀mê nditọ ifan̄ ke mbufo ẹdinyene. Edieke ẹkerede m̀mê akpana ẹnyene nditọ, ẹnen̄ede ẹkere kan̄a nte n̄kpọ etiede ye mbufo. Ke uwụtn̄kpọ, edieke ẹnyenede ediwak nditọ, ndi ẹyekeme ndinọ mmọ udia, ẹnọ mmọ ọfọn̄, ẹnyụn̄ ẹdọn̄ mmọ n̄wed? Edieke edide ke mbufo idikemeke, ẹneme ye n̄wan m̀mê ebe mbufo ẹban̄a nditọ ifan̄ emi ẹdinyenede man ẹkeme ndise mban̄a nditọ ifan̄ emi mbufo ẹbierede ndinyene nte Jehovah oyomde. Edi Jehovah ọdiọn̄ọ ke idịghe kpukpru ini ke n̄kpọ edisan̄a ke uwem emi nte mbufo ẹyomde. (Eccl. 9:11) Edi enye ọyọdiọn̄ kpukpru se mbufo ẹnamde man ẹkụt ibuot nte ẹsụk ẹbọkde nditọ mbufo.

Mme item Bible: “N̄kọkibuot owo nsịnifịk itreke ndinyene ufọn, edi kpukpru owo eke ẹnamde n̄kpọ ke ibụmede iditreke ndidu ke unana.”​—N̄ke 21:5.

“Anie ke otu mbufo emi oyomde ndibọp tọwa mîdibemke iso isụhọde itie ibat se iditakde, man okụt m̀mê enye enyene okụk emi ekemde ndida mbọp mma?”​—Luke 14:28.

Ẹyak Jehovah edi akpa ke ubon mbufo. Ẹkụt ẹte ke mbufo ndinam n̄kpọ Jehovah edi ata akpan n̄kpọ akan ke ubon mbufo. Ekpedi ẹmenyenyene nditọ, ẹbiere ẹte ke ẹyekpep nditọ mbufo kiet kiet ndima Jehovah. Ẹn̄wam mmọ yak edi mmọ ẹma ẹka mbono esop, mmọ ẹkpan̄ utọn̄ ẹkop se ẹtịn̄de, ẹnyụn̄ ẹkpekpep n̄kpọ ẹto se ẹkpepde do. Ẹkûtre ndinịm Utuakibuot Ubon kpukpru urua. Ẹkpep nditọ mbufo nte mmọ ẹkpekwọrọde ikọ. Ẹkûmen n̄kpọ emi mbufo ẹkpenamde nte ete ye eka ẹdori eyen mbufo emi ọsọn̄ọde kpukpru nditọ-eka esie ke idem m̀mê ndiyak nnọ iman mbufo ẹnam. Oyoyom mbufo ẹda ini ye odudu ẹbọk nditọ mbufo ndima Jehovah. Edi edieke mbufo ẹnamde ntre, ufọn emi mbufo ẹdidiade oyokpon.

Item Bible: “Nnyeneke ntak eke okponde akan emi ndiwụt esịtekọm, nte ndikop ke nditọ mi ke ẹsasan̄a ke akpanikọ.”​—3 John 4.b

Ẹbuọt idem ye Jehovah. Edieke edide ke ẹkere ndinyene nditọ mîdịghe edi ke ẹma ẹnyenyene, ẹnen̄ede ẹnịm ke nte Jehovah ọdọhọde mbufo ẹnam n̄kpọ edi akpan n̄kpọ akan se mbon edem mbufo ẹyomde ẹnam.

Edieke mbufo ẹbierede ke mbufo idinyeneke ediwak nditọ, ẹnịm ke Jehovah eyese aban̄a mbufo ke ini ẹsọn̄de. Inamke n̄kpọ m̀mê nso ke mbon en̄wen ẹkere, ẹkûkere ke ana ẹnyene nditọ n̄kukụre man nditọ oro ẹn̄wana okụk ẹda ẹse ẹban̄a mbufo ke ini emi ẹsọn̄de. Ẹkûyak ndịk anam mbufo ke idụhe owo emi edisede iban̄a mbufo. Jehovah ọn̄wọn̄ọ ke iyese iban̄a mbufo, ndien enye isitreke ndinam se enye ọn̄wọn̄ọde.​—Josh. 23:14.

Mme item Bible: “Buọt idem ye Jehovah ke ofụri esịt fo kûnyụn̄ uberi edem ke asian fo. Diọn̄ọ enye ke kpukpru usụn̄ fo, ndien enye eyenen̄ede usụn̄ fo enịm.”​—N̄ke 3:5, 6.

“N̄kedi eyenọwọn̄, mmonyụn̄ nsọn̄, edi akanam n̄kwe nte ẹkpọn̄de edinen owo ofụri ofụri, m̀mê nte nditọ esie ẹben̄ede udia.”​—Ps. 37:25.

“Ẹka iso, ndien, ndibem iso nyom obio ubọn̄ ye edinen ido esie, ndien ẹyedian kpukpru n̄kpọ emi ẹnọ mbufo.”​—Matt. 6:33.

Nditọ ẹdi ọsọn̄urua enọ emi Jehovah ọnọde mme ete ye eka. Ana-edi esịt esinem Jehovah eti-eti ke ini mme ebe ye n̄wan emi ẹdide Christian ẹsede ẹban̄a nditọ mmọ nte Jehovah oyomde! Mmọ ẹsise ẹban̄a nditọ mmọ, ẹkụt ẹte ke mmọ ẹkop inemesịt, ẹnyụn̄ ẹn̄wam mmọ ẹkpere Jehovah. Mmọ ẹsida ima ẹnam emi. Mmọ ẹsibiere m̀mê nditọ ifan̄ ke mmimọ idinyene, ẹnyụn̄ ẹnam se Abasi ọdọhọde mmọ ẹnam utu ke se mbon edem mmọ ẹyomde mmọ ẹnam. Edieke ebe ye n̄wan emi ẹdide Christian ẹnamde kpukpru emi, mmọ ẹwụt ke nditọ mmimọ ẹsọn̄ urua eti-eti, ke mmọ ẹdi “udeme emi otode Jehovah.”